Wẽnnaam sẽn vẽneg a Miise t’a reng n gom Mesi wã yellã, maana yʋʋm kobs-yopoe t’a sẽn togs bũmb ningã yaool n na n pidsi. A Zezi sɩd roga Betlehɛm. Na maam yʋʋm 30, rat n yeel tɩ yʋʋmd 29 a Zezi rogmã poore, bũmb a Daniɛll sẽn da reng n togs Mesi wã waoogã zug n paam pidsgu. A Zezi sɩd reega lisgu, tɩ Wẽnnaam kɩt t’a vʋʋsem sõngã sig a zugu, tɩ wilg t’a yãk-a lame. Yagengã bɩ Mesi wã b sẽn da sɩng n gũudẽ wã sɩd waa a sẽn da tog n wa wakat ningã bal kɛpɩ.

Wakat kãng tɛk la a Zezi sɩng a tʋʋmdã, n ‘moond Wẽnnaam soolem koe-noogo.’ (Luk 8:1) Wa b sẽn da pĩnd n togsã, a sɩd yɩɩ nin-sõngo, nin-bʋgsgo, tɩ neb a taabã yell ra pak-a. A ra zãmsda nebã ne nonglem, t’a sẽn yet bũmb ningã ra sõngd-b wʋsgo. A maaga “bãase, la yĩns tood buud fãa” me, tɩ wilg tɩ Wẽnnaam ra bee ne-a. (Matɩe 4:23) Kambã la kãsembã fãa ra wata a Zezi nengẽ, n da tõe n yeel wa a Zezi karen-biig a ye sẽn yeelã. A yeela woto: “Tõnd yãa Mesi” wã.—Zã 1:41.

A Zezi reng n togsame tɩ nand t’a sɩng a naamã rɩɩb dũniyã zugu, zaba, tẽn-digimdg la yel-beed a taab n na n nams ãdem-biisã. A yeela nebã tɩ b “gũ.”—Mark 13:37.

A Zezi yɩɩ ned sẽn zems zãnga, sẽn sak Wẽnnaam wakat fãa. Baasgo neb n kisg-a, hal n wa baas n kɩt tɩ b kʋ-a. A kũumã yɩɩ yaoodo, sẽn kɩt tɩ tõnd tõe n paam d yaab a Ãdem ne a Hawa sẽn kong bũmb ningã, rat n yeel tɩ vɩɩm sẽn kõn sa arzãn pʋgẽ, tẽngã zugu.

A Zezi sẽn ki wã, la Wẽnnaam sẽn vʋʋg-a rasem a tãab poor t’a lebg malɛk sẽn tar tõog wʋsgã yaa bũmb b sẽn da pĩnd n togse. A vʋʋgrã poore, a vẽnega a meng t’a karen-biis sẽn yɩɩd bãmb 500 yã-a. Nand t’a rʋ saasẽ, a yeela a karen-biisã tɩ b moon koe-noogã sẽn gomd yẽ la a Rĩungã yellã tɩ “nebã buud fãa” wʋme. (Matɩe 28:19) La b moona koɛɛgã n ta zĩ-bʋgo?

—Tika Matɩe, Mark, Luk, Zã, 1 Korẽnt dãmba.