Armagedõ sẽn sɩd yaa bũmb ninga

‘Bãmb yaa zĩn-dãmba . . . sẽn saagd dũniyã tɛk fãa nanambs nengẽ n na n tɩ tigs bãmb tɩ b wa . . . zĩig sẽn boond ne hebre goam tɩ Armagedõ.’—WILGRI 16:14, 16.

ARMAGEDÕ bɩ “Harmagedõ” wã yaa zĩig yʋʋre. La bõe yĩng tɩ nebã sã n wʋm Armagedõ, bɩ b tagsd sabaab bɩ zabr yelle? Armagedõ võorã meng yaa bõe?

B tigma bãmb zĩig sẽn boond tɩ Armagedõ

Armagedõ yaa hebre gom-bila. A võorã yaa “Megido tãnga.” Megido yaa tẽng yʋʋre, la tãng pa be b sẽn boond tɩ Megido tãng ye. Megido bee pĩnd Israyɛll nebã sẽn da beẽ wã nug-rɩtgo. Pẽe so-bɛd a yiib sẽn yekd taaba, tɩ ra sõngd sodaasã zabr wakate. Pĩnd wẽndẽ wã, zab-bɛd la b zab Megido babgẽ wã. La wakat fãa, sull a ye tõogda a bɛɛbã n sãam-b zãng-zãnga. Rẽ n so, tɩ b sã n wa gomd Megido yell bɩ nebã tagsd zabr yelle. *

Pa zab nins b sẽn zab Megido wã n sõngd tɩ d wʋm Megido võor ye. Yaa bũmb ning sẽn wa ne zab-kãensã. Megido ra naaga tẽns nins Wẽnnaam sẽn da pʋlem t’a na n kõo Israyɛll nebã. (Yikri 33:1; Zozue 12:7, 21) A ra yeel-b lame me t’a na n fãag-b-la ne neb nins sẽn na n zab  ne-bã, la a sɩd maana woto. (Tõodo 6:18, 19) Wala makre, yɩɩ Megido la a Zeova maan yel-solemd n fãag Israyɛll nebã, wakat ning Kanaã rĩm a Zabẽ ne a tãb-biisã, la a Sizera sẽn yaa a tãb-biisã naabã sẽn wa n zabd ne-bã.—Bʋkaoodba 4:14-16.

Woto yĩnga, “Armagedõ” bɩ “Harmagedõ” wã võor tagmame. A bilgda yelle, a pa bilgd zĩig sɩd-sɩd ye. A kɩtdame tɩ d tagsd sodaas sul a yiib sẽn na n zab taab yelle.

B togsa Wilgr sebrã pʋgẽ t’a Sʋɩtãan ne zĩn-dãmbã na n wa yik n pirsa goosneem dãmbã tɩ b tigim b sodaasã, n na n zab ne Wẽnnaam nin-buiidã n gɩdg b tʋʋmdã. Yaa rẽ n na n wa ne Armagedõ zabrã. Bala sasa kãnga, Wẽnnaam na n kẽesa a toogo, n sãam bɛɛbã. Neb milyõ rãmb n na n ki.—Wilgri 19:11-18.

Biiblã yetame tɩ Wẽnnaam kõta sugri, t’a maanda nebã neere, n zoet b nimbãanega, t’a sũur ka puugd tao-tao, t’a nonga nebã wʋsgo. (Nehemi 9:17) Bõe yĩng masã t’a na n kʋ neb woto fãa? Sẽn na yɩl n wʋm rẽ võore, bɩ d leok sogsg a tãabo: 1) Ãnd n na n sɩng zabrã? 2) Bõe yĩng tɩ Wẽnnaam na n kẽes a toogo? 3) Rẽ na n waa ne bark bʋse?

1. ÃND N NA N SƖNG ZABRÃ?

Armagedõ zabrã pa Wẽnnaam n na n yik bal n zab ne nebã ye. Wẽnnaam na n kẽesa a toog sẽn na yɩl n fãag nin-sõma wã, tɩ neb nins sẽn dat n sãam-bã ra paam n sãam-b ye. Yaa “dũniyã tɛk fãa nanambsã” bɩ goosneema rãmbã n na n sɩng zabrã. Bõe n na n kɩt tɩ b sɩng zabrã? A Sʋɩtãan n na n pirs bãmb ne b sodaasã sẽn na yɩl tɩ b zab ne neb nins sẽn tũud Wẽnnaam a Zeova wã.—Wilgri 16:13, 14; 19:17, 18.

Tẽns wʋsg pʋgẽ, b yetame tɩ ned fãa tara sor n na n gom a sẽn date, la a tar sor me n na n yãk tũudum a sẽn date. Woto kɩtame tɩ Biiblã sẽn yet tɩ goosneema rãmbã na n zaba ne tũudmã bɩ n sãam-a wã wõnd bũmb sẽn pa tõe n yɩ. La a buud maana sẽn pa kaoose, n ket n maand rũndã-rũndã. * Baasgo, bũmb a yiib n kɩt tɩ zab-kãensã yaa toor ne sẽn na n wa-a  ne Armagedõ wã. Pipi, zabr ning sẽn na n yik tũudum poorẽ tɩ wa ne Armagedõ wã na n yɩɩ dũniyã gill zugu. Yiib-n-soaba, a Zeova sẽn na n kẽes a toog n tʋm tʋʋmd ningã na n yɩɩ tʋʋm-kãseng a sẽn zɩ n tʋme. (Zeremi 25:32, 33) Biiblã boonda rẽ tɩ “Wẽnnaam Sẽn-tõe-fãa da-kãsengã zabre.”

2. BÕE YĨNG TƖ WẼNNAAM NA N KẼES A TOOGO?

A Zeova wilga neb nins sẽn tũud yẽ wã tɩ b bao laafɩ, la b nong b bɛɛbã. (Miise 4:1-3; Matɩe 5:43, 44; 26:52) Woto yĩnga, goosneema rãmbã sã n wa na n zab ne-ba, b pa na n bao zab-teed n na n zab n fãag b mens ye. Wẽnnaam sã n pa kẽes a toogo, bɛɛbã na n menesa a nin-buiidã zãnga, la rẽ na n sãama a yʋʋrã. A Zeova sã n bas tɩ bɛɛbã menes a nin-buiidã, yaa wa a pa nong a nebã, a pa tɩrga, la a ka pãng ye. A kõn bas tɩ yɩ woto abada!—Yɩɩl Sõamyã 37:28, 29.

Wẽnnaam sẽn pa rat tɩ ned baa a ye sãamã, a rengd n keoog-b lame tɩ b bãng a sẽn na n maan bũmb ningã. (2 Pɩɛɛr 3:9) A kɩtame tɩ b gʋls kibay Biiblã pʋgẽ, tɩ tẽegd tõnd a sẽn kẽes a toog pĩndã n fãag a nin-buiidã b bɛɛbã nugẽ. (2 Rĩm dãmba 19:35) Biiblã leb n wilgame tɩ ka la bilfu, a Sʋɩtãan ne goosneem dãmbã la b sodaasã sã n wa na n zab ne Wẽnnaam a Zeova nin-buiidã, a Zeova na n le kẽesa a toogo. Sɩd me, Biiblã pĩnd n togsame t’a Zeova na n sãama nin-wẽnsã. (Yelbũna 2:21, 22; 2 Tesalonik rãmba 1:6-9) Wakat kãnga, na n lebga vẽeneg ne bɛɛbã tɩ zabrã b sẽn bolgã yaa ne Sẽn-tõeyã-fãa wã.—Ezekɩɛll 38:21-23.

3. RẼ NA N WAA NE BARK BƲSE?

Armagedõ zabrã na n kɩtame tɩ neb milyõ rãmb paam fãagre. Yaa zabr sẽn na n wa ne laafɩ la bãan tẽngã zugu.—Wilgri 21:3, 4.

Wilgr sebrã pʋgẽ, b yetame tɩ ‘kʋʋng ned sẽn ka tõe n sõd n sɛ’ n na n põs zabrã. (Wilgri 7:9, 14) Wẽnnaam na n wilga nin-kãensã b sẽn na n maan to-to n maneg tẽngã t’a lebg arzãna, wa a sẽn da sɩng n datã.

B sẽn na n zab ne Wẽnnaam nin-buiidã na n yɩɩ wakat bʋgo?

[Tẽngr not rãmbã]

[Foto seb-neng a 6]

Pĩnd wẽndẽ wã, a Zeova zab n fãaga a nin-buiidã

[Foto seb-neng a 7]

A Zeova na n le fãaga a nin-buiidã Armagedõ zabrã sasa