SEBRÃ GOM-ZUG SÕSGÃ | PƲƲSG TÕE N NAFA NED BƖ?
Neb nins sẽn pʋʋsdã gomda vɩʋʋgẽ bal bɩ?
Neb kẽer tagsdame tɩ pʋʋsg yaa sẽk sãoong bala, la tɩ neb nins sẽn pʋʋsdã pa paamd kelgr ye. Sãnda pʋʋsame, n tagsdẽ tɩ b pa paam leokr ye. Rao a ye sẽn tẽed tɩ Wẽnd kae wilga bũmb ning sẽn kɩt t’a pa tẽedã. A mamsa yẽ sẽn tagsd tɩ Wẽnnaam segd n yɩɩ to-to wã a yamẽ, la a pʋʋs n kos t’a maan dãamd baa yaa bilf t’a wʋme. A yeelame tɩ Wẽnnaam pa leok ye.
La Biiblã wilgame tɩ Wẽnnaam beeme, la t’a kelgda pʋʋsgo. Hal sẽn kaoose, Wẽnnaam no-rɛɛs n gom ne neba, n yeel woto: “Yãmb sã n kelme, b [Wẽnnaam] na n wʋmame, la b na n zoee yãmb nimbãanega. Bãmb sã n wʋm yãmb kelemsã bala, b na n leoka yãmba.” (Ezayi 30:19) Biiblã vɛrse a to n yeel woto: “Nin-tɩrsã pʋʋsg tata bãmb yam.”—Yel-bũnã 15:8.
A Zeezi pʋʋsa a Ba wã n ‘paam leokre.’—Ebre-rãmbã 5:7
Biiblã gomda neb sẽn paam tɩ Wẽnnaam reeg b pʋʋsg yelle. Vɛrse a ye n yeel t’a Zeezi pʋʋsame n kos Wẽnnaam t’a fãag-a, la t’a “paama leokre.” (Ebre-rãmbã 5:7) B gomda neb a taab sẽn paam tɩ Wẽnnaam reeg b pʋʋsg yell Dãniyɛll 9:21 la 2 Kibay 7:1 pʋgẽ.
La bõe yĩng tɩ neb kẽer tagsdẽ tɩ Wẽnnaam pa reegd b pʋʋsgo? Ned sã n dat t’a pʋʋsg reege, a segd n pʋʋsa a Zeova * sẽn yaa Wẽnnaam ning sẽn kɩt tɩ b gʋls Biiblã. A pa segd n pʋʋs wẽnnaam a to, wall a yaab-rãmbã ye. Wẽnnaam wilgame me tɩ d segd n kosa “bũmb sẽn zems ne bãmb daabo.” A yeelame tɩ d sã n kos bũmb sẽn zems a raabã, a “kelgda tõndo.” (1 Zã 5:14) Rẽnd d sã n dat tɩ pʋʋsg reege, d segd n zãmsa Biiblã n bãng Wẽnnaam la a raabã.
Neb wʋsg kɩsa sɩd tɩ pʋʋsgã pa tũudum yel-maandɩ bala, la tɩ Wẽnnaam kelgda pʋʋsgo. A Izaak sẽn be Kenya wã yeela woto: “Mam pʋʋsa Wẽnnaam n kos t’a sõng-m tɩ m wʋm Biiblã goam võore. Rẽ poor bilfu, ned n wa n yeel maam tɩ m sã n data, a tõe n zãms-m-la Biiblã.” Filipin soolmẽ wã, pag yʋʋr sẽn boond t’a Hilda yeelame tɩ yẽ ra yũuda sɩgaare, n wa rat n base. A maka naoor wʋsg n pa tõoge, t’a sɩdã yeel-a woto: “Fo pa na n pʋʋs Wẽnnaam n kos sõngr sɩda?” A Hilda tũu saglgã. Ad a sẽn yeele: “Wẽnnaam sẽn sõng maam to-to wã ling-m lame. Bilf-bilfu, mam yamã wa n pa le be sɩgaarã ye. Mam tõog n basame.”
Yãmb me tõe n kɩsa sɩd tɩ y sã n pʋʋs Wẽnnaam tɩ zems ne a raabã, a na n sõng-y lame tɩ y welg y zu-loeesã bɩ?
^ sull 6 Biiblã wilgdame tɩ Wẽnnaam tara yʋʋre. A yʋʋrã la a Zeova.
