Maan-kʋʋdb kãsem-dãmbã talla a Zeezi n kẽng guvɛrneer a Pɩlat zakẽ wã. A sok-b lame yaa: ‘Bõe la rao-kãngã maan-yã?’ Tɩ b leoke: ‘A yeelame tɩ yẽ yaa rĩma.’ T’a Pɩlat soka a Zeezi: ‘Foo la zʋɩf-rãmbã rĩma?’ T’a Zeezi leoke: “Mam soolmã ka dũni ka rẽnd ye.”

Rẽ, a Pɩlat kɩtame tɩ b tall a Zeezi n kẽng Galɩle naab a Erood nengẽ, t’a ges a Zeezi sã n maana bũmb sẽn pa sõma. La a Erood pa yã bũmb ye. A kɩtame tɩ b tall a Zeezi n leb a Pɩlat nengẽ. A Pɩlat yeela nebã yaa: ‘Maam ne a Erood fãa pa yã bũmb a Zeezi sẽn maan tɩ yaa wẽng ye. Mam na n bas-a lame.’ La nebã kelmame n yeele: ‘Kʋ-y-yã-a! Kʋ-y-yã-a!’ Sodaasã pãba a Zeezi ne kalwaase, n tʋbs-a kolkoodo, la b pãb-a nug-gila. B rɩka gõos n maan naam pugl n fõgen-a, n yaand-a n yetẽ: ‘Zʋɩf-rãmbã rĩma, tõnd pʋʋsda yãmba.’ A Pɩlat le yeela nebã yaa: ‘Mam pa ne bũmb a sẽn maan tɩ yaa wẽng ye.’ La b kelmame n yeele: ‘Ka-y-yã-a ra-luk zugu!’ A Pɩlat basame tɩ b yõk a Zeezi n na n tɩ kʋ.

Sodaasã talla a Zeezi n kẽng zĩig b sẽn boond tɩ Golgota, n ka-a raoog zugu, la b zẽk raoogã n sele. A Zeezi pʋʋsa a Zeova n yeele: ‘M Ba, kõ-b sugri. Bala b ka mi b sẽn maandã ye.’ Nebã ra yaanda a Zeezi, n yetẽ: ‘Fo sã n sɩd yaa Wẽnnaam Biiga, bɩ f sig raoogã zugu. Fãag f meng tɩ d gese.’

B ra kaa bi-bees a yiib n yɛgl a Zeezi. A ye n yeel-a yaa: ‘Fo sã n wa be f Rĩungã pʋgẽ bɩ f tẽeg m yelle.’ La a Zeezi yeel-a lame yaa: ‘Fo na n zĩnda arzãnã pʋgẽ ne maam.’ Midi poore, tẽngã fãa lebga lik bida, n kaoos lɛɛr a tãabo. A Zeezi karen-biis n da yas ra-lukã sɛɛga. A Zeezi ma a Maari ra bee be. A Zeezi yeela a Zã t’a ges a Maari yell wa a mengã ma.

A Zeezi wa n yeelame: “Bũmb fãa maan n saame.” A sulga a zugã, n kell n ki. Wakat kãng bala, tẽngã rigimda ne pãnga. La rido-kẽengã sẽn da welgd wẽnd-doogã zĩ-sõngã ne zĩ-sõng  sẽn yɩɩdã pãrga zĩis a yiibu. Soda-naab a yembr yeelame: ‘Rao-kãngã sɩd ra yaa Wẽnnaam Biiga.’