Dũniyã gill zugu, neb milyõ-rãmb maanda Nowɛllã bʋʋm toor-toor yĩnga. Makre, kẽer naagda b zo-rãmb la b roagdb n kɩdemd sũ-noogo. Sãnda tagsda Wẽnnaam yell n yɩɩda, bɩ n sõngd naong rãmba. Nebã sẽn maand woto fãa wã pa maneg n yaa wẽng ye. La b sẽn maand bõn-kãensã Nowɛllã yĩngã pa zems ye. Bõe yĩnga?

Pipi, neb wʋsg sẽn maand Nowɛllã tẽedame tɩ yaa a Zezi rogem daar kibsa. La kʋdemdã yel-mitb wʋsg yaool n wilgdame tɩ ned baa a ye pa mi a Zezi sẽn dog daar ningã takɩ ye. Sebr a yembr (Le livre chrétien du pourquoi [angl.]) yeelame tɩ “pipi kiris-nebã pa yãk daar n na n tẽegd a Zezi rogem ye,” bala, “b ra pa rat n kẽes b meng ziri tũudum yel-maandɩ pʋgẽ ye.” Sɩd me, Biiblã zĩig baa ye pa wilgd t’a Zezi maana a rogem daar kibsa, wall ned a to rogem daar kibs ye. La a kõo a karen-biisã noor tɩ b tẽegd a kũumã daare.—Luk 22:19.

Yiib-n-soaba, bãngdb wʋsg sak n deegame tɩ bũmb nins b sẽn maand Nowɛllã daarã pa yit Biiblã pʋgẽ ye. Yaa ziri tũudum yel-maandɩ. Wala makre, d tõe n sõdga papa Nowɛllã, kũunã nebã sẽn kõt taabã, buuzi-rãmbã b sẽn yõgendã, nag-teedã b sẽn tar n nagsd b zagsã la bũmb a taaba, n paas Nowɛllã yɩɩlã. Rẽ wɛɛngẽ, sebr a yembr (Les Externes de l’Église catholique) soka woto: “Nowɛllã sasa, d sã n mi n kõt taab kũuni, la d nagsd d zagsã ne d pʋʋsgã roto, tõnd sʋkã neb a wãn n tagsd tɩ tõe tɩ d sẽn maandã yaa ziri tũudum yɛla?”

La tõe tɩ y sokda y meng sã n zemsame tɩ y naag n maan Nowɛllã ne a yel-maandɩ wã sẽn wõnd pa wẽngã. Sã n yaa woto, ad bũmb a tãab-n-soab y sẽn segd n bãnge. Wẽnnaam a Zeova pa rat tɩ b naag ziri tũudum yel-maandɩ tũudum hakɩkã pʋgẽ ye. A kɩtame tɩ no-rɛɛs a Amos togs pĩnd Israyɛll nebã sẽn da yaa tõtbã woto: ‘Mam kisa yãmb kibs rayã. Mam ka rat-b ye. Zãag-y maam ne y yɩɩlã bʋʋre.’—Amos 5:21, 23.

Bõe yĩng t’a sũur sãam ne-b woto? Be neere. Tẽeg-y bũmb nins Israyɛll rɩtg rĩungã neb sẽn maanã. B pipi rĩm a Zeroboam maana sãnem nag-bi a yiibu, n ning a ye Betɛll, la a ning a to wã Dan. Rẽ poore, a yeela nin-buiidã tɩ b ra le kẽng Zerizalɛm wẽnd-doogẽ wã n tɩ waoog Wẽnnaam a Zeova, la tɩ b kẽngd Dan la Betɛll n pʋʋsd nag-bi wã. Rĩmã yãka kibs raya, la maan-kʋʋdb me.—1 Rĩm dãmba 12:26-33.

Wõnda Israyɛll nin-kãensã sẽn maanã pa wẽng ye. Sɩd me, b maana bõn-kãensã fãa n na n waoog Wẽnnaam la b noog a sũuri. La Wẽnnaam sẽn kɩt t’a Amos la no-rɛɛsdb a taab togs bũmb ninsã wilgda vẽeneg t’a sũur pa noom ne Israyɛll nebã sẽn maanã ye. Ne no-rɛɛs a Malaki maasem, Wẽnnaam yeela woto: “Mam yaa Zu-soaba, mam ka tek ye.” (Malaki 3:6) Rẽ yĩnga gom-kãensã pa sõngd tõnd tɩ d bãng Wẽnnaam tagsg Nowɛllã ne a yel-maandɩ wã zug sɩda?

Neb milyõ-rãmb sẽn bãng bũmb nins d sẽn yã sõs-kãngã pʋgẽ wã yãka yam n pa le maand Nowɛll ye. Yʋʋmdã pʋgẽ, b mi n naaga b zo-rãmb la b roagdb n kɩdem sũ-noogo, wall b sõngd naong rãmba, wakat la daar ning b sẽn date.