Tara yõod tɩ y bãng a Zezi bɩ?

“Yãmb na bãng sɩda, la sɩdã na kõ yãmb lohorem.”—ZÃ 8:32.

BIIBLÃ pʋgẽ d yãta sɩd ning sẽn tõe n sõng-d tɩ d paam d meng ne tagsa nins nebã sẽn tar a Zezi zug n pa wʋmd b võore, la sẽn tudgd-ba. La rẽ yĩnga d sẽn tẽed bũmb ning a Zezi zugã tara yõod bɩ? N-ye. Tara yõod ne a Zeova la a Zezi. Rẽnd segd n talla yõod ne tõnd me.

● Bõe yĩng tɩ y sẽn tẽed bũmb ningã tar yõod ne a Zeova? Bala, “Wẽnnaam yaa nonglem.” (1 Zã 4:8) A Zeova ratame tɩ d vɩɩmd ne sũ-noog wakat sẽn kõn sa yĩnga. A Zezi yeela woto: “Wẽnnaam nonga dũniyã [rat n yeel tɩ ãdem-biisã] hal tɩ b kõ b Biigã sẽn ka to, tɩ ned ning fãa sẽn tẽed bãmb . . . na paam vɩɩm sẽn ka sɛta.” (Zã 3:16) Wẽnnaam tʋma a Biigã t’a wa ki tõnd fãagr yĩnga, n pak sor tɩ d tõe n wa vɩɩmd wakat sẽn kõn sa tẽngã sẽn na n lebg arzãnã zugu. Woto la a sɩng n data. (Sɩngre 1:28) Wẽnnaam data ne a sũur fãa n kõ vɩɩm sẽn kõn sa wã neb nins sẽn baood n bãngd sɩdã a Biigã zugu, la b toeemd b vɩɩmã tɩ zemsd ne rẽ wã.—Rom dãmba 6:23.

● Bõe yĩng tɩ y sẽn tẽed bũmb ningã tar yõod ne a Zezi? A Zezi me nonga ãdem-biisã. A sak n kii tõnd yĩng n wilg t’a nong-d lame. (Zã 15:13) A ra miime tɩ yaa ne rẽ maasem bal la nebã tõe n paam fãagre. (Zã 14:6) Rẽnd a Zezi sẽn dat tɩ neb wʋsg rɩ a maoongã yõodã pa lingr ye. Yaa rẽ n kɩt t’a yeel a karen-biis hakɩkã tɩ b sõng dũniyã gill neb tɩ b bãng Wẽnnaam noyã la a raabã.—Matɩe 24:14; 28:19, 20.

● Bõe yĩng tɩ d sẽn tẽed bũmb ningã segd n tall yõod ne-do? Tags-y bũmb nins sẽn tar yõod wʋsg ne-yã yelle. Wala makre, y laafɩ wã la y zakã rãmba. Y tʋlla ne y sũur fãa tɩ yãmb ne y nebã tar yĩns laafɩ la vɩɩm sẽn tar bark bɩ? Ne a Zezi maasem, a Zeova kɩtame tɩ yãmb ne y nebã tõe n wa paam yĩns laafɩ sẽn zems zãnga, n vɩɩmd wakat fãa dũni-paalgã pʋgẽ, tɩ toog la namsg ka le beẽ ye. (Yɩɩl Sõamyã 37:11, 29; Wilgri 21:3, 4) Yãmb sɩd rata vɩɩm a woto bɩ? Sã n yaa rẽ, bũmb la y segd n maane.

Tẽeg-y tɩ Biiblã vɛrse ning sẽn be sõsgã sɩngrẽ wã yeelame tɩ “yãmb na bãng sɩda, la sɩdã na kõ yãmb lohorem.” D sã n bãng sɩdã a Zezi zugu, la tʋʋmd ning a sẽn tar Wẽnnaam daabã pidsg pʋgẽ wã, tõe n kɩtame tɩ d wa paam d meng ne yel-wẽndã la kũumã yembdo. Sẽn na yɩl n paam y meng ne yembd kãng wẽnem sẽn ka to wã, segdame tɩ y ‘bãng sɩdã.’ Bao-y n bãng-y sɩdã la y bãng yãmb ne y nebã sẽn tõe n maan to-to n dɩ a yõodo. A Zeova Kaset rãmbã na n sõng-y-la ne yamleoogo.