Zagsã rãmba, segl-y y mense

“Bɩ y segle, tɩ bõe, ninsaal Biigã wata wakat ning yãmb sẽn ka tẽeda.”—LUK 12:40.

1, 2. Bõe yĩng tɩ d segd n tũ a Zezi sagl ning sẽn yet tɩ d ‘segl d mensã’?

“NINSAAL BIIGÃ sã n wa ne a naamã” n na n welg ninsaalbã ne taaba, na n yɩɩ wãn ne yãmb la y zakã rãmba? (Mat. 25:31, 32) Woto sẽn na n zĩnd wakat d sẽn pa tẽedã yĩnga, tara yõod wʋsg tɩ d tũ a Zezi sagl ning sẽn yet tɩ d ‘segl d mensã.’—Luk 12:40.

² Sõsg ning sẽn loogã wilgame tɩ zakã ned kam fãa sã n maand bũmb ning Biiblã sẽn wilg t’a segd n maaname wã, sõngdame tɩ zakã nebã fãa ket n gũudẽ. La bũmb a taab me la d tõe n maan tɩ sõng zakã nebã fãa tɩ b ket n tũud Wẽnnaam. Bɩ d gom rẽ yelle.

Tall-y nif sẽn “yaa sõma”

3, 4. a) Zak rãmb segd n gũusa b mens ne bõe? b) Tall nif sẽn “yaa sõma” wã rat n yeelame tɩ bõe?

³ Zak rãmb sã n dat n segl b mens sõma n gũ Kiristã waoongã, b segd n gũusame n da wa bas bũmb baa a ye tɩ tiis-b tɩ b pa tʋm tũudum hakɩkã yĩng ye. B pʋd n segd  n zãaga b mens ne bũmb ning fãa sẽn tõe n tiis-bã. Sẽn mik tɩ zags wʋsg neb zoe n lʋɩɩ laogã nonglem sẽn yaa bẽdgã pʋgẽ wã yĩnga, segdame tɩ y ning a Zezi sagl ning sẽn yet tɩ d tall nif sẽn “yaa sõma” wã y yamẽ. (Karm-y Matɩe 6:22, 23.) Wala fɩtl bugum sẽn tõe n vẽneg sor tɩ kɩt tɩ d kẽnd n pa lakdẽ wã, bũmb ning tõnd sẽn get ne d ‘pʋ-tẽer ninã’ tõe n vẽnega tõnd Wẽnnaam tũudmã pʋgẽ, tɩ kɩt tɩ d tõogd n gind yel-wẽnã.—Ef. 1:18.

⁴ Sẽn na yɩl tɩ d tõog n ges bũmb n yã bõn-kãng vẽenega, rẽnda d ninã yɩ sõma la b tees bũmb ning d sẽn getã. Yaa woto me ne tõnd pʋ-tẽer ninã. Rẽnd tall nif sẽn “yaa sõma” wã rat n yeelame tɩ d ning d yamẽ wã bũmb ning d sẽn datã bala. Woto, pa na n yɩ laogã baoobo, la modg tɩ d zakã rãmb paam rɩɩbo, fut la yɛl a taabã n na n pak tõnd n yɩɩd ye. D na n modgd n lʋɩɩsda d tũudmã yɛl taoore. (Mat. 6:33) Woto rat n yeelame tɩ d noogd-d d sũur ne d sẽn tar bũmb ninsã bala, la d lʋɩɩsd Wẽnnaam raabã maaneg taoore.—Heb. 13:5.

5. Wãn to la bi-pugl a ye wilg tɩ yaa Wẽnnaam tʋʋmdã bal n be a yamẽ?

⁵ Roagdbã sã n sõng b kambã sẽn na yɩl tɩ b tall nif sẽn “yaa sõma,” womda bi-sõma. Wala makre, Etiopi, bi-pugl a ye sẽn karem sõma lekollẽ wã yĩng paamame tɩ b tẽngã goosneema wã na n yao-a t’a tɩ karem inivɛrsite. La sẽn yaa a Zeova tʋʋmdã bal n da be a yamẽ wã yĩnga, kɩtame t’a zãgse. Rẽ poore, a paama tʋʋm tɩ b na n yaood-a kiuug fãa tõnd ligdã 1890000. B tẽngã neb wʋsg kiuug yaood pa kolg woto weoog ye. La so-pakrã tʋʋmd n da be bi-puglã yamẽ. Woto kɩtame t’a zãgs tʋʋmdã, n pa reng n bao a roagdbã tagsg meng ye. A roagdbã sẽn wa n bãng a sẽn maan bũmb ningã, b tagsg yɩɩ wãna? B sũur yɩɩ noog wʋsgo, hal tɩ b pẽg-a!

6, 7. Bõe la d segd n ‘gũus d mens’ ne?

⁶ D tõe n yeelame t’a Zezi sẽn gom nif sẽn “ka sõma” yell Matɩe 6:22, 23 pʋgẽ wã keoogda tõnd ne zoe-bõn me. Bala gom-bil ning b sẽn lebg tɩ sẽn “ka sõma” wã rat n yeelame me tɩ sẽn “yaa wẽnga,” wall “tʋlg f to bũmbu.” La a Zeova tagsg yaa wãn ne tʋlg f to bũmb bɩ zoe-bõne? Biiblã yeta woto: “La yoob ne dẽgd fãa la zoe-bõne, [bɩ rat-tɩ-looge,] bɩ y ra sak [tɩ b] pʋd bõn-kãens yãmb sʋk ye.”—Ef. 5:3.

⁷ Sã n yaa ned a to n yaa rat-tɩ-loog soaba, tõe n yɩɩ nana ne-d tɩ d bãnge. La sã n yaa tõnd mengã, a bãngr yaa toog ne-do. Rẽnd d segd n tũu sagl ning a Zezi sẽn kõ wã. A yeela woto: “Bɩ y gũus y mens neer n da maan zoe-bõn ye.” (Luk 12:15) Woto baoodame tɩ d feesd d meng wakat fãa n get bũmb ning sẽn pak tõnd n yɩɩdã. Zak rãmb segd n tagsd n geta b sã n pa sãamd sẽk la ligd reemã, pemsmã kokrã la teedã raab wɛɛngẽ.

8. Teedã raab wɛɛngẽ, bõe la d tõe n maan n wilg tɩ d ‘gũusda d mense’?

⁸ Nand tɩ y ra bũmbu, y pa segd n ges y sã n tara ligd sẽn sek bũmbã raab bal ye. Y segd n soka y meng woto: ‘Rẽ yĩnga m na n paama sẽk n tʋmd ne bõn-kãngã la m get a yell sõma bɩ? Sẽn na yɩl n bãng m sẽn tõe n tʋm ne-a to-to wã pa na n kaoos wʋsg sɩda?’ Kom-biisã, ra tẽ-y piblisite rãmbã fãa, tɩ wa lebg fut ligd sẽn yaa toog la teed a taab baoob n pak-y ye. Y segd n yɩɩ yõk-m-meng rãmba. Sẽn paase, tags-y n ges-y bũmb nins y sẽn daadã sã n pa na n tiis y zakã rãmba, tɩ b pa tõog n segl b mens n gũ ninsaal Biigã. Kɩs-y sɩd ne a Zeova sẽn pʋlem-d bũmb ningã. A yeela woto: “Mam kõn bas yãmb wall m mong yãmb abada.”—Heb. 13:5.

 Yãk-y bũmb n maand Wẽnnaam tũubã wɛɛngẽ

9. Zak rãmb sã n yãk bũmb n maand Wẽnnaam tũubã wɛɛngẽ, wãn to la tõe n naf-ba?

⁹ Bũmb a to me la zak rãmb tõe n maan tɩ keng b fãa tẽeb la sõng-b tɩ b ket n tũud Wẽnnaam. Yaa b sẽn na n yãk bũmb b sẽn dat n maan Wẽnnaam tũubã wɛɛngẽ, la b modg n maane. Woto na n sõng-b lame tɩ b bãng b sã n sɩd maanda a Zeova raabã sõma, la sõng-b me tɩ b bãng bũmb ning b sẽn segd n lʋɩɩsd taoor n yɩɩdã.—Karm-y Filip rãmb 1:10.

10, 11. Wẽnnaam tũubã wɛɛngẽ, bõe la yãmb ne y zakã rãmb yãk n maandẽ, la bõe la y yãk n dat n wa maane?

¹⁰ Baa zakã rãmb sã n yãk bũmb sẽn zems bal la sẽn pa yɩɩd b fãa pãng n maandẽ, na n woma bi-sõma. Wala makre, b tõe n yãka yam n vaeesd daarã vɛrse wã daar fãa. Zakã neb sẽn leokd to-to wã tõe n sõnga zakã soab t’a bãng b ned kam fãa tẽeb pãng sẽn ta zĩig ninga. Zakã rãmb sã n naagd taab n karemd Biiblã, na n sõnga kambã tɩ b bãngd kareng n paasdẽ, la b wʋmd Biiblã goam võor sõma me. (Yɩɩl 1:1, 2) Segdame me tɩ d yãk yam n paasd d pʋʋsgã sõmblem. D tõeeme me n yãk yam n modgd n wilgdẽ tɩ d sɩd tara zʋg sõma nins vʋʋsem sõng sẽn kõtã. (Gal. 5:22, 23) D tõe n bao n bãnga d sẽn na n maan bũmb ning koe-moonegã pʋgẽ n wilg tɩ d kʋmda nebã. Zak rãmb sã n modgd n maand rẽ, na n sõnga kambã tɩ b lebg nimbãan-zoɛtba. La tõe n kɩtame me tɩ b wa rat n yɩ so-pakdb bɩ misioneer dãmba.

¹¹ Y tõe n tags n gesa bũmb kẽer yãmb ne y zakã rãmb sẽn tõe n yãk n maane. Wala makre, y tõe n yãka yam n na n moond koɛɛgã wʋsg n paasdẽ. Y leb n tõe n maoome n wa tõe n moon soayã noy, tʋʋmã zĩisẽ, bɩ ne telefõn n pa zoe rabeem ye. Y tõeeme me n tɩ moon koɛɛgã zĩis nins b sẽn dat sõngr n yɩɩdã. Zakã ned tõe n zãmsa buud gom-zẽng sẽn na yɩl n wa tõog n moond sẽn gomd-b buud gom-kãnga wã.

12. Bõe la zak soab tõe n maan n sõng a zakã rãmb tɩ b paas zood ning b sẽn tar ne Wẽnnaamã?

¹² Y sã n yaa zak soab bɩ y bao n bãng zĩis nins y zakã rãmb sẽn dat sõngr sẽn na yɩl n ket n tũud Wẽnnaamã, la y yãk bũmb sẽn tõe n sõng-b rẽ wɛɛngẽ n maandẽ. Bũmb nins y sẽn na n yãk n maandẽ wã segd n zemsa ne y zakã neb fãa pãnga, la b yɛlã sẽn yaa to-to. (Yel. 13:12) Yaa vẽeneg tɩ yɩl n wa tõog n maand bũmb d sẽn yãk yam n dat n maandẽ wã rɩkda sẽk wʋsgo. Rẽ n so tɩ y segd n maan y sẽn tõe tɛk n boog televiziõ wã gesgo, tɩ kɩt tɩ y tõog n maand bũmb sẽn na n paas yãmb ne a Zeova zoodã. (Ef. 5:15, 16) Modg-y wʋsg tɩ yãmb ne y zakã rãmb wa tõog n maand bũmb ning y sẽn dat n maanã. (Gal. 6:9) Zak neb sã n yãk bũmb Wẽnnaam tũubã wɛɛngẽ n maandẽ, ‘nebã fãa na n yãame tɩ b bɩtame.’—1 Tɩm. 4:15.

Ra vaand-y y zak pʋgẽ zaabr Biibl zãmsgã ye

13. Toeen-bʋg la b maan tigissã wɛɛngẽ, la sogs-bʋs la d segd n sok d mense?

¹³ Bũmb a to me n tõe n sõng zak rãmb sõma tɩ b ‘segl b mens’ n gũ ninsaal Biigã. Yaa toeeng ning b sẽn maan tigissã kẽnd wɛɛngẽ yʋʋmd 2009 yʋʋm-vẽkr kiuugã pipi raarã tɛkã. D pa le tigimd taab n maand sebrã zãmsg wa d sẽn da maand pĩndã ye. D naagd-a-la ne Wẽnnaam tʋʋmdã lekoll la Tʋʋmdã tigisg n maandẽ. Toeen-kãng yaa sẽn na yɩl tɩ zakã rãmb tõog n yãk zaabr a ye semen fãa n zãmsd Biiblã tɩ kengd b tẽebo. Sẽn mik tɩ d sẽn sɩng woto maaneg kaoosame wã yĩnga,  segdame tɩ d sok d meng woto: ‘Rẽ yĩnga mam sɩd maanda zak pʋgẽ zaabr Biibl zãmsgã, wall m yãka sẽk n zãmsd Biiblã m ye bɩ? M sɩd rɩta rẽ yõod bɩ?’

14. a) Sẽn yɩɩd fãa, bõe yĩng tɩ d zãmsd Biiblã ne d zakã rãmba, wall d zãmsd-a d ye? b) Bõe yĩng tɩ yaa tɩlae tɩ d yãk zaabr n zãmsd Biiblã?

¹⁴ Sẽn yɩɩd fãa, d sã n maand zak pʋgẽ zaabr Biibl zãmsgã, wall d yãk sẽk n zãmsd Biiblã d ye, na n kɩtame tɩ d kolg Wẽnnaam. (Zak 4:8) D sã n dɩkd sẽk n zãmsd Biiblã wakat fãa la d bãngd d Naandã n paasdẽ, zood ning d sẽn tar ne-a wã me na n paasdame. D sã n kolgd a Zeova n paasdẽ, na n kɩtame tɩ d maneg n nong-a ne ‘d sũur fãa, ne d ratem fãa, ne d yam fãa, la ne d pãng fãa.’ (Mark 12:30) Yaa vẽeneg tɩ d tʋlla ne d sũur fãa n sak Wẽnnaam la d rɩk a togs-n-taare. (Ef. 5:1) Rẽnd zak pʋgẽ zaabr Biibl zãmsgã maaneg yaa bũmb sẽn tõe n sõng d zakã ned kam fãa t’a ‘segl a meng’ n gũ “to-kãsengã” ning yell b sẽn pĩnd n gomã. (Mat. 24:21) D sã n dat n wa paam n põse, zak pʋgẽ zaabr Biibl zãmsgã maaneg yaa tɩlae.

15. Wãn to la zak pʋgẽ zaabr Biibl zãmsgã maaneg nafd zak rãmba?

¹⁵ Bũmb a to me n kɩt tɩ d segd n maand zak pʋgẽ zaabr Biibl zãmsgã. D sã n maand-a, kɩtdame tɩ zakã neb zems-n-taarã paasdẽ. Zak rãmb sã n naagd taab n sõsd Wẽnnaam la a raabã zugu semen fãa, nafd-b-la wʋsgo. Ned ne a pag sã n zãmsd Biiblã n bãngd Wẽnnaam ne a raabã n paasdẽ, b nonglmã me na n paasdame. (Karm-y Koɛɛg Soab 4:12.) Roagdbã ne b kambã sã n naagd taab n zãmsd Biiblã, tõe n kɩtame tɩ b nong taaba, tɩ zems-n-taar be b sʋka. Bala nonglem yaa “bũmb fãa loɛtg sɩd-sɩda.”—Kol. 3:14.

16. Wãn to la saam-bi-pogs a tã sẽn yãk zaabr takɩ Biiblã zãmsg yĩng naf-yã?

¹⁶ Saam-bi-pogs a tãab n tũ sagl ning sẽn yet tɩ d yãk zaabr takɩ n zãmsd Biiblã tɩ naf-ba. Pʋg-yãan-kãensã yaa pʋg-kõap sẽn pa kĩ ne taaba, n vɩ tẽn-yɛng pʋgẽ. B sɩng n yaa zood na maan yʋʋm wʋsgo. B sẽn dat n mi n segd taab n sõsd la b yaool n pa rat tɩ yɩ sõs-zaal balã kɩtame tɩ b zems taab n yãk zaabr a ye, tɩ semen fãa bɩ b segd taab n zãmsd Biiblã. B sɩnga ne ‘ Rends pleinement témoignage au sujet du Royaume de Dieu ’ sebrã. B nin-yɛng yeela woto: “D sẽn segd taabã noom-d-la wʋsgo, tɩ kɩt tɩ d zãmsgã wae n yɩɩgd lɛɛr a ye. D mamsda pipi kiris-nebã sẽn da be yɛl nins pʋsẽ wã d yamẽ, tɩ d ned kam fãa togs a manesem sẽn na n yɩ to-to, a sã n da be yel-kãensã buud taoore. D modgdame n tũud bũmb nins d sẽn zãmsdã koe-moonegã pʋgẽ. Rẽ kɩtame tɩ koe-moonegã la karen-biisã maaneg tar yamleoog wʋsg ne tõnd la a womd biis n yɩɩd pĩndã.” Pʋg-kãensã sẽn maand woto wã pa sõngd-b Wẽnnaam tũubã wɛɛngẽ bal ye. Kɩtame me tɩ b zoodã pãng paase. B fãa wilgame tɩ b sẽn paam n tõe n segd taab n maand woto wã noom-b lame.

17. Zak rãmb sã n dat tɩ zak pʋgẽ zaabr Biibl zãmsg naf-ba, bõe la b segd n maane?

¹⁷ La yãmb yẽ? Wãn to la yãmb sẽn yãk zaabr takɩ n zãmsd Biiblã y ye wall ne y zakã rãmbã nafd-yã? Y sã n dat tɩ rẽ naf-y sõma, rẽnda y maand-a n pa vaandẽ ye. Zakã ned kam fãa segd n segla a meng n sa tɩ wakat ning y sẽn yãk zãmsgã yĩngã nan ka ta ye. Y pa segd n bas tɩ yel-bõones kɩt tɩ y pa maan zãmsgã ye. Bũmb nins y sẽn yãkd n zãmsdẽ wã segd n zemsda ne y zakã rãmb yɛla. Bõe la y tõe n maan tɩ zãmsgã tall yamleoogo? Toeemd-y y sẽn maand zãmsgã to-to wã sẽn na yɩl tɩ naf zakã ned kam fãa. Kɩt-y me tɩ bãan zĩnd zãmsgã sasa, la ra yɩ yaar ye.—Zak 3:18. *

 Ket-y n ‘gũusd-y’ la y ‘segend y mense’

18, 19. D sẽn mi tɩ ninsaal Biigã waoong ta n saame wã segd n kɩtame tɩ yãmb ne y zakã rãmb maand bõe?

¹⁸ Yɛlã sẽn tar kengr rũndã-rũndã wã wilgdame tɩ sẽn sɩng ne yʋʋmd 1914 tɛka, d sɩd vɩɩ a Sʋɩtãan dũniyã yaoolem dayã pʋgẽ. Yaa vẽeneg tɩ Armagedõ ta n saame. Ka la bilfu, a Zeova na n kɩtame tɩ ninsaal Biigã wa sãam nin-wẽnsã. (Yɩɩl 37:10; Yel. 2:21, 22) Y sẽn mi rẽ wã pa segd n kɩt tɩ yãmb ne y zakã rãmb segl y mens sõma sɩda?

¹⁹ Rẽ yĩnga yãmb tũuda a Zezi sagl ning sẽn yet tɩ d tall nif sẽn “yaa sõma” wã bɩ? Baa dũniyã nebã sẽn baood arzɛka, yʋʋr la naamã, yãmb zakã rãmb yẽ yãka bũmb takɩ n maand Wẽnnaam tũubã wɛɛngẽ bɩ? Yãmb sɩd maanda zak pʋgẽ zaabr Biibl zãmsgã, wall y yãka wakat n zãmsd Biiblã y ye bɩ? Rẽ nafda yãmb bɩ? Y yaa pʋg-sɩda, paga, wall biiga, rẽ yĩnga y maanda bũmb ning Biiblã sẽn wilg tɩ y segd n maandame wã, tɩ sõngd y zakã nebã fãa tɩ b ‘ket n gũudẽ’ wa sõsg ning sẽn loogã sẽn wilgã bɩ? (1 Tes. 5:6) Y sã n maanda woto, ninsaal Biigã na n wa mikame tɩ y ‘segla y meng’ n sa!

[Tẽngr note]

Bõe la yãmb bãng-yã?

• Zak rãmb sã n tar nif sẽn “yaa sõma,” wãn to la tõe n sõng-b tɩ b ‘segl b mense’?

• Zak rãmb sã n yãk bũmb takɩ n maand Wẽnnaam tũubã wɛɛngẽ, wãn to la tõe n sõng-b tɩ b ‘segl b mense’?

• Zak rãmb sã n maand zak pʋgẽ zaabr Biibl zãmsgã n pa vaandẽ, wãn to la tõe n sõng-b tɩ b ‘segl b mense’?

[Zãmsgã sogsgã]