Yãmb tõe n bãnga Wẽnnaam sõma bɩ?

F sã n paam n tõe n pʋʋs wall f gom ne nin-kãseng n pʋt a yʋ-peellã, yaa zu-zẽkre. Nebã nong n boonda nin-kãsemsã ne waoogr yʋya. Wala makre “Perzidã,” “Naab” bɩ “Patrõ.” Woto kɩtame tɩ nin-kãseng sã n yeel yãmb tɩ y tõe n boond-a-la ne a yʋ-peellã, yaa vẽeneg tɩ y na n tagsame t’a waoog-y lame.

WẼNNAAM yeta tõnd Biiblã sẽn yaa a Gomdã pʋgẽ wã woto: “Mam yaa a Zeova, yaa mam yʋʋr la woto.” (Ezai 42:8) * Baa ne a sẽn tar waoogr yʋy wʋsgã, wala makre “Naanda,” “Sẽn-tõeyã-fãa” la “Saasẽ pãng soabã,” a waoogda neb nins sẽn tũud-a wã, n sakdẽ tɩ b boond a yʋ-peellã.

Wala makre, daar a yembre, no-rɛɛs a Moiiz sẽn wa n na n gom ne Wẽnnaamã, a yeela woto: “Zeova, y kabre.” (Yikri 4:10) Wẽnnaam doogã sẽn da be Zerizalɛmmã pakr sasa, rĩm a Salomo sẽn wa n na n pʋʋs Wẽnnaamã, a sɩnga woto: “Zeova.” (1 Rĩm dãmba 8:22, 23) No-rɛɛs a Ezai me sẽn wa n na n pʋʋs Wẽnnaam Israɛll buudã fãa yĩngã, a yeela woto: “Zeova, yãmb yaa tõnd Ba.” (Ezai 63:16) Dẽnd yaa vẽeneg tɩ d saasẽ Ba wã ratame tɩ d pʋt a yʋ-peellã.

Yaa sɩd tɩ pʋt a Zeova yʋʋrã tara yõodo, la bãng a Zeova sõma wã pa f sẽn na n pʋt a yʋʋrã bal ye. A Zeova pʋlma ned ning fãa sẽn nong-a la a kɩs sɩd ne-a woto: “Mam na n zẽka yẽnda; tɩ bõe, yẽ mii mam yʋʋre.” (Yɩɩl Sõamyã 91:14) Yaa vẽeneg tɩ bãng Wẽnnaam yʋʋrã baoodame tɩ d bãng bũmb wʋsg me, sẽn yɩɩd fãa yaa rẽ n tõe n kɩt tɩ d paam a koglgo. La bõe la y segd n maan n tõog n bãng a Zeova sõma?

[Tẽngr note]