1. D sẽn tar manesem ning koe-moonegã pʋgẽ wã tara yõod bɩ? Rɩk-y makre. (Ges-y fotã sẽn be yĩngrã.)

SAAM-BIIG ne a pag n da moond koɛɛgã, n boond nebã tɩ b wa Kirist kũumã tẽegre. B wa n sõsda ne paga, tɩ saagã wa sɩng niibu. B rɩka b maasem tɩɩg a ye n kõ pagã. Pagã sũur yɩɩ noog ne rẽ, t’a yãk yam n wa tẽegrã. A wa n yeelame t’a ra pa tẽr bũmb ning saam-biigã ne a pagã sẽn yeel yẽ wã sõma, la t’a pa tol n yĩm manesem ning b sẽn tall ne-a wã ye. Saam-biigã ne a pagã tũ a Zezi saglg ning sẽn be Matɩe 7:12 pʋgẽ wã.

2. Sagl-bʋg la a Zezi kõ-yã, la wãn to la d tõe n tũ sagl-kãnga?

² A Zezi yeela woto: “Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.” (Mat. 7:12) Wãn to la d tõe n tũ sagl-kãnga? Yell fãa taoore, d sok d meng woto: ‘M sã n da be m to wã zĩigẽ, manesem bʋg la m na n dat t’a tall ne-ma?’ Rẽ poore, d modg n tall manesem kãng ne d to wã.—1 Kor. 10:24.

3, 4. a) Bõe yĩng tɩ pa d tẽed-n-taasã sʋk bal la d segd n tũ a Zezi saglgã? b) Bõe yell la d na n gom sõs-kãngã pʋgẽ?

³ La a Zezi ratame tɩ d tũ a saglgã d tẽed-n-taasã sʋk  bal bɩ? Ayo. A ra gomda manesem ning d sẽn segd n tall ne neb buud fãa wã yelle, baa ne d bɛɛbã menga. (Karm-y Luk 6:27, 28, 31, 35.) Rẽnd yɩta sõma tɩ d tũ sagl-kãng d sẽn wat n moond koɛɛgã, bala neb nins d sẽn moondã wʋsg na n saka koe-noogã, n wa “paam vɩɩm sẽn ka sɛtã.”—Tʋʋ. 13:48.

⁴ Masã, d na n leoka sogsg a naase. Yaa sogsg d sẽn segd n ning d yamẽ d sã n wa moond koɛɛgã. Sogs-kãens la woto: Yaa nin-bʋg buud la m sẽn sõsd ne wã? Zĩ-bʋg la m sõsd ne-a? Wakat bʋg la nebã rat tɩ d sõs ne-b n yɩɩda? Wãn to la m segd n sõs ne-ba? Wa d sẽn na n yã wã, d sã n wae n sokd d mens sogs-kãensã, na n sõng-d lame tɩ d bãng neb nins d sẽn moondã sẽn nonge, n tõog n sõs ne b ned kam fãa.—1 Kor. 9:19-23.

5. D sã n wa sõsd ne neda, sogs-bʋs la d tõe n sok d mense?

⁵ Koɛɛgã mooneg sasa, d wae n sõsda ne nebã yembr-yembre. Ned kam fãa zʋg la a yɛl yaa toor ne a to. Y sã n wa sõsd ne ned bɩ y sok y meng woto: ‘Sã n da yaa maam la nin-kãngã, tɩ ned wa na n sõs ne-ma, manesem bʋg la m na n dat t’a talle? A sã n yɩ tao-tao n tags tɩ m yaa woto wall woto, n pa reng n bao n bãng-ma, m sũur na yɩ noog sɩda?’ D sã n sok d mens sogs-kãensã, na n sõng-d lame tɩ d maan ned kam fãa bũmb ning d sẽn dat t’a maan tõndã.

6, 7. Koe-moonegã sasa, d sã n seg ned t’a gom tɩ yaa wa a sũur yika ne-do, bõe la d segd n maane?

⁶ Ned ka be n dat tɩ b tags t’a yaa nin-toaag ye. Wala makre, kiris-nebã maanda b sẽn tõe fãa n tũud Biiblã sẽn sagl tɩ d kɩt tɩ d “goamã zĩnd bark wakat fãa” wã. (Kol. 4:6) La d sẽn yaa koangdbã, d tõe n wa yeela gomde, n wa maand d bãngẽ. (Zak 3:2) Sã n yaa ned la d tudg n gome, yaa vẽeneg tɩ d pa na n dat t’a tags tɩ d yaa sũ-to-ned ye. D sẽn dat yaa a sẽn na n yɩ wʋmda. Woto wã, ned sã n gom tõnd tɩ d sũur sãame, tõnd me pa segd n yɩ wʋmd sɩda?

⁷ Koe-moonegã sasa, y sã n seg ned t’a soabã gom tɩ yaa wa a sũur yika ne-yã, yɩta sõma tɩ y mao n yɩ wʋmda. Tõe t’a tara zu-loees a tʋʋmã zĩigẽ, wall a lekollẽ wã. Tõe me tɩ yaa bãag n namsd-a. Sɩd me, neb la d zoe n seg koe-moonegã sasa tɩ b sũy yik ne-do. La b wʋsg toeemame, d sẽn kell n gom ne-b ne bʋgsem la waoogrã.—Yel. 15:1; 1 Pɩɛ. 3:15.

8. Bõe yĩng tɩ d segd n moond koɛɛgã neb buud fãa?

⁸ D moonda neb buud toor-toore. Yʋʋmã noorã, Gũusg Gasgã mi n tara sõsg t’a gom-zugã yaa: “Biiblã toeemda neba.” Sõs-kãng pʋgẽ, b goma neb 60 la zak yelle. B kẽer da yaa wagda, rã-yũudba, yoaadba, bi-bees la dorogɛɛr-dãmba. B sãnda ra yaa politik taoor-dãmba, tũudum taoor-dãmba, wall neb sẽn da modgd n na n paam naam b tʋʋmã zĩisẽ. La nin-kãensã fãa wʋma koe-noogã, n sak tɩ b zãms-b Biiblã. B toeemame, n lebg a Zeova Kaset rãmba. Woto wilgdame tɩ d pa segd n tẽ tɩ neb n be n pa tol n tõe n sak koe-noogã ye. (Karm-y 1 Korẽnt dãmb 6:9-11.) D miime tɩ neb buud toor-toor  tõe n saka Rĩungã koɛɛgã.—1 Kor. 9:22, MN.

9. Bõe yĩng tɩ d pa segd n maan yaar nebã zagsẽ?

⁹ D wae n sõsda ne nebã b zagsã pʋsẽ. (Mat. 10:11-13) D sã n paam tɩ neb a taabã pa maand yaar tõnd zakã pʋgẽ, noom-d lame. Sɩd me, tõnd zakã tara yõod ne-do. D ratame t’a yɩ zĩig d sẽn tõe n zĩnd bãan tɩ rabeem kaẽ ye. Rẽnd d sã n wa moond koɛɛgã zak-zaka, d segd n gũusame n da maan yaar nebã zagsẽ ye.—Tʋʋ. 5:42.

10. Wãn to la d tõe n gũus n da wa sãam d koe-moonegã zĩigẽ nebã sũyã?

¹⁰ Rũnda-rũndã, dũniyã sẽn pid ne bi-beelmã kɩtame tɩ neb wʋsg gũusd b mens ne sãamba. (2 Tɩm. 3:1-5) D segd n gũusame n da maan bũmb sẽn tõe n kẽes-b rabeem n paas ye. Wala makre, y sã n ta zak noor n wẽ tɩ ned pa leoke, y tõe n dat n lɩkame n ges ned sã n beeme, wall y pak n kẽ n gilg n gẽes zakã rãmba. Tõe tɩ yaa y sẽn dat n moon neb wʋsgã yĩnga. (2 Tɩm. 4:5) Y rata ne sũur fãa n sõng nebã tɩ b bãng Wẽnnaam. (Rom 1:14, 15) La y sã n maan woto, pa na n sãam zakã rãmb sũy sɩda? B yagsã tagsg na n yɩɩ wãna? Bɩ d gũusi, n da maan bũmb sẽn na n sãam nebã sũy d koe-moonegã zĩigẽ ye. Tʋm-tʋmd a Poll yeelame: “Tõnd maoodame n ka rat n lub neda, baa sẽn yaa ne bũmb ning ye, tɩ ned da gom Wẽnnaam tʋʋmdã wẽng ye.” (2 Kor. 6:3) D sã n pa maand yaar nebã zagsẽ, d manesmã tõe n sõngame tɩ b sak n kelg-do.—Karm-y 1 Pɩɛɛr 2:12.

11. Bõe yĩng tɩ ned sã n sãam d sẽkã bɩ pa noom-do?

¹¹ D fãa la bal tara tʋʋm wʋsgo. Sẽn na yɩl n tõog n maan bũmb nins fãa d sẽn segd n maanã, yaa tɩlae tɩ d sigl d tʋʋmã sõma. (Ef. 5:16; Fil. 1:10) Bũmb sã n wa kɩt tɩ d pa tõog n maan d sẽn da magã fãa, sãamda d sũuri. Rẽ n so tɩ ned sã n wa d nengẽ n pa sõs n kaoose, a sẽn mi tɩ d tara bũmb a taab n segd n maanã, noom-d lame. Woto wã, wãn to la d tõe n tũ a Zezi saglgã, n wilg tɩ d waoogda nebã moonegã sasa?

12. Wãn to la d tõe n bãng wakat ning nebã sẽn dat tɩ d sõs ne-b n yɩɩdã?

¹² Wakat bʋg la nebã rat tɩ d sõs ne-b n yɩɩda? Sok-y y meng woto: ‘Wakat bʋg la tõnd moonegã zĩigẽ neb wae n be b zagsẽ wã? Wakat bʋg la b tar sẽk n na n sak n kelge?’ Yɩta sõma tɩ d modgd n kẽnd n kaagd-b wakat kãense. Zĩis kẽere, yaa zaabr wall zĩ-sobd la d tõe n yã nebã b zagsẽ. Sã n yaa woto yãmb babgẽ wã, y tõe n sigla y tʋʋmã, n tõog n tɩ sõs ne-b wakat kãense. (Karm-y 1 Korẽnt dãmb 10:24.) D sã n modgd sẽn na yɩl n moon koɛɛgã wakat ning nebã sẽn be b zagsẽ wã, d tõe n kɩsa sɩd t’a Zeova na n ninga d tʋʋmdã barka.

13. Bõe la d tõe n maan n wilg tɩ d waoogda d kɛlgdbã?

¹³ Bõe me la d tõe n maan n wilg tɩ d waoogda d kɛlgdbã? D sã n seg ned sẽn dat n kelge, d na n moon-a-la koɛɛgã sõma, la d segd n gũusame n da sõs n kaoos wʋsg ye. Tõe t’a magd n na n maana bũmb  sẽn tar yõod ne-a. A sã n yeel t’a pa tar sẽka, d tõe n wilgame tɩ d na n sõsa koɛɛg-koɛɛga, la d sɩd modg n da kaoos ye. (Mat. 5:37) Nand tɩ d looge, yɩta sõma tɩ d sok a soabã wakat bʋg la a rat tɩ d lebg n wa sõs ne-a. Koe-moondb kẽer wae n yeta woto: “Mam nongẽ lame n lebg n wa sõs ne-yã. Y sã n date, y tõe n kõ-m-la y nimero tɩ m bool-y wall n tool-y mesaaz nand tɩ m wa.” D sã n ning d yamẽ tɩ d sẽn moond b rãmbã sẽkã pa waooge, d rɩkda tʋm-tʋmd a Poll togs-n-taare. A yeelame: “Mam ka baood m meng sõngr bal ye, la yaa neb wʋsg sõngre, sẽn na yɩlg tɩ b paam fãagre.”—1 Kor. 10:33.

14-16. a) Bõe yĩng tɩ d segd n kɩt tɩ d kɛlgdã bãng d waoongã võore? Rɩk-y makre. b) Wãn to la tigims sull yel-gɛt a ye wae n sõsd ne nebã?

¹⁴ Mams-y wa ned sẽn na n wa yãmb zakẽ wã tɩ yãmb pa mi-a ye. La a taame n sɩng yãmb sogsgo, n baood n bãng yãmb sẽn nong bũmb ninsã. Y na n sokda y meng nin-kãngã sẽn yaa ned ninga, la a sẽn dat bũmb ninga. Y sẽn pa rat n sãam a sũurã yĩnga, tõe tɩ y na n kelg-a-la bilfu, la y kʋʋg sõsgã. La nin-kãng sã n da yeel yãmb t’a yaa logtore, la tɩ bãmb gilgdame n wilgd nebã b sẽn tõe n maan to-to n gil bãas kẽere, sãmbg kae tɩ y na n maaga y yĩng  n kelg-a. Sɩd me, ned sã n wa na n sõs ne-do, d nonga a soabã sẽn na n wilg-d a sẽn yaa ned ninga. Woto wã, d manesem segd n yɩɩ wãn koɛɛgã mooneg sasa?

¹⁵ Tẽns wʋsgo, d sã n kẽ zak pʋgẽ, d segd n deng n wilga d waoongã võore. Yaa sɩd tɩ d tara kibay sẽn tõe n naf d kɛlgdã, la mams-y wa d sẽn na n ta, n pa wilg tõnd sẽn yaa ned ninga, n sok d kɛlgdã woto: “Ninsaalbã zu-loeesã sʋka, bʋg la y rat tɩ sa pipi?” Yaa d sẽn dat n bãng d kɛlgdã tagsgo, n tõog n bãng Biiblã vɛrse ning d sẽn tõe n tik n sõs ne-a wã yĩng la d sẽn sok woto wã. La d kɛlgdã tõe n sokda a meng yaa: ‘Nin-kãngã yii yɛ, la bõe yĩng t’a sokd maam sogs-kãensã? Yaa bõe la a rata?’ Rẽnd d segd n kɩtame tɩ sõsgã zĩnd yamleoog ne d kɛlgdã. (Fil. 2:3, 4) Wãn to la d tõe n maan dẽ?

¹⁶ Tigims sull yel-gɛt a ye wilga yẽ sẽn wae n sɩngd sõsg to-to. A sã n seg neda, a pʋʋsd-a lame, la a wilg-a Yãmb dat n bãnga sɩdã bɩ? seb-vãoogã, la a yeel woto: “Rũndã, tõnd pʋɩta seb-kãngã yãmb sakẽ wã. A leokda sogsg a yoob neb wʋsg sẽn mi n sokd b mense. Yãmb dẽnd la woto.” Saam-biigã yeelame tɩ moonegã zĩigẽ nebã fãa la bal sã n bãng tõnd waoongã võore, b basda b yam bilfu, tɩ d tõe n sõs ne-ba. Sẽn na yɩl n kẽng taoor ne sõsgã, tigims sull yel-gɛtã sokda a kɛlgdã yaa: “Sogs-kãensã sʋka, bʋg la y zoe n sok y menga?” A sã n wilg sokrã, saam-biigã lakda seb-vãoogã, n wilga Biiblã sẽn leokd sokrã to-to. La kɛlgdã sã n pa wilg sokre, saam-biigã pa pẽdgd-a ye. A yãkda sokr a ye, tɩ b sõse. La yaa vẽeneg tɩ d tõe n sɩnga sõsg ne manesem buud toor-toore. Zĩis kẽere, d pa segd n pʋʋs d kɛlgdã yĩngr-yĩngr bal la d sɩng sõsg ye. Rẽnd sẽn na yɩl tɩ d moonegã zĩigẽ nebã kelg-do, d segd n gesa b sẽn minim n sõsd ne taab to-to wã, n sõs ne-ba.

17. Wa d sẽn yã sõs-kãngã pʋgẽ wã, wãn to la d tõe n tũ a Zezi saglgã?

¹⁷ Wa d sẽn yã sõs-kãngã pʋgẽ wã, wãn to la d tõe n tũ a Zezi saglgã koɛɛgã mooneg sasa? Yaa d sẽn na n ning d yamẽ tɩ ned kam fãa zʋg la a yɛl yaa toor ne a to. D gũus n da maan yaar nebã zagsẽ ye. D moon koɛɛgã wakat ning nebã sẽn be b zagsẽ, la b tar sẽk n na n kelge. La d mao tɩ d sẽn sɩngd sõsgã to-to wã zĩnd yamleoog ne d moonegã zĩigẽ nebã.

18. Bõe yĩng tɩ d segd n maand d moonegã zĩigẽ nebã bũmb nins d sẽn dat tɩ b maan tõndã?

¹⁸ Koe-moonegã sasa, d sã n maand nebã bũmb nins d sẽn dat tɩ b maan tõndã, wata ne nafa wʋsgo. D sã n tar manesem-sõngo, d wilgdame tɩ Biiblã sagls tũub yaa sõma, la waoogd d Ba sẽn be saasẽ wã. (Mat. 5:16) D sã n waoogd nebã, tõe n kɩtame tɩ b wʋsg sak n zãms Biiblã. (1 Tɩm. 4:16) La d sẽn moond b rãmbã saka koe-noogã tɩ b pa sak me, d miime tɩ d maanda d sẽn tõe fãa. (2 Tɩm. 4:5) Bɩ d ned kam fãa rɩk tʋm-tʋmd a Poll togs-n-taare. A yeelame tɩ yẽ “maanda bũmb fãa Koe-noogã yĩnga.” (1 Kor. 9:23) Woto yĩnga, bɩ d fãa kell n tũ a Zezi saglgã koe-moonegã sasa.