1-3. Zu-loe-bʋs la sẽn kẽ-b kãadmã segda? (Ges-y fotã sẽn be yĩngrã.)

RAO sẽn kẽ kãadem na maan yʋʋm 38 tɩ yẽ ne a pagã noom ne taab yeela woto: “F sã n dat tɩ f kãadem yɩ sõma, n sɩd sak n modgd rẽ yĩnga, a Zeova ningda barka.” Sɩd me, pag ne a sɩd tõe n kɩtame tɩ b kãadem yɩ noogo, la b teend taab zu-loees sasa me.—Yel. 18:22.

² La sẽn kẽ-b kãadmã mi n paamda “toog ne yĩngã yelle.” (1 Kor. 7:28) Bõe yĩnga? Yaa tɩ daar fãa zu-loeesã tõe n kɩtame tɩ pag ne a sɩd pa wʋmd taab sõma ye. B sẽn pa zems zãnga, b ned kam fãa tõe n maana bũmb n sãam a to sũuri, wall a togs gomd t’a to wã pa wʋm a võor sõma ye. (Zak 3:2, 5, 8) Neb wʋsg sẽn kẽ kãadem tara tʋʋm sẽn dɩkd sẽk wʋsgo, la b tar kom-bõoneg n zãada. Woto fãa kɩtame tɩ b mi n ya wʋsgo, n pa tar sẽk n zĩ ne taab ye. Ligdã zu-loeese, bãas wall zu-loees a taab tõe n kɩtame tɩ b pa le nong taab wa pĩndã, n pa le waoogd taab sõma me ye. Sẽn paase, baa b sã n modg tɩ b kãadmã yaa sõma, “yĩngã ratem biis” tõe n wa kẽe sʋk n sãam-a zãnga. Wala makre, yoobo, raglem, mo-beedo, no-koɛɛma, sũ-kiiri, sũ-yikri, la welgre.—Gal. 5:19-21.

 ³ Rũndã-rũndã sẽn yaa ‘yaoolem wakatã’ me kɩtame tɩ pa nana ne neb nins sẽn kẽ kãadmã ye. Bala neb wʋsg yaa beed dãmba, la neb sẽn pa zoet Wẽnnaam. (2 Tɩm. 3:1-4) Sẽn na n baase, sẽn kẽ-b kãadmã tara bɛ sẽn maand a sẽn tõe tɛk n dat n sãam b kãadmã. Tʋm-tʋmd a Pɩɛɛr yeela woto: “Yãmb bɛyã sẽn yaa Sʋɩtãanã gõoda wa gɩgemd sẽn kelemda, n baood a sẽn tõe n paam a soab n sãame.”—1 Pɩɛ. 5:8; Wil. 12:12.

4. Bõe yĩng tɩ d tõe n yeel tɩ d kãadem tõe n yɩɩ sõma?

⁴ Zapõ rao a ye yeela woto: “M da tara ligd zu-loeese. La m sẽn da pa yẽsd ne m pagã sõma wã kɩtame t’a pa mi a sẽn maandg ye. Sẽn paase, a lʋɩɩ bãag sẽn nan pa kaoose. Woto fãa mi n kɩtame tɩ d zabd taaba.” Yaa sɩd tɩ d pa tõe n gil kãadmã zu-loeesã fãa ye. La d tõe n modgdame tɩ zu-loe-kãens ra sãam d kãadmã ye. D sã n paam a Zeova sõngre, d kãadmã tõe n yɩ sõma. (Karm-y Yɩɩl Sõamyã 127:1.) D na n goma bũmb a nu d sẽn tõe n maan tɩ d kãadem yɩ sõma yelle. Rẽ poore, d na n yãa bũmb ning sẽn kɩt tɩ nonglem yaa tɩlae kãadem pʋgẽ wã.

5, 6. Bõe la pag ne a sɩd tõe n maan n wilg tɩ b tẽegda a Zeova yelle?

⁵ Neb sẽn kẽ kãadem sã n dat tɩ b kãadmã yɩ sõma, yaa tɩlae tɩ b nong a Zeova la b sakd-a. (Karm-y Koɛɛg Soab 4:12.) Pag ne a sɩd sã n tũud a Zeova saglsã, b wilgdame tɩ b tẽegda a yelle. Biiblã yeela woto: “Yãmb sã n dat n kẽng rɩtg wall goabga, yãmb tʋbã na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’ “ (Ezai 30:20, 21) Yaa pag ne a sɩd sẽn na n naagd taab n karemd Biiblã la b ‘wʋmd’ a Zeova goamã. (Yɩɩl 1:1-3) B sã n maand zak pʋgẽ Biibl zãmsgã n pa vaandẽ me, la b kɩtdẽ tɩ be yamleoog la kengd tẽebo, na n sõngame tɩ b kãadmã maneg n yɩ noogo. B sã n naagd taab n pʋʋsd daar fãa, b kãadmã na n yɩɩ sõma, t’a Sʋɩtãan dũniyã ra tõog n sãam-a ye.

⁶ A Zeraar sẽn be Alemayn wã yeela woto: “D sã n wa tar zu-loeese, pa rẽ bɩ d moor sã n wa yõsg taab tɩ wa ne sũ-sãamse, d tũuda Wẽnnaam Gomdã saglse, tɩ sõng-d tɩ d maan sũ-mar ne taab la d kõ taab sugri.” A paasame tɩ neb sã n dat tɩ b kãadem yɩ sõma, yaa tɩlae tɩ b maand sũ-mar ne taab la b kõt taab sugri. Pag ne a sɩd sã n naagd taab n tũud Wẽnnaam, b tẽegda a yelle. Woto la bãmb ne a Zeova zoodã na n paamd pãnga, tɩ b zems-n-taarã me pãng paasdẽ.

7. Wãn to la rao segd n ges a pag yelle?

⁷ Rao sẽn get a pag yell to-to wã tõe n sõngame tɩ b kãadmã yɩ sõma. Biiblã yeelame tɩ “Kirist yaa ned kam fãa zugu, la tɩ pag zug yaa a sɩda.” (1 Kor. 11:3) Woto rat n yeelame tɩ bõe? Rat n yeelame tɩ rao sẽn get a pag yell to-to wã segd n yɩɩ wa a Zezi sẽn get a karen-biisã yell to-to wã. A Zezi zɩ n maan a karen-biisã pãng wall a gom-b wẽng ye. A ra yaa nin-bʋgsga, sũ-mar soaba, nin-nana la sik-m-meng soaba.—Mat. 11:28-30.

8. Bõe la rao tõe n maan n paam t’a pagã nong-a la a waoogd-a?

⁸ Rao sã n yaa kiris-ned hakɩka, a pa na n yet a pagã wakat fãa t’a segd n  waooga yẽ ye. A na n zĩnda ne-a, n ning a yamẽ t’a ‘ka pãng wa yẽ, n maand-a sẽn zemse.’ (1 Pɩɛ. 3:7) Yẽ ne a pagã bee neb sʋk tɩ b pa be neb sʋk me, a segd n modgdame t’a no-goamã la a manesmã wilgdẽ t’a nand-a lame. (Yel. 31:28) Rao sã n get a pag yell sõma woto, na n kɩtame t’a pagã nong-a la a waoogd-a, t’a Zeova ningd b kãadmã barka.

9. Wãn to la pag tõe n wilg t’a sakda a sɩda?

⁹ D sã n nong a Zeova ne d sũur fãa, d na n sika d mens “Wẽnnaam sẽn yaa pãng soabã taoore.” (1 Pɩɛ. 5:6) Bũmb a ye pag sẽn tõe n maan n wilg t’a sakda a Zeova naamã yaa a sẽn na n teend a sɩdã. Biiblã yeela woto: “Pagba, bɩ y sak y sɩdbã wa sẽn zems Zu-soabã yam.” (Kol. 3:18) Yaa sɩd tɩ rao tõe n wa yãka yam n na n maan bũmb tɩ pa ta a pagã yam ye. La sã n mik tɩ pa kɩɩsd Wẽnnaam noyã, pagã sã n yaa pʋg-sõngo, a na n teela a sɩdã.—1 Pɩɛ. 3:1.

10. Bõe yĩng tɩ pag segd n sak a sɩda?

¹⁰ A Zeova kõo pag tʋʋmd sẽn tar yõod zakã pʋgẽ. A yaa a sɩdã ‘sõngda.’ (Sɩng. 2:18) Neb a yiib sẽn kẽ kãadem sã n wa rat n yãk yam n maan bũmb zakã fãa yĩnga, pagã tõe n togsa a tagsg rẽ zugu, la a na n maana rẽ ne waoogre. Rao sẽn tar yam na n maaga a yĩng n kelg a pagã. (Yel. 31:10-31) Pag sã n sakd a sɩda, tõe n waa ne sũ-noogo, bãan la zems-n-taar zakã pʋgẽ, tɩ pagã ne a sɩdã sũur noom ne b mense, b sẽn mi tɩ b tata Wẽnnaam yamã yĩnga.—Ef. 5:22.

11. Bõe yĩng tɩ yaa tɩlae tɩ pag ne a sɩd kõt taab sugri?

¹¹ Bũmb a to sẽn tõe n kɩt tɩ kãadem kell n yɩ sõma yaa pagã ne a sɩdã sẽn na n kõt taab sugri. B sã n ‘maand sũ-mar ne taaba, la b kõt taab sugri,’ b zems-n-taarã pãng na n paasdame. (Kol. 3:13) La b ned kam fãa sã n pa  yĩmd a to kongre, tɩ b moor sã n le wa yõsg taab bɩ a tẽegd rẽ, tõe n sãama b kãadmã. Roog sã n pusi, a pãngã boogdame. Woto me, sũ-yikr la sũ-kẽk tõe n kɩtame tɩ yaa toog ne pag ne a sɩd tɩ b kõ taab sugri. La b sã n kõt taab sugr wa a Zeova sẽn kõt sugrã, b kãadmã pãng na n paasdame.—Mii. 7:18, 19.

12. Bõe yĩng tɩ d tõe n yeel tɩ “nonglem luta yel-wẽn wʋsgo”?

¹² F sã n nong ned t’a soabã beeg-fo, f pa na n ‘tagsd wẽngã’ yell n pa basdẽ ye. Sɩd me, “nonglem luta yel-wẽn wʋsgo.” (1 Kor. 13:4, 5; karm-y 1 Pɩɛɛr 4:8.) Rẽnd d sã n nong d taabã, d pa na n sõt b sẽn beeg-dã sõore, tɩ sã n wa ta sõor ning d sẽn yãkã bɩ d pa le kõ-b sugr ye. Tʋm-tʋmd a Pɩɛɛr sẽn wa n sok a Zezi n na n bãng naoor a wãn la a segd n kõ ned sugrã, a Zezi leoka woto: “Naoor pisopoe la a yopoe.” (Mat. 18:21, 22, Sebr Sõngo) A Zezi gomdã wilgdame tɩ ned sã n beeg kiris-neda, a segd n kõ-a-la sugri, n pa ges a sẽn beeg-a wã sõor ye.—Yel. 10:12. *

13. D sã n dat n kell n yɩ sug-kõta, bõe la d segd n maane?

¹³ A Anɛt sẽn be Alemayn wã yeela woto: “Pag ne a sɩd sã n pa kõ taab sugri, wata ne sũ-kẽkã, la kɩt tɩ b pa le kɩs taab sɩd ye. Woto sãamda kãadem. B sã n kõ taab sugri, paasda kãadmã pãnga tɩ b nonglmã paasdẽ.” Sẽn na yɩl n kell n yɩ sug-kõta, y segd n nanda bũmb nins y to wã sẽn maand yãmb yĩngã, la y wilgdẽ tɩ y sũur nooma ne rẽ. Yɩta sõma tɩ y gũusd n get bõn-kãense, n pẽgd-a rẽ yĩnga. (Kol. 3:15) Woto, y yamã na n gãeyã bãane, y na n zemsda taaba, tɩ Wẽnnaam ningd-y bark me.—Rom 14:19.

14, 15. Sagl-bʋg la a Zezi kõ-yã? Neb sẽn kẽ kãadem sã n tũud a saglgã, wãn to la nafd-ba?

¹⁴ Yaa vẽeneg tɩ y ratame tɩ y taabã manesem sẽn yaa to-to ne yãmbã wilgdẽ tɩ b nand-y lame la b waoogd-y-yã. Y ratame tɩ y sã n na n togs ned y sũur gomd bɩ a kelg sõma, la a wilg tɩ paka yẽ me. La tõe tɩ y zoe n wʋma ned sẽn yet woto: “M na lebs-a a sẽn maan-mã.” Yaa sɩd tɩ ned sũur sã n yik wʋsgo, a tõe n goma woto. La Biiblã yeelame: ‘Ra yeel tɩ f na n maan-a-la wa a sẽn da maan foomã ye.’ (Yel. 24:29) Sɩd me, a Zezi kõo saglg sẽn yaa sõma n yɩɩda. Yell sã n wa be tõnd ne d to sʋka, d segd n tũu sagl-kãnga. A yeela woto: “Bũmb ning yãmb sẽn dat tɩ nebã maan yãmbã, bɩ yãmb me maan bãmb woto.” (Luk 6:31) A Zezi gomdã wilgdame tɩ d segd n maanda d taabã bũmb nins d sẽn dat tɩ b maan tõndã. D pa segd n lebs-b wẽng wẽng yĩng ye. Neb sẽn kẽ kãadem sã n dat n tũ a Zezi saglgã, b ned kam fãa na n maana a to wã neere, a sẽn dat tɩ b kãadmã yɩ sõma wã yĩnga.

¹⁵ Rao sã n wilgdẽ tɩ sẽn pak a pagã paka yẽ, t’a pagã me maand woto, b zems-n-taarã pãng na n paasdame. Afirikdisiid rao a ye yeelame tɩ yẽ ne a pagã modgd n tũuda a Zezi saglgã. A  paasame: “Yaa sɩd tɩ wakat ninga, d sũur mi n sãama ne taaba. La d ned kam fãa modgdame t’a manesem sẽn yaa to-to ne a to wã yɩ wa a sẽn dat t’a to wã maanã. A wilgdame t’a waoogda a to wã la a nand-a.”

16. Bõe la neb sẽn kẽ kãadem pa segd n maan taaba?

¹⁶ Y sã n wa be ne neba, y pa segd n gomd y pagã wall y sɩdã pãn-komsem yell ye. Y pa segd n maand rẽ sẽn na yɩl n maan laad meng ye. Y sã n gomd bũmb a sẽn maand wakat fãa tɩ pa noom-y yell me, pa zems ye. Tẽeg-y tɩ kãadem pa wags-taaba, tɩ y na n bao n bãng sẽn tar-a pãng n yɩɩda, ned ning sẽn tõe n tãs t’a koɛɛg lim a to, pa rẽ bɩ n gom n sãam a to sũur n yɩɩd ye. Yaa sɩd tɩ d fãa yaa koangdba, n mi n tõe n maan bũmb n sãam d to wã sũuri. La woto pa kõt sɩdã bɩ pagã sor t’a gom n ning a to wã yãnde, pa rẽ bɩ n tʋ-a wall a tolg n pãb-a ye.—Karm-y Yelbũn 17:27; 31:26.

17. Wãn to la sɩdbã tõe n wilg tɩ b tũuda a Zezi saglgã?

¹⁷ Buud kẽer neb getame tɩ rao sẽn maand a pag pãng wall sẽn pãbd-a yaa gãndaoogo. La Biiblã yetame: ‘Sũ-mar soab yɩɩda gãndaoogo. La ned sẽn tõe a meng yɩɩda sẽn zab-a zabr n deeg tẽnga.’ (Yel. 16:32) A Zezi Kirist sẽn yɩ nin-kãseng sẽn ka to wã yɩɩ yõk-m-meng soaba. Yɩl n tõog n dɩk a togs-n-taar baooda modgre. Rẽnd rao sẽn tʋʋd a pag wall a pãbd-a pa gãndaoog ye. A sãamda yẽ ne a Zeova zoodã. Yɩɩl-gʋlsd a Davɩɩd sẽn yɩ gãndaoogã yeela woto: “Bɩ y rig ne dabeem n da maan yel-wẽn ye. Bɩ y gom yãmb sũyã pʋsẽ yãmb gãas pʋsẽ, la bɩ y sĩndi.”—Yɩɩl 4:5.

18. Bõe yĩng tɩ nonglem yaa tɩlae kãadem pʋgẽ?

¹⁸ Karm-y 1 Korẽnt dãmb 13:4-7. Nonglem yaa tɩlae kãadem pʋgẽ. Biiblã yetame: “Bɩ y paas nimbãan-zoeer wʋsgo, la neerlem ne sik-m-menga, la sũ-bʋgsem ne sũ-mare. La sẽn paas bõn-kãens fãa, bɩ y maan nonglem sẽn yaa bũmb fãa loɛtg sɩd-sɩdã.” (Kol. 3:12, 14) Pagbã ne b sɩdbã segd n nonga taab ne nonglem hakɩka, n dɩkd a Zezi sẽn sak n ki tõnd yĩngã togs-n-taare. Neb sẽn kẽ kãadem sã n sɩd nong taab woto, baa fʋɩ pa na n tõog n sãam b kãadmã ye. Wala makre, b pãn-komsem, bãase, ligd zu-loeese, wall zu-loees b sẽn tõe n paam ne b roagdbã.

19, 20. a) Neb sẽn kẽ kãadem sã n dat tɩ b kãadmã yɩ sõma, bõe la b segd n maane? b) Bõe yell la d na n gom sõsg ning sẽn pʋgdã pʋgẽ?

¹⁹ Neb sẽn kẽ kãadem sã n dat tɩ b kãadmã yɩ sõma, b segd n nonga taaba, n kɩs taab sɩda, la b sakd n modgd rẽ yĩnga. B sã n wa tar zu-loeese, b pa na n welg taab ye. B na n maanda bũmb nins sẽn na n kɩt tɩ b maneg n nong taabã. Pagã ne a sɩdã sã n nong a Zeova la b nong taaba, b na n maana b sẽn tõe tɛk n welg b zu-loeesã, bala “nonglem ka sɛt abada.”—1 Kor. 13:8; Mat. 19:5, 6; Heb. 13:4.

²⁰ Rũndã-rũndã sẽn yaa toog wakatã, yɩl n tõog tɩ d kãadem yɩ sõma pa nana ye. (2 Tɩm. 3:1) La d sã n bao a Zeova sõngre, d tõogdame. Baasgo, sẽn kẽ-b kãadmã me segd n modgame tɩ yoobã sẽn piuug zĩig fãa wã ra wa sãam b kãadmã ye. Sõsg ning sẽn pʋgdã wilgda b sẽn tõe n maan dẽ to-to.