Wẽnnaam Gomdã sẽn yete
Wẽnnaam na n lugla goosneema t’a soog dũniyã gill bɩ?
Sõs-kãngã pʋgẽ, b leokda sogsg nebã sẽn mi n sokdẽ, n wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.
1. Bõe yĩng tɩ goosneema sẽn na n soog dũniyã gill yaa tɩlae?
Rũndã-rũndã, zu-loees nins sẽn namsd ãdem-biisã wae n bee zĩig zãnga. Wala makre, tẽns kẽer pʋsẽ, nebã fãa la bal yaa naong rãmba, la neb b sẽn wẽgde. La tẽns a taab pʋsẽ, wõnda neb wʋsg tarame tɩ zʋʋg sẽn yaa tɩlaeyã. Yaa goosneema sẽn na n soog dũniyã gill bal n na n tõog n pʋɩ dũniyã laogã tɩ sek nebã fãa.—Karm-y Koɛɛg Soab 4:1; 8:9.
2. Ãnda n tõe n yɩ goosneema kãng naaba?
Nebã wʋsg pa rat tɩ nin-yɛng soog dũniyã gilli, bala, rao bɩ pag kae n tõe n dɩ naam a woto tɩ zems ye. Ãdem-biig kae n tõe n ta nebã fãa yam ye. Sẽn paase, Biiblã wilgame tɩ ninsaal mi n tõe a to n maand-a wẽnga. Ãnda n tõe n yeel t’a sã n deeg naam, pa na n tol n yɩ woto? Nebã miime tɩ nin-toaag sã n soog dũniyã gilli, pa na n yɩ sõma ye.—Karm-y Yelbũn 29:2; Koɛɛg Soab 8:9.
Wẽnnaam a Zeova yãka a Bi-ribl a Zezi t’a na n soog ãdem-biisã wakat fãa. (Luk 1:32, 33) A Zezi vɩɩmda tẽngã zugu. A maaga bãad-rãmba, a zãmsa sik-m-mens rãmb tɩ b bãng Wẽnnaam, la a sõs ne kamba. (Mark 1:40-42; 6:34; 10:13-16) Rẽnd a Zezi toga ne naamã.—Karm-y Zã 1:14.
3. Goosneema tõe n sooga dũniyã gill sɩda?
Wẽnnaam yãka a Bi-riblã t’a na n zĩnd saasẽ n dɩ naam tẽngã zugu. (Daniɛll 7:13, 14) Wa sẽn pa tɩlae tɩ naab zĩnd a soolmã tẽns fãa pʋsẽ n yaool n tõog n ges a nin-buiidã yellã, pa tɩlae t’a Zezi me zĩnd tẽngã zug n dɩ naam ye.—Karm-y Matɩe 8:5-9, 13.
Rẽ yĩnga nebã fãa na n saka a Zezi naamã bɩ? Ayo. Yaa sẽn nong-b tɩrlmã bal n na n sake. La a Zeova na n menesa neb nins fãa sẽn pa na n sak a Zezi sẽn yaa na-tɩrg la sẽn nong nebã.—Karm-y Yɩɩl Sõamyã 37:9-11.
4. Bõe la dũni gill naabã na n maane?
A Zezi tigimda dũniyã sik-m-mens rãmbã fãa wa pe-kɩɩm sẽn tigimd a rũmsi, n zãmsd-b Wẽnnaam noyã. (Zã 10:16; 13:34) Nin-kãensã teenda a Zezi la a naamã ne b sũy fãa. (Yɩɩl Sõamyã 72:8; Matɩe 4:19, 20) Dũniyã gill zugu, b moondame n wilgd nebã t’a Zezi lebga rĩma.—Karm-y Matɩe 24:14.
Ka la bilfu, a Zezi na n menesa ninsaalbã goosneema-rãmb sẽn pa sõma wã. A yãka a karen-biis kẽer tɩ b na n kẽng saasẽ n tɩ naag-a n dɩ naam. (Daniɛll 2:44; 7:27) A Zezi goosneema wã na n sõnga sẽn na n vɩɩmd-b tẽngã zugã fãa tɩ b bãng a Zeova, la a lebs n lugl arzãn ning sẽn da zĩnd hal sɩngrẽ wã.—Karm-y Ezai 11:3, 9; Matɩe 19:28.
[Foto seb-neng 11]
Y sã n dat vẽnegr n paase, bɩ y karem seb-kãngã sak a 8 wã. A Zeova Kaset rãmbã n yiis-a.
[Foto seb-neng 11]
Biiblã sɩd yetame tɩ bõe?
