Sogsg Biiblã sẽn leokde
Bõe yĩng tɩ d segd n tẽegd a Zezi kũumã yell yʋʋmd fãa?
A Zezi kũumã paka sor tɩ d tõe n wa paam bark bʋse?—Ezai 25:8; 33:24.
Bũmb nan pa maan tẽng zug t’a yõodã ta a Zezi kũumã ye. A kiime sẽn na yɩl tɩ ãdem-biisã tõog n vɩɩmd wa Wẽnnaam sẽn sɩng datã. Wẽnnaam sẽn wa n naan ninsaalbã, b ra pa tar tʋls-wẽnse, n bẽedẽ la b kiidẽ ye. (Sɩngre 1:31) Yaa a Ãdem n yɩ sabab tɩ ninsaalbã lebg yel-wẽn-maandba. A Zezi kiime sẽn na yɩl tɩ d wa paam d mens ne yel-wẽndã la ne kũumã.—Karm-y Matɩe 20:28; Rom dãmb 6:23.
Wẽnnaam sẽn tʋm a Biigã t’a wa ki tõnd yĩngã wilgdame t’a nonga tõnd wʋsgo. (1 Zã 4:9, 10) A Zezi talla bur ne divẽ n wilg a karen-biisã b sẽn segd n maan to-to n tẽegd a kũumã yelle. D sã n tẽegd a Zezi kũumã yell yʋʋmd fãa, d wilgdame tɩ d sũur nooma ne bũmb ning Wẽnnaam la a Zezi sẽn maan n wilg tɩ b nonga tõndã.—Karm-y Luk 22:19, 20.
Ãnd dãmb n segd n wãb burã la b yũ divẽ wã?
A Zezi sẽn wa n na n wilg a karen-biisã b sẽn segd n tẽegd a kũumã yell to-to wã, a goma kaool yelle. (Matɩe 26:26-28) Kaool kãng paka sor tɩ neb sõor takɩ na n kẽng saasẽ, n tɩ yɩ rĩm-dãmb la maan-kʋʋdba. Baa sẽn yaa neb milyõ-rãmb n tẽegd a Zezi kũumã, yaa sẽn naag-b kaoolã pʋgẽ wã bal n wãbd burã la b yũud divẽ wã.—Karm-y Wilgr 5:10.
A Zeova sẽn sɩng neb nins sẽn na n lebg rĩm-dãmbã yãkrã kolga yʋʋm 2 000 masã. (Luk 12:32) D sã n mak nin-kãens sõorã ne neb nins sẽn na n vɩɩmd wakat sẽn kõn sa tẽngã zugã sõore, d mikdame tɩ b yaa bilfu.—Karm-y Wilgr 7:4, 9, 17.
Découvrez aussi…
KIBAY TÕND ZUGU
A Zeezi kũumã tẽegre
A Zeova Kaset rãmbã boond-y lame tɩ y wa naag-b n maan a Zeezi kũumã tẽegr yʋʋmd 2025, tʋʋlg kiuugã rasem a 2 daare.
Sogsg nebã sẽn wae n sokdẽ
Bõe yĩng t’a Zeova Kaset rãmbã sẽn maand Soaalã zaabr dɩɩbã to-to wã yaa toor ne tũudum a taabã nebã?
Yaoolem dɩɩbã bɩ a Zeezi kũumã tẽegrã yaa a Zeova Kaset rãmbã tigsg ning sẽn tar yõod n tɩ yɩɩdã. Biiblã pʋgẽ, b togsda bũmb kẽer tigis-kãng wɛɛngẽ.
