1, 2. a) Bõe yĩng t’a Ana segend so-toakã t’a sũurã yaool n pa noome? b) Wãn to la a Ana kibarã tõe n sõng tõndo?

A ANA segenda a meng n na n tog sore. A tara zu-loeese, la a modgdame n pa rat n tags rẽ yelle, bala tog n yɩɩ sũ-noog wakate. Yʋʋmd fãa, a sɩd a Ɛlkana peegda a zakã rãmb tɩ b tog sor n kẽng wẽnd-doogẽ wã Silo, n tɩ waoog Wẽnnaam. A Zeova ratame tɩ sasa kãng yɩ sũ-noog wakate. (Karm-y Tõod 16:14, 15.) Yaa vẽeneg t’a Ana sɩng n nonga kibs kãensã hal a yãadmẽ. La yʋʋmã noorã, yɛlã pa nana ne-a ye.

² A Ana ra paamame t’a sɩdã nong-a. La a Ɛlkana ra tara pag a to, t’a yʋʋr la a Penina. La wõnda a raabã ra yaa a nams a Ana yõorã. A Penina pʋd n da sɩfa a sũurẽ n na n maan tɩ kibs kãensã wakat bɩ a Ana sũ-sãangã maneg n yãnge. Bõe la a Penina ra maanda? La sẽn tar yõod n yɩɩda, wãn to la a Ana sẽn tall tẽeb ne a Zeova wã sõng-a t’a tõog toogo, baa ne yellã sẽn wõnd yɩɩda a pãngã? Y sã n tara zu-loees sẽn namsd-y hal n sãamd y sũur wʋsgo, bɩ y bãng t’a Ana kibarã tõe n kenga y raoodo.

3, 4. Zu-loe-kãsems a yiib la a Ana ra tara. Yaa bʋse, la bõe yĩng tɩ fãa ra pa nana ne-a?

³ Biiblã wilga zu-loe-kãsems a yiib sẽn da namsd a Ana wʋsgo. Pipi soabã ra pa nana yaa sɩda, la yiib-n-soabã ra tolg n yɩɩda a nug t’a pa tar a tɩɩm ye. Pipi zu-loɛɛgã yaa pʋg-taarã, bala a pʋg-to wã ra kis-a-la wʋsgo. Zu-loɛɛg a to wã yaa a sẽn da yaa kiirã. Pag sẽn dat rogem sã n tar zu-loe-kãngã, namsd-a-la wʋsgo. Sẽn paase, a Ana rãmb wakatẽ wã, b minimdã ra kɩtame tɩ pag sã n tar zu-loe-kãngã, yaa sũ-sãams tɛkẽ. Ned fãa ra ratame n paam rogem t’a yʋʋr da menem ye. Kɩtame tɩ ned sã n da yaa kiiri, yaa yel-beed la yãnd menga.

⁴ A Ana ra na n tõog n maoo ne zu-loe-kãngã, sã n da mikẽ lame t’a Penina yellã pa naag ye. Rao sã n tar sẽn yɩɩd pag a ye,  wata ne zu-loeese. Naoor wʋsgo, yaa pʋg-taare, zab la sũ-sãamse. Pa woto la Wẽnnaam da rat ye. Bala a naana pag a ye n kõ a Ãdem. (Sɩng. 2:24) A Ɛlkana zakã kibarã sẽn be Biiblã pʋgẽ wã wilgda vẽeneg tɩ rao sã n tar sẽn yɩɩd pag a ye, pa sõma ye. Yaa bũmb b sẽn pa pẽgd Biiblã pʋgẽ.

5. Bõe yĩng t’a Penina rat t’a Ana namse, la bõe la a ra maand n sãamd a sũurã?

⁵ Yaa a Ana la a Ɛlkana ra nong n yɩɩda. Zʋɩf rãmbã kʋdemdã kibay sɛb wilgdame t’a Ɛlkana reng n kẽe kãadem ne a Ana, n yaool n na n dɩk a Penina yʋʋm a wãn poore. Sẽn yaa a soab fãa, a Penina sẽn da maand sũ-kiir wʋsg ne a pʋg-to wã yĩnga, a ra maanda a sẽn tõe fãa n na n nams-a. Bũmb sẽn da kõt a Penina pãng yaa a sẽn da tar rogmã. A paama kamb wʋsgo, hal t’a sã n dog fãa bɩ a zẽk-m-mengã tar paasgo. A ra tog n kʋmda a Ana la a belsd-a a zu-loɛɛgã pʋgẽ, la a pʋd n da bẽta rẽ n maneg n yaand-a. Biiblã yetame t’a Penina ra “namsd-a-la wʋsgo, n sãamd a sũuri.” (1 Sãm. 1:6) Yaa pʋ-toog la a Penina sẽn da maandã. A sẽn da baood bal yaa sãam a Ana sũuri. La a sɩd tõogame.

6, 7. a) A Ɛlkana sẽn mak n na n bels a Ana wã, bõe yĩng t’a Ana pa togs-a a Penina sẽn maand yẽ bũmb ningã? b) A Ana sẽn da yaa kiirã wilgdame t’a Zeova ra pa nong-a bɩ? (Ges-y vẽnegrã sẽn be tẽngrã.)

⁶ Wõnda b sã n wa togd sor n dabd wẽnd-doogẽ wã Silo, a Penina paamda segb n tolg n yaand a Ana. Wakat kãnga, a Ɛlkana sã n na n maan maoongo, a pʋɩtame t’a Penina reeg yẽ “ne a kambã fãa” rẽnda, t’a Ana reeg yẽ a ye bal rẽnda. A Penina tũnugda ne rẽ n yaand a Ana la a tẽegd-a t’a yaa kiiri, hal t’a Ana yãbd n pa satẽ, tɩ rɩɩb yamleoog meng pa tar-a ye. A Ɛlkana bãngame t’a pʋg-nongr a Ana sũurã sãamame t’a pa rat rɩɩb ye. A makame n na n bels-a. A sok-a-la woto: “Yaa bõe tɩ f yãbd n ka rat n dɩ? Yaa bõe tɩ f sũur sãamdẽ? Mam ka yɩɩd kom-dibli piig ne foom sɩda?”—1 Sãm. 1:4-8.

⁷ A Ɛlkana bãngame t’a Ana sũ-sãangã yaa a sẽn pa tar rogmã. Yaa vẽeneg t’a Ana sũur yɩɩ noog a Ɛlkana sẽn tẽeg-a t’a nong-a lame wã. * La a Ɛlkana pa tol n gom a Penina  manesmã yelle, Biiblã me pa wilg t’a Ana togs-a-la a Penina sẽn maand yẽ wã ye. Tõe t’a gesame t’a sã n togse, yellã na n maneg n zẽname. Bõe n wilgd t’a Ɛlkana sã n bãng me, a na n tõog n welga yellã? A Penina pa na n maneg n kisg-a n paase, t’a kambã la a tʋʋm-kambã me naag pʋg-kãngã sẽn pa tar nimbãan-zoeerã n nams-a sɩda? Sã n yɩ woto, yellã na n maneg n zẽname tɩ zakã pʋg vɩɩm lebg toog ne a Ana n paase.

8. Ned sã n maand yel-bõones sẽn namsd yãmba, wall a maand-y wẽnga, bõe yĩng tɩ y na n paam belsgo, y sã n tẽeg t’a Zeova yaa tɩrlem soaba?

⁸ A Ɛlkana ra mi a Penina sẽn da maand a pʋg-to wã fãa t’a ra pa mi me, Wẽnnaam a Zeova yẽ ra nee fãa. Wẽnnaam sẽn vẽneg yellã n togs a Gomdã pʋgẽ wã wilgdame t’a ra nee bũmb fãa. Leb n yaa keoogr n kõ ned ning fãa sẽn kis a to bɩ n maand sũ-kiir baa yaa bilfu. Sẽn paase, bʋʋm-dãmbã ne sẽn nong-b laafɩ wa a Ana wã tõe n paama belsgo, b sã n bãng tɩ Wẽnnaam sẽn yaa tɩrlem soabã kaooda bʋʋd a wakat tɩ zemse. (Karm-y Tõod 32:4.) Tõe t’a Ana ra mii rẽ sõma, bala yaa a Zeova nengẽ la a bao sõngre.

9. A Ana sẽn da mi a pʋg-to wã sẽn na n tall manesem ningã, la a baas n sak n tog sor n kẽng Silo wã kõta tõnd sagl-bʋgo?

⁹ Zakã nebã yika tõdbeoogo, tɩ ned fãa sagd a teed n segend so-toakã. Neba fãa saame la bal tɩ b na n looge, baa kambã. Yaa sẽn yɩɩd kilo 30 la b na n maane, n pasg Efrayim tẽngã sẽn pid ne tãensã n paam n ta Silo. * Sã n yaa ne nao, so-toakã na n dɩka raar a ye bɩ rasem a yi. A Ana ra zoe n mi a pʋg-to wã manesem sẽn na n yɩ to-to. La baasgo, a ka pa yir ye. Woto yaa mak-sõng a sẽn kõ rũndã-rũndã wẽn-tũudbã. Pa yam bũmb tɩ d bas tɩ neb a taabã sẽn maand tɩ pa noom-dã kɩt tɩ d pa tũ a Zeova sõma ye. D sã n maan woto, d na n konga bark nins sẽn tõe n keng d raood tɩ d tõog toogã.

10, 11. a) Bõe yĩng t’a Ana yik n kẽng wẽnd-doogẽ wã n pa bas tɩ kaoose? b) Wãn to la a Ana pelg a pʋg n togs a saasẽ Ba wã sẽn be a sũurẽ?

¹⁰ Tãensã kɩtame tɩ sorã yaa gõdem-gõdem, la a Ɛlkana ne a zakã rãmb tũu so-kãng bala. B kolga Silo masã, n ne tẽngã sẽn be kunkubr zugu, tɩ tãensã gũbg-a. B ta n saame, la yaa vẽeneg t’a Ana zoe n bʋgsda a sẽn na n yeel a Zeova bũmb ning a pʋʋsgã pʋgẽ wã. B sẽn ta wã, b zĩndame n dɩ. La a Ana pa bas tɩ kaoos ye. A wa n yik n basa a zakã rãmba, n kẽng wẽnd-doogẽ wã.  Maan-kʋʋdbã kãsem a Eli da zĩi wẽnd-doogã noore. A Ana sẽn da tagsd a pʋʋsgã yellã yĩnga, a pa yã a Eli ye. A sẽn tõog n ta wẽnd-doogẽ wã, a kɩsa sɩd t’a na n paama kelgre. Ned wa n pa mi a toogã sẽn ta zĩig ningã me, a Ba sẽn be saasẽ wã yẽ miime. Sũ-sãangã sãag-a lame t’a sɩng yãbre.

¹¹ A Ana yãbdame n kĩgsdẽ, la a pʋʋsd a Zeova a sũur pʋgẽ. A no-bɩmsã bal n da miimdi, t’a gomd a sũur pʋgẽ n togsd a Zeova a sũ-sãangã. A pʋʋsame n kaoose, n pelg a pʋg n togs a Ba wã sẽn be a sũurẽ wã fãa. A pa kos tɩ Wẽnnaam kõ-a a sẽn datã bala, rat n yeel tɩ rogmã ye. Yaa sɩd t’a ra ratame t’a Zeova ning-a barka, la a ra magdame me n na n kõ a Zeova kũuni. Rẽ n so t’a pʋlem a Zeova t’a sã n sõng-a t’a paam bi-ribla, a na n dɩka biigã n kõ-a t’a tʋm a roogẽ wã a yõor tɛka.—1 Sãm. 1:9-11.

12. Wala a Ana kibarã sẽn wilgdã, bõe la d segd n tẽegd pʋʋsgã wɛɛngẽ?

¹² Pʋʋsgã wɛɛngẽ, a Ana sẽn maanã yaa mak-sõng n kõ a Zeova nin-buiidã. A Zeova yeta tõnd tɩ d pelg d pʋs n gom ne-a n da maan yam-yoogo, n togs-a d zu-loeesã fãa, wa biig sẽn kɩs a ba sɩda, n miẽ t’a nong-a lame. (Karm-y Yɩɩl Sõamyã 62:9; 1 Tesalonik rãmb 5:17.) Wẽnnaam vẽnega tʋm-tʋmd a Pɩɛɛr t’a yeel bũmb sẽn kengd raood pʋʋsgã wɛɛngẽ. A yeela woto: “Bɩ y bas yãmb yɩɩrã fãa ne bãmba; tɩ bõe, bãmb mengã geta yãmb yelle.”—1 Pɩɛ. 5:7.

13, 14. a) Maana wãn t’a Eli yɩ tao-tao n tall tags-kɛgr a Ana zugu? b) Bõe yĩng t’a Ana sẽn tall manesem ning ne a Eli wã yaa mak-sõngo?

¹³ La ninsaalbã yẽ pa tõe n wʋm tõnd toogã la b kʋm tõnd n ta a Zeova ye. A Ana sẽn da yãbd la a pʋʋsdẽ wã, a wa n wʋma ned koɛɛga. Yaa maan-kʋʋdbã kãsem a Eli. Ra-kãngã ra get-a lame. A yeela a Ana woto: “Fo na n basa rãam yũub rabʋre?” A Eli yãa a Ana no-bɩmsã sẽn da miimdã, a sẽn da kĩgsdã, la sũ-sãamsã sẽn da kɩt t’a yaa zõo wã. A Eli pa sok-a n gese bõe n tar-a ye. A yɩɩ tao-tao bal n tags t’a yũu rãam n su.—1 Sãm. 1:12-15.

¹⁴ Ad sɩd yaa kaeto! Fo sẽn na n yas ne f toogo, tɩ b yeel-f tɩ yaa rãam. Rẽ me, Wẽnnaam sẽn yãk ned ning t’a yaa maan-kʋʋdbã kãsmã la sẽn yeel woto wã. Baasgo, a Ana manesmã yel-kãngã pʋgẽ wã me yaa mak-sõngo, sẽn wilgd t’a talla tẽebo. A pa bas tɩ ninsaal tudgr sãam a pʋʋsgã ye. A leoka a Eli ne waoogre, n wilg-a tɩ yaa a sũur n sãame. A Eli le goma ne-a, la so-kãngã a sẽn bãng t’a tudgame wã, tõe t’a sika a koɛɛgã n gom ne bʋgsem. A yeel-a-la woto: “Bɩ f kẽng ne laafɩ, tɩ Israyɛll Wẽnnaam kõ foom f sẽn kot bãmb bũmb ningã.”—1 Sãm. 1:15-17.

15, 16. a) A Ana sẽn kẽng wẽnd-doogẽ wã n tɩ waoog a Zeova la a pelg a pʋg n togs-a sẽn be a sũurẽ wã, bõe n maane? b) Wãn to la d tõe n dɩk a Ana togs-n-taare, sã n wa wõnd yɛlã loog-d lame?

 ¹⁵ A Ana sẽn kẽng wẽnd-doogẽ wã n tɩ waoog a Zeova la a pelg a pʋg n togs-a sẽn be a sũurẽ wã, bõe n maane? Kibarã yeta woto: “Yẽ loogame. Yẽ rɩɩ rɩɩb n ka le gãnem a neng ye.” (1 Sãm. 1:18) A Ana paamame t’a yamã gãande. Dẽnd yaa wa a rɩka a yellã sẽn da zɩlgd-a wã n tɩ tʋk ned a to sẽn tar pãng n yɩɩd yẽ. Nin-kãng yaa a Ba sẽn be saasẽ wã. (Karm-y Yɩɩl Sõamyã 55:23.) Zu-loɛɛg beeme n yɩɩd a Zeova pãng bɩ? Abada! Ka zĩnd pĩndã, kae rũndã, kõn tol n zĩnd me!

¹⁶ D sũurã sã n wa sãam wʋsgo, tɩ wõnd yɛlã loog-d lame tɩ d pa mi d sẽn maande, yɩta sõma tɩ d rɩk a Ana togs-n-taare, n pelg d pʋg n togs d yellã a soab ning sẽn ‘wʋmd-a pʋʋsgã.’ (Yɩɩl 65:3) D sã n maan rẽ ne tẽebo, tõnd me na n yãame tɩ ‘Wẽnnaam laafɩ wã sẽn yɩɩd nebã bãngr fãa’ wã na n ledga d sũ-sãangã.—Fil. 4:6, 7.

17, 18. a) Bõe n wilgd t’a Ɛlkana saka a Ana pʋlengã? b) Bõe la a Penina wa n bãnge?

¹⁷ Vẽkembeoog yibeoogo, a Ana leb n kẽnga wẽnd-doogẽ wã ne a Ɛlkana. Wõnda a togsa a Ɛlkana a sẽn kos Wẽnnaam bũmb ningã, la a pʋlengã, bala a Moiiz tõogã ra wilgame tɩ pag sã n pʋlem Wẽnnaam bũmb t’a sɩdã pa mi tiiri, a sɩdã tara sor n tõe n kɩt tɩ vaale. (Sõd. 30:10-15) La ra-kãngã sẽn yaa wẽn-sakdã pa yeel tɩ pʋlengã na n vaalame ye. Yẽ ne a Ana pʋd n naaga taab n pʋʋs a Zeova wẽnd-doogẽ wã, n yaool n dɩk yir sore.

¹⁸ Wakat bʋg la a Penina wa n bãng t’a yaalgã pa le maand a Ana bũmbu? Kibarã pa togs ye. La b sẽn yeel t’a Ana ‘pa le gãnem a nengã’ wilgdame t’a pa le sãam a sũur ye. Sẽn yaa a soab me, pa kaoos la a Penina bãng t’a yaalgã pa le zabd a Ana ye. Rẽ tɛka, Biiblã pa le gom a Penina yell ye.

19. Bark bʋg la a Ana paam-yã, la wãn to la a wilg t’a pa yĩm tɩ yaa Wẽnnaam n ning-a barkã?

¹⁹ Daar ne a to fãa, a Ana sũ-noogã tara paasgo. A wa n tʋtame. La baa rẽ sẽn paas a sũ-noogã, a pa tol n yĩm tɩ yaa Wẽnnaam n ning-a bark ye. A roga bi-ribla, n pʋd a yʋʋr t’a Sãmwɛll. Sãmwɛll rat n yeelame tɩ “Wẽnnaam yʋʋre.” Woto wilgda vẽeneg t’a pʋda Wẽnnaam yʋʋr n kos biigã. Yʋʋm-kãngã, a Ana pa tũ a Ɛlkana ne zakã rãmb n kẽng Silo ye. Yʋʋm a tãabã sẽn pʋglã fãa, a paa yir n ges biigã yelle, hal t’a wa sigi. A kenga a pɛlg n gũud raar ning a sẽn na n tall a bi-nongrã t’a tɩ pa wẽnd-doogẽ wã.

20. Wãn to la a Ana ne a Ɛlkana pids b pʋlengã?

 ²⁰ Pa yɩ nana ne a Ana t’a bas a biigã wẽnd-doogẽ wã la a loog ye. A ra miime tɩ b na n gesa a Sãmwɛll yell sõma. Tõe tɩ yaa pagb kẽer sẽn tʋmd wẽnd-doogẽ wã n na n ges a yelle. Baasgo, biigã ra paoodame. Sẽn paase, pʋg-bʋg n pa rat t’a biig be a sɛɛgẽ? La ne rẽ fãa, a Ana ne a Ɛlkana talla biigã n wa kɩse. Pa yɩ ne nen-gãneng ye. Yɩɩ ne sũ-noogo. B maana maand wẽnd-doogẽ wã n kõ a Zeova, la b tall a Sãmwɛll n tɩ wilg a Eli, n tẽeg-a pʋleng ning a Ana sẽn da maan yʋʋm a wãn sẽn loogã.

21. Wãn to la a Ana pʋʋsgã wilgd t’a sɩd tara tẽebo? (Ges-y zĩ-gũbrã gom-zug sẽn yet tɩ “ Pʋʋsg a yiib sẽn tar pãnga.”)

²¹ Dẽ poore, a Ana pʋʋsa a Zeova. A Zeova sũur yɩɩ noog ne a pʋʋsgã, t’a kɩt tɩ b gʋls tɩ be Biiblã pʋgẽ. Y sã n karem a pʋʋsgã sẽn be 1 Sãmwɛll 2:1-10, y yãtame t’a sẽn gom to-to wã sɩd wilgdame t’a talla tẽebo. A Ana pẽga a Zeova a pãng-kãsengã yĩnga, a sẽn sikd wuk-m-mens rãmbã, n ningd nimbãan-dãmbã barka, n tõe tɩ ned ki la a tõe tɩ ned vɩɩmdã. A pẽga a Ba wã, a sẽn yaa sõng hal n ka to wã, a tɩrlmã la a sẽn ka basd a nebã yĩnga. A Ana bee bʋʋm la a sẽn yeel tɩ “ned ka be n tar pãng wa tõnd Wẽnnaamã.” A Zeova yaa Wẽnnaam d sẽn sɩd tõe n teege. A pa toeemd ye. A yaa zĩ-soalgdg ka pãng rãmbã la nimbãan-dãmbã yĩnga.

22, 23. a) Bõe n wilgd tõnd t’a Sãmwɛll bɩʋʋngã sasa, a ra miime t’a roagdbã nong-a lame? b) Bark bʋs yɛs la a Zeova ning a Ana?

²² Biig a Sãmwɛll sẽn paam t’a ma yaa ned sẽn tar tẽeb woto wã sɩd yaa sõma. Baa ne a sẽn da rat n be ne a ma wã, a zɩ n tags t’a yĩma a yell ye. Yʋʋmd fãa, a Ana wata Silo, la a sã n watẽ, a wʋgda fu-bil n wa kõ a Sãmwɛll t’a na n yeelgd n tʋmd wẽnd-doogẽ wã. Fuugã sẽn  wʋg to-to wã meng wilgdame t’a nonga a biigã wʋsgo. (Karm-y 1 Sãmwɛll 2:19.) Mams-y y yamẽ a sẽn wa ne fu-paall n yelg bi-riblã, n maneg-manege, n doog n ges-a n yõgemd a noore, la a gom ne-a hal tɩ biigã sũur noome. A Sãmwɛll sẽn paam ma sẽn yaa woto wã sɩd yaa bark tɛkẽ. Biig a Sãmwɛll bɩɩme, la a yɩɩ bark a roagdbã yĩnga, la Israyɛll nebã fãa yĩnga.

²³ Wẽnnaam pa yĩm a Ana me yell ye. A Zeova kell n kõ-a-la rogem tɩ yẽ ne a Ɛlkana le paam kamb a nu. (1 Sãm. 2:21) La wõnda bũmb ning sẽn da kõt a Ana sũ-noog n yɩɩdã, yaa a sẽn da tar zood sõma ne a Ba a Zeova wã. Yʋʋmã sẽn da tar paasgã, zood kãng me talla paasgo. Wẽnd na kɩt tɩ yãmb me nengẽ yɩ woto, y sẽn modgd n na n tall a Ana tẽebã buudã.