Ad tũudum taoor dãmb yʋy sẽn yi manesem sẽn yaa to-to Ikrɛn zabrã wɛɛngẽ:

•   “A Kirill sẽn yaa Risi Ortodogs tũudmã taoor soabã pa yeel baa fʋɩ n na n wilg tɩ Risi sẽn yik n tɩ zabd ne Ikrɛnnã pa zems ye. A tũudmã yelga kibay sẽn yaa ziri Ikrɛn wɛɛngẽ, t’a Putin sẽn yaa Risi tẽngã naabã tik kiba-kãensã zut n na n tɩ zab ne Ikrɛn.”—EUobserver, 2022, tʋʋlg kiuug rasem a 7.

•   “A Kirill . . . wilgame tɩ Risi sẽn yik n tɩ zabd ne Ikrɛnnã yaa bũmb sẽn zems kɛpɩ, tɩ bala, b sẽn maan woto wã yaa sẽn na n zab ne yel-wẽnde.”—AP News, 2022, tʋʋlg kiuug rasem a 8.

•   “Tẽne wã daare, a Epifanius I sẽn yit Kiɛɛv tẽngã n yaa Ikrɛn Ortodogs tũudmã taoor soabã ninga a nin-buiidã barka, sẽn na yɩl tɩ b tɩ zab ne Risi sodaasã. A yeelame me tɩ Risi sodaasã kʋʋb pa yel-wẽnd ye.”—Jerusalem Post, 2022, tʋʋlg kiuug rasem 16.

•   “Tõnd [Conseil panukrainien des Églises et des organisations religieuses (UCCRO)] teenda Ikrɛn sodaasã la neb nins fãa sẽn kẽesd b toog zabrã pʋgẽ wã. D ningd-b-la barka, b sẽn modgd n na n fãag Ikrɛn, bɛɛbã nugẽ wã yĩnga, la d pʋʋsda b yĩng me.”—UCCRO a sẽn yeele, 2022, wao-fugdg kiuug rasem 24

 Yãmb tagsg yaa wãn to? Tũudum nins sẽn yet tɩ b tũuda a Zeezi Kiristã segd n yeela b nebã tɩ b tɩ zab zabr bɩ? Bõe la Biiblã yeta?

Tũudmã taoor dãmb manesem sẽn yɩ to-to zab wɛɛngẽ pĩndã

 Hal pĩnd n tãag masã, tũudmã taoor dãmb nong n yetame tɩ zabã pa wẽnga, tɩ yaa bũmb sẽn zemse, la tɩ pʋd n yaa tɩlɛ, n yaool n yetẽ tɩ b tʋmda sẽn na yɩl tɩ laafɩ zĩndi. Hal yʋʋm wʋsgo, a Zeova Kaset rãmbã wilga vẽeneg tɩ tũudmã taoor dãmb sẽn maan bũmb ningã wilgdame tɩ b yaa zãmb-dãmba. Ad sõss kẽer sẽn be d sɛbã pʋsẽ, n gomd rẽ yelle.

•   Sõsg ning gom-zug sẽn yaa “Les croisades : une ‘illusion tragique’” pʋgẽ, b wilgame tɩ Katolik tũudmã tara taale, neb ka tɛkã b sẽn varg n yeel tɩ yaa Wẽnnaam la Kiristã yʋʋr yĩngã.

•   Sõsg ning gom-zug sẽn yaa “L’Église catholique en Afrique” pʋgẽ, b wilgame tɩ tũudmã pa maan baa fʋɩ sẽn na yɩl n gɩdg tɩ buud ra zab ne buud a to, la b pʋd n da varg buud ning neb ye.

•   Sõss nins gom-zut sẽn yaa “La religion est-​elle responsable?” ne, “Le rôle de la religion dans les guerres” n paas “La religion prend parti” wã pʋgẽ, b wilgame tɩ Katolikã, Ortodogs la Protɛstã tũudmã taoor dãmb fãa teela zab wʋsgo.

Kiris-nebã segd n teela zab bɩ?

 A Zeezi yeelame: “Fo tog n nonga f to wa f menga.” (Matiye 22:39) “Nong-y y bɛɛbã.”—Matiye 5:44-47.

 A Zeezi yeelame: “Mam Rĩungã pa dũni-kãngã rẽnd ye. Mam Rĩungã sã n da yaa dũni-kãngã rẽnda, mam tʋm-tʋmdbã ra na n zabame tɩ b ra yõk maam n kõ Zʋɩf-rãmbã ye.” (Zã 18:36) “Neb nins fãa sẽn zabd ne sʋʋsã, sʋʋs n na n kʋ-ba.”—Matiye 26:47-52.

 Tags-y n ges-y: Kiris-nebã sã n da pa tog n zab baa yaa sẽn na yɩl n kogl a Zeezi, rẽ yĩnga, b segd n kẽesa b toog zab pʋsẽ bʋʋm a to yĩng bɩ? Karm-y sõsg ning gom-zug sẽn yaa “Peut-​on concilier guerre et christianisme?” n bãng pipi kiris-nebã sẽn tũ a Zeezi mak-sõngã la a zãmsgã to-to.

Bõe n na n paam tũudum nins sẽn teend zabã?

 Biiblã wilgdame tɩ Wẽnnaam kisa tũudum nins sẽn yet tɩ b gomda a Zeezi yʋʋr yĩnga, n yaool n pa tũud a sẽn zãms nebã bũmb ninsã.—Matiye 7:21-23; Tɩt 1:16.

•   Vẽnegr sebrã pʋgẽ, b wilgame tɩ tũudum-kãensã tara taal Wẽnnaam nifẽ, “neb nins fãa b sẽn kʋ tẽngã zugã” yĩnga. (Vẽnegre 18:21, 24) Sẽn na yɩl n bãng bũmb ning sẽn kɩt tɩ d yet woto wã, bɩ y karem sõsg ning gom-zug sẽn yaa “Qu’est-​ce que Babylone la Grande?”

•   A Zeezi wilgame tɩ Wẽnnaam na n sãama tũudum nins fãa a sẽn kisã, b tʋʋm-wẽnsã yĩnga. B yaa wa tɩ-yood sẽn womd biis sẽn pa sõma, tɩ b segd n kɛ-b n lob bugmẽ. (Matiye 7:15-20) Sẽn na yɩl n bãng b sãoongã sẽn na n yɩ to-to, bɩ y karem sõsg ning gom-zug sẽn yaa “La fin de la fausse religion est proche!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images