Sã n yaa ne Biiblã, wakat bʋg la pag sẽn yaa kiris-ned segd n pil a zugu, la bõe yĩnga? D ges bũmb ning Wẽnnaam sẽn kɩt tɩ tʋm-tʋmd a Poll togs yel-kãngã wɛɛngẽ. A wilga pagbã sẽn segd n maan to-to tɩ waoog Wẽnnaam. (1 Korẽnt dãmba 11:3-16) A Poll wilga bũmb a tãabo: 1) Bũmb ning pagã sẽn maand tɩ baoodẽ t’a pil a zugã, 2) zĩig ning a sẽn segd n pil a zugã, la 3) bũmb ning sẽn kɩt t’a tog n pil a zugã.

Bũmb ning pagã sẽn maand tɩ baoodẽ t’a pil a zugã. A Poll goma pʋʋsg la bãngr-goam togsg yelle. (Vɛrse a 4, 5) Ned sã n pʋʋsdẽ, a gomda ne a Zeova. Rũndã-rũndã, bãngr-goamã togsg yaa koɛɛgã mooneg la nebã zãmsgã. La rẽ yĩnga a Poll ra rat n yeelame tɩ pag sã n pʋʋsdẽ fãa, bɩ a sã n zãmsd ned Biiblã fãa, a segd n pila a zug bɩ? Ayo. Bee ne sẽn yaa zĩig ningã.

Zĩig ning a sẽn segd n pil a zugã. A Poll goma zĩis a yiib yelle: Yaa zakã pʋgẽ la tigingã pʋgẽ. A yeela woto: “Pag zug yaa a sɩda . . . La pag sã n pʋʋsdẽ walla a sã n togsd bãngr-goam n ka pil a zug bũmbu, a paoogda a zu-soabã.”  (Vɛrse a 3, 5) A Zeova wilgame tɩ zak fãa pʋgẽ, yaa raoã la pagã zu-soaba. Pagã sã n wa maand bũmb Wẽnnaam sẽn bobl a sɩdã n pa maan bũmb n wilg t’a sakda a zu-sobendã, a ningd-a-la yãnde. Wala makre, sã n wa yaa tɩlae t’a zãms ned Biiblã t’a sɩdã be yambẽ, a tog n pila a zugã sẽn na yɩl n wilg t’a sakda a sɩdã zu-sobendo. A sɩdã yaa a Zeova Kaset soab t’a pa a Zeova Kaset soab me, a segd n maana woto, bala yaa a sɩdã la zakã soaba. * A sã n na n pʋʋs bɩ n zãms ned Biiblã t’a bi-ribl sẽn deeg lisg be yambẽ, a segd n pila a zugu. Woto pa rat n yeel t’a biigã la zakã soab ye. Yaa sẽn na yɩl n wilg t’a sakda zu-sobend ning rap nins sẽn deeg lisgã sẽn tar tigingã pʋgẽ wã.

A Poll sẽn wa n gomd tigingã pʋgẽ zu-sobendã yellã, a yeela woto: “Ned sã n dat n wẽ no-koeemde, tõnd ka minim no-koeemd ye, la Wẽnnaam tẽedbã me ka minim ye.” (Vɛrse 16) Yaa rap nins sẽn deeg lisgã bal n segd n yɩ taoor lʋɩtb tigingã pʋgẽ. (1 Tɩmote 2:11-14; Hebre dãmba 13:17) Yaa rapã bal n tõe n yɩ kãsem dãmb la kãsemb sõngdba, n ges Wẽnnaam nin-buiidã yelle. (Tʋʋma 20:28) La wakat ninga, tõe n wa yɩɩ tɩlae tɩ pag sẽn yaa kiris-ned maan bũmb rao sẽn deeg lisg sẽn da segd n maane. Wala makre, tõe n wa yɩɩ tɩlae t’a lʋɩ taoor koe-moonegã tigisg sasa, sã n mik tɩ rao sẽn deeg lisg la sẽn tõe n maan dẽ ka be. Wakat ning me, rao sẽn deeg lisg tõe n tũu pag n kẽng a Biibl zãmsg tɩ yaa pagã n na n lʋɩ taoore. Yel-kãens a yiib fãa pʋgẽ, sẽn mik t’a maanda bũmb rao sẽn da segd n maanã yĩnga, a segd n pila a zugu.

Yɛl wʋsg n be tɩ pa tɩlae tɩ pag sẽn yaa kiris-ned sã n wa maandẽ bɩ a pil a zug ye. Wala makre, a sã n wa leokd sokr tigissã sasa, a sã n wa moond zak-zak ne  a sɩd bɩ ne rao a to sẽn deeg lisgu, walla a sã n wa zãmsd Biiblã a kamb sẽn pa reeg lisg bɩ n lʋɩ taoor n pʋʋsd ne-ba. La yell ning taoore, a sã n pa mi a sã n segd n pila a zug bɩ a pa segd n pili, a segd n maana vaeesg sɛbã pʋsẽ n paase. * La a sã n ket n sãmbdẽ la a tagsdẽ t’a segd n pila a zugu, a tõe n pilame.

Bũmb ning sẽn kɩt t’a tog n pil a zugã. Vɛrse 10 pʋgẽ, d yãta bʋʋm a yiib sẽn kɩt tɩ pag sẽn yaa kiris-ned segd n pil a zugu. A Poll yeela woto: “Pag tog n ninga a zug bãnd malɛk rãmbã yĩnga, tɩ wilg a sẽn teegd a soabã noore.” A Poll sẽn gom zug bãnd sẽn wilgd a sẽn teegd bɩ a sẽn sakd a soabã noor yellã, yaa ãnd zu-sobend la pagã sẽn sakdã? Pag sã n pil a zugu, a wilgdame t’a sak n deega zu-sobend ning a Zeova sẽn kõ tigingã pʋgẽ rap nins sẽn deeg lisgã. A sã n maan woto, a wilgdame t’a nonga Wẽnnaam a Zeova la t’a sakd-a lame. Bʋʋm a to sẽn kɩt tɩ pag segd n pil a zug yaa “malɛk rãmba yĩnga.” Bõe yĩng tɩ d yet woto?

Malɛgsã sẽn be saasẽ wã sã n yã tɩ bãmb ne ninsaalbã sẽn be tẽng zugã fãa sakda a Zeova noyã zu-sobendã wɛɛngẽ, b sũy yaa noogo. Ninsaalbã sẽn pa zems zãngã sã n maand woto, kõta malɛgsã mak-sõngo. Bala bãmb me segd n saka noy nins a Zeova sẽn kõ zu-sobendã wɛɛngẽ wã, la yaa bũmb bãmb kẽer sẽn pa tõog n maan pĩnd wẽndẽ wã. (Ziid 6) Tigingã pʋgẽ, malɛgsã tõe n yãa pag sẽn yaa kiris-ned sẽn tar minim, la bãngr n yɩɩd rao sẽn  deeg lisgu, tɩ baa ne rẽ bɩ a sakd ra-kãng zu-sobendo. Tõe n yaa pag sẽn paam vʋʋsem sõng zaeeb n na n wa tɩ rɩ naam ne Kirist saasẽ. La a na n paama naam n yɩɩd malɛgsã menga. Ad sɩd yaa mak-sõng n kõ malɛgsã! Woto sɩd yaa zu-zẽkr bũmb n kõ pagb nins sẽn yaa kiris-nebã, b sẽn sikd b mens n sakd Wẽnnaam noyã zu-sobendã wɛɛngẽ tɩ malɛgs milyõ rãmbã get-bã!