Rẽ yĩnga y na sak n yeel sãan bɩ ned y sẽn pa mi sõma, t’a sẽn dat bũmb ning fãa bɩ a we n kos-y tɩ y na n maaname sɩda? Tõe tɩ woto yeelg na n yɩɩ toogo. La sã n yaa y zoa hakɩka, y yam pa na n yo ye. Sɩd me, ned wae n sakd n maanda a zoa raabo.

Biiblã wilgdame t’a Zeova maanda bũmb ning fãa a sẽn mi tɩ na n yɩ a nin-buiidã noogo. Makre, rĩm a Davɩɩd sẽn yɩ Wẽnnaam zoa wã yeela woto: “Zu-soaba, mam Wẽnnaam, yãmb bõn-bãnã yãmb sẽn maanã ne y tagsgã tõnd yĩngã yaa wʋsgo. . . . Bãmb sõor yaa wʋsg n yɩɩd tɩ ned ka tõe n togs n sɛ ye.” (Yɩɩl Sõamyã 40:6) A Zeova leb n maanda baa neb nins sẽn nan pa mi-a wã neere. Biiblã yeelame t’a ‘kõt-b-la rɩɩb tɩ sekdẽ, tɩ b sũy pit ne sũ-noogo.’—Tʋʋma 14:17.

A Zeova sẽn maand bũmb toor-toor n noogd ninsaalbã sũyã, a ratame tɩ neb nins sẽn dat n yɩ a zo-rãmbã me maan sẽn noogd a sũuri. (Yelbũna 27:11) La bõe la y tõe n maan n noog Wẽnnaam sũuri? Biiblã yeta woto: “Bɩ y ra yĩm tɩ maan neere, la sõng nebã ye, tɩ bõe, maand kãens nooma Wẽnnaam sũuri.” (Hebre dãmba 13:16) La rẽ yĩnga woto wilgdame tɩ ned sã n dat n noog Wẽnnaam sũuri, a segd n maanda nebã neer la a sõngd-b bal bɩ?

Biiblã paasa woto: “Tẽeb sã n kaẽ, ned ka tõe n ta Wẽnnaam yam ye.” (Hebre dãmba 11:6) Sɩd me, yaa a Abrahaam sẽn tẽ Wẽnnaamã poor la a ‘bool-a t’a zoa.’ (Zak 2:23) A Zezi Kirist me wilgame tɩ ned sã n dat n paam Wẽnnaam barka, a segd n ‘tẽe Wẽnnaam.’ (Zã 14:1) La wãn to la y tõe n paam tẽeb ning buud Wẽnnaam sẽn dat t’a zo-rãmbã tallã? Yaa y sẽn na n sɩng Biiblã sẽn yaa Wẽnnaam Gomdã zãmsgo. Rẽ na n sõngame tɩ y ‘sũurã pid ne a raabã bãngre,’ tɩ y bãng y sẽn tõe n maan to-to n ‘ta a yam ne bũmb fãa.’ Y sã n bãngd a Zeova n paasdẽ la y maand a raabã, y tẽebã pãng na n paasdame, tɩ yãmb ne-a zoodã pãng me paasdẽ.—Kolos rãmba 1:9, 10.