SAK 55
Teend-y y tigingã
A Zeova nin-buiidã yaa bãmb milyõ-rãmb dũniyã gill zugu, n tũud-a ne sũ-noog b tigimsã pʋsẽ. B wilgdame tɩ b sũur yaa noog ne zãmsg la sagls nins b sẽn paamdã, la b teend b tigimsã ne manesem buud toor-toore. Yãmb tagsg yaa wãn ne y tigingã?
1. Wãn to la y tõe n teel tigingã ne y sẽkã la y pãngã?
Tõnd ned kam fãa tõe n maana bũmb n sõng tigingã pʋgẽ. Wala makre, neb n be yãmb tigingã pʋgẽ n yaa neb yʋʋm sẽn vẽsge, pa rẽ bɩ n yaa koms-rãmb bɩ? Y tõe n sõng-b lame tɩ b kẽng tigissã bɩ, bɩ n maan bũmb a taab n sõng-ba? Wala makre, kẽng n tɩ ra teed n wa kõ-ba, bɩ n sõng-b ne b zakã yẽesgo. (Karm-y Zak 1:27.) D tõeeme me n sõng ne Rĩungã roog yẽesg la a manegre. Ned baa a ye pa modgd tõnd tɩ d maan bõn-kãens ye. Yaa d sẽn nong a Zeova la d tẽed-n-taasã n kɩt tɩ d kõt d mens “ne yamleoogo.”—Yɩɩn-sõamyã 110:3, Wẽnnaam sebre, 1983.
A Zeova Kaset rãmb nins sẽn deeg lisgã tõe n teela tigingã ne manesem a taaba. Saam-biis nins sẽn tar minim tɩ zems ne noy nins Biiblã sẽn gãneg kãsem-sõngdbã la kãsem-dãmbã yãkr wɛɛngẽ wã tõe n paamame tɩ b yãk-b tɩ b lebg kãsem-sõngdba, la kãsem-dãmba. Saam-biisã la saam-bi-pogsã fãa tõe n yɩɩ so-pakdbã, n teel koɛɛgã mooneg tʋʋmdã ne b sũur fãa. Kẽer me tõe n sõnga ne Rĩungã rot la tigim-kãsemsã rot meebo, wall b yik n tɩ sõng tiging sẽn dat sõngr bũmb kẽer wɛɛngẽ.
2. Wãn to la d tõe n teel tigingã ne d ligdã la bũmb nins d sẽn tarã?
D tõe n waooga a Zeova ne d ‘paoongã.’ (Yel-bũnã 3:9) D sẽn kõt ligd la bũmb a taab n teend d tigingã, la d teend koɛɛgã mooneg tʋʋmdã dũniyã gill zugã yaa zu-zẽkre. (Karm-y 2 Korẽnt rãmb 9:7.) Sẽn paase, b yãkda ligdã d sẽn kõtã n sõngd neb sabab-wẽns poore. Neb wʋsg yãkda ‘bũmb n bĩng kɛɛnga,’ sẽn na yɩl n paamd n kõt yamleoog kũuni. (Karm-y 1 Korẽnt rãmb 16:2.) D tõe n ninga d ligdã kogendã sẽn be Rĩungã rot la tigim-kãsemsã rotẽ wã pʋsẽ, wall d tũnug ne donate.dan124.com n maand dẽ ne ẽntɛrnetã maasem. A Zeova kõta tõnd segb tɩ d tõe n tũnug ne bũmb nins d sẽn tarã n wilg tɩ d nong-a lame.
D BAO N BÃNG N PAASE
D ges bũmb kẽer d sẽn tõe n maane, n teel tigingã.
3. D tõe n teela tigingã ne bũmb nins d sẽn tarã
A Zeova ne a Zeezi fãa nonga neb nins sẽn kõt ne sũ-noogã. Wala makre, a Zeezi pẽga pʋg-kõor a yembr sẽn kõ ligdi, baa ne a sẽn da pa tar ligd wʋsgã. Karm-y Luk 21:1-4, tɩ rẽ poor bɩ y leok sogsgã:
-
Yaa tɩlɛ tɩ d kõ ligd wʋsgo, sẽn na yɩl n ta a Zeova yam bɩ?
-
A Zeova ne a Zeezi fãa tagsg yaa wãna, d sã n kõt d kũunã ne yamleoogo?
Y sã n dat n bãng bũmb nins b sẽn maand ne ligdã d sẽn kõtã, bɩ y ges VIDEO wã. Rẽ pooor bɩ y leok sokrã.
-
Wãn to la b maand ne ligdã d sẽn kõtã, tɩ nafd tigimsã sẽn be dũniyã gill zugã?
4. D tõe n sõnga ne yamleoogo
Pĩnd wẽndẽ wã, neb nins sẽn da tũud a Zeova wã ra tʋmda ne b sũy fãa n get zĩis nins b sẽn waoogd-a wã yelle. Rẽ ra pa baood tɩ b kõt ligd bal ye. Karm-y 2 Kibay 34:9-11, tɩ rẽ poor bɩ y leok sokrã:
-
Wãn to la Israyɛll ned fãa sõng n ges a Zeova roogã yelle?
Y sã n dat n bãng a Zeova Kaset rãmbã sẽn tũud b mak-sõngã to-to, bɩ y ges VIDEO wã. Rẽ poor bɩ y leok sogsgã.
-
Bõe yĩng tɩ d segd n ges tɩ d Rĩungã roog kell n yɩ yɩlemde, t’a bũmba fãa me yaa sõma?
-
Bõe la y tõe n maan n sõnge?
5. Saam-biisã tõe n baoome n na n paam tʋʋm tigingã pʋgẽ n paase
Biiblã pʋgẽ, b sagenda kiris-neb nins sẽn yaa rapã tɩ b maan b sẽn tõe fãa sẽn na yɩl n teel tigingã. Y sã n dat n yã makr a ye rẽ wɛɛngẽ, bɩ y ges VIDEO wã. Rẽ poor bɩ y leok sokrã.
-
Video wã pʋgẽ, wãn to la a Rayan ra baood n na n teel tigingã n paase?
Biiblã pʋgẽ, b wilgda bũmb nins saam-biisã sẽn segd n maane, n wa paam tɩ b yãk-b tɩ b lebg kãsem-sõngdba, la kãsem-dãmba. Karm-y 1 Tɩmote 3:1-13, tɩ rẽ poor bɩ y leok sogsgã:
NINA TÕE N SOKAME YAA: “Yɛ la a Zeova Kaset rãmbã paamd ligdã n tʋmd b tʋʋmã?”
-
Y na n leokame tɩ bõe?
KƲMSGO
A Zeova nanda modgr nins d sẽn maande, n teend tigingã ne d sẽkã, d pãngã la bũmb nins d sẽn tarã.
Lebg-n-gese
-
Wãn to la d tõe n teel tigingã ne d sẽkã la d pãngã?
-
Wãn to la d tõe n teel tigingã ne bũmb nins d sẽn tarã?
-
Bõe la y rat n na n maan n teel y tigingã?
BŨMB A TAABA
Bõe yĩng tɩ Wẽnnaam pa le yet tɩ sẽn tũud-b yẽ wã kõ piig-pʋɩɩre?
“Biiblã pʋgẽ, bõe la b yet piig-pʋɩɩrã wɛɛngẽ?” (Bee jw.org)
Modg n bao tʋʋm tigingã pʋgẽ wã rat n yeelame tɩ bõe?
“Yãmb modgdame n na n lebg yel-gɛt bɩ?” (Yʋʋmd 2014 bõn-bɩʋʋng kiuug rasem 15 Gũusg Gasgã)
A Zeova Kaset rãmb sẽn maand modgr wʋsgo, n wʋkd sɛb n gilgd n kõt b tẽed-n-taase.
D sẽn paamd ligdã to-to n tʋmd d tʋʋmã yaa toor fasɩ ne tũudum a taabã.
Découvrez aussi…
Sogsg nebã sẽn wae n sokdẽ
Zãms ned Biiblã rat n yeelame tɩ bõe?
Bao-y n bãng-y sogsg kẽer leoor nebã sẽn sokd tõnd sẽn zãmsd nebã Biiblã to-to wã zugu.
