Yʋʋmd 2023 sig-noy kiuugã rasem 23 wã, Etazĩni logto-kãseng a yembr yeela nebã tɩ reezo sosiyo rãmbã pa nafd kom-bɩɩsã baa bilfu.

•   “Yaa sɩd tɩ reezo sosiyo rãmbã nafda kamb la kom-bɩɩs kẽere. La kaset buud toor-toor n be n wilgdẽ tɩ reezo sosiyo rãmbã me tõe n kɩtame tɩ kambã la kom-bɩɩsã sũy pa le noom ne b mense, la sãam b yĩns laafɩ wã.”—Yita Social Media and Youth Mental Health: The U.S. Surgeon General’s Advisory, yʋʋmd 2023.

 B sẽn maan vaeesg n yã bũmb ninsã wilgda bũmb ning sẽn kɩt tɩ yellã segd n pak nebã fãa wã.

•   Sẽn tɩ yɩɩda, yaa kom-bɩɩs nins sẽn tar yʋʋm 12 n debd yʋʋm 15 wã “sẽn kẽed reezo sosiyo rãmbã pʋgẽ n maand sẽn yɩɩd lɛɛr a tãab daar fãa wã n tõe n lebg neb sũy sẽn pa noom ne mense. Wala makre, b tõe n wa bẽeda depresiyõ wã bãaga, la b maand yɩɩr wʋsgo.”

•   Kom-bɩɩs nins sẽn tar yʋʋm 14 “sẽn tʋmd ne reezo sosiyo rãmbã wʋsgã yaa neb sẽn pa gõe sõma, neb b sẽn pẽdgd ẽntɛrnetã zug n dat tɩ b maan sẽn pa sõma, neb sũur sẽn pa noom ne b yĩngã sẽn yaa to-to wã, neb sẽn pa nand b mense, la neb sẽn maand yɩɩr wʋsgo. Yel-kãensã paamda kom-pugli wã n yɩɩd kom-dibli wã.”

 Bõe la roagdbã tõe n maan n kogl b kambã ne zu-loe-kãensã? Biiblã kõta sagls sẽn tõe n sõng-ba.

 Ra bas-y y kambã tɩ b maand b sẽn dat ye. Roagdba, tags-y reezo sosiyo rãmbã tall n tʋmã sẽn tõe n wa ne zu-loees ninsã yelle, la y ges y sã n na n sakame tɩ y kambã kẽed reezo sosiyo rãmbã pʋgẽ, bɩ y pa na n sake.

•   Biiblã sẽn yete: “Zãms biig sor ning a sẽn segd n tũ wã.”—Yel-bũnã 22:6, notã.

•   Y sã n dat n bãng n paase, bɩ y karem sõsg ning gom-zug sẽn yaa “Mam biigã segd n tʋmda ne rezo sosiyo rãmbã bɩ?”

 Y sã n sak tɩ y biigã na n kẽed reezo sosiyo rãmbã pʋgẽ, bɩ y gũus ne zu-loees nins a sẽn tõe n paamã, la y bao n bãng a sẽn maand bũmb nins reezo sosiyo rãmbã pʋgẽ wã. Wãn to?

 Kogl-y y biigã ne bũmb nins sẽn be reezo sosiyo rãmbã pʋgẽ n tõe n wã-a wã. Sõng-y-yã-a t’a bãng bũmb nins sẽn tõe n wã-a wã, la a gil bõn-kãense.

•   Biiblã sẽn yete: “B pa segd n pʋd yoob la rẽgd buud baa a ye wall yão-beed yell yãmb sʋka, . . . Yãn-tʋʋm wall yalem-goam bɩ kʋʋsem gom-yood me pa segd n zĩnd yãmb sʋk ye.”—Efɛɛz rãmbã 5:3, 4.

•   Y sã n dat n bãng y sẽn tõe n tũ saglgã to-to, bɩ y karem sõsg ning gom-zug sẽn yaa “Protégez votre adolescent des dangers des réseaux sociaux.”

 Wilg-y-yã-a a sẽn tar sor n tõe n maane. Wala makre, wilg-y-yã-a wakat ning a sẽn tõe n kẽ reezo sosiyo rãmbã pʋgẽ, la a sẽn tõe n pa be n kaoos to-to.

•   Biiblã sẽn yete: “Woto wã, bɩ y kell n gũus neer ne yãmb sẽn kẽnd to-to wã tɩ ra yɩ wa neb sẽn ka yam ye. Bɩ y yɩ wa yam dãmba. Ra sãam-y y sẽkã ye.”—Efɛɛz rãmbã 5:15, 16.

•   Tũnug-y ne video ning gom-zug sẽn yaa Gũus ne réseaux sociaux rãmbã n sõng y kambã tɩ b bãng bõe yĩng tɩ y segd n wilg-b b sẽn tar sor n na n maane.