Wẽnnaam pa tar pag a sẽn kẽed ne n dogd kamb ye. Yẽ la bũmb fãa Naanda. A naana ninsaalbã tɩ b tõe n dɩk a togs-n-taare. Rẽ n so tɩ b boond a Ãdem sẽn yɩ pipi ninsaalã tɩ “Wẽnnaam biiga.” Woto me, yaa Ba wã sẽn naan a Zezi n wõneg a mengã la b sẽn boond-a tɩ “Wẽnnaam biigã.”—Karm-y Luk 3:38; Zã 1:14, 49.

Wẽnnaam naan a Zezi n yaool n naan d yaab a Ãdem. A Zezi la a reng n naane, n tũnug ne-a n naan malɛgsã la bõn-naands a taabã fãa. Yaa rẽ la Biiblã sẽn boond a Zezi tɩ “Bi-kãseng sẽn yɩɩd bõn-naandsã fãa” wã.—Karm-y Kolos rãmb 1:15, 16.

Nand tɩ b rog a Zezi Betlehɛm, a ra yaa malɛk n be saasẽ. Wẽnnaam dɩka a Zezi vɩɩmã n ning a Maari pʋgẽ wã t’a rog-a t’a yɩ ninsaala.—Karm-y Luk 1:30-32; Zã 6:38; 8:23.

Bõe yĩng tɩ Wẽnnaam kɩt t’a Zezi wa tẽngã zugu? Bõe la a maan-yã? Y tõe n paama sogs-kãensã leoor Biiblã pʋgẽ. B leoorã na n sõng-y lame tɩ y bãng bũmb nins Wẽnnaam ne a Zezi sẽn maan yãmb yĩngã, la y nan rẽ.