Neb nins fãa sẽn nong a Zeova wã,

A Zezi yeelame tɩ “yãmb na bãng sɩdã, la sɩdã na kõ yãmb lohorem.” (Zã 8:32) Ad gom-kãensã sɩd kengda raoodo! N-ye, y tõe n bãnga sɩdã, baa ne tõnd sẽn vɩ “yaoolem wakatã” tɩ ziri wã piuug n pid zĩig fãa wã. (2 Tɩmote 3:1) Yãmb ket n tẽra y sẽn wa n bãng sɩdã sẽn be Wẽnnaam Gomdã pʋgẽ wã paalmã bɩ? Yaa vẽeneg tɩ y sũur yɩɩ noog wʋsgo!

Tara yõod wʋsg tɩ d bãng sɩdã sẽn be Wẽnnaam Gomdã pʋgẽ wã la d taasd-a neb a taabã. La d segdame me n zã d mens tɩ zems ne bũmb nins d sẽn bãng Wẽnnaam Gomdã pʋgẽ wã. Sẽn na yɩl n maan rẽ, d segd n paa Wẽnnaam nonglmã pʋgẽ. Woto rat n yeelame tɩ bõe? A Zezi sẽn yeel bũmb ning yʋng ning b sẽn na n yõk-a wã leokda sok-kãngã. A yeela a tʋm-tʋmdbã woto: “Yãmb sã n sak mam tõodã, yãmb na n paa mam nonglem pʋgẽ, wa mam sẽn sak m Ba tõodã n paad bãmb nonglem pʋgẽ” wã.—Zã 15:10.

D bãng t’a Zezi kell n paa a Ba wã nonglmã pʋgẽ a sẽn sak a tõodã bɩ a noyã yĩnga. Tõnd me sã n dat n pa Wẽnnaam nonglmã pʋgẽ, d segd n tũu Biiblã sẽn yetã daar fãa. Yʋn-kãngã me, a Zezi le yeela woto: “Yãmb sẽn bãng bõn-kãensã, yãmb sã n maan woto, bark bee yãmb zutu.”—Zã 13:17.

Wẽnd na kɩt tɩ seb-kãngã sõng yãmb tɩ y tũ Biiblã sẽn yetã, la sõng-y tɩ y kell n pa “Wẽnnaam nonglmã pʋgẽ, yãmb sẽn gũud . . . vɩɩm sẽn ka sɛtã.”—Ziid 21.