A Dauda sẽn yit Sieraleonnã yeela woto: “Tõnd zakã rãmb ra vɩɩ tẽn-bil a ye pʋgẽ. M sẽn wa n yaa yãagã, tõnd zakã rãmb ne zak a to rãmb n da zabd taab zĩig poorẽ. Zak fãa ra yetame tɩ zĩigã yaa bãmb n so. Sẽn na yɩl n welg yellã, b boola tɩɩm soaba. A sẽn ta wã, a kõo rao a ye nin-gɛtga, la a pil-a ne fu-pɛɛlga. Pa yã n kaoos la raoã sɩng rigbu, t’a tʋʋlgã kaoogdẽ. A sẽn get nin-gɛtgẽ wã, a wa n zẽka a koɛɛg n yeele: ‘M nee nin-kẽem sẽn kẽnd n watẽ! A yera fu-peelse, n yaa woko, t’a zoobdã fãa pelge, t’a kẽnd n kuudẽ.’”

“A sẽn da bilgd ned ningã yaa m yaab-raoogo! Raoã lebga wa ned zug sẽn kae. A kelmame n yeele: ‘Yãmb sã n pa tẽed m sẽn yetã bɩ y wa ges y toore!’ La ned baa ye ra pa tar daood n na n kolg n ges ye. Tɩɩmã soab ra zãada wamde, tɩ tɩ-koom be be. Yaa tɩɩs vãad la a ning koomẽ. A yãkame n mes raoã, tɩ rẽ kɩt t’a bʋk bilfu.”

“Sẽn da be-a nin-gɛtgã pʋgẽ n wõnd m yaab-raoogã gomame, n yeel tɩ zĩigã yaa tõnd zakã rãmb n so. A yeela m yaab-poak t’a maan a sẽn dat ne zĩigã la a ra zoe rabeem ye. Zak a to wã rãmb sakame tɩ sɩd yaa tõnd n so zĩigã. Yellã welgame.”

 Kibay a woto buud waee Afirikdeluwɛst tẽnsã pʋsẽ. Dũniyã gill zugu, neb milyõ rãmb n tẽed tɩ sẽn ki-bã tara zĩig n kẽnda, la tɩ b sã n be be b nee sẽn vɩ-bã, n tõe n maan-b neer bɩ wẽnga. Woto yaa sɩd bɩ? Sẽn ki-bã tɩ vɩɩ zĩig a to bɩ? B sã n pa tɩ vɩ zĩig a to, ãnd dãmb masã la nebã sẽn mi n yãt n tẽed tɩ yaa sẽn ki-bã? Segdame tɩ d paam sogs-kãensã leoore, bala yaa yell sẽn tõe n tũ ne d yõore.