1, 2. Bõe la d tõe n maan n kell n pa Wẽnnaam nonglmã pʋgẽ?

TÕND ned kam fãa ratame n tar pãnga, la yĩns laafɩ. Rẽ n so tɩ d rɩt rɩɩb sẽn yaa sõma, n maand yĩn-wɩsgre, la d get d yĩngã yell sõma. Woto fãa baooda modgre. La d sẽn ne tɩ manegda tõndã, d ket n modgdame. La zĩig a to wɛɛngẽ me la d tog n modg n tall pãng la laafɩ.

² Tõnd sẽn zãms Biiblã n bãng a Zeova wã yaa bõn-kãseng menga. La d segd n modgame tɩ tõnd ne a zoodã pãng ket n paasdẽ. A Ziid kenga kiris-nebã raoodo, n yeel-b tɩ b “kell n pa Wẽnnaam nonglmã pʋgẽ.” La a wilg-b-la b sẽn tõe n maan dẽ to-to. A yeel-b lame: “Bɩ yãmb nang pãng ne tẽeb ning y sẽn tar tɩ yaa sõng wʋsgã.” (Ziid 20, 21, MN) Bõe la d tõe n maan n paam tẽeb sẽn tar pãnga?

3-5. a) A Zeova noyã tũub wɛɛngẽ, bõe la a Sʋɩtãan dat tɩ d tagse? b) Tõnd tagsg segd n yɩɩ wãn ne a Zeova noyã la a saglsã?

³ Tõnd ned kam fãa tog n kɩsa sɩd t’a Zeova noyã sõmblem ka to ye. Tara yõod wʋsgo. Bala a Sʋɩtãan ratame tɩ d tags tɩ Wẽnnaam noyã tũub yaa toogo, la  tɩ d sã n dat n paam sũ-noogo, d tog n bãng n yãka sẽn yaa sõma la sẽn yaa wẽng d toore. A Sʋɩtãan sɩng n maanda woto hal Edɛn zẽedã zĩigẽ. (Sɩngre 3:1-6) A ket n maanda woto rũndã-rũndã.

⁴ La rẽ yĩnga, a Sʋɩtãan sẽn yeel t’a Zeova noyã tũub yaa toogã, yaa sɩd bɩ? Ayo. Mams-y wa yãmb sẽn kẽnd zĩ-neer pʋga, n wa yã tɩ b yãka babg a ye n gɩdg ne bãense, tɩ ned pa tõe n kẽ ye. Tõe tɩ y na n soka y meng bõe yĩng tɩ b gɩdg zĩ-kãngã. La zĩig pʋgẽ wã, yãmb wʋma gɩgemd sẽn zĩnd be n kelme. Y tagsg na n yɩɩ wãna? Y sũur na n yɩɩ noogo, bala y miime tɩ bãens sã n da pa beẽ, yãmb da na n lebga gɩgemdã rɩɩbo. Bãensã makda a Zeova noyã, tɩ gɩgemdã makd a Sʋɩtãana. Biiblã yetame: “Modg-y tɩ y yamã ket n vẽenẽ, la y yɩ gũusdba. Yãmb bɛyã sẽn yaa Sʋɩtãanã gõoda wa gɩgemd sẽn kelemde, n baood ned n na n wãbe.”—1 Pɩyɛɛr 5:8, MN.

⁵ A Zeova ratame tɩ d vɩɩmã yɩ noogo. A pa rat t’a Sʋɩtãan tõog n belg-d ye. Rẽ n so t’a kõ tõnd noy la saglse, sẽn na yɩl n kogl-do, tɩ d paam sũ-noogo. (Efɛɛz rãmbã 6:11) A Zak yeelame: “Ned ning sẽn maagd a yĩng n get tõog ning sẽn zems zãngã sẽn yaa lohorem tõogã pʋgẽ, la a ket n get-a . . . na n paama sũ-noog bũmb ning a sẽn maandã pʋgẽ.”—Zak 1:25, MN.

6. Bõe n na n sõng-d tɩ d kɩs sɩd t’a Zeova noyã sõmblem ka to?

⁶ Tõnd sã n tũud a Zeova noyã, d vɩɩmã yɩta sõma, tõnd ne yẽ zoodã me paamda pãnga. Wala makre, a yeelame tɩ d pʋʋsd-a wakat fãa. D sã n sak n maand woto, nafda tõndo. (Matiye 6:5-8; 1 Tesalonik rãmbã  5:17) D leb n paamda sũ-noogo, d sã n sak n tigimd taab n waoogd-a la d kengd taab raoodo, n moond koɛɛgã la d zãmsd nebã Biiblã. (Matiye 28:19, 20; Galat rãmbã 6:2; Ebre-rãmbã 10:24, 25) D sã n bʋgs sagl-kãensã sẽn sõngd tõnd to-to wã zugu, la sẽn paasd tõnd tẽebã pãng to-to wã me, d na n maneg n kɩsa sɩd t’a Zeova noyã sõmblem ka to ye.

7, 8. Bõe n na n sõng tõnd tɩ d ra maan yɩɩre, d sẽn tõe n wa seg zu-loe-kɛgems yĩnga?

⁷ Tõe tɩ y mi n tagsa beoog-daarã yelle, n yɛɛsd y na n wa sɛg zu-loe-kɛgems sẽn na n mak y tẽebã. Sã n yaa woto, tẽeg-y a Zeova sẽn yeelã: ‘Mam yaa a Zeova, yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ning yãmb sẽn tog n tũ  wã zugu. Yãmb sã n da sak mam tõodã, yãmb laafɩ wã ra na n yɩɩ wa kʋɩls koom, la yãmb tɩrlmã ra na n yɩɩ wa ko-kãsengã ko-wiisi.’—Ezayi 48:17, 18, Wẽnnaam Sebre, 1983.

⁸ Tõnd sã n sakd a Zeova, d laafɩ wã na n yɩɩ wa kʋɩlg sẽn pa kʋɩt koom. Tõnd tɩrlmã me na n yɩɩ wa mogrã ko-pɛmã sẽn pemd wakat fãa wã. Sẽn wa n yaa yell ning fãa, d tõe n kell n saka a Zeova. Biiblã yetame: ‘Bas f yell ne a Zeova, la bãmb na n kõo foom bũmb ning f date. Bãmb kõn tol n bas nin-tɩrg t’a miim ye.’—Yɩɩn-sõamyã 55:23.

9, 10. Tall tẽeb sẽn bɩ rat n yeelame tɩ bõe?

⁹ D sã n modg tɩ d zoodã ne a Zeova wã pãng paasdẽ, d tẽebã me na n bɩɩme. (Ebre-rãmbã 6:1) Gom-kãensã võor yaa bõe?

¹⁰ Kiris-ned yʋʋm sã n paasdẽ, pa rat n yeel t’a tẽebã me bɩt n paasdame ye. D sã n dat tɩ d tẽebã bɩ, d tog n modgame t’a Zeova lebg d zoa meng-menga, la d modg n tũ a sẽn datã. (Zã 4:23) A Poll yeelame: “Neb nins sẽn vɩ yĩngã ratem sakr yĩngã tagsda yĩngã yɛl yelle. La neb nins sẽn vɩ vʋʋsem sõngã sakr yĩngã tagsda vʋʋsem sõngã yɛl yelle.” (Rom dãmbã 8:5, MN) Kiris-ned tẽeb sẽn bɩ pa basd tɩ arzɛkã baoobã la yõ-noogrã soog a vɩɩmã ye. A lʋɩɩsda a Zeova raabã taoore, t’a sẽn yãkd yam ninsã fãa yaa sõma. (Yel-bũnã 27:11; karm-y Zak 1:2, 3, MN.) A pa basd tɩ bũmb tus-a t’a maan wẽng ye. A mii sẽn yaa sõma, la a maandẽ.

11, 12. a) Tẽebã bɩʋʋng wɛɛngẽ, bõe la a Poll yeel-yã? b) D sã n dat n paam tẽeb sẽn bɩ, bõe la d segd n maane? Rɩk-y makre.

 ¹¹ D sã n dat tɩ d tẽebã bɩ, d segd n modga wʋsgo. Tʋm-tʋmd a Poll yeelame: “Rɩɩb sẽn yaa taokã yaa neb nins sẽn bɩ wã yĩnga, rat n yeel tɩ neb nins sẽn minim n tagsdẽ tɩ kɩt tɩ b mi sõma ne wẽng n bakã.” (Ebre-rãmbã 5:14, MN) A Poll sẽn yeel tɩ “sẽn minimã,” yaa wa ned sẽn modg n bãng ɛspoorã sõma.

¹² D sã n get ned sẽn maand ɛspoor buudu, n tar minim sõma, bee yamleoogo. La d miime t’a soabã pa rog ne ye. A pa yik daar-n-yɛng me n tõog n paam minim ye. A baoo sẽk rẽ yĩnga, la a modg wʋsgo. A sẽn dog n yaa bi-pɛɛlgã, a ra pa mi t’a tõe n talla a nusã ne a karsã n maan bũmb ye. La a wa n sɩngame n zãmsd bũmb gãdbo, la a zãms kẽna. A wa n yãka yam n na n maan ɛspoore, n maand n yɩlemdẽ, hal n wa paam minim. Woto me, d sã n dat n wa paam tẽeb sẽn bɩ, d segd n baoo sẽk rẽ yĩnga, la d modg wʋsgo.

13. Bõe n na n sõng tõnd tɩ d bãng sẽn noom a Zeova la sẽn pa noom-a?

¹³ Seb-kãngã pʋgẽ, d yãa d sẽn tõe n maan n bãng sẽn noom a Zeova la sẽn pa noom-a, la d sẽn tõe n ta a yam to-to. D bãngame t’a Zeova noyã yaa sõma, tɩ rẽ kɩt tɩ d maneg n nong-ba. Masã d sã n dat n yãk yam n maan bũmbu, d na n soka d mens yaa: ‘Yel-kãngã pʋgẽ, Biiblã no-bʋs la m tõe n tũ? M maanda wãn n tõog n tũ-ba? Bõe la a Zeova rat tɩ m maane?’—Karm-y Yel-bũn 3:5, 6; Zak 1:5, MN.

14. D sã n dat tɩ d tẽebã paam pãnga, bõe la d segd n maane?

¹⁴ D ket n modgd wakat fãa n bɩɩsd d tẽebã. Ned sã n dɩt rɩ-sõma, a yĩngã paamda keelem la pãnga. Woto  me, d sã n zãmsd Biiblã n bãngd a Zeova sõma, d tẽebã paamda pãnga. D sẽn wa n sɩng Biiblã zãmsgã, d bãnga bũmb wʋsg a Zeova zugu. La pa segd n tek be ye. D segd n bao n wʋma Wẽnnaam yel-zulumsã me. Yaa rẽ la a Poll rat tɩ d maane. Rẽ n so t’a yeel tɩ “rɩɩb sẽn yaa taokã yaa neb nins sẽn bɩ wã yĩnga.” D sã n tũud bũmb nins d sẽn zãmsdã, d paamda yam. Biiblã yetame: “Yam yɩɩda bũmba fãa.”—Yel-bũnã 4:5-7; 1 Pɩyɛɛr 2:2.

15. Bõe yĩng tɩ d segd n nong a Zeova ne d sũur fãa, la d nong d tẽed-n-taasã?

¹⁵ Ned tõe n tara pãnga la yĩns keelem. La a segd n geta a meng yell sõma, sẽn na yɩl n ket n tar pãnga. Woto me, kiris-ned sẽn tar tẽeb sẽn bɩ sõma tog n modga wʋsgo, tɩ yẽ ne a Zeova zoodã ket n tar pãnga. Ad saglg a Poll sẽn kõ tõndo: “Bɩ y feesd y mens n get y sã n bee tẽebã pʋgẽ. Makd-y y mens n get y sẽn yaa neb nins buudu.” (2 Korẽnt rãmbã 13:5, MN) La pa d tẽebã bal n tog n paamd pãng ye. Tõnd sẽn nong a Zeova to-to wã, la d sẽn nong d saam-biisã to-to wã me tog n paamda pãnga. A Poll yeelame: “Mam sã n . . . tar bãngrã fãa, la mam sã n tar tẽeb wʋsg hal n tõe n serg tãens la m yaool n pa tar nonglem, mam yaa zaalem.”—1 Korẽnt rãmbã 13:1-3, MN.

16. Bõe la a Sʋɩtãan data?

¹⁶ A Sʋɩtãan ratame tɩ d tags tɩ d pa tol n tõe n ta a Zeova yam ye. A ratame tɩ d koms raoodo, n tags tɩ d zu-loeesã pa tar tɩɩm ye. A pa rat tɩ d kɩs d saam-biisã sɩd ye. A pʋd n pa rat tɩ d paam sũ-noog ye. (Efɛɛz rãmbã 2:2) A Sʋɩtãan miime tɩ tags-kɛgã tõe n sãama  tõndo, la sãam tõnd ne a Zeova zoodã. La bũmb la a Zeova kõ tõnd tɩ tõe n sõng-d tɩ d mao ne tags-kɛgã. A kɩtame tɩ d tar tẽeb tɩ beoog na n yɩɩ neere.

17. Bõe yĩng tɩ d segd n kell n gãd bũmb nins tõnd sẽn tẽedã?

¹⁷ Pipi Tesalonik rãmb 5:8, MN pʋgẽ, a Poll goma tõnd sẽn tẽed bũmb ninsã yelle, n bool tɩ “fãagrã saagre.” A maka rẽ ne kut-pugl sodaag sẽn fõgen zabr sasa. Tõnd sã n tẽed bũmb nins a Zeova sẽn pʋlmã, na n kogla tõndo, la sõng-d tɩ d tõog n mao ne tags-kɛgã.

18, 19. Wãn to la bũmb nins a Zeezi sẽn da tẽedã sõng-a t’a tall raoodo?

¹⁸ A Zeezi sẽn da tẽed bũmb ninsã sõng-a lame t’a tall raoodo. Yʋng ning b sẽn na n yõk-a wã, yɛlã pʋgla taaba. A zoa n zãmb-a, t’a to kɩɩs t’a pa mi-a, t’a taabã zoe n bas-a. A tẽngã neb yikame n yeel tɩ  rẽnda b ka-a ra-luk zugu. Bõe n sõng-a t’a tõog toogo? Biiblã yetame: “Sũ-noog ning sẽn da be b taoorã yĩnga, b tõoga toog kũum ra-lukã zug n pa zoe yãnde, la b zaoonda Wẽnnaam geerã nug-rɩtgo.”—Ebre-rãmbã 12:2, MN.

¹⁹ A Zeezi ra miime t’a sã n kell n yɩ sakda, na n waooga a Ba wã yʋʋre, la wilg t’a Sʋɩtãan yaa ziri yagda. Rẽ kõ-a-la sũ-no-kãsenga. A ra miime me tɩ pa na n kaoos la a kẽng a Ba wã nengẽ saasẽ ye. Sõng-a lame t’a tõog toogo. Wa a Zeezi, tõnd me segd n tagsa Wẽnnaam sẽn pʋlem tõnd bũmb ninsã yelle. Rẽ na n sõnga tõnd tɩ d tõog toogo, sẽn yaa yell ning fãa taoore.

20. Bõe n na n sõng-d tɩ d kell n tall tags-sõma?

²⁰ A Zeova nee tõnd tẽebã la d tõog-toogã. (Ezayi 30:18; karm-y Malasɩ 3:10.) A pʋlmame t’a na n ‘kõo tõnd d sũur sẽn date.’ (Yɩɩn-sõamyã 37:4) Dẽ wã yĩnga,  d tags a sẽn pʋlem bũmb ninsã yelle. A Sʋɩtãan ratame tɩ d tẽebã komse, tɩ d tags t’a Zeova sẽn pʋlem bũmb ninsã pa na n tol n pids ye. D ra tall tags-kɛg ye. Sã n mik t’a Zeova pʋlemsã pa le yaa vẽeneg tõnd yamẽ, d kos-a t’a sõng-do. D tẽeg goam nins sẽn be Filip rãmb 4:6, 7, MN wã: “Da maan-y yɩɩr baa fʋɩ poorẽ ye. La bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã, tɩ rẽ la Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã la y tagsa wã, Kirist Zeezi maasem yĩnga.”

21, 22. a) A Zeova ratame tɩ tẽngã zug vɩɩm yɩ wãn-wãna? b) Bõe la yãmb yãk yam n na n maane?

²¹ D nong n bʋgsd bũmb nins sẽn wat beoogã zugu. Ka la bilfu, bõn-vɩɩsã fãa na n pẽga a Zeova. (Vẽnegre 7:9, 14) D mams d yamẽ vɩɩmã sẽn na n yɩ to-to dũni-paalgã pʋgẽ wã. Sẽn na n yɩ noog to-to wã na n yɩɩga tõnd sẽn tagsã. Wẽnnaam na n sãama a Sʋɩtãan ne a zĩn-dãmbã la nin-wẽnsã fãa. Ned kõn le bẽ bɩ n ki ye. Daar fãa, nebã na n neka ne yĩns keelem. B sũur na n yɩɩ noog ne vɩɩmã. B na n naaga taab n tʋme, tɩ tẽngã gill lebg arzãna. B fãa na n paama rɩ-nood tɩ seke, la zagse. Ned kõn le maan a to wẽng ye. Nebã na n maanda taab neere. Wakat n wat tɩ b fãa na n “paam Wẽnnaam kambã lohormã sẽn be ziirã.”—Rom dãmbã 8:21, MN.

²² A Zeova ratame tɩ d yɩ yẽ zoa meng-menga. Rẽ wã, d maand d sẽn tõe fãa n sak-a, la d modg tɩ tõnd ne a zoodã pãng paasd wakat fãa. Bɩ d fãa kell n pa Wẽnnaam nonglmã pʋgẽ, wakat sẽn kõn sa yĩnga.—Ziid 21.