Israyɛll neb wʋsg n le wa n sɩng n pʋʋsd bõn-naandse, t’a Zeova bas tɩ Filisti nebã wa soog b tẽngã. La Israyɛll neb kẽer n da ket n tũud a Zeova. Wala makre, a Manoa. Yẽ ne a pagã ra pa tar biig ye. Daar a ye, a Zeova tʋma malɛk a Manoa pagã nengẽ. Malɛkã yeel-a lame yaa: ‘Fo na n doga bi-ribla. Yẽ n na n fãag Israyɛll nebã Filisti nebã nugẽ. A na n yɩɩ nazireẽ.’ Fo mii nazireẽ sẽn yaa a soab bɩ? Yaa ned a Zeova sẽn welg toore, sẽn na yɩl t’a tʋm a tʋʋmã. Ned sã n da yaa nazireẽ, a pa tog n wõrs a zoobdã ye.

A Manoa pagã sɩd roga bi-ribla, tɩ b pʋd a yʋʋr t’a Samsõ. A Samsõ sẽn wa n lebg bedre, a Zeova kõ-a-la pãng wʋsgo. A tõog n kʋʋ bõnyẽeg ne nus bala. Vugri, a Samsõ kʋʋ Filisti neb 30, yẽ a ye. Filisti nebã ra kis-a lame, n baood n na n kʋ-a. Daar a ye, a Samsõ tɩ gãanda Gaza tẽngẽ wã, tɩ Filisti nebã tɩ yals tẽngã noore, n gũud-a yibeoog n na n kʋ. La yʋn-sʋk sẽn ta, a Samsõ yikame n kẽng n tɩ vik tẽngã kʋɩlenga. A tebga kʋɩlengã n dogl a bãokã, n dʋ Ebrõ tãngã zugu.

Filisti nebã wa n kẽnga a Samsõ pʋg-sad nengẽ. A yʋʋr la a Dalila. B yeel-a lame yaa: ‘Fo sã n sõng tõnd tɩ d bãng bũmb ning sẽn kɩt t’a Samsõ tar pãng wʋsg woto wã, tõnd na n kõo foo ligd wʋsgo. Tõnd dat n yõk-a lame n kẽes bãens-roogo.’ A Dalila ra nonga ligdi, rẽ n so t’a sake. A Samsõ ra pa rat n togs-a bũmb ning sẽn kɩt tɩ yẽ tar pãngã ye. La a Dalila pẽdg-a-la wʋsgo, t’a kong n togs-a, n yeel-a yaa: ‘B zɩ n wõrs mam zoobdã ye. Bala mam yaa nazireẽ. B sã n wõrs mam zoobdã, mam pãngã na n saame.’ A Samsõ ra pa segd n togs pagã ye, pa sɩda?

Zĩig pʋgẽ, a Dalila tɩ togsa Filisti nebã tɩ yẽ bãnga a Samsõ pãngã sẽn yitẽ. A belga a Samsõ t’a gãand yẽ karsã zug n gũsi,  la a kɩt tɩ ned wa wõrs a zoobdã. Rẽ poore, a Dalila kelmame n yeele: ‘Samsõ, Filisti nebã watame.’ A Samsõ nekame, la a ra pa le tar pãng ye. Filisti nebã yõk-a lame, n kɩɩd a ninã, la b tɩ ning-a bãens-roogo.

Daar a ye, Filisti neb tusa n tigim taab b wẽnnaam a Dagõ roogẽ wã, n kelemd n yetẽ yaa: ‘Tõnd wẽnnaamã kɩtame tɩ d yõk a Samsõ. Tall-y-yã a Samsõ n wa t’a maan tɩ d la.’ B kɩtame t’a wa yals roogã ra-lugds a yiib sʋka. A Samsõ yeela a Zeova yaa: ‘Zeova, m kotame tɩ f le kõ-m pãnga.’ Rẽ t’a Samsõ zoobdã ra yiime n le lebg wogdo. A tusa roogã ra-lugdsã ne a pãng fãa, tɩ roogã lʋɩ, n kʋ neb nins fãa sẽn da be be wã. Yẽ me kiime.