A Simita * ra yaa pag sẽn tar yʋʋm 35 n be Daka, Bãngladɛs soolmẽ wã. A ra nonga nebã, n yaa nimbãan-zoɛt me. A ra yaa pag sẽn nong a menga, la sẽn tʋmd wʋsgo. A ra maanda a sẽn tõe fãa n na n sõng a taabã tɩ b bãng Wẽnnaam. La a wa n lʋɩɩ bãaga, n ki semen a ye pʋgẽ, t’a zakã rãmb la a zo-rãmbã sũy sãam wʋsgo.

A Zak ne a pagã me ra tara yʋ-noog wa a Simita. B ra zemsa yʋʋm 30. La daar a ye, b yii Niuyork n kẽng Etazĩni babg a ye n na n tɩ ges b zo-rãmba, tɩ yel-beed paam-ba. B so-toakã sasa, b fãoo ne b mobillã n maan kaalem, tɩ b zakã rãmbã, b zo-rãmbã la b tʋmd-n-taasã sũy sãam wʋsgo.

D fãa neeme tɩ wẽngã la namsgã bee zĩig zãnga. Zabã kʋʋda sodaas la neb a taaba. Bi-be-tʋʋmã la nen-kɛglmã namsda neb wʋsgo. Agsɩdã-rãmbã kʋʋda kãsemb la kamba, naong rãmb la rakãag-rãmba. Yaa woto me ne bãas nins sẽn komsd nedã. Sabab-wẽnsã kʋʋda neb buud fãa. Bu-welsgã la wẽgbã bee zĩig zãnga. Tõe tɩ yel-kãensã sʋka, a ye n zoe n paam yãmba.

Rẽ n so tɩ d mi n sokd d mens woto:

• Bõe yĩng tɩ yel-beed mi n paam nin-sõngo?

• Yaa Wẽnnaam n wat ne yel-kãensã bɩ?

• Yel-beedã wata yaar bɩ, bɩ yaa ninsaalbã sababo?

• Yaa Karma * wã n kɩt tɩ nebã namsdẽ bɩ?

• Wẽnnaam sẽn tõe fãa wã, bõe yĩng t’a pa kogend nin-sõmsã?

• Wẽngã la namsgã na n wa saame bɩ?

Sẽn na yɩl n paam sogs-kãensã leoore, d segd n bao n bãnga sogsg a yiib leoore: Bõe yĩng tɩ yel-beedã beẽ? La bõe la Wẽnnaam na n maane?