Wẽnnaam Gomdã sẽn yete

Wẽnnaam tara siglg bɩ?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Bõe yĩng tɩ Wẽnnaam da sigl Israyɛll nebã sõma?

Wẽnnaam da kɩtame t’a Abrahaam yagensã lebg nin-buiid a sẽn sigl sõma, la a kõ-b noy. A kɩtame tɩ b boond-b tɩ Israyɛll neba. Bãmb n da segd n ges tɩ bũmb da wa sãam tũudum hakɩkã, la tõodã Wẽnnaam sẽn da kõ-bã ye. (Yɩɩl Sõamyã 147:19, 20) Woto nafa dũniyã buud fãa neba.—Karm-y Sɩngr 22:18.

Wẽnnaam yãka Israyɛll nebã tɩ b yɩ yẽ kaset rãmba. Wakat ning fãa b sẽn sak Wẽnnaamã, naf-b lame. (Tõodo 4:6) D sã n bao n bãng Israyɛll nebã kibarã neere, na n sõng-d lame tɩ d bãng Wẽnnaam sõma.—Karm-y Ezai 43:10, 12.

2. Bõe yĩng tɩ kiris-neb hakɩkã sigl sõma?

Israyɛll nebã wa n pa le maand sẽn tat Wẽnnaam yam, t’a bas-ba, n yãk kiris-neb tigingã n ledg-ba. (Matɩe 21:43; 23:37, 38) Wẽnnaam sẽn wa n be ne Israyɛll nebã, b ra yaa a kaset rãmba. Rũndã-rũndã, yaa kiris-neb hakɩkã n yaa a Zeova Kaset rãmba.—Karm-y Tʋʋm 15:14, 17.

A Zezi sigla a karen-biisã sõma sẽn na yɩl tɩ b yɩ Wẽnnaam kaset rãmba, la b sõngd nebã buud fãa tɩ bãmb me lebgd yẽ karen-biisi. (Matɩe 10:7, 11; 24:14; 28:19, 20) B tʋʋmdã kolgda a baasg zĩigẽ. Rũndã-rũndã, a Zeova kɩtame tɩ buud toor-toor neb milyõ rãmb naag taab tũudum hakɩkã pʋgẽ. (Wilgri 7:9, 10) Wẽnnaam sigla kiris-neb hakɩkã me sõma sẽn na yɩl tɩ b tõog n sõngd taab la b kengd taab raoodo. Dũniyã gill zugu, b sẽn zãmsd bũmb nins b tigimsã pʋsẽ wã fãa yaa a ye.—Karm-y Hebre dãmb 10:24, 25.

  3. A Zeova Kaset rãmbã rũndã-rũndã siglgã sɩnga wakat bʋgo?

Sɩnga yʋʋmd 1870 wã sẽnese. Wakat kãnga, neb a wãn sẽn da tigimd taab n zãmsd Biiblã wa n bãnga bũmb kẽer Biiblã sẽn yete, tɩ nebã yaool n da bas rẽ tẽeb hal daar zãra. B bãngame t’a Zezi lugla kiris-nebã tigingã sẽn na yɩl tɩ b moon koɛɛgã. Woto kɩtame tɩ b sigl koɛɛgã moonego, n na n moon dũniyã gill zugu. Yɩɩ yʋʋmd 1931 wã tɛk la b kɩt tɩ b na n boond-b t’a Zeova Kaset rãmba.—Karm-y Tʋʋm 1:8; 2:1, 4; 5:42.

4. A Zeova Kaset rãmbã sigla wãn-wãna?

Pipi kiris-nebã wakatẽ, b ra tara tʋm-tʋmdb la kãsem-dãmb sẽn da be Zerizalɛm n get tigimsã sẽn be zĩis toor-toorã yelle. Sul-kãngã ra sak n deegame tɩ yaa a Zezi n yaa tigingã taoor soaba. (Tʋʋma 16:4, 5) Rũndã-rũndã me, a Zeova Kaset rãmbã sak n deegame tɩ yaa a Zezi la b taoor soaba. (Matɩe 23:9, 10) B Siglgã tara taoor lʋɩtb Sulli, sẽn yaa rap sẽn tar minim sõma. Yaa nin-kãensã n get b tigimsã sõor sẽn yɩɩd 100000 yelle, n wilgd-b sor Wẽnnaam tũubã pʋgẽ, b tẽebã kengr yĩnga. Tiging fãa pʋgẽ, b yãkda rap sẽn kõt mak-sõng tɩ b yaa yel-gɛtba. Yel-gɛtbã geta tigingã neb yell ne nonglem.—Karm-y 1 Pɩɛɛr 5:2, 3.

A Zeova Kaset rãmbã sigla sõma n moond koe-noogã la b sõngd neb tɩ b lebgd a Zezi karen-biisi. Sẽn na yɩl tɩ koɛɛgã ta zĩig fãa, b yiisda sɛb Biiblã zãmsg yĩnga, n lebgd seb-kãens buud-goam sõor sẽn yɩɩd 500 pʋsẽ n kõt nebã. B moonda koɛɛgã zak-zak wa tʋm-tʋmdbã sẽn da maandã. (Tʋʋma 20:20) Ned ning fãa sẽn date, b kẽnd n zãmsd-a-la Biiblã. B fãa sẽn baood n yɩɩd yaa Wẽnnaam daabã maanego, la neb a taabã sõngre. Woto kɩtame tɩ b yaa nin-buiid sẽn tar sũ-noogo.—Karm-y Yɩɩl Sõamyã 33:12; Tʋʋm 20:35.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak 19 soabã. A Zeova Kaset rãmbã n yiis-a.