1. Bõe la d segd n maan n ta Wẽnnaam yam?

 TÕND sã n dat n tall zood sõma ne Wẽnnaam, d segd n laka d mens fasɩ ne ziri tũudmã. D segd n kẽe tũudum hakɩɩkã pʋgẽ. Rũndã-rũndã, neb milyõ-rãmb n maand woto dũniyã gill zugu.

2. A Zeova Kaset rãmbã bee tẽns a wãn pʋsẽ, la b tʋʋmd yaa bõe?

² Biiblã reng n togsame tɩ tũudum hakɩɩkã neb na n yɩɩ “kʋʋn-kãseng . . . sẽn yit tẽnsã fãa pʋsẽ, buud toɛy-toɛyã fãa pʋsẽ, la sẽn gomd buud-goamã fãa.” (Vẽnegre 7:9) A Zeova Kaset rãmb milyõ-rãmb n sõngd neb a taabã tɩ b bãngd a Zeova soayã, la a noyã sẽn wilgd t’a nonga tõndã. B maanda rẽ tẽns 239 pʋsẽ.

3. Ãnda la a Zeova Kaset rãmbã waoogda, la bõe la b pa maanda?

³ A Zeova Kaset rãmbã sak n deegame tɩ yaa a Zeova a yembr bal n segd ne waoogre. B pa sakd n wõgemd n waoog bõn-naands bɩ tũudum imaaz-rãmb ye. (1 Zã 5:21) B pa waoogd sẽn ki-bã ye. Wala makre, b pa maand sẽn ki-bã veye, wall yel-maandɩ a taab sẽn teend ziri tũudmã neb sẽn tẽed bũmb ninsã, la “zĩn-dãmb zãmsg” ye. (1 Tɩmote 4:1) La b belsda neb nins sẽn be sũ-sãang pʋgẽ, b ned sẽn ki yĩngã. B wilgd-b lame tɩ Wẽnnaam pʋlmame tɩ sẽn ki-bã na n wa vʋʋgame, n vɩɩmd tẽngã sẽn na n lebg arzãnã zugu.—Zã 5:28, 29; Tʋʋma 24:15.

4. Wẽnnaam nin-buiidã tagsg yaa bõe ne tɩt maanego?

⁴ A Zeova Kaset rãmbã pa maand tɩt ye. B miime tɩ bõn-kãensã yita a Sʋɩtãan nengẽ. B pa rɩt tɩɩm sẽn na yɩl n kogl b mens ye. Yaa a Zeova la b teeg-yã.—Yel-bũnã 18:10.

5. Bõe n wilgd t’a Zeova Kaset rãmbã pa “dũniyã rẽnda”?

⁵ A Zeezi yeelame t’a karen-biisã pa segd n yɩ “dũniyã rẽnd” ye. (Zã 17:16) A Zeezi mengã pa sak n kẽes a toog a wakatẽ politikã yɛlẽ ye. (Zã 6:15) Woto me, a Zeova Kaset rãmbã pa kẽesd b mens politikã yɛlẽ ye. B pa nong b tẽngã tɩ loog noor me ye. B pa naagd n maood sẽn na yɩl tɩ yɛlã toeem wa dũniyã nebã sẽn maandã ye. Baasgo, b yaooda lampo-rãmbã la b sakd tẽns nins pʋsẽ b sẽn be wã noyã.—Zã 15:19; Rom dãmbã 13:1, 7.

6. No-bʋs la Wẽnnaam nin-buiidã tũud kãadmã kõom la a kaoobã wɛɛngẽ?

⁶ A Zeova Kaset rãmbã sẽn sakd goosneema-rãmbã noyã yĩnga, b sã n na n kẽ kãadem, b maanda rẽ tɩ zems ne tẽngã laloa. (Tɩt 3:1) B sẽn sakd Wẽnnaam noyã yĩng me, b kẽeda kãadem ne pag a ye bala. (1 Tɩmote 3:2) Sẽn paase, b sẽn tũud Biiblã noyã yĩnga, kɩtame tɩ b pa wae n kaood b kãadmã ye.

7. Wãn to la a Zeova Kaset rãmbã wilgd tɩ b nonga taaba?

⁷ A Zeova Kaset rãmbã nonga taaba. B sẽn nong taab la b nong Wẽnnaamã kɩtame tɩ b zemsd taab n yaa wa zag-yɛng neba, baa ne b sẽn yaa buud toɛy-toɛy la tẽns toɛy-toɛy nebã. Sabab-wẽng sã n maane, wall bũmb a to sã n wa maan tɩ yaa tɩlɛ tɩ b sõng taaba, b yɩta tao-tao n sõng taaba. A Zeova Kaset rãmbã sẽn vɩ to-to wã wilgdame tɩ b nonga taaba.—Zã 13:35.

8. Wẽnnaam nin-buiidã lakda b mens ne bõe?

⁸ A Zeova nin-buiidã maoodame n yaa pʋ-peelem dãmb la nin-tɩrse. B zãagda b mens ne wagdem, ziri yagbo, yoob la rã-tɩgre. B pa maand zãmb me ligdã baoob wɛɛngẽ ye. Rapã pa pãbd b pagbã ye. Nand tɩ neb kẽer lebg a Zeova Kaset rãmba, b ra maanda yel-kãensã, la a Zeova sõng-b lame tɩ b base. Wẽnnaam ‘pek-b lame tɩ b lebg yɩlem’ a nifẽ.—1 Korẽnt rãmbã 6:9-11.

9. Bõe la sebr a yembr yeel Afirik egiliiz-rãmb kẽer wɛɛngẽ?

⁹ Neb wʋsg yetame tɩ bãmb tũudmã la tũudum hakɩɩkã. B mi n sõdga bõn-kãsems  b sẽn maane, n na n kõ b mens bʋʋm. Wala makre, sebr a yembr goma Afirik egiliiz-rãmb kẽer yelle, n yeel yaa: “[Egiliiz-paalã] reega tɩtã rãmb zĩiga. . . . B yetame tɩ b togsda beoog yɛla, la tɩ b maanda yel-soalma. B sʋkã, no-rɛɛsdbã yetame tɩ b paamda vẽnegre, la b wilgd zãmsd võore. B tũnugda ne ko-sõngo, ka-sõngo, tompɛglem, buzi-rãmb la wisd n maagd bãas la b kogend neb ne bãase.”

10, 11. Bõe yĩng tɩ rũndã-rũndã yel-soalmã pa wilgd tɩ tũudum tata Wẽnnaam yam?

¹⁰ Tũudum-kãens nebã yetame tɩ yel-soalmã wilgdame tɩ Wẽnnaam ningda b tũudmã barka. La yel-soalem maaneg pa wilgd tɩ tũudum tata a Zeova yam ye. A Sʋɩtãan kõta neb sẽn pa tũud Wẽnnaam sɩd-sɩdã tõog tɩ b maand ‘yel-soalma.’ (2 Tesalonik rãmbã 2:9) Sẽn paase, Biiblã reng n togsame tɩ Wẽnnaam sẽn da kõt neb tõog tɩ b maand yel-soalmã ra “na n wa saame.” Wala makre, bãngr-goam kũunã, buud-gom-zẽnã la bãngrã.—1 Korẽnt rãmbã 13:8.

¹¹ A Zeezi yeelame: “Pa ned ning fãa sẽn boond maam tɩ ‘Zu-soaba, Zu-soaba,’ n na n kẽ saasẽ Rĩungã pʋgẽ ye. Yaa sẽn maand-a mam Ba sẽn be saasẽ wã raabã bala. Baraare, neb wʋsg na n soka maam yaa: ‘Zu-soaba, Zu-soaba, tõnd pa togs bãngr-goam ne yãmb yʋʋre, n dig zĩn-dãmb ne yãmb yʋʋre, la d maan yel-soalem wʋsg ne yãmb yʋʋr sɩda?’ La mam na n leoka bãmb yaa: ‘Mam pa mi yãmb lae-lae! Yãmb sẽn yaa tʋʋm-wẽns-maandba, loog-y n bas-y maam!’”—Matiye 7:21-23.

12. Ãnd dãmb n na n kẽ saasẽ Rĩungã pʋgẽ?

¹² Woto wã, ãnd dãmb n na n kẽ saasẽ Rĩungã pʋgẽ? Yaa neb nins sẽn maand a Zeova raabã.

13. Tʋʋm-bʋg la Wẽnnaam yeel a nin-buiidã tɩ b tʋm rũndã-rũndã, la ãnd dãmb n tʋmd tʋʋm-kãnga?

¹³ Bõe la Wẽnnaam dat t’a nin-buiidã maan rũndã-rũndã? A Zeezi yeelame: “Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga.” (Matiye 24:14) Yaa tʋʋm-kãng la a Zeova Kaset rãmbã tʋmd ne yẽesem.

14. Wẽnnaam Rĩungã yaa bõe, la ãnd dãmb n na n dɩ naam Rĩungã pʋgẽ?

¹⁴ “Dũniyã tɛk fãa,” a Zeova Kaset rãmbã moonda Wẽnnaam Rĩungã koɛɛgã, n wilgdẽ tɩ yaa goosneema sẽn be saasẽ, n na n dɩ naam tẽngã gill zug ne tɩrlem. B zãmsda nebã t’a Zeova yãka Kirist Zeezi t’a yaa Rĩun-kãng Rĩma, la a yãk neb 144000 ãdem-biisã sʋk tɩ b na n yɩ a na-rɩt-n-taase.—Dãniyɛll 7:14, 18; Vẽnegre 14:1, 4.

15. Bõe la Rĩungã na n sãame?

¹⁵ A Zeova Kaset rãmbã tũnugda ne Biiblã n wilgd nebã tɩ Wẽnnaam Rĩungã na n sãama a Sʋɩtãan dũniyã gilli. Ziri tũudmã ne a zãmsg toor-toorã sẽn paoogd Wẽnnaam la b waoogd a Sʋɩtãanã na n menemame. (Vẽnegre 18:8) Ninsaalbã goosneema-rãmbã fãa sẽn kɩɩsd Wẽnnaamã me na n menemame.—Dãniyɛll 2:44.

16. Ãnd dãmb zut la Kirist Zeezi na n dɩ naam, la yɛ la b na n vɩɩmde?

¹⁶ Sẽn paase, a Zeova Kaset rãmbã wilgda nebã tɩ Kirist Zeezi na n kɩtame tɩ sẽn maand-b Wẽnnaam daabã paam bark wʋsgo. B na n zĩnda tẽngã zug t’a Zeezi rɩ naam b zutu. Biiblã yeelame: “A na n fãaga naong soab sẽn kelemd n kot sõngre, n paas nimbãan-ned la ned ning fãa sẽn pa tar sõangda. A na n zoee nimbãan-ned la naong soab nimbãanega. A na n fãaga naong rãmbã vɩɩm.”—Yɩɩn-sõamyã 72:12, 13.

17. Ãnd dãmb bal n moond Wẽnnaam Rĩungã koɛɛgã?

¹⁷ Sull a to ka be n moond Rĩungã koe-noog sẽn yaa tʋʋmd Wẽnnaam sẽn dat t’a nin-buiidã tʋmã ye. Dũniyã gill zugu, yaa a Zeova Kaset rãmbã bal n wilgd nebã Wẽnnaam Rĩungã sẽn yaa a soaba.