D naandã yamã yɩɩda tõnd hal zĩig sẽn zãre. A yaa d Ba sẽn nong-do, n dat d neere. A pʋd n da pa rat tɩ ninsaalbã kɩɩs-a, n maand b sẽn dat ye. (Yelbũna 20:24) Wa sẽn yaa tɩlae tɩ biig roagdb wilg-a sẽn segdã, yaa tɩlae tɩ tõnd me paam tɩ Wẽnnaam wilg-d sẽn segde. (Ezai 48:17, 18) Biiblã yaa Wẽnnaam n kõ-do, n na n sõng-d tɩ d bãng sẽn segde.​—Karm-y 2 Tɩmote 3:16.

A Zeova noyã sõngda tõnd tɩ d vɩɩmã yɩ sõma masã menga. Leb n wilgda d sẽn tõe n maaneg n wa paam vɩɩm sẽn kõn sa wã. Sẽn mik tɩ yaa Wẽnnaam n naan tõndã, togame la zemsame tɩ d tũ a sẽn yetã.​—Karm-y Yɩɩl Sõamyã 19:8, 12; Wilgr 4:11.

Biiblã pʋgẽ, d yãta sagls la goam sẽn tõe n sõng-d tɩ d bãng Wẽnnaam daab yɛl kẽer pʋgẽ. Noy me n be be, tɩ noor fãa wilgd bũmb takɩ d sẽn tog n maane. (Tõodo 22:8) La yaa tõnd n segd n tags n bãng d sẽn na n tũ noyã la saglsã to-to. (Yelbũna 2:10-12) Wala makre, Biiblã yetame tɩ vɩɩmã yaa Wẽnnaam kũuni. D sã n bãng rẽ, d maanda gũusg d tʋʋmã zĩigẽ, d zakẽ, la d sã n wa rɩkd sore.​—Karm-y Yɩɩl Sõamyã 100:3.

A Zezi goma Wẽnnaam noy a yiib sẽn yaa kãsems yelle. Pipi soabã wilgda Wẽnnaam sẽn naan ninsaalã võore. Yaa sẽn na yɩl t’a bãng-a, n nong-a, la a tũ-a ne a sũur fãa. D yam-yãkr fãa pʋgẽ, d tog n tẽega no-kãng  yelle. (Yelbũna 3:6) Neb nins sẽn tũud rẽ ne b sũy fãa wã paamda Wẽnnaam zoodo, sũ-noog hakɩka, la b na n wa paama vɩɩm sẽn kõn sa.​—Karm-y Matɩe 22:36-38.

Yiib-n-soabã sõngdame tɩ tõnd ne neb a taabã zĩid-n-taarã yɩ noogo. (1 Korẽnt dãmba 13:4-7) No-kãng tũub kɩtdame tɩ d rɩk Wẽnnaam togs-n-taar d manesmã ne neb a taabã pʋgẽ.​—Karm-y Matɩe 7:12; 22:39, 40.

Biiblã noyã sõngda zagsã rãmb tɩ b nonglmã ne taabã paasdẽ. (Efɛɛz rãmba 4:32; Kolos rãmba 3:12, 14) A sẽn yet tɩ kãadem yaa yõor tɛk bũmbã me kogenda zak rãmb ne zu-loees kẽere.​—Karm-y Sɩngr 2:24.

Biiblã noyã tũub sõngda tõnd ligdã la tʋʋmã baoob wɛɛngẽ, la kɩtdẽ tɩ d gind sũ-sãamse. Wala makre, tʋʋmã zĩisẽ, b nong n data neb sẽn tʋmd sõma la ne pʋ-peelem wa Biiblã sẽn sagend tõndã. (Yelbũna 10:4, 26; Hebre dãmba 13:18) Wẽnnaam Gomdã yetame tɩ d sek d mens ne sẽn yaa tɩlae ne-dã, la d bao Wẽnnaam zoodã n yɩɩd ligdã la teedã.​—Karm-y Matɩe 6:24, 25, 33; 1 Tɩmote 6:8-10.

Biiblã noy tũub kogenda tõnd laafɩ wã wɛɛngẽ. (Yelbũna 14:30; 22:24, 25) Wala makre, d sã n tũud Wẽnnaam noorã rãamã yũub wɛɛngẽ, kogenda tõnd ne bã-kʋʋds la sãmpoaga. (Yelbũna 23:20) A Zeova pa gɩdg rãam yũubu, la a pa rat tɩ d yũ tɩ loog ye. (Yɩɩl Sõamyã 104:15; 1 Korẽnt dãmba 6:10) Wẽnnaam noyã pa sõngd tõnd tɩ d gũus ne d tʋʋm-tʋmdɩ wã bal ye. Sõngdame tɩ d gũus ne d tagsa wã me. (Yɩɩl Sõamyã 119:97-100) Kiris-nebã sẽn tũud a Zeova noyã pa sẽn nafd-bã yĩng bal ye. Yaa sẽn na yɩl n waoog-a.​—Karm-y Matɩe 5:14-16.