1-3. a) Bõe yĩng tɩ pagbã nong n manegd b kambã? b) Bõe yĩng t’a Zeova rat tɩ neb nins sẽn tũud-a wã yɩ yɩlma, la bõe n kɩt tɩ tõnd rat n yɩ yɩlem wakat fãa?

PAG nong n manegda a biiga, sẽn yɩɩd fãa a sã n dat n tall-a n yi. A sood-a-la koom, n ning-a fut sẽn yaa yɩlem la sõma. A miime tɩ yɩlemdã wata ne laafɩ. A leb n miime tɩ biigã sã n yaa yɩlemde, na n waooga a roagdbã, la a sã n yaa rẽgdo, na n ning-b-la yãnde.

² A Zeova sẽn yaa tõnd saasẽ Ba wã ratame tɩ neb nins sẽn tũud-a wã yɩ yɩlma. A Gomdã yeta woto: “Ne ned ning sẽn yaa yɩlemde, fo wilgda a soab tɩ f yaa yɩlemde.” * (Yɩɩl  Sõamyã 18:26, NW ) A Zeova nonga tõndo. A miime tɩ d sã n yaa yɩlma, na n nafa tõnd wʋsgo. A ratame tɩ tõnd sẽn yaa a Kaset rãmbã yɩ yɩlma, tɩ nebã sã n yã tõnd bɩ b pẽg-a. Vẽenega, d sã n manegd d mensã la d tar manesem sẽn yaa sõma, na n kɩtame t’a Zeova yʋʋrã paam waoogre.—Ezekɩɛll 36:22; 1 Pɩɛɛr 2:12.

³ D sẽn mi tɩ Wẽnnaam nonga neb nins sẽn yaa yɩlmã kɩtdame tɩ d modgd n yɩt yɩlem wakat fãa. D ratame tɩ d manesmã fãa waoog-a, bala d nong-a lame. D leb n dat n paa a nonglmã pʋgẽ. Bɩ d ges bũmb ning sẽn kɩt tɩ d segd n yɩ yɩlmã, yɩlemdã sẽn dat n yɛɛlga, la d sẽn tõe n maan to-to n kell n yɩ yɩlma. Woto na n sõnga tõnd tɩ d bãng zĩis nins d sẽn segd n manege.

4, 5. a) Pipi bʋʋm sẽn kɩt tɩ tõnd segd n yɩ yɩlmã yaa bʋgo? b) Wãn to la bũmb nins a Zeova sẽn naanã wilgd t’a nonga yɩlemde?

⁴ A Zeova menga kõta tõnd mak-sõngo. Rẽ n so t’a Gomdã sagend tõnd tɩ d rɩk Wẽnnaam togs-n-taare. (Efɛɛz rãmba 5:1) Ad pipi bʋʋm sẽn kɩt tɩ d segd n yɩ yɩlmã: Tõnd Wẽnnaam a Zeova nonga yɩlemde, n yaa sõngo.—Maankʋʋre 11:44, 45.

⁵ Wala d sẽn tõe n ges bũmb nins a Zeova sẽn naanã n bãng t’a yaa nonglem, t’a yaa tɩrga, t’a tara yam la pãngã, d sã n ges bõn-kãensã, d bãngdame me t’a nonga yɩlemde. (Rom dãmb 1:20) A naana tẽngã n dat t’a yɩ zĩig sẽn yaa yɩlemd ninsaalbã yĩnga. Woto yĩnga, a maana bũmb a taab sẽn sõngd n yɩlgd pemsmã, koomã la zĩigã, tɩ kɩt tɩ tẽngã tõe n yɩlg a meng a toore. Vẽenega, Wẽnnaam sẽn yaa a soab ning sẽn “naan tẽngã” getame tɩ yɩlemdã tara yõod wʋsgo. (Zeremi 10:12) Tõnd me segd n gesame tɩ yɩlemdã tara yõod wʋsgo.

6, 7. Wãn to la a Moiiz tõogã wilg vẽeneg tɩ neb nins sẽn tũud a Zeova wã segd n yɩɩ yɩlma?

⁶ Bʋʋm a to sẽn kɩt tɩ d segd n yɩ yɩlmã yaa t’a Zeova  sẽn yaa naab sẽn ka to wã ratame tɩ neb nins sẽn tũud-a wã yɩ yɩlma. Tõog ning a Zeova sẽn da kõ Israɛll nebã wilgdame tɩ Wẽnnaam tũudmã pʋgẽ, yɩlemdã yaa tɩlae. Tõogã ra yeelame tɩ paasgã daare, maan-kʋʋdbã kãsmã segd n soo koom naoor a yiib tõre. (Maankʋʋre 16:4, 23, 24) Maan-kʋʋdbã ra segd n pɛgsa b nusã la b waas b nao wã n yaool n maan maoongã n kõ a Zeova. (Yikri 30:17-21; 2 Kibaya 4:6) Tõogã wilga yɛl 70 sẽn dẽgemd neda, la sẽn kɩtd t’a yɩ rẽgd Wẽnnaam nifẽ. Israɛll ned sẽn yaa rẽgd ra pa tõe n kẽes a toog Wẽnnaam tũudmã yɛl kẽer pʋsẽ ye. Wakat ninga, ned sã n zãgs n pa tũ noor yɩlemdã wɛɛngẽ, b kʋʋd-a lame. (Maankʋʋre 15:31) Ned ning fãa sẽn da pa tũud noy nins b sẽn kõ yɩlemdã wɛɛngẽ wã, koomã soob la futã pɛgb sẽn naage, b segdame n “yiis a soab Israɛll nebã sʋka,” sẽn dat n yeel tɩ b segd n kʋ-a lame.—Sõdbo 19:17-20.

⁷ Baa d sẽn pa tũud a Moiiz tõogã, noy nins sẽn be a pʋgẽ wã sõngda tõnd tɩ d bãng a Zeova sẽn get yɛlã to-to. Tõogã wilga vẽeneg tɩ neb nins sẽn tũud Wẽnnaamã segd n yɩɩ yɩlma. A Zeova pa toeem ye. (Malaki 3:6) Tõnd tũudmã segd n yɩɩ tũudum sẽn yaa “sõma,” la “sẽn ka tar yelle,” sã n pa rẽ a pa tat a Zeova yam ye. (Zak 1:27) Rẽ wɛɛngẽ d segd n bao n bãnga a sẽn dat tɩ d maan bũmb ningã.

8. Zĩ-bʋs wɛɛngẽ la a Zeova rat tɩ tõnd yɩ yɩlma?

⁸ Biiblã pʋgẽ, yɩ yɩlemd pa rat n yeel bal tɩ d sood koom ye. D sã n dat n yɩ yɩlem Wẽnnaam nifẽ, d segd n yɩɩ yɩlem bũmba fãa pʋgẽ. A Zeova ratame tɩ d yɩ yɩlem tũudmã wɛɛngẽ, vɩɩm manesmã wɛɛngẽ, tagsgã pʋgẽ, la a rat me tɩ d yĩngã yɩ yɩlemde. D ges woto fãa sẽn dat n yɛɛlga.

9, 10. Yɩ yɩlemd tũudmã wɛɛngẽ rat n yeelame tɩ bõe, la kiris-neb hakɩkã lakda b mens ne bõe?

 ⁹ D yɩ yɩlem tũudmã wɛɛngẽ. Woto rat n yeelame tɩ d ra bas tɩ ziri tũudmã yɛl kẽ d tũudmã pʋgẽ ye. Israɛll nebã sẽn wa n yit Babilon n lebd Zerizalɛmã, b ra segd n saka sagl-kãngã: “Loog-y-yã! Ra sɩɩs-y bõn-dẽgd ye. Yi-y-yã a pʋgẽ n maneg y mense.” (Ezai 52:11) Sẽn yɩɩd fãa, Israɛll nebã sẽn da lebd Zerizalɛmã yaa sẽn na yɩl n tɩ lebs n lugl a Zeova tũudmã. A Zeova tũudmã segd n yɩɩ yɩlemde, n da naag ne Babilon tũudmã zãmsgo, a nebã sẽn tẽed bũmb ninsã la b rog-n-migsã ye.

¹⁰ Rũndã-rũndã me, tõnd sẽn yaa kiris-neb hakɩkã, d segd n gũusame tɩ ziri tũudmã yɛl ra kẽ d tũudmã pʋgẽ ye. (1 Korẽnt dãmba 10:21) D sɩd segd n maana gũusgu, bala ziri tũudmã yɛl bee zĩig zãnga. Wala makre, tẽns wʋsg pʋsẽ, nebã tẽedame tɩ ninsaal tara sɩɩg sẽn pa kiidi. D yãta rẽ b rog-n-migsã, b yel-maandɩ wã, la b manesmã pʋsẽ. (Koɛɛg Soaba 9:5, 6, 10) Kiris-neb hakɩkã lakda b mens ne rog-n-migs nins sẽn naag ne ziri tũudmã yɛlã. * D pa segd n bas tɩ ned modg tõnd tɩ d kɩɩs bũmb nins Biiblã sẽn wilgd Wẽnnaamã tũub wɛɛngẽ wã ye.—Tʋʋma 5:29.

11. Yɩ yɩlemd vɩɩm manesmã pʋgẽ wã rat n yeelame tɩ bõe, la bõe yĩng tɩ rẽ yaa tɩlae?

¹¹ D yɩ yɩlem d vɩɩm manesmã pʋgẽ. Yɩ yɩlemd vɩɩm manesmã pʋgẽ wã rat n yeelame tɩ d lak d mens ne yoob la raglem tʋʋm buud fãa. (Efɛɛz rãmba 5:5) Yaa tɩlae tɩ d yɩ yɩlem vɩɩm manesmã wɛɛngẽ. Wala d sẽn na n yã sak ning sẽn pʋgdã pʋgẽ wã, sẽn na yɩl n pa Wẽnnaam nonglmã pʋgẽ, d segdame n “zoe yoobo.” Yoaadb nins sẽn ka rat n tek yam n kos sugrã “ka na n paam Wẽnnaam soolem ye.” (1 Korẽnt dãmba 6:9, 10, 18) La Wẽnnaam  nifẽ, nin-kãensã yaa tʋʋm-dẽgd maandba. B sã n pa tek yam la b toeem b manesmã, “bãmb pʋɩɩr na n yɩɩ . . . kũum a yiib soabã.”—Wilgri 21:8.

12, 13. Bõe yĩng tɩ d segd n gũus ne d tagsgã, la wãn to la d tõe n yɩ yɩlem d tagsgã pʋgẽ?

¹² D yɩ yɩlem d tagsgã pʋgẽ. Naoor wʋsgo, ned sã n tagsd bũmb yelle, a wat n maana bõn-kãnga. Tõnd sã n bas tɩ tags-wẽns kẽ d yamã la d sũurã, d na n wa tʋma tʋʋm-dẽgdo. (Matɩe 5:28; 15:18-20) La tõnd sã n modgdẽ tɩ bõn-sõma kẽed d yamẽ wã, na n kɩtame tɩ d tall manesem sẽn yaa sõma. (Filip rãmba 4:8) Wãn to la d tõe n kell n yɩ yɩlem d tagsgã pʋgẽ? Yaa d sẽn na n lak d mens ne reem buud fãa sẽn tõe n dẽgem d yamã. * Sẽn paase, d sã n karemd Wẽnnaam Gomdã daar fãa, tags-sõma na n kẽeda d yamẽ wã.—Yɩɩl Sõamyã 19:9, 10.

¹³ Sẽn na yɩl n pa Wẽnnaam nonglmã pʋgẽ, d tũudmã segd n yɩɩ yɩlemde, d segd n yɩɩ yɩlem vɩɩm manesmã la d tagsgã pʋgẽ me. Seb-kãngã pʋgẽ sags kẽer gomda yel-kãensã yelle. Bɩ d gom d yĩngã yɩlemdã yell masã.

14. Bõe yĩng tɩ yĩngã la teedã yɩlemdã pa be ne ned kam fãa yam-yãkre?

¹⁴ Sẽn na yɩl tɩ d yĩngã la d teedã yɩ yɩlma, d segd n sooda koom, n pɛgd d futã la d pɩɩsd d rotã la d zagsã. Yɩ yɩlemdã bee ne ned kam fãa yam-yãkr bɩ? Pa woto ne neb nins sẽn tũud a Zeova wã ye. Bala wala d sẽn zoe n yã wã, a Zeova sẽn dat tɩ tõnd yĩngã la d teedã yɩ yɩlmã pa sẽn nafd tõndã yĩng bal ye. Yaa tɩ waoogda yẽnda. D tẽeg makr ning d sẽn dɩk sag-kãngã sɩngrẽ wã yelle. D sã n yã biig sẽn yaa rẽgd wakat fãa t’a futã pa sõma, d tõe n tagsame t’a roagdbã pa get a yell sõma ye. Bɩ bõe?  Tõnd pa rat tɩ d manesmã la d sẽn manegd d mensã to-to wã sãam d saasẽ Ba wã yʋʋre, bɩ n kɩt tɩ nebã pa kelg koɛɛgã tõnd sẽn moondã ye. Wẽnnaam Gomdã yeta woto: “Tõnd maoodame n ka rat n lub ned baa sẽn yaa ne bũmb ninga ye, tɩ ned da gom Wẽnnaam tʋʋmdã wẽng ye. La ne bũmb fãa tõnd maanda sẽn zems [ne] Wẽnnaam tʋm-tʋmdba.” (2 Korẽnt dãmba 6:3, 4) Wãn to la d tõe n maan tɩ d yĩngã la d teedã kell n yɩ yɩlma?

15, 16. Bõe n wilgd tɩ d nonga yɩlemde, la d futã segd n yɩɩ wãn to?

¹⁵ D yĩngã yɩlemdã. Yaa sɩd tɩ tẽng fãa pʋgẽ, nebã sẽn vɩ to-to wã la b tarmã yaa toor-toore. Baa ne rẽ, naoor wʋsgo d tõe n paama safãnd la koom n soodẽ la d sood d kambã daar fãa. Sẽn na yɩl n wilg tɩ tõnd nonga yɩlemde, d segd n pɛgsa d nusã ne safãnd n yaool n dɩ bɩ n segl rɩɩbo. D sã n kẽng we-kɛɛng poor me d segd n pɛgsa d nusã ne safãnde.  D sã n so biiga, bɩ a sã n dʋʋd tɩ d pek-a, walla d toeem a põgã, d segd n pɛgsa d nusã ne safãnde. D sã n pegsd d nusã ne safãnde, tõe n kɩtame tɩ d gil bãase, bɩ n da kɩt tɩ bãag long neb a taab ye. Wala makre, tõe n sõnga nebã tɩ b gil pʋ-zaba. Woto maaneg sɩd tõe n fãaga yõyã. Neb nins sẽn pa tar bĩn-bogd b zagsẽ wã segdame n modg n tu. Baa Israɛll nebã ra segd n tuu bok n bus b bĩndã.—Tõodo 23:13,14.

¹⁶ D segd n pɛgsda d futã wakat fãa n manegdẽ tɩ yaa sõma. Pa tɩlae tɩ kiris-ned fuug yɩ fu-paalle, fuug ligd sẽn yaa toog bɩ modɛll paall ye. La segd n yɩɩ yɩlemd la maneg tɩ yaa sõma n sakd gesgo. (1 Tɩmote 2:9, 10) D sẽn beẽ zĩig ning fãa, d sẽn manegd d mengã to-to wã segd n kɩtame “tɩ Wẽnnaam sẽn yaa tõnd Fãagdã kareng paam waoogr ne bũmb fãa.”—Tɩt 2:10.

17. Bõe yĩng tɩ d zakã la d teedã segd n yɩ yɩlma?

¹⁷ Tõnd zakã la d teedã. Tõnd zakã sẽn yaa to-to fãa, d segd n pɩɩsd-a lame la d manegdẽ tɩ sakd gesgo. D segd n modgame tɩ d mobillã, d montɛɛrã, bɩ d weefã d sẽn tar n kẽnd tigissã la koɛɛgã moonegã yɩ yɩlemd wakat fãa. D ra yĩm tɩ tõnd zakã la d teedã sã n yaa yɩlma, na n kɩtame tɩ nebã bãng tɩ tõnd Wẽnnaam a Zeova nonga yɩlemd ye. Tõnd pʋd n yeta nebã t’a Zeova yaa Wẽnnaam sẽn nong yɩlemde, t’a “na n sãama neb nins sẽn sãamd dũniyã,” la tɩ ka la bilfu, a Rĩungã na n kɩtame tɩ tẽngã gill lebg arzãna. (Wilgri 11:18; Luk 23:43) Vẽenega, tõnd ratame tɩ d zakã la d teedã wilg tɩ baa masã menga, d tũuda noy nins nebã sẽn na n tũ yɩlemdã wɛɛngẽ dũni paalgã pʋgẽ wã.

18. Wãn to la d tõe n wilg tɩ d nanda d Rĩungã Roogo?

¹⁸ Tõnd pʋʋsgã zĩiga. D sẽn nong a Zeova wã segd n kɩtame tɩ d modgd n get d Rĩungã Roog yelle, bala yaa be la tũudum hakɩkã neb tigimd taab n pʋʋsdẽ. Tõnd ratame  tɩ ned sã n wa Rĩungã Roogẽ, bɩ a sũur yɩ noog ne zĩigã sẽn yaa to-to wã. D segd n pɩɩsd-a lame la d manegd-a wakat fãa sẽn na yɩl t’a kell n yɩ sõma la sakd gesgo. D sã n modgd wakat fãa n manegd-a, wilgdame tɩ d nanda d Rĩungã Roogo. D segd n gesame tɩ d sẽn paam n tõe n dɩk d sẽkã n sõng n pɩɩs Rĩungã Roogo, bɩ n sõng ne a “manegrã” yaa zu-zẽkr bũmbu. (2 Kibaya 34:10) Yaa woto me ne tigis-kãsengã roogo, la tigis-kãseng zĩig fãa.

19. Sẽn na yɩl n yɩ yɩlemde, d segd n laka d mens ne bõe, la wãn to la Biiblã sõngd tõnd rẽ wɛɛngẽ?

¹⁹ Sẽn na yɩl n kell n yɩ yɩlemde, d segd n laka d mens ne rã-tɩgre, sɩgaar la doroog yũubu. Biiblã pa sõdgd minim-wẽns nins fãa nebã sẽn tar rũndã-rũndã wã n wilgdẽ ye. La a tara noy sẽn sõngd tõnd tɩ d bãng a Zeova sẽn tagsd to-to yel-kãensã wɛɛngẽ. Sẽn mik tɩ d mii a Zeova tagsg sẽn yaa a soabã, d sẽn nong-a wã yĩng segd n kɩtame tɩ d maan sẽn tat a yam. Bɩ d ges Biiblã noy a nu rẽ wɛɛngẽ.

20, 21. A Zeova ratame tɩ d lak d mens ne bõe, la bʋʋm-kãseng bʋg n kɩt tɩ d segd n maan dẽ?

²⁰ “M zo-nongdse, tõnd sẽn tar kãab-kãensã, bɩ d lak ne bũmb [nins] fãa sẽn yaa rẽgdo, yĩngã rẽnd la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaamã yĩnga.” (2 Korẽnt dãmba 7:1) A Zeova ratame tɩ d lak d mens ne bũmb nins fãa sẽn tõe n dẽgem d yĩngã la d yamã. Rẽnd d pa segd n dɩ, n yũ, bɩ n vʋdg d meng ne bũmb sẽn tõe n sãam d yĩngã la sẽn tõe n yãgem d zugã ye.

²¹ Biiblã wilgda bʋʋm-kãseng ning sẽn kɩt tɩ d segd n “lak ne bũmb [nins] fãa sẽn yaa rẽgdã.” D tẽeg 2 Korẽnt dãmb 7:1 sẽn sɩng to-to wã. A yeelame tɩ “tõnd sẽn tar kãabg kãensã” wã. Yaa kãab-bʋse? Goam nins sẽn deng  rẽ wã pʋgẽ, a Zeova yeelame yaa: “Mam na n yɩɩ yãmb Ba, la yãmb na n yɩɩ mam kom-dibli la mam kom-pugli.” (2 Korẽnt dãmba 6:17, 18) Tags-y n ges-y-yã: A Zeova yeelame t’a na n kogla yãmba, la a nong yãmb wa ba sẽn nong a biiga. La yaa yãmb sẽn na n lak y meng ne bũmb nins fãa sẽn dẽgemd yĩngã la yamã la a Zeova na n pids a kãabgã. Ad sɩd yaa yalemd menga, y sã n bas tɩ minim-wẽnsã kɩt tɩ y kong lohorem kãngã!

22-25. Biiblã no-bʋs n tõe n sõng tõnd tɩ d lak d mens ne minim-wẽnsã?

²² “Nong [a Zeova] fo Wẽnnaam ne f sũur fãa, la ne f sɩɩgã fãa, la ne f yam fãa.” (Matɩe 22:37) A Zezi yeelame tɩ no-kãngã n yaa kãseng n yɩɩd a taabã fãa. (Matɩe 22:38) A Zeova sɩd segda ne nonglem woto. D sã n dat n nong a Zeova ne d sũurã fãa, d sɩɩgã fãa, la ne d yamã fãa, d segd n laka d mens ne manesem nins fãa sẽn tõe n kɩt tɩ d yõor yɩ koɛɛg bɩ n kɩt tɩ d zugã yãgmã.

²³ Yaa a Zeova n “kõt [nebã] fãa vɩɩm la vʋʋsem la bũmb fãa.” (Tʋʋma 17:24, 25) Vɩɩmã yaa Wẽnd kũuni. D sẽn nong vɩɩmã kõtã yĩnga, d pa segd n deem ne d vɩɩmã ye. D segd n laka d mens ne bũmb nins fãa sẽn tõe n sãam d laafɩ wã, bala d sã n pa lak d mens ne bõn-kãensã, wilgdame tɩ d pa get tɩ vɩɩmã yaa kũun sẽn tar yõod ye.—Yɩɩl Sõamyã 36:10.

²⁴ “Nong f yak wa f menga.” (Matɩe 22:39) Ned sã n tar minim-wẽnse, pa yẽ mengã bal la a namsd ye. A namsda neb a taabã me. Wala makre, sɩga-yũud bug-zõos kẽeda sẽn pa yũudbã, n namsd-ba, la rẽ tõe n kõ-b-la bãase. Ned sã n maand a to wẽng woto, a kɩɩsda Wẽnnaam noor ning sẽn yet tɩ d nong d yak bɩ d to wã. Nin-kãng sã n yetẽ t’a nonga Wẽnnaam, yaa ziri.—1 Zã 4:20, 21.

²⁵ “Sak soolem soaadbã ne nanambsã.” (Tɩt 3:1) Tẽns wʋsg pʋsẽ, f sã n tar doroog bɩ f sã n yũud-a, f kɩɩsda  tẽngã laloa wã. Woto yĩnga, tõnd sẽn yaa kiris-neb hakɩkã, d lakda d mens fasɩ ne doroogã.—Rom dãmb 13:1.

26. a) Sẽn na yɩl n pa Wẽnnaam nonglmã pʋgẽ, bõe la d segd n maane? b) Bõe yĩng tɩ yɩ yɩlemd Wẽnnaam nifẽ be nafre?

²⁶ Sẽn na yɩl n pa Wẽnnaam nonglmã pʋgẽ, d segd n yɩɩ yɩlem bũmba fãa pʋgẽ. Yɩl n bas minim-wẽns tõeeme n pa yɩ nana ye. La y tõe n bas-b lame. * Vẽenega, d sã n tũud a Zeova noyã, d vɩɩmã na n sɩd yɩɩ noogo, bala a sẽn zãmsd tõnd bũmb ninsã fãa yaa d nafr yĩnga. (Ezai 48:17) Sẽn yɩɩd fãa, d sã n kell n yɩ yɩlma, d sũur na n yɩɩ noogo, bala d miime tɩ d manesmã na n kɩtame tɩ Wẽnnaam yʋʋrã paam waoogre, la kɩt tɩ d pa a nonglmã pʋgẽ.