1, 2. a) Sãana sẽn na n pʋʋs a Maari wã, a yeel-a lame tɩ bõe? b) Yam-yãkr bʋg la a Maari ra segd n maane, la bõe yĩng tɩ rẽ na n toeem a vɩɩmã?

A MAARI maaga a yĩng n get sãan sẽn kẽed b zakẽ wã. A sẽn ta wã, a pa sok a Maari ba bɩ a ma yell ye. Yaa a Maari la a rata. A Maari sẽn yã-a wã bala, a bãngame tɩ pa Nazarɛt ned ye. Sẽn yaa tẽn-bilã yĩnga, b pa yãt sãan n kong ye. La sãan-kãngã pʋd n yaa toor fasɩ. A sẽn pʋʋs a Maari to-to wã ling-a lame, bala ned ra zɩ n pʋʋs-a woto ye. A yeelame: “Mam pʋʋsda foom, fo sẽn yaa ned Wẽnnaam sẽn barkã. Zu-soabã bee ne foom.”—Karm-y Luk 1:26-29.

² Biiblã wilgame t’a Maari yaa a Heli sẽn yit Nazarɛt sẽn be Galile wã bi-pugla. B sẽn na n sɩng a Maari yell goamã tɩ yaa sasa a sẽn da tog n maan yam-yãkr sẽn pa nana a vɩɩmã pʋgẽ. Rẽ tɩ b ra rɩk-a lame n kõ a Zozɛf sẽn yaa ra-wãadã. A Zozɛf pa arzɛk soaba, la a tũuda Wẽnnaam ne a sũur fãa. Dẽnd a Maari ra ninga a yamẽ bal t’a na n lebga a Zozɛf paga, n sõngd-a ne zakã yell gesg la b kambã wubri. Yaa wakat kãng la a Wẽnnaamã tʋm sãanã t’a wa bobl-a tʋʋmd sẽn na n toeem a vɩɩmã fasɩ.

3, 4. D sã n dat n bãng a Maari sõma, bõe la d pa segd n tẽ, la bõe la d segd n maane?

³ Biiblã sẽn pa togsd bũmb wʋsg a Maari zugã lingda neb wʋsgo. A pa gomd a yãadmã yell la a sẽn yɩ ned ning buudã wʋsg ye. B pʋd n pa bilgd a mengã sẽn da yaa to-to wã ye. Baa ne rẽ, Wẽnnaam Gomdã sẽn yet a Maari zugã sõngda tõnd tɩ d bãng bũmb wʋsgo.

⁴ D sã n dat n bãng a Maari sõma, d pa segd n tẽ bũmb nins tũudum wʋsg sẽn zãmsd nebã pʋg-kãngã zugã ye. D ra tags t’a sɩd yaa wa b sẽn mamsd-a to-to n maand bõn-naandsã ye. D ra tags me tɩ pʋg-kãngã sẽn yaa sik-m-meng soabã yaa “Wẽnnaam ma,” bɩ “saasẽ rĩm-poaka,” wa tũudum kẽer sẽn zẽkd-a to-to wã ye. D gãd Biiblã sẽn yet tõnd bũmb ningã bala, tɩ na n sõngd-d  lame tɩ d bãng t’a Maari tẽebã talla pãnga, la d bãng d sẽn tõe n dɩk a togs-n-taar to-to.

5. a) A Gabriyɛll sẽn pʋʋs a Maari t’a manesmã yɩ to-to wã wilgda tõnd bõe yẽ mengã zugu? b) Yam-bʋg la d tõe n dɩk a Maari mak-sõngã pʋgẽ?

⁵ A Maari sãanã meng pa ninsaal ye. Yaa malɛk a Gabriyɛll. Malɛkã sẽn bool-a tɩ “ned Wẽnnaam sẽn barkã,” ‘yɛɛs-a lame,’ hal t’a sok a meng tɩ yaa bõe pʋʋsem la woto. (Luk 1:29) La malɛkã gomdã võor yaa bõe? Yaa vẽeneg t’a Maari sẽn da baoodã pʋd n pa ninsaalb bark ye. Malɛkã gomdã rat n yeelame tɩ Wẽnnaam a Zeova sũur yaa noog ne a Maari. Rẽ la a Maari ra rat n yɩɩda. Baasgo, a pa zẽk a meng n tagsdẽ t’a zoe n paama Wẽnnaam barkã ye. A Maari mak-sõngã wilgda tõnd tɩ segdame tɩ d modgd n baood Wẽnnaam barkã, la d ra tol n tags tɩ d zoe n paamame ye. Wẽnnaam kisa wuk-m-mens rãmbã. Sik-m-mens rãmbã la a nonga, n sõngd-ba.—Zak 4:6.

6. Tʋʋm-bʋg sẽn sɩd yaa zu-zẽkr meng la malɛkã bobl a Maari?

⁶ Yaa tɩlae t’a Maari tall sik-m-menga, bala malɛkã wa n bobl-a-la tʋʋmd sẽn sɩd yaa zu-zẽkre. A yeel-a lame t’a na n dɩka pʋg n dog biig sẽn na n lebg nin-kãseng sẽn ka to. A Gabriyɛll yeela woto: “Zu-soab a Wẽnnaam na n kõo yẽ a yaab a Davɩɩd naam. Yẽ na n sooga a Zakoob buudã wakat fãa la a soolem ka na n sɛ abada.” (Luk 1:32, 33) A Maari ra miime tɩ hal sẽn yɩɩd yʋʋm tusri, Wẽnnaam pʋlma a Davɩɩd t’a yageng n na n wa yɩ rĩm wakat sẽn kõn sa. (2 Sãm. 7:12, 13) Dẽnd biigã a sẽn na n dogã yaa Mesi ning Wẽnnaam nin-buiidã sẽn da sɩng n gũudẽ wã.

7. a) A Maari sẽn sok malɛkã bũmb ningã wilga bõe yẽ mengã zugu? b) Yam-bʋg la kom-bɩɩsã tõe n dɩk a Maari mak-sõngã pʋgẽ?

⁷ Sẽn paase, malɛkã yeela a Maari tɩ b na n boonda biigã tɩ “Sẽn-ka-to Biiga.” Na n yɩɩ wãn tɩ ninsaal dog Wẽnnaam Biiga? A Maari yɩta wãn meng n doge? B ra rɩk-a lame n kõ a Zozɛf la b ra nan pa kẽ kãadem ye. Sɩd me, a pelga a pʋg n sok malɛkã woto: “Bõn-kãng na n yɩɩ wãn n zĩnd tɩ mam nan ka mi raoa?” (Luk 1:34) A sokrã wilgdame t’a ra pa zoet yãnd a sẽn yaa pʋg-sad sẽn pa mi raoã ye. A ra getame meng tɩ yaa zu-zẽkre. Rũndã-rũndã, kom-bɩɩs wʋsg yɩta tao-tao n sãam b mense, la b  nong n yaand sẽn nan ka mi-b rao wall pagã. Ad dũniyã sɩd toeemame. La a Zeova yẽ pa toeem ye. (Mal. 3:6) A Zeova ket n nanda neb nins sẽn modgd n tũud a noyã.—Karm-y Hebre dãmb 13:4.

8. Na n yɩɩ wãn t’a Maari sẽn pa zems zãngã rog biig sẽn zems zãnga?

⁸ Yaa sɩd t’a Maari tũu Wẽnnaam ne a sũur fãa, la yẽ me ra yaa ninsaal sẽn pa zems zãnga. A na n maana wãn n tõog n dog biig sẽn zems zãnga, Wẽnnaam Biiga? A Gabriyɛll wilga sẽn na n yɩ to-to. A yeelame: “Sɩɩg Sõng na n waa fo zugu, la Sẽn-ka-to pãng na n buii foom. Woto yĩnga, bi-sõng ninga fo sẽn na n dogã, b na n boonda yẽ tɩ Wẽnnaam Biiga.” (Luk 1:35) Bi-sõngã rat n yeelame tɩ biig “sẽn pa tar dẽgdo,” “sẽn yaa yɩlemd fasɩ,” n yaa “Wẽnnaam dẽnda.” Sẽn mik tɩ ninsaalbã pa zems zãngã, kambã b sẽn dogdã me pa zems zãng ye. Rẽ n so t’a Zeova na n maan yel-solemd sẽn pa na n tol n le zĩndi. A rɩka a Biigã sẽn be saasẽ wã vɩɩm n ning a Maari pʋgẽ wã, la a kɩt t’a pãngã sẽn yaa a vʋʋsem sõngã “bui” a Maari, tɩ yel-wẽndã pa ta biigã ye. A Maari tẽe malɛkã sẽn yeelã bɩ? A leokame tɩ bõe?

9. a) Bõe yĩng tɩ sẽn pa tẽed-b a Maari kibarã pa tar bʋʋm? b) Bõe la a Gabriyɛll maan n keng a Maari tẽebã?

⁹ Neb n yet tɩ b pa tõe n tẽ tɩ pʋg-sad sẽn pa mi rao n dog biig ye. Baa kiris-neb ne yʋʋrã bãngdb kẽer meng yeta woto. Ne b bãngrã fãa, bũmb sẽn yaa vẽeneg la b pa mi. A Gabriyɛll yaool n togsa rẽ. A yeelame tɩ “bũmb ka be Wẽnnaam sẽn ka tõe ye.” (Luk 1:37) A Maari sak n deegame t’a Gabriyɛll sẽn yeelã yaa sɩda, bala a ra yaa pʋg-sad tẽeb sẽn tar pãnga. La a tẽebã ra pa tik vɩʋʋg ye. Wa ned buud fãa yam sẽn vẽene, a Maari ra rata kaset sẽn na yɩl n da tẽ goamã woto bal ye. A Gabriyɛll ra mii rẽ, la a sɩd kõ-a-la kaseto. A togs-a-la bũmb a roagd a Elizabɛt zugu. Nebã ra miime t’a yaa kiir hal sẽn kaoose, la Wẽnnaam maana yel-solemd t’a rɩk pʋga!

10. Bõe yĩng tɩ d pa segd n tags tɩ b sẽn bobl a Maari tʋʋmd ningã ra pa na n tall zu-loeese?

¹⁰ Bõe la a Maari na n maan masã? A bãnga tʋʋmd ning b sẽn dat n bobl-a wã, a leb n paama kaset sẽn wilgd tɩ Wẽnnaam na n pidsa a Gabriyɛll sẽn yeelã. D pa tog n tags tɩ tʋʋm-kãngã ra na n yɩɩ nana ne-a, la tɩ zu-loees ra pa na n zĩnd ye. Pipi, a ra segd n kẽe kãadem ne a Zozɛf. A sã n bãng t’a Maari tara pʋga, b kãadmã na n le tõogame bɩ? Yell a to me yaa tɩ tʋʋmdã seka rabeem. Yaa Wẽnnaam bõn-naandg ning a sẽn nand n yɩɩdã  vɩɩm la b sẽn na n gũnug a Maari wã, Wẽnnaam Biigã a sẽn nong wʋsgã! A tog n gesa a yell a peelem wakate, la a kogl-a dũniyã sẽn yaa wẽngã yĩnga. Hakɩka, yaa tʋʋm-saalg tɛkẽ!

11, 12. a) Rap kẽer sẽn tall tẽeb sõma manesem yɩɩ wãna, Wẽnnaam sẽn wa n dat n bobl-b tʋʋmd sẽn pa nana? b) A Maari sẽn leok a Gabriyɛll to-to wã wilga bõe yẽ mengã zugu?

¹¹ Biiblã wilgdame tɩ rap kẽer sẽn tall tẽeb sõma meng maana rabeem ne tʋʋmd Wẽnnaam sẽn da rat n bobl-ba, hal n da pa rat n sak ye. Wala makre, Wẽnnaam sẽn wa n tʋm a Moyiizã, a zãgsame, n yeel t’a zɩlemdã pa faas n tõe n yɩ Wẽnnaam koe-taasd ye. (Yik. 4:10) A Zeremi me yeelame tɩ yẽ “nan yaa biig bala,” n ka sek a na tʋm tʋʋmd ning Wẽnnaam sẽn dat n bobl-a wã ye. (Zer. 1:6) A Zonas yẽ pʋd n zoeeme. (Zon. 1:3) La a Maari na n maana wãna?

¹² Hal ne rũndã, neb nins sẽn tar tẽebã tẽra a Maari sẽn leok a Gabriyɛll to-to tɩ wilgd a sik-m-mengã la a sakrã. A yeelame: “Mam yaa Zu-soabã tʋm-tʋm-poaka. Bɩ y kɩt t’a yɩ woto ne maam wa yãmb sẽn yeelã.” (Luk 1:38) Yaa tʋm-tʋm-pogsã la b ra pa nand n yɩɩda, tɩ b zu-soben-dãmbã so b vɩɩmã n maand b yam. Dẽnd a Maari gomdã rat n yeelame tɩ yaa a Zeova sẽn yaa a Zu-soabã n so yẽ zãng-zãnga. A Maari ra miime t’a na n paama koglg a nugẽ, la tɩ yaa Zu-soab sẽn ka basd neb nins sẽn kɩs-a sɩdã, t’a na n ninga yẽ barka, a sã n maan a sẽn tõe fãa n na n tʋm tʋʋm-kãngã sẽn pa nana wã.—Yɩɩl 31:24.

13. Wẽnnaam tʋʋmd ning sã n wõnd yaa toogo, wall d tagsdẽ tɩ d pʋd n pa tõe, wãn to la a Maari mak-sõngã tõe n sõng-do?

¹³ Wẽnnaam tõe n kõo tõnd tʋʋmd ninga, tɩ wõnd yaa toogo, wall d tagsdẽ tɩ d pʋd n pa tõe ye. La a Gomdã pʋgẽ, a kõo kaset wʋsg sẽn kɩt tɩ d tõe n kɩs-a sɩda, n teeg-a zãng-zãng wa a Maari. (Yel. 3:5, 6) Yãmb na n sak n teeg-a lame bɩ? D sã n maan woto, a na n keo-d lame, tɩ d paam bʋʋm n maneg n paas d tẽebã pãnga.

14, 15. a) Bõe la a Zeova maane, a Maari sẽn ta a Zakari ne a Elizabɛt nengẽ wã? b) A Maari goam nins sẽn be Luk 1:46-55 wã wilgda bõe yẽ mengã zugu?

¹⁴ A Gabriyɛll sẽn gom a Elizabɛt yellã kenga a Maari. Pʋg-bʋg n da tõe n wʋm a Maari yellã sõma tɩ sã n pa a Elizabɛte?  Tao-tao bala, a Maari kẽnga Zide tẽng a yembr sẽn be tãens sʋka. Tõe tɩ sorã taa rasem a tã bɩ a naas kẽnde. A sẽn ta maan-kʋʋd a Zakari ne a pag a Elizabɛt nengẽ wã, a Zeova kɩtame t’a paam kaset sẽn na n keng a tẽebã n paase. A sẽn ta n pʋʋs t’a Elizabɛt wʋmã bala, biigã zĩnda a Elizabɛt pʋgẽ wã n kɩdem sũ-noogo. A Elizabɛt pida ne sɩɩg sõngo, n bool a Maari t’a “Zu-soabã ma.” Wẽnnaam kɩtame t’a Elizabɛt bãng t’a Maari biigã na n wa lebga yẽ Zu-soaba, t’a na n yɩɩ Mesi wã. Wẽnnaam leb n kɩtame t’a pẽg a Maari a sakrã yĩnga, n yeel woto: “Bark bee ned ninga sẽn tẽ wã zugu.” (Luk 1:39-45) Hakɩka, bũmb ning fãa a Zeova sẽn pʋlem a Maari wã na n pidsame.

 ¹⁵ A Maari leoka a Elizabɛt gomdã. B gʋlsa rẽ tɩ be Wẽnnaam Gomdã pʋgẽ. (Karm-y Luk 1:46-55.) Zĩig pa be Biiblã pʋgẽ t’a Maari gom n wogl wa zĩ-kãngã ye. A pẽgda a Zeova a sẽn ning-a bark t’a na n yɩ Mesi wã ma wã yĩnga, tɩ wilgdẽ t’a yaa mi-beoog soaba. A wilga a tẽebã pãng sẽn ta zĩig ninga, a sẽn yeel me t’a Zeova sikda wuk-m-mens la pãens rãmba, la a sõngd nin-tals la naong rãmb nins sẽn modgd n tũud-a wã. Leb n wilgda a bãngrã sẽn da ta zĩig ningã. B geelame n mik t’a sõdga Biiblã babg ning b sẽn da gʋls ne hebre wã vɛrse rãmb sẽn yɩɩd bãmb 20. *

16, 17. a) Zʋg-sõng bʋg la a Maari ne a biigã tall tɩ d segd n dɩk b togs-n-taare? b) A Maari sẽn kẽng a Elizabɛt nengẽ wã tẽegda tõnd bõe?

¹⁶ Yaa vẽeneg t’a Maari ra bʋgsda Gʋlsg Sõamyã zug neere. La a kell n yɩɩ sik-m-meng soaba, n lebg n dɩk goam sẽn be Biiblã pʋgẽ, n pa bao n na n togs a mengã goam ye. Biig ning a sẽn dogã me sẽn wa n bɩ, a talla sik-m-menga. Bala a yeela woto: “Mam karengã ka mam dẽnd ye, yaa sẽn tʋm-a maamã rẽnda.” (Zã 7:16) Yaa sõma tɩ d sok d mens woto: “Rẽ yĩnga mam nanda Wẽnnaam Gomdã wa a Maari bɩ, bɩ m teega m meng tagsg la m bãngre?” Yaa vẽeneg t’a Maari yẽ ra nanda Wẽnnaam Gomdã.

¹⁷ A Maari zĩnda a Elizabɛt nengẽ kiis a tãabo, la yaa vẽeneg tɩ b kenga taab raood wʋsgo. (Luk 1:56) Woto tẽegda tõnd zood hakɩk sẽn tõe n naf ned to-to. D sã n bao zo-rãmb neb nins sẽn sɩd nong d Wẽnnaamã sʋka, d tõe n kɩsa sɩd tɩ d tẽebã la d zoodã ne a Zeova wã pãng na n paasame. (Yel. 13:20) La wakat wa n taame t’a Maari na n lebg n kuli. A Zozɛf na n yeelame tɩ bõe, a sã n bãng t’a tʋtame?

18. Bõe la a Maari vẽneg n togs a Zozɛfe, la a Zozɛf manesem yɩɩ wãna?

¹⁸ A Maari pa gũ t’a pʋgã bɩ t’a yaool n na n togs a Zozɛf ye. Nand t’a togse, tõeeme t’a ra sokda a meng ra-kãngã sẽn yaa wẽn-zoɛtã manesem sẽn na n yɩ a soaba. Baa ne rẽ, a togs-a-la yellã fãa. Yaa vẽeneg tɩ namsa a Zozɛf. A ra rat n tẽe a Maari, la bũmb pa wilgd tɩ pa a sẽn zãmb-a ye. Biiblã pa wilg sẽn wa a yamẽ wã fãa ye. B yeelame bal t’a yãka yam n na n bas a Maari, bala wakat kãngã, b sã n da rɩk pʋg-sad n kõ raoa, yaa wa b sẽn zoe n kẽ kãadem. La a ra rat n soos n bas-a lame, a sẽn pa rat n ning a Maari yãnd la a paoog-a wã yĩnga. (Mat. 1:18, 19) A  Maari sũur tog n sãama wʋsgo, a sẽn ne tɩ yellã namsda ra-kãngã sẽn yaa nin-sõngã. La a pa ning a Zozɛf taal a sẽn pa tẽ-a wã ye.

19. Wãn to la a Zeova sõng a Zozɛf t’a bãng a sẽn tog n maane?

¹⁹ A Zeova maana neer n sõng a Zozɛf t’a bãng a sẽn tog n maanega. Zãmsd pʋgẽ, Wẽnnaam malɛk n yeel a Zozɛf t’a Maari pʋgã yaa yel-solemde. Ad rẽ kɩtame t’a Zozɛf yam gãande! Masã, yẽ me maana wa a Maari sẽn da maan sɩngrẽ wã. A maana a Zeova sẽn dat t’a maan bũmb ningã. A kẽe kãadem ne a Maari, la a segl a meng n na n tʋm tʋʋmd ning sẽn yaa zu-zẽkr ned a to sẽn pa na n tol n le paamã, rat n yeel t’a Zeova Biigã yell gesgo.—Mat. 1:20-24.

20, 21. Sagl-bʋs la sẽn kẽ-b kãadmã, ne sẽn magd-b n na n kẽ wã tõe n paam a Maari ne a Zozɛf kibarã pʋgẽ?

²⁰ A Zozɛf ne a pagã vɩɩmdã sẽn ta yʋʋm 2000 masã. La yɩta sõma tɩ sẽn kẽ-b kãadmã, la baa sẽn magd-b n na n kẽ wã rɩk yam b mak-sõngã pʋgẽ. Yaa vẽeneg t’a Zozɛf sẽn da ne a pagã sẽn tʋmd zakã tʋʋm la a get biigã yell sõma wã, a sũur yɩɩ noog malɛkã sẽn sõng-a t’a bãng a sẽn segd n maanegã. A tog n yãame tɩ sɩd tara yõod tɩ ned sã n wa rat n maan yam-yãkr sẽn pa nana, bɩ a teeg a Zeova. (Yɩɩl 37:5; Yel. 18:13) Sãmbg kae t’a zak-sobendã pʋgẽ, a kell n maana gũusg la a yɩ nin-bʋgsgo, a sã n da wa segd n yãk yam n maan bũmbu.

²¹ A Maari kell n sak n kẽe kãadem ne a Zozɛf. Yam-bʋg la d tõe n dɩk rẽ pʋgẽ? Baa ne sẽn wõnd sɩngrẽ wã ra yaa toog ne a Zozɛf t’a tẽ a Maari goamã, a Maari kell n basame t’a yãk b sẽn na n maanegã, bala yaa yẽ n da na n yɩ zakã soaba. A Maari rɩka yam yẽ mengã sẽn maanã pʋgẽ. Yaa woto me la pagb nins sẽn yaa kiris-nebã maand rũndã-rũndã. Yel-kãngã sõnga a Zozɛf ne a Maari tɩ b bãng tɩ tara yõod tɩ b pelgd b pʋs n yẽsd ne taaba.—Karm-y Yelbũn 15:22.

22. A Maari ne a Zozɛf kãadmã ra tika bõe, la tʋʋm-bʋg n da gũud-ba?

²² A Maari ne a Zozɛf kãadmã ra tika bũmb ning sẽn tar yõod n yɩɩdã. B yiibã ra nonga a Zeova n yɩɩd bũmb fãa, la b rat ne b sũy fãa n yɩ roagdb sẽn maand sẽn tat a yam. Yaa sɩd tɩ b na n paama bark wʋsgo, la zu-loees me kõn kong ye. Bãmb n da segd n wub a Zezi sẽn na n wa lebg zãmaan fãa nin-kãseng sẽn ka to wã.