Bũmb nins y sẽn maand n deemdẽ wã nafd-y lame bɩ?
Bũmb nins y sẽn maand n deemdẽ wã nafd-y lame bɩ?
“Bɩ y mak n bãng sẽn tat Zusoabã yam.”—EF. 5:10.
1, 2. a) Bõe yĩng tɩ d tõe n yeel t’a Zeova ratame tɩ d vɩɩmã noom-do? b) Sẽk ning d sẽn dɩkd n deemdẽ wã sẽn yaa ‘Wẽnnaam kũunã,’ kɩtame tɩ d segd n maan bõe?
BIIBLÃ pʋgẽ, b wilgda vẽeneg t’a Zeova ratame tɩ d vɩɩmã yɩ-d noogo. Wala makre, Yɩɩl Sõamyã 104:14, 15 wã yeelame t’a Zeova kɩtdame tɩ ‘kood bɩt ninsaalbã sõngr yĩnga,’ tɩ kɩtdẽ tɩ d tõe n paamd “rãam sẽn kõt nebã sũ-noogo, la kaam sẽn salemd bãmb nense, la rɩɩb sẽn kengd nebã sũyã.” Sɩd me, yaa a Zeova n kɩtd tɩ koodã buud toor-toorã yit la b womda, tɩ kɩtdẽ tɩ d tõe n paam dɩɩbo, kaam la rãamã. Baa rãam sẽn pa tɩlae ne ninsaalã, a ‘kõta sũ-noogo.’ (Koɛ. 9:7; 10:19) Woto fãa wilgdame t’a Zeova ratame tɩ d vɩɩmã noom-do. A ratame tɩ d “pid ne sũ-noogo.”—Tʋʋ. 14:16, 17.
2 Dẽnd d pa segd n tags tɩ d sã n mi n dɩk sẽk n “ges bõn-yɩgds” wall mood buud toor-toor sẽn yaa neere, pa zems ye. Bũmb a woto maaneg tõe n bels-d lame la paas d vɩɩmã noom. (Mat. 6:26, 28; Yɩɩl 8:4, 5) Sɩd me, sũ-noogã yaa “Wẽnnaam kũuni.” (Koɛ. 3:12, 13) Rẽnd sẽk ning d sẽn dɩkd n deemdẽ wall d noogd d yõorã naaga bũmb nins Wẽnnaam sẽn kõt-dã sʋka. Woto kɩtame tɩ d segd n tʋmd ne-a tɩ zemsd ne Wẽnnaam daabo. *
Reemã yaa bugs toor-toore, la pa fãa n yaa sõma ye
3. Bõe yĩng tɩ nebã nong reem toor-toore?
3 Neb nins sẽn tar tagsg sẽn zems reem toor-toorã zugã miime tɩ b tõe n yãka reem nins b sẽn nonge. La b miime me tɩ pa reem buudã fãa n yaa sõma ye. Bõe yĩng tɩ nebã sẽn nong reem ninsã pa yembre? Sẽn na yɩl n wʋm a võore, d mak reemã ne rɩɩbo. Dũniyã babs toor-toorã neb sẽn nong rɩbd ninsã pa yembr ye. Kiris-neb sẽn vɩ dũniyã babs toɛy-toɛy me nonga reem buud toor-toore. Baa neb sẽn vɩ tẽng a ye pʋgẽ tõeeme n pa nong bõn-yɛng ye. Wala makre, nina tõe n nonga sɛb karengo, t’a to get rẽ wa bũmb sẽn yiisd yam. Sãnda tõe n nonga reem sẽn yiisd tʋʋlgo, wala ball tãoobo, tɩ kẽer pa nong rẽ ye. Wala nebã sẽn nong rɩbd toor-toorã, b tõe n yãka reem toor-toor me n nongẽ.—Rom 14:2-4.
4. Bõe yĩng tɩ pa reem buudã fãa la d tõe n deeme? Rɩk-y makr n wilg y leoorã võore.
4 Baa d sẽn tar sor n tõe n yãk d sẽn dat reem wall yõ-noogr ningã, pa bũmb nins fãa d sẽn tʋll n maanã la sõma ye. Tẽeg-y rɩɩbã makrã. D tõe n nonga rɩɩb buud toor-toore. La d pa na n sak n dɩ rɩɩb sẽn põog ye. Bala, tõe n kɩtame tɩ d lʋɩ bãaga. Woto me, d tõe n yãka reem bɩ yõ-noogr buud toor-toore, la d pa na n sak n yãk reem sẽn wilgd yoob yɛla, nen-kɛglem wall reem sẽn tõe pogl-do, bɩ sẽn tõe n tũ ne d yõor ye. Reem kãens buudã pa zems ne Biiblã noy ye. B reeng sãamda zood ning d sẽn tar ne a Zeova wã la d laafɩ wã me. Dẽnd pa reem buudã fãa la d tõe n yãk ye. D segd n deng n tagsa d sẽn tʋll n maan bũmb ningã zug neere, n bãng n yãk reem sẽn na n naf-do, la sẽn tat a Zeova yam. (Ef. 5:10) Wãn to la d tõe n maan dẽ?
5. Wãn to la d tõe n bãng reem wall pemsem kokr sã n tata a Zeova yam?
5 Sẽn na yɩl tɩ reem wall yõ-noogr naf-d la ta a Zeova yam, d segd n gũusame tɩ bũmb nins d sẽn maand wakat kãensã zems ne Biiblã noyã. (Yɩɩl 86:11) Bũmb sẽn tõe n sõng-y tɩ y bãngd n yãkdẽ tɩ zemsdẽ, yaa y sẽn na n feesd y menga. Wala makre, sogsg a tãab n be d sẽn tõe n sok d menga. Sogs-kãens la woto: Bõe? wakat bʋgo? la ne ãnda? D na n bao n bãnga rẽ sẽn dat n yɛɛlgã.
Bõe la m na n maan deemã sasa?
6. Reem bʋs buud la d pa na n saag n deeme, la bõe yĩnga?
6 Nand tɩ d yãk reem wall yõ-noogr d sẽn date, d segd n soka d meng woto: Boẽ? Rat n yeel tɩ ‘bõe la m na n maan deemã sasa?’ Segdame tɩ d tẽeg tɩ reem bɩ yõ-noogr bugs a yiib n be. Pipi bukã yaa b rãmb nins sẽn naag ne yɛl d sẽn pa tol n segd n maanã. Yiib-n-soabã yaa reem nins sẽn naag ne yɛl d sẽn tõe n yãk yam n maanã. D gom pipi soabã yelle? Dũni-kãngã sẽn yaa wẽngã pida ne reem buud toor-toor sẽn naag ne yɛl sẽn kɩɩsd Biiblã sagls la Wẽnnaam noyã. (1 Zã 5:19) Kiris-ned hakɩk pa saagd n yãk reem kãens buudã baa a yembr ye. Rat n yeel tɩ wala reem sẽn naag ne zĩn-dãmb yɛla, sẽn wilgd raglem tʋʋm toor-toor la nen-kɛglem tʋʋma. Reem nins pʋsẽ nebã sẽn maand taab wẽnga, la b rãmb nins sẽn kɩtd tɩ yaa wa yoob pa wẽngã me yaa reem-yoodo. (1 Kor. 6:9, 10; karm-y Wilgr 21:8.) D sã n wa yaa d yembr wall d wa n bee ne neb me, d lakda d mens ne reem kãensã buudã. Woto la d wilgd a Zeova tɩ d “[kisa] sẽn yaa wẽnga.”—Rom 12:9; 1 Zã 1:5, 6.
7, 8. Reemã wɛɛngẽ, bõe n tõe n sõng tõnd tɩ d bãng n yãk yam tɩ zemse? Rɩk-y makr n wilg rẽ.
7 Reemã bɩ yõ-noogrã buk a yiib-n-soabã yaa b rãmb nins sẽn naag ne yɛl d sẽn segd n tags b zut neer n yaool n bãng d sẽn na n maanegã. Tõe tɩ Biiblã pʋgẽ, b pa gomd reem kãens yell vẽeneg ye. La Biiblã saglsã tõe n sõng-d lame tɩ d bãng a Zeova sẽn get-b to-to wã. Dẽnd nand tɩ d yãk reem bãmb dãmbã sʋka, d segd n tagsame n ges a sã n pa kɩɩsd Biiblã noyã. (Yel. 4:10, 11) Dẽ poore, d segd n maana yam-yãkr sẽn na n sõng-d tɩ d kell n tall sũur-kaset sẽn yaa sõma. (Gal. 6:5; 1 Tɩm. 1:19) Wãn to la d tõe n maan dẽ? D lebs n tẽeg makr ning d sẽn da rɩk ne rɩɩbã yelle. Nand tɩ d rɩ rɩɩb d sẽn nan zɩ n dɩ, d na n bao n bãnga bũmb nins b sẽn tall n segl-a wã. Woto me, nand tɩ d yãk reem wall yõ-noogre, d segd n bao n bãnga a sã n zemsa ne kiris-neda.—Ef. 5:17.
8 Wala makre, y tõe n nonga ɛspoorã reem ninga. Neb wʋsg sɩd nonga ɛspoorã. Sɩd me, ɛspoor tõe n yɩɩ noogo. La ɛspoor ning wags taab sasa, rɛɛmdbã tõe n wa tʋmda nen-kɛglem sẽn loog noore, tɩ kɩt tɩ b tõe n pogl taab wall b kʋ taab menga. Reem kẽer pʋd n yaa wẽnse. Reem sãnda rɛɛmdb la a gɛtbã sã n mi n na n kɩdem wall b wilg b sũ-sãanga, b tara manesem toor-toor sẽn pa sõma, la sẽn wilgd tɩ b getame tɩ bãmb tẽngã bark yɩɩda tẽns a taabã. Y sã n nonga ɛspoor sẽn naag ne yel-kãensã buudu, bõe la y segd n maane? Y sã n bʋgs yɛl nins sẽn naag a pʋgẽ wã zugu, tõe tɩ y na n mikame tɩ reem a woto pa tat a Zeova yam, la t’a pa zems ne laafɩ la nonglem koɛɛg ning d sẽn moondã ye. (Ezai 61:1; Gal. 5:19-21) La y sã n fees reem n mik tɩ bũmb nins b sẽn maand a pʋgẽ wã pa wẽng a Zeova nifẽ, reem kãng reeng tõe n naf-y lame, la noog y sũuri.—Gal. 5:22, 23; karm-y Filip rãmb 4:8.
Wakat bʋg la m deemda?
9. Sẽk ning d sẽn dɩkd n deemdẽ wã wilgda bõe?
9 Sokr a yiib-n-soab d sẽn segd n sok d mengã la woto: Wakat bʋgo? Rat n yeel tɩ ‘wakat bʋg la m dɩkd n kokd pemsmã bɩ n deemdẽ?’ Sẽk ning mam sẽn dɩkd n kẽesd a pʋgẽ wã zema wãna? Tẽeg-y tɩ pipi sokrã yɩɩ woto: Bõe la m na n maan deemã sasa? D sẽn na n leok sok-kãngã to-to wã wilgda bũmb nins tõnd sẽn nongã, la bũmb nins sẽn sakd d nifẽ wã. La d sẽn na n leok sokr a yiib-n-soabã to-to wã wilgda bũmb nins tõnd sẽn lʋɩɩsd taoorã, rat n yeel tɩ bũmb nins tõnd sẽn get tɩ tara yõod n yɩɩdã. Wãn to masã la d tõe n bãng d sẽn get reemã bɩ pemsmã kokr yõod to-to wã sã n zemsame bɩ pa zemse?
10, 11. Wãn to la a Zezi goam nins sẽn be Matɩe 6:33 wã tõe n sõng-d tɩ d bãng d sẽn na n dɩk sẽk ning n deemã tɛka?
10 A Zezi yeela woto: “Bɩ f nong Zusoabã fo Wẽnnaam ne f sũur fãa, la ne f ratem fãa, la ne f yam fãa, la ne fo pãng fãa.” (Mark 12:30) Woto wilgdame tɩ yaa a Zeova la d segd n nong n yɩɩda. D wilgda rẽnda, d sã n tũud a Zezi saglg ning sẽn pʋgdã. A yeela woto: “Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Mat. 6:33) Wãn to la gom-kãensã tõe n sõng-d tɩ d bãng sẽk ning d sẽn segd n dɩkd n deemdẽ wã tɛka, la d tagsg reemã zug sẽn segd n yɩ to-to?
11 Tẽeg-y t’a Zezi yeelame tɩ d ‘reng n bao Wẽnnaam soolmã’ bɩ a Rĩungã. A pa yeel tɩ d ‘bao Wẽnnaam Rĩungã bal ye.’ A Zezi ra miime tɩ d segd n baoa bũmb a taab me. Wala makre, d segd n dɩka sẽk n tʋm n paam dɩɩbo, zaka, futu, n kẽes d kambã lekolle, n noogd d yõor la d maand yɛl a taaba. La pa bõn-kãensã n segd n pak tõnd n yɩɩd ye. Yaa Rĩungã la d segd n deng n bao. (1 Kor. 7:29-31) D sẽn mi bũmb ning d sẽn segd n lʋɩɩs taoorã, d segd n lebsa yõ-noogrã la yɛl a taabã fãa poorẽ, la d rengd n baood Wẽnnaam Rĩungã. D sã n maand woto, reemã bɩ yõ-noogrã na n naf-d lame.
12. Wãn to la Luk 14:28 goamã tõe n sõng-d reem yãkr wɛɛngẽ?
12 Nand tɩ d yãk reem buud n deeme, yɩta sõma tɩ d reng n tags sẽk ning a sẽn na n dɩkã yelle, wa ned sẽn dat n me roog me sẽn segd n deng n tags “a ligdã yellã.” (Luk 14:28) Wa teed kẽer paoong sẽn tũud ne ligd yiisgã, reemã bɩ pemsmã kokr me rɩkda sẽka. Dẽnd segdame tɩ d reng n bao n bãng reem kãng sẽn na n dɩk d sẽkã to-to wã. Sẽk ning d sẽn dɩkd n deemdẽ wã pa segd n loog nug n kɩt tɩ d pa le tõe n maan bũmb nins sẽn tar yõod n yɩɩdã, rat n yeel tɩ Biiblã zãmsg d ye wall ne d zakã rãmbã, tigissã kẽnd la koɛɛgã mooneg ye. (Mark 8:36) La d sã n mik tɩ reem bɩ pemsmã kokr ning kõt-d-la keelem n kɩtdẽ tɩ d tõe n ket n tʋmd Wẽnnaam tʋʋmdã, sẽk ning d sẽn mi n dɩkd n deemd reem kãngã pa sẽk d sẽn sãamd ye.
Ne ãnda la m na n deeme?
13. Bõe yĩng tɩ d segd n gũus neb nins d sẽn na n naag n deemã yãkr wɛɛngẽ?
13 Sokr a tãab-n-soab d sẽn segd n sok d mengã la woto: Ne ãnda? Rat n yeel tɩ ‘ne ãnd dãmb la m na n deeme?’ Sok-kãngã leokr tara yõodo. Bõe yĩnga? Bala reemã na yɩ noog bɩ kõn yɩ noogã bee ne d sẽn naag neb nins n deemdẽ wã. Wala makre, d sã n naag neb n dɩt rɩɩbo, tara yamleoogo. Pemsmã kokr me yaa woto. D sã n deemd ne d zo-rãmba, noomame n yɩɩda. Dẽnd pa lingr la tõnd neb wʋsgo, sẽn yɩɩd fãa, kom-bɩɩsã sẽn nong n naagd neb a taab n kokd pemsmã ye. La d sã n dat tɩ reem bɩ pemsem kokr naf-do, rẽndame tɩ d reng n bãng neb nins d sẽn tõe n sak tɩ naag-d n deemã.—2 Kib. 19:2; karm-y Yelbũn 13:20; Zak 4:4.
14, 15. a) Zo-rãmbã yãkr wɛɛngẽ, mak-sõng bʋg la a Zezi kõ-do? b) Nand tɩ d yõg zood ne neda, sogs-bʋs la d segd n sok d menga?
14 A Zezi mak-sõngã tũub na n sõng-d lame tɩ d bãng d zo-rãmbã tũusgu. Sɩd me, a Zezi sɩng n nonga ninsaalbã hal b naanegã tɛka. (Yel. 8:31) A sẽn da wa n be tẽngã zugã me, a ra nonga nebã fãa la a waoogd-ba. (Mat. 15:29-37) La baasgo, a ra miime tɩ wilg tɩ f nonga neda, la yɩ ned zoa pa yembr ye. Baa a sẽn da nong nebã fãa wã, pa nebã fãa n da yaa a zo-rãmb ye. A sẽn yeel a tʋm-tʋmdb 11 wã bũmb ningã sõngd-d lame tɩ d bãng a sẽn da tũusd a zo-rãmbã to-to. A yeel-b-la woto: ‘Yãmb sã n maan bũmb nins fãa mam sẽn yeel yãmbã, yãmb yaa mam zo-rãmba.’ (Zã 15:14; ges-y Zã 13:27, 30 wã me.) Yaa neb nins sẽn da tũud a Zezi la b maand a Zeova raabã bal la a Zezi ra tũusd tɩ yɩ a zo-rãmba.
15 Woto yĩnga, nand tɩ y yõg zood ne neda, segdame tɩ y tẽeg a Zezi gomdã. Sok-y y meng woto: ‘Rẽ yĩnga, nin-kãngã no-goamã la a tʋʋm-tʋmdɩ wã wilgdame t’a sakda a Zeova ne a Zezi bɩ? A nonga sẽn yaa sõma la a kis wẽng bɩ? A tũud-n-taar na n kɩtame tɩ m maneg n lʋɩɩsd Rĩungã taoor la m wɩngd ne a Zeova sakr bɩ?’ Y sã n tõog n leok sogs-kãensã fãa tɩ ‘n-ye,’ rẽnd y paama zo-sõng y sẽn tõe n naagd n deemdẽ wall y kokd pemsem.—Karm-y Yɩɩl Sõamyã 119:63; 2 Kor. 6:14; 2 Tɩm. 2:22.
Reem nins d sẽn yãkdã yaa sõma bɩ?
16. Reemã la pemsmã kokrã wɛɛngẽ, sogs-bʋs la d segd n sok d mense?
16 Pemsmã kokr la reemã wɛɛngẽ, d goma yɛl a tãab yelle: B sõmblmã, b sẽn dɩkd sẽk ningã la neb nins d sẽn naagd n deemdẽ wã. D sã n dat tɩ pemsem kokr naf-do, d segd n deng n tagsa bõn-kãensã b tãabã yelle, n bao n bãng d sẽn na n maan bũmb ningã sã n zemsa ne Biiblã saglsã. Woto yĩnga, nand tɩ d yãk reem wall yõ-noogre, segdame tɩ d fees n bãng a sã n pa kɩɩsd Biiblã noyã. D sã n dat n bãng reem sã n yaa sõma, d segd n soka d meng woto: ‘Reem kãngã reeng baoodame tɩ m maan bõe? Bõn-kãens yaa sõma bɩ, bɩ b yaa wẽnse?’ (Yel. 4:20-27) Sẽk ning d sẽn dɩkd n deemdẽ wã wɛɛngẽ, d segd n soka d meng woto: ‘Wakat bʋg la mam dɩkd n deemdẽ? Sẽk ning m sẽn dɩkdã zemsame bɩ, bɩ looga noore?’ (1 Tɩm. 4:8) Sẽn na n baase, neb nins d sẽn tõe n naag n deemã wɛɛngẽ, segdame tɩ d sok d meng woto: ‘Ne ãnd dãmb la m na n deeme? B yaa tũud-n-ta-sõma bɩ?’—Koɛ. 9:18; 1 Kor. 15:33.
17, 18. a) Wãn to la d tõe n bãng d reem sã n zemsa ne Biiblã noyã? b) Reemã yãkr wɛɛngẽ, bõe la yãmb yãk yam n na n maandẽ?
17 D sã n mik tɩ reem pa zems ne Biiblã sagls zĩ-kãensã b taabã baa yaa zĩ-yende, yaa vẽeneg t’a pa sõma ye. La reem nins d sẽn deemdã sã n zems ne Biiblã noyã zĩis a tãab nins yell d sẽn goma, na n waooga a Zeova, la naf tõnd me.—Yɩɩl 119:33-35.
18 Woto yĩnga, d sã n wa na n deem wall d kok pemsem fãa bɩ d modg tɩ d sẽn na n maanã yɩ sõma. D bãng n dɩk sẽk sẽn zems me, la d ges tɩ neb nins sẽn na n naag-d n deemã yɩ nin-sõma. Bɩ tõnd ned kam fãa ket n tũud Biiblã sagl-kãngã ne a sũur fãa: “Yãmb sẽn dɩta, wall yãmb sẽn yũuda, wall yãmb sẽn maand bũmb a taaba, bɩ y maan fãa Wẽnnaam waoogr yĩnga.”—1 Kor. 10:31.
[Tẽngr note]
^ sull 2 Sõs-kãngã pʋgẽ, b sã n wa gomd reem, yõ-noogr wall pemsem kokr yelle, yaa bũmb nins d sẽn maand d yamleoog yĩngã yell la b gomda.
Y tõe n wilga a võor bɩ?
Reemã yãkr wɛɛngẽ, wãn to la vɛrse nins sẽn pʋgdã tõe n sõng-yã?
• Matɩe 6:33.
• Yelbũn 13:20.
[Zãmsgã sogsgã]
[Foto seb-neng 11]
(Yaa sebrã meng pʋgẽ la y tõe n yã fãa)
✔Bõe
[Foto seb-neng 12]
(Yaa sebrã meng pʋgẽ la y tõe n yã fãa)
✔Wakat bʋgo
[Foto seb-neng 14]
(Yaa sebrã meng pʋgẽ la y tõe n yã fãa)
✔Ne ãnda
[Foto seb-neng 12]
Wãn to la a Zezi mak-sõngã tõe n sõng tõnd zo-rãmbã la reemã yãkr wɛɛngẽ?
