1-3. a) Yel-bʋs n da tõe n sãam zems-n-taar ning sẽn da be pipi kiris-nebã tigingã neb sʋkã? b) Tõnd sẽn na n vaees Tʋʋm sebrã kibarã na n nafa tõnd wãn to?

 A POLL ne a Barnabaas sũy yaa noog wʋsgo. B saa b misioneer pipi so-toakã n nan tat Ãntiyoos sẽn be Siiri wã. B sũy yaa noogo, bala a Zeova “paka kʋɩleng bu-zẽmsã yĩng sẽn na yɩl tɩ b tõe n tẽ.” (Tʋʋ. 14:26, 27) Sɩd me, b moona koe-noogã Ãntiyoose, tɩ bu-zẽms “neb wʋsg” sẽn da be tẽn-kãng pʋgẽ lebg kiris-neba.—Tʋʋ. 11:20-26.

² Tẽedbã sõor sẽn da paasdã kibar taa Zide tao-tao. La kibarã pa yɩ nebã fãa noog beenẽ ye. Neb kẽer ra tagsdame tɩ yaa tɩlɛ tɩ bu-zẽmsã neb kẽ bãongo, tɩ sãnda pa tagsd woto ye. Kiris-neb nins sẽn yaa Zʋɩf-rãmbã ne kiris-neb nins sẽn da pa Zʋɩf-rãmbã manesem ne taab ra na n yɩɩ wãn to? Sẽn da pa-b Zʋɩf-rãmbã ra na n tũu a Moyiiz Tõogã sẽn yetã bɩ? B wẽe no-koeemd wʋsg bãongã kõom wɛɛngẽ, hal tɩ ra tõe n sãam zems-n-taar ning sẽn be b sʋkã. La wãn to la b ra na n welg yel-kãngã?

³ Tõnd sẽn na n vaees Tʋʋm sebrã kiba-kãngã wã na n sõnga tõnd tɩ d bãng bũmb toor-toor sẽn tar yõodo. Tõe n sõng-d lame tɩ d bãng d sẽn tõe n tʋm ne yam to-to, yell ning sã n wa rat n sãam zems-n-taar ning sẽn be tõnd sʋkã.

4. Kiris-neb kẽer sẽn yaa Zʋɩf-rãmb ra ket n gomda bõe yelle, la rẽ wata ne sok-bʋgo?

⁴ Karen-biig a Luk yeelame yaa: “Neb kẽer n yi Zide n wa, n sɩng saam-biisã zãmsg n yetẽ yaa: ‘Yãmb sã n pa kẽ bãong wa sẽn zems ne a Moyiiz Tõogã, y pa tõe n paam fãagr ye.’” (Tʋʋ. 15:1) Biiblã pa wilg ‘neb nins sẽn yi Zide’ wã sã n da yaa Fariziyẽ-rãmb sẽn tuub n lebg kiris-neb ye. La wõnda b ra tara Fariziyẽ-rãmbã sẽn da gãd Tõogã dem-demã tagsa wã buudu. Sẽn paase, tõe tɩ b yeelame tɩ b gomda tẽn-tʋmdbã ne kãsem-dãmbã sẽn be Zerizalɛmmã yʋʋr yĩnga. (Tʋʋ. 15:23, 24) Yʋʋm 13 la woto Wẽnnaam sẽn da vẽneg tẽn-tʋmd a Pɩyɛɛr t’a sõng bu-zẽms neb sẽn pa kẽ bãong tɩ b lebg kiris-neba. La bõe yĩng tɩ Zʋɩf-rãmb sẽn da yaa tẽedb ra ket n gomd bãongã kõom yelle? a—Tʋʋ. 10:24-29, 44-48.

5, 6. a) Bõe yĩng tɩ Zʋɩf-rãmb kẽer sẽn da lebg kiris-neb ra tẽed tɩ bãongã kõom ket n yaa tɩlɛ? b) Bãongã kõom kaoolã naaga kaool ning a Zeova sẽn maan ne a Abrahaammã bɩ? Wilg-y y leoorã võore. (Ges-y vẽnegrã.)

 ⁵ Tõe tɩ yaa bʋʋm toor-toor yĩng la b sẽn da ket n gomd bãongã kõom yellã. Bũmb a ye yaa tɩ yaa a Zeova mengã n da kõ noor tɩ Israyɛll rapã kẽ bãongo. Ra yaa kaset sẽn wilgd tɩ b yaa a Zeova nin-buiidu. A Zeova ra kõo a Abrahaam ne rap nins sẽn da be a zakẽ wã noor tɩ b kẽ bãongo. Kaoosg zugẽ, a kõo Israyɛll nebã no-kãng me. b (Maan. 12:2, 3) A Moyiiz tõogã ra wilgame tɩ baa bu-zẽmsã neb ra segd n kẽe bãongo, n yaool n paam sor n naag n maan bũmb kẽere. Wala makre, n dɩ Pakã rɩɩbo. (Yik. 12:43, 44, 48, 49) Sɩd me, Zʋɩf-rãmbã yamẽ, rao sã n da pa kẽ bãongo, a yaa rẽgdo, n pa tõe n tũ Wẽnnaam ye.—Eza. 52:1.

⁶ Dẽnd ra yaa tɩlɛ tɩ Zʋɩf-rãmb nins sẽn da lebg kiris-nebã tall tẽeb la sik-m-meng n sak n toeem b tagsa wã tɩ zems ne a Zeova rẽndã. Kaool-paalgã ra ledga tõogã kaoolã. Kɩtame tɩ baa ned sã n da rog n yaa Zʋɩfe, pa rat n yeel bal tɩ nin-kãng soabã kell n naaga a Zeova nin-buiidã wa sẽn da yaa to-to pĩndã ye. Wa Zʋɩf-rãmb nins sẽn da be Zide wã sẽn maan to-to wã, Zʋɩf-rãmb nins sẽn da lebg tẽedb n ket n vɩ ne b Zʋɩf-taasã ra segd n talla raood n lebg a Zeezi karen-biisi, la b naag bu-zẽmsã neb sẽn da pa kẽ bãongã sẽn lebg tẽedbã n pʋʋsd a Zeova.—Zer. 31:31-33; Luk 22:20.

7. “Neb kẽer sẽn yi . . . Zide” n wa wã ra pa wʋmd bõe võore?

⁷ Yaa sɩd t’a Zeova noyã la a saglsã pa toeem ye. Bũmb sẽn wilgd rẽ yaa t’a Moyiiz tõogã sẽn da tik bũmb nins zugã, kaool-paalgã me tika bõn-kãens zugu. (Mat. 22:36-40) Wala makre, bãongã kõom wɛɛngẽ, a Poll wa n yeela kaoosg zugẽ yaa: “Yaa sẽn yaa-a Zʋɩf a sũur pʋgẽ wã n yaa Zʋɩfe. La a bãongã kõom yaa sũurã rẽnda, vʋʋsem sõngã sẽn maane, la pa sẽn zems ne tõog b sẽn gʋls ye.” (Rom. 2:29; Tõo. 10:16) “Neb kẽer sẽn yi . . . Zide” n wa wã ra pa wʋmd bõn-kãng võore, n yetẽ t’a Zeova ket n datame t’a nin-buiidã kẽ bãongo. Rẽ yĩnga, b ra na n sak n toeema b tagsa wã bɩ?

8. Bõe yĩng tɩ b tall bãongã kõom yell n kẽng siglgã taoor lʋɩtb sullã sẽn da be Zerizalɛmmã taoore?

⁸ A Luk yeelame yaa: “A Poll ne a Barnabaas sẽn kɩɩs wʋsg n wẽ no-koeemd ne-b [neb kẽer sẽn da “yi Zide n wa” wã] poore, saam-biisã yãka yam n na n tʋm a Poll ne a Barnabaase, n paas bãmb neb kẽer tẽn-tʋmdbã  ne kãsem-dãmbã sẽn be Zerizalɛmmã nengẽ yel-kãng c poorẽ.” (Tʋʋ. 15:2) Kiris-neb nins sẽn da be Ãntiyoos tigingã pʋgẽ wã ra wẽeda no-koeemd bãongã kõom wɛɛngẽ. Sẽn da yet-b tɩ bãongã kõom yaa tɩlɛ wã ne b rãmb nins sẽn da pa tagsd tɩ yaa tɩlɛ wã fãa ra kɩsa sɩd tɩ b ned fãa bee bʋʋm, tɩ kɩt tɩ b ra pa tõe n wʋm taab ye. Sẽn na yɩl tɩ zems-n-taar la laafɩ kell n zĩnd tigingã pʋgẽ, tigingã nebã tʋma ne yam n tall yellã n kẽng “tẽn-tʋmdbã ne kãsem-dãmbã sẽn be Zerizalɛmmã” sẽn da yaa siglgã taoor lʋɩtb sullã taoore. Yam-bʋg la d tõe n dɩk Ãntiyoos tigingã kãsem-dãmbã nengẽ?

9, 10. Zĩ-bʋg wɛɛngẽ la kiris-neb nins sẽn da be Ãntiyoosã, ne a Poll la a Barnabaas kõ tõnd mak-sõngo?

⁹ Bũmb sẽn tar yõod d sẽn bãng yaa tɩ d segd n kɩsa a Zeova siglgã sɩda. Tags-y ges-y-yã: Kiris-neb nins sẽn da be Ãntiyoosã ra miime tɩ siglgã taoor lʋɩtb sullã nebã fãa ra yaa Zʋɩf-rãmb sẽn lebg kiris-neba. La baa ne rẽ, b ra kɩsa siglgã taoor lʋɩtb sullã sɩda, n miẽ tɩ b na n welga bãongã kõom yellã tɩ zems ne Gʋls-sõamyã wã. Bõe yĩnga? Bala tigingã nebã ra kɩsa sɩd zãng-zãng t’a Zeova na n tũnuga ne a vʋʋsem sõngã, la tigingã Zu-soab sẽn yaa a Zeezi Kiristã n welg yellã. (Mat. 28:18, 20; Efɛɛ. 1:22, 23) Yell a woto buud sã n wa be tigingã pʋgẽ, bɩ d rɩk kiris-neb nins sẽn da be Ãntiyoosã togs-n-taare, n kɩs a Zeova siglgã la siglgã taoor lʋɩtb sullã neb sɩda.

¹⁰ Tẽegda tõnd bũmb a to me. Yaa tɩ sik-m-mengã la sũ-marã tara yõod wʋsgo. Yaa a Zeova mengã n da tũnug ne a vʋʋsem sõngã n yãk a Poll ne a Barnabaas tɩ b na n kẽng tẽns toor-toorã pʋsẽ n tɩ moon koɛɛgã. La baa ne rẽ, b pa tik rẽ n bao n na n welg bãongã kõom no-koeemdã sẽn zĩnd Ãntiyoosã b toor ye. (Tʋʋ. 13:2, 3) Sẽn yɩɩd fãa, a Poll wa n yeelame yaa: “Yɩɩ vẽnegr m sẽn paam yĩng la m sẽn kẽng be [Zerizalɛm] wã.” Rẽ yaa kaset sẽn wilgd tɩ yaa a Zeova vʋʋsem sõngã n da wilgd-a sore. (Gal. 2:2) Rũndã-rũndã kãsem-dãmbã me maoodame n na n tall sik-m-meng la  sũ-mar a woto buudu, yɛl sẽn tõe n wa ne zu-loe-kɛgems sã n wa wa. B pa wẽed no-koɛɛm ye. B pʋd n maanda vaeesg Gʋls-sõamyã wã pʋgẽ, la b baood n bãngd tʋm-tʋmd sẽn tũud sɩdã sẽn kõt noy la sagls nins yɛl-kãensã wɛɛngẽ wã.—Fili. 2:2, 3.

11, 12. Bõe yĩng tɩ tar yõod tɩ d gũ a Zeova?

¹¹ Yɛl kẽer wɛɛngẽ, tõe n yɩɩ tɩlɛ tɩ d gũ hal t’a Zeova wa welg-ba. D tẽeg tɩ kiris-neb nins sẽn da be a Poll wakatẽ wã gũu hal n tãag yʋʋmd 49 wã sẽnese, t’a Zeova yaool n na n wilg bu-zẽmsã neb sã n segd n kẽe bãong bɩ b pa segd n kẽ. Yɩɩ na maan yʋʋm 13 poore, d sã n sɩng sõdgã sasa ning a Korney sẽn paam vʋʋsem sõngã zaeeb yʋʋmd 36. Bõe yĩng tɩ kaoos woto? Tõe tɩ Wẽnnaam da ratame n kõ Zʋɩf-rãmb nins sẽn da yaa kiris-nebã weer tɩ b toeem b tagsa wã tɩ zems ne yẽ rẽndã. Ra yaa yʋʋm tusr la kobs-wɛ la woto, a Zeova sẽn maan bãongã kõom kaoolã ne b yaab a Abrahaam. Dẽnd ra yaa toeeng-kãsenga!—Zã 16:12.

¹² D sẽn paam tɩ d saasẽ Ba wã sẽn yaa sũ-mar la maan-neer soabã zãmsd tõnd la a sõngd tõnd sẽn na yɩl tɩ d tagsa wã zems ne yẽ rẽndã yaa zu-zẽkre! A sẽn zãmsd tõnd bũmb ninsã nafda tõnd wakat fãa. (Eza. 48:17, 18; 64:8) Rẽ wã, b sã n wa toeem tõnd sẽn da wʋmd Biiblã vɛrse ning võor to-to, wall bũmb a to a Zeova siglgã pʋgẽ, d pa segd n wuk d meng n pẽdgd n yetẽ tɩ tõnd sẽn tagsd to-to wã la sõma, pa rẽ bɩ n gomd n sãbsd siglgã ye. (Koɛ. 7:8) Y sã n wa tar tagsa a woto buudu, bɩ y bʋgs Tʋʋm sak 15 wã zugu, la y pʋʋs a Zeova n kos-a t’a sõng-y tɩ y tũ sagls nins sẽn be be wã. d

13. Wãn to la d tõe n dɩk a Zeova togs-n-taar sũ-marã wɛɛngẽ, koɛɛgã mooneg pʋgẽ?

¹³ Tõe n yɩɩ tɩlɛ tɩ d maan sũ-mare, d sã n wa zãmsd ned Biiblã, tɩ yaa toog ne nin-kãng soab t’a bas bũmb a sẽn tẽed tɩ yaool n pa zems ne Biiblã sẽn yetã, wall a bas yel-maandɩ sẽn pa zems ne Biiblã. Sã n wa yaa woto, tõe n yɩɩ tɩlɛ tɩ d kõ a soabã weere, sẽn na yɩl tɩ vʋʋsem sõngã sõng-a t’a sak n toeeme. (1 Kor. 3:6, 7) Sẽn paase, yɩta sõma tɩ d pʋʋs a yĩnga. A Zeova na n sõnga tõnd bilf-bilf tɩ d bãng d sẽn tõe n sõng-a to-to tɩ naf-a n tɩ yɩɩda.—1 Zã 5:14.

14, 15. a) Wãn to la tigingã neb wilg tɩ b nanda a Poll ne a Barnabaas la neb nins sẽn da tũud-b n togd sorã? b) Wãn to la a Poll ne neb nins sẽn da togd sor ne-a wã keng neb nins sẽn da be Fenisi ne Samari wã raoodo?

¹⁴ A Luk paasame yaa: “Nin-kãensã sẽn paam tɩ tigingã neb yãag-b n zãag bilfu, b kell n pasga Fenisi ne Samari n da togsd bu-zẽmsã neb sẽn tuubd to-to wã ball-balle, tɩ kõt saam-biisã fãa sũ-noog wʋsgo.” (Tʋʋ. 15:3) Tigingã nebã sẽn yãag a Poll ne a Barnabaas la neb nins sẽn da be ne-bã n zãag bilfã, wilgame tɩ b ra nong-b lame la b nand-ba. B da ratame  n maan bũmb n teel-ba, la b rat me tɩ b paam a Zeova barkã. Rẽ me yaa bũmb a to wɛɛngẽ kiris-neb nins sẽn da be Ãntiyoosã sẽn kõ tõnd mak-sõngo! Rẽ yĩnga, yãmb wilgdame tɩ y nanda y tẽed-n-taasã, “sẽn yɩɩd fãa, b rãmb nins [kãsem-dãmbã] sẽn tʋmd wʋsg koɛɛgã mooneg pʋgẽ, la nebã zãmsg pʋgẽ wã” bɩ?—1 Tɩm. 5:17.

¹⁵ A Poll ne a tʋmd-n-taasã sẽn wa n dabd Zerizalɛmmã, b kenga b tẽed-n-taas nins sẽn da be Fenisi ne Samari wã raoodo, n togs-b bu-zẽmsã neb sẽn tuubd to-to wã “ball-balle.” Tõe tɩ neb kẽer sẽn kelg a Poll goamã ra yaa Zʋɩf-rãmb sẽn lebg kiris-neba, n zoe n kẽng tẽn-kãens pʋsẽ, a Etɩɛn kʋʋbã poore. Rũndã-rũndã me, b sã n wa togsd a Zeova sẽn ningd tõnd sẽn sõngd nebã tɩ b lebgd a Zeezi karen-biisã tʋʋmd bark to-to wã, kengda d tẽed-n-taasã raoodo, sẽn yɩɩd fãa b rãmb nins sẽn maood ne zu-loeesã. Bɩ y maand y sẽn tõe fãa n kẽnd tigissã, tigis-kãsemsã, rasem a tãab tigis-kãsemsã, la y karemd nebã vɩɩm kibayã sẽn be tõnd sɛbã pʋgẽ wall jw.org pʋgẽ wã n paam n dɩ kiba-kãensã yõodo.

16. Bõe n wilgd tɩ bãongã kõom ra lebga zu-loɛɛg meng-menga?

¹⁶ Kiris-neb nins sẽn da yi Ãntiyoosã toga sor n maan kilo kobs-nu la pis-nu, la b wa n taa b sẽn dabdẽ wã. A Luk yeelame yaa: “B sẽn ta Zerizalɛmmã, tigingã neb la tẽn-tʋmdbã ne kãsem-dãmbã reeg-b-la neere. B togsa bũmb nins fãa Wẽnnaam sẽn tũnug ne bãmb n maanã.” (Tʋʋ. 15:4) La “Fariziyẽ-rãmbã sullã neb kẽer sẽn lebg tẽedbã yika b zĩisẽ n yeele: ‘Yaa tɩlɛ tɩ b kẽes-b bãong la b yeel-b tɩ b tũ a Moyiiz Tõogã.’” (Tʋʋ. 15:5) Yaa vẽeneg tɩ bãongã kõom ra lebga zu-loɛɛg meng-menga, tɩ ra yaa tɩlɛ tɩ b welg-a.

17. Ãnd dãmb n da yaa siglgã taoor lʋɩtb sullã sẽn be Zerizalɛmmã, la tõe tɩ yaa bõe yĩng la b sẽn yãk “kãsem-dãmbã” tɩ b naagã?

¹⁷ Yel-bũn 13:10 yetame tɩ “neb nins sẽn baood saglsã tara yam.” Sẽn zems ne rẽ, “tẽn-tʋmdbã ne kãsem-dãmbã tigma taab n na n ges [bãongã kõom] yelle.” (Tʋʋ. 15:6) Wa siglgã taoor lʋɩtb sullã sẽn maand to-to rũndã-rũndã wã, “tẽn-tʋmdbã ne kãsem-dãmbã” tigma taab n yãk yam tigimsã fãa yĩnga. Bõe yĩng tɩ kãsem-dãmbã ra naagd tẽn-tʋmdbã n tʋmdẽ? Tẽeg-y tɩ b ra kʋʋ tẽn-tʋmd a Zak, la tɩ sasa n zĩnd tɩ b kẽes a Pɩyɛɛr bãens roogo. Rẽ yĩnga, yɛl a woto buud n da paam tẽn-tʋmdb a taabã bɩ? Sã n yɩɩ woto,  dẽnd ra tara yõod tɩ b paam kiris-neb a taab sẽn paam vʋʋsem sõngã zaeeb sẽn na n sõng ne tʋʋmdã.

18, 19. Gom-bʋs sẽn tar pãng wʋsg la a Pɩyɛɛr togs-yã, la rẽ sõnga a kɛlgdbã tɩ b bãng bõe?

¹⁸ A Luk le paasame yaa: “La b sẽn wẽ no-koeemd wʋsg n kaoos poore, a Pɩyɛɛr yikame n yeele . . . : ‘Rapa, m saam-biisi, yãmb mii vẽeneg tɩ hal sẽn kaoose, Wẽnnaam yãka maam yãmb sʋka, sẽn na yɩl tɩ tũ ne mam no-goam tɩ bu-zẽmsã neb wʋm koe-noogã la b tẽ. Wẽnnaam sẽn mi sẽn be ned sũurẽ wã wilgame tɩ b taa a yam n kõ-b vʋʋsem sõngã, wa a sẽn kõ tõnd me wã. Sẽn paase, Wẽnnaam pa geelg baa bilf tɩ bu-zẽmsã yaa toor ne tõnd ye. La a yɩlga b sũyã b tẽebã yĩnga.’” (Tʋʋ. 15:7-9) Sebr a yembr pʋgẽ, b wilgame tɩ Gɛrk gom-bil ning b sẽn lebg tɩ “wẽ no-koeemd wʋsg” vɛrse a 7 wã pʋgẽ wã sõngdame tɩ d bãng tɩ kãsem-dãmbã “soka sogsgo, la b maag b yĩng n maan vaeesg yellã zugu.” Dẽnd baa ne b tagsa wã sẽn da yaa toor-toorã, b sak n sõsa yellã zugu, tɩ ned fãa togs sẽn be a sũurẽ.

¹⁹ A Pɩyɛɛr sẽn togs goam sẽn tar pãng wʋsgã tẽega nebã fãa t’a maana kaseto, a Korney ne a zakã rãmb sẽn yɩ pipi bu-zẽms neb sẽn paam vʋʋsem sõngã zaeeb yʋʋmd 36. Dẽnd a Zeova sã n da pa le welgd Zʋɩf-rãmbã la sẽn pa-b Zʋɩf-rãmbã, bõe yĩng tɩ ninsaalbã ra ket n maand woto? A Pɩyɛɛr goamã wilgdame me tɩ sẽn na yɩl t’a Zeova yeel tɩ ned yaa tɩrga, yaa a sẽn tẽed Kiristã, la pa a sẽn tũud a Moyiiz tõogã yĩng ye.—Gal. 2:16.

20. Wãn to la neb nins sẽn da wẽed no-koɛɛm bãongã kõom wɛɛngẽ wã ra “makd Wẽnnaam”?

²⁰ Sẽn zems ne Wẽnnaam sẽn da yeel bũmb ningã, la a sẽn tũnug ne a vʋʋsem sõngã n maan bũmb ninsã, a Pɩyɛɛr baasa a goamã n yeel yaa: “Woto wã, bõe yĩng tɩ yãmb makd Wẽnnaam masã, n zɩlgd karen-biisã zɩɩb sẽn yaa zɩsgo, zɩɩb tõnd yaab-rãmbã ne tõnd me sẽn pa tõog n tʋke? La tõnd tẽedame tɩ yaa Zu-soab a Zeezi barkã maasem yĩng la tõnd paam fãagre, wa bãmb me sẽn paam fãagr to-to wã.” (Tʋʋ. 15:10, 11) A Pɩyɛɛr wilgame tɩ neb nins sẽn da wẽed no-koɛɛm bãongã kõom wɛɛngẽ wã ra ‘makda Wẽnnaam,’ bɩ n ‘baood Wẽnnaam noore.’ Zʋɩf-rãmbã ra baoodame n na n modg bu-zẽmsã neb tɩ b tũ tõogã. La bãmb mensã yaool n da pa tũud bũmb nins fãa sẽn be tõogã pʋgẽ wã, tɩ kɩt tɩ Wẽnnaam kãab-b kãab-wẽnga. (Gal. 3:10) B pʋd n da segd n wilga Wẽnnaam tɩ b sũur yaa noog ne a sẽn tũnug ne a Zeezi n maan-b neerã.

21. Bõe la a Barnabaas ne a Poll togs tɩ sõng tẽn-tʋmdbã la kãsem-dãmbã tɩ b bãng n yãk yam?

²¹ Yaa vẽeneg t’a Pɩyɛɛr sẽn togs goam ninsã kɩtame t’a kɛlgdbã tagse, bala ‘sullã neb fãa sĩndame.’ Rẽ poore, a Barnabaas ne a Poll togs-b-la “bõn-bãnã la yel-soalem wʋsgã Wẽnnaam sẽn tũnug ne bãmb n maan bu-zẽmsã neb sʋkã.” (Tʋʋ. 15:12) Tẽn-tʋmdbã la kãsem-dãmbã ra tõeeme masã n tik Wẽnnaam tagsg sẽn da yaa a soab yellã zugã n bãng n yãk yam bãongã kõom wɛɛngẽ.

22-24. a) Wãn to la rũndã-rũndã siglgã taoor lʋɩtb sullã rɩkd pĩnd wẽndẽ siglgã taoor lʋɩtb sullã togs-n-taare? b) Wãn to la kãsem-dãmbã fãa wilgd tɩ b ratame tɩ bũmb fãa yɩ wa a Zeova sẽn dat to-to wã?

 ²² Rũndã-rũndã me, siglgã taoor lʋɩtb sullã sã n wa tigim taaba, b maagda b yĩng n maan vaeesg Wẽnnaam Gomdã pʋgẽ n paam t’a wilg-b sore, la b pʋʋs ne b sũur fãa n kos-a vʋʋsem sõngã. (Yɩɩn. 119:105; Mat. 7:7-11) Rẽ wɛɛngẽ, b rengd n kõo sullã ned kam fãa b tigsgã na-kẽndre. Woto, ned fãa tõe n zoe n tagsa rẽ yelle, la a pʋʋs rẽ yĩnga. (Yel. 15:28) Tigsgã sasa, saam-bi-kãensã sẽn paam vʋʋsem sõngã zaeebã pelgda b pʋs n sõsd ne taab ne waoogre. Sõsgã sasa, b baoodame n bãng Wẽnnaam Gomdã sẽn yetã.

²³ Tigingã kãsem-dãmbã segd n dɩka b togs-n-taare. Kãsem-dãmbã sã n wa tigim taab n na n welg yell ninga, tɩ ket n pa yãkd nenga, b tõe n kosa filiyallã taoor lʋɩtb sullã, wall tigims sull yel-gɛtã sõngre. Sã n yaa tɩlɛ, filiyallã taoor lʋɩtb sullã tõe n gʋlsa siglgã taoor lʋɩtb sullã.

²⁴ Hakɩɩka, a Zeova ningda neb nins sẽn sakd n tũud a siglgã noyã barka, la b rãmb nins sẽn yaa sik-m-mens rãmbã, sẽn maand-b sɩd la b maand sũ-marã me barka. Wa d sẽn na n yã sak ning sẽn pʋgdã pʋgẽ wã, d sã n maand woto, a Zeova na n kõo tõnd a laafɩ wã, a na n kɩtame tɩ zems-n-taar zĩnd d sʋka, tɩ d sõorã me fɩɩge.