Nand tɩ y maan bũmbu, tõe tɩ y na n soka y meng woto: ‘Yãoã na n nafa maam sɩda?’ La pʋʋsgã wɛɛngẽ, d sã n sok d meng sok-kãnga, wilgdame tɩ d tagsda d meng yell bal bɩ? Ayo. D sokda d meng bal n dat n bãng pʋʋsgã sã n sɩd nafda neda.

Sõsg ning sẽn loogã pʋgẽ, d yãa bũmb toor-toor sẽn wilgd tɩ pʋʋsg pa tũudum yel-maandɩ bala, wall bũmb sẽn tõe n kɩt tɩ ned yĩm a zu-loees yell bal ye. Wẽnnaam sɩd kelgda pʋʋsgo. D sẽn pʋʋsd to-to wã, la d sẽn kot bũmb ninsã sã n zems ne a raabã, a kelgdame. A pʋd n sagend-d lame tɩ d kolg-a. (Zak 4:8) La woto wã, d sã n wae n pʋʋsdẽ, wãn to la nafd tõndo? Ad bark a wãn d sẽn tõe n paame:

Y sã n mi n wa tar zu-loeese, y tagsda zu-loeesã yell wʋsgo, hal n maand yɩɩr bɩ? Biiblã yeelame tɩ sã n wa yaa woto bɩ d ‘pʋʋs n da base,’ n “wilg Wẽnnaam bũmb nins [tõnd] sẽn datã.” (1 Tesalonik-rãmbã 5:17; Filip-rãmbã 4:6) Biiblã paasame tɩ d sã n pelg d pʋg n pʋʋse, “Wẽnnaam laafɩ wã sẽn yɩɩd ninsaalbã bãngr fãa wã na n gũu [tõnd] sũyã ne [d] tagsdã.” (Filip-rãmbã 4:7) D sã n togs d saasẽ Ba wã yɛl nins sẽn pak-dã, d yɩɩrã na n boogame. Sɩd me, Yɩɩn-sõamyã 55:23 yeela woto: ‘Bas f yell ne Sẽn-Ka-Saabo, la bãmb na n kõo foom bũmb ning f sẽn date.’

Dũniyã gill zugu, neb wʋsg n zoe n pʋʋs Wẽnnaam tɩ b yam gãand bãane. Kooredisiid pag a ye yʋʋr sẽn boond t’a Hee Ran yeela woto: “Baa mam sẽn tar zu-loees wʋsgã, m sã n pʋʋs Wẽnnaam n gom rẽ yelle, yaa wa m zu-loeesã boogdame.  M paamda raood me.” A Sesilya sẽn be Filipinnã tara kom-pugli a yiibu. A ma wã me lʋɩɩ bãaga, n pa le mi a neng ye. A yeelame tɩ mi n pa nana, la tɩ ne pʋʋsgã maasem, a tõe n maoo daar fãa tɩ yɩɩrã ra loog a nug ye. A paasame t’a kɩsa sɩd t’a Zeova na n sõng-a lame t’a tõog n ges a ma wã la a kambã yelle.

Yãmb maooda ne zu-loe-kɛgems bɩ? Tõe tɩ yaa zu-loees sẽn tõe n tũ ne y yõor menga. Sã n yaa woto, bɩ y pʋʋs Wẽnnaam sẽn yaa a soab ning “sẽn belsd nebã,” t’a na n kɩtame tɩ y yamã gãand bãane. Biiblã yeelame t’a “belsda tõnd d yel-pakrã fãa pʋgẽ.” (2 Korẽnt-rãmbã 1:3, 4) Wala makre, daar a ye, a Zeezi sũur sãama wʋsgo, hal t’a “yĩgimd n pʋʋs” Wẽnnaam. Rẽ poore, bõe n maane? Malɛɛk  n yi saasẽ n wa paas a Zeezi pãnga. (Luk 22:41, 43) A Neemi me sẽn yɩ wẽn-sakdã namsa wʋsgo, bala nin-wẽns n da rat n gɩdg-a t’a pa tʋm tʋʋmd Wẽnnaam sẽn bobl-a ye. A pʋʋsa Wẽnnaam n yeel woto: “Moasã, Zu-soaba, mam kot-y lame tɩ y kõ maam pãnga.” Yɛlã sẽn baas to-to wã wilgdame tɩ Wẽnnaam kelga a pʋʋsgã, n sõng-a t’a bas rabeem n tõog tʋʋmdã. (Neemi 6:9-16) A Reginald sẽn be Gãna wã wilga pʋʋsgã sẽn nafd yẽ to-to, n yeel woto: “Mam sã n pʋʋse, sẽn yɩɩd fãa, sã n yaa zu-loe-kɛgems sasa, yaa wa m sẽn dɩk m yell n tɩ togs ned sẽn tõe n welg-a, t’a soabã yeel-m tɩ m da maan yɩɩr ye.” Vẽenega, d sã n pʋʋs Wẽnnaam, a belsd-d lame.

Bũmb nins tõnd sẽn yãkd yam n maandẽ wã kẽer tõe n nafa tõnd ne d roagdbã la d zo-rãmba, wall wã-do. Bõe n tõe n sõng-d tɩ d bãng n yãk yam tɩ zemse? Biiblã wilga bũmb d sẽn tõe n maan zu-loees taoore, n yeele: “Yam sã n paoog yãmb ned a yembre, bɩ y kos Wẽnnaam sẽn kõt nebã fãa ne yamleoog n ka lengdẽ wã, la b na kõ-a yamã.” (Zak 1:5) D sã n pʋʋs Wẽnnaam n kos yam, a tõe n tũnuga ne a vʋʋsem sõngã n sõng-d tɩ d bãng d sẽn na n maanega. Sɩd me, a Zeezi yeelame tɩ d sã n kos d Ba sẽn be saasẽ wã a vʋʋsem sõngã, a na n kõ-d lame.—Luk 11:13.

Baa a Zeezi meng ra miime t’a sã n dat n maan bũmbu, a segd n kosa a Ba wã sõngre. Biiblã yeelame t’a sẽn wa n dat n yãk a tʋm-tʋmdb 12 wã, a “pʋʋsa Wẽnnaam yʋngã tɛk fãa.”—Luk 6:12.

Rũndã-rũndã me, neb wʋsg n pʋʋs Wẽnnaam n kos yam wa a Zeezi, t’a leok-ba. Nin-kãens yãa rẽ, n maneg n kɩs Wẽnnaam sɩda. Wala makre, a Regina sẽn be Filipinnã goma zu-loees nins yẽ sẽn segã yelle. A sɩdã maana kaalem, tɩ lebg yẽ n segd n ges zakã yelle. A tʋʋmã me wa n sãamame. Sẽn paase, a ra segda zu-loees a kambã wubr wɛɛngẽ. A maana wãn n bãng n mao ne zu-loe-kãensã fãa? A yeela woto: “Mam teega a Zeova, n pʋʋsd-a n kot sõngre.” A Kwabena sẽn be Gãna wã wilga bũmb sẽn kɩt tɩ yẽ pʋʋs Wẽnnaam n kos sõngre. A yeelame tɩ yẽ ra tara tʋʋm-sõngo, tɩ tʋʋmdã wa sãamame. A goma tʋʋm nins yẽ sẽn da tõe n tɩ baoã yelle, n yeel woto: “Mam da kota a Zeova t’a sõng-m tɩ m bãng m sẽn na n yãk tʋʋmd ning tɩ yɩ sõma.” A paasame: “Mam kɩsa sɩd t’a Zeova sõng-m lame tɩ m sẽn yãk tʋʋmd ningã sõngd-m tɩ m tõe n ges m meng yelle, la kɩt me tɩ m tõe n maand bũmb nins sẽn paasd maam ne yẽ zoodã pãngã.” Yãmb me sã n wa tar zu-loees sẽn tõe n sãam yãmb ne Wẽnnaam zoodã, y tõe n pʋʋs-a lame n kos sõngre. Woto, y na n bãnga Wẽnnaam sẽn na n sõng-y to-to.

D yãa bũmb a wãn sẽn wilgd pʋʋsgã sẽn tõe n naf yãmb to-to. (Y tõe n gesa zĩ-gũbr ning gom-zug sẽn yaa: “ Pʋʋsg sẽn nafd ned to-to.”) La y sã n dat tɩ pʋʋsgã naf yãmba, y segd n deng n bao n bãnga Wẽnnaam la a raabã. Sã n yaa rẽ la y rata, y tõe n kosa a Zeova Kaset rãmbã tɩ b sõng-y tɩ y zãms Biiblã. * Woto, y tõe n wa lebga Wẽnnaam sẽn yaa a soab ning “sẽn kelgd pʋʋsgã” zoa.—Yɩɩn-sõamyã 65:3.