1, 2. a) Bõe n kɩt tɩ mi n yaa toog ne-d tɩ d tags tɩ tẽngã na n sɩd wa lebga arzãna? b) Bõe n na n sõng-d tɩ d kɩs sɩd tɩ Wẽnnaam kãabsã na n pidsame?

MAMS-Y y yamẽ saam-biig sẽn sig tʋʋma, n wa ta Rĩungã roogẽ. Tʋʋmã yɩɩ yaamse, bala tʋʋmdã taoor soab yaa nin-toaaga, n tar-a n namsdẽ. A zakã rãmb yell gesg me pa nana ne-a ye. Sẽn paase, a pagã ka laafɩ, tɩ yaa yɩɩr n kõ-a. La tigsgã sẽn sɩng ne yɩɩll ningã yɩ-a-la noogo, hal tɩ yɩ wa ko-yũud sẽn wʋm ned tɩ b kõ-a ko-maasga. A sũur nooma a sẽn wa n be ne a tẽed-n-taasã Rĩungã roogẽ wã. Yɩɩllã gomda d sẽn na n wa vɩɩmd arzãnã pʋgẽ wã yelle. B yetame t’a mams a yamẽ t’a bee dũni paalgã pʋgẽ. A nonga yɩɩn-kãngã wʋsgo. Yẽ ne a zakã rãmb naaga neb a taabã n yɩɩle, hal tɩ yɩɩllã goam keng a raoodo, t’a yɩɩrã booge.

² A buud zoe n paama yãmb bɩ? A buud paama neb wʋsgo. La vɩɩmã sẽn pid ne zu-loeesã kɩtame tɩ mi n yaa toog tɩ d mams tẽngã gill sẽn na n wa lebg arzãnã. Sɩd-sɩdã, vɩɩmã yaa toogo, tɩ d tõe n yeel tɩ dũni-kãngã sẽn yaa to-to wã zãra ne arzãna. (2 Tɩm. 3:1) La bõe n tõe n sõng-d tɩ d kɩs sɩd tɩ tẽngã na n wa lebga arzãna? Bõe meng n wilgd tɩ ka la bilfu Wẽnnaam Rĩungã sɩd na n sooga dũniyã gilli? D gom bũmb a wãn yelle, tɩ na n kenga d tẽebã. Pipi, yaa bãngr-goam a Zeova sẽn togs tɩ pids Israyɛll nebã wakate. Rẽ poore, d na n yãa bãngr-gom-kãensã la a taab sẽn pidsd to-to rũndã-rũndã menga, hal tɩ noogd sũuri. Sẽn na n baase, d na n goma bãngr-gom-kãensã sẽn na n pids to-to ka la bilfu.

3. Bõe la a Zeova pʋlem zʋɩf rãmbã sẽn da be yembdã, tɩ kɩt tɩ b bas sãmbs la yɩɩre?

³ Tags-y n ges-y zʋɩf rãmbã vɩɩm sẽn da yaa to-to, b sẽn wa n be yembd Babilon yʋʋmd 500 ne zak sẽn deng a Zezi rogmã. Roagdb wʋsg bɩɩ be n dog kamba, tɩ b kambã me lebg bɛda. Vɩɩmã ra yaa toogo. Babilon nebã ra yaand-b lame, b sẽn da tẽed a Zeova pʋlemsã yĩnga. (Yɩɩl 137:1-3) A Zeova ra pʋlmame t’a na n kɩtame tɩ b leb b ba-yirã. Na maan yʋʋm wʋsgo, zʋɩf rãmb nins sẽn da sakd-a wã kell n  kɩsa sɩd ne pʋlen-kãngã. A Zeova wilgame tɩ b sã n leb b ba-yirã, vɩɩmã na n yɩɩ noogo. A yeelame meng tɩ Zida tẽngã na n yɩɩ wa zẽed zĩig yẽ sẽn manege, wa Edɛn zẽedã zĩiga. (Karm-y Ezai 51:3.) A Zeova sẽn yeel woto wã yaa sẽn na n yɩl t’a nin-buiidã bas sãmbs la yɩɩre, n kɩs sɩd tɩ b vɩɩmã na n yɩɩ noogo. Bõe n wilgd rẽ? Bɩ d tẽeg bãngr-goam a wãna.

4. Bõe la a Zeova yeel-yã, tɩ kɩt tɩ zʋɩf rãmbã bas b yam tɩ b sã n leb b ba-yirã, bãan na n zĩndame?

⁴ Bãan na n zĩndame: Pa arzãn sɩd-sɩd pʋgẽ la zʋɩf rãmb nins sẽn na n yi yembdã na n tɩ vɩɩmd ye. Yaa tẽng sẽn yɩ vɩʋʋg yʋʋm 70. Bãmb sʋkã neb wʋsg ra pa mi tẽngã meng ye. Wakat kãng tɩ gɩgma, kata, ãbs la we-rũms a taab ra waeeme. Tõe tɩ zak-soben-dãmbã ra sokda b mens woto: ‘M na n maana wãn n kogl m pagã ne m kambã? La m piisã ne m niisã yẽ?’ Sã n yaa woto me, b bee bʋʋm. La bɩ y ges Wẽnnaam sẽn pʋlem bũmb ning tɩ be Ezai 11:6-9 wã, la y tags rẽ sẽn keng b raood to-to. (Karm-y.) Ne gom-kãensã sẽn be yamleoogã, a Zeova wilg-b lame tɩ b bas b yam tɩ bũmb pa na n maan bãmb ne b rũmsã ye. A sẽn yeel tɩ gɩgemd na n wãba yamdã rat n yeelame t’a pa na n wãb b niisã ye. Wẽn-sakdbã ra pa tog n yɛɛs tɩ we-rũmsã na n maana bãmb bɩ b rũmsã bũmb ye. A Zeova pʋlmame t’a na n kogla a nin-buiidã Zida tẽngã pʋgẽ, la baa weoog la kãgr pʋgẽ.—Eze. 34:25.

5. Bãngr-gom-bʋs n sõng sẽn yi-b yembdã tɩ b kɩs sɩd t’a Zeova na n kɩtame tɩ yɩ tɩgre?

⁵ Na n yɩɩ tɩgre: Tõeeme tɩ nin-buiidã maana yɩɩr bũmb a taab yĩnga. Wala makre, tõe tɩ b ra sokda b mens yaa: ‘D sã n leb d ba-yirã, d na n maana wãn tɩ d zagsã rãmb paam rɩɩbo? D na n maana wãn n paam ro-gãase? D na n paama tʋʋm sɩda? D sã n paam me, rẽ yĩnga na n sãooga d sẽn da tʋmd d yembdã wakatã bɩ?’ Ne bãngr-goam maasem, a Zeova wilgame t’a na n gesa rẽ fãa yelle. A pʋlmame t’a na n kõo a nin-buiidã sẽn yaa sakdbã saag tɩ seke, tɩ tẽngã ‘wom rɩ-nood wʋsgo.’ (Ezai 30:23) Ro-gãasã la tʋʋmã wɛɛngẽ, a yeelame: “B na n mee zags n zĩnd b pʋsẽ. Bãmb na n sela tɩɩs n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye.” (Ezai 65:21, 22) Dẽnd woto fãa ra wilgdame tɩ b vɩɩmã na n yɩɩ noogo, la tɩ pa na n yɩ wa b sẽn da be yembdã ye. La yel-kãseng n da kete, yell ning meng sẽn kɩt tɩ b kẽng yembdã. B na n maana wãn ne yel-kãnga?

6. Bõe n nams Wẽnnaam nin-buiidã yʋʋm wʋsgo, tɩ ra wõnd bãaga? La bõe la a Zeova yeel sẽn na yɩl tɩ b bas b yam?

⁶ B na n tũu Wẽnnaam sõma: Yʋʋm wʋsg nand tɩ Wẽnnaam nin-buiidã kẽng yembdã, b ra yaa wa bãad rãmb tũudmã wɛɛngẽ. A Zeova ra kɩtame tɩ no-rɛɛs a Ezai yeel-b woto: “Zug fãa ka keem ye, la sũur ka tar pãng ye.” (Ezai 1:5) Wẽnnaam tũubã wɛɛngẽ, b ra yaa wa zoens la wʋmse. Bala b ra yẽda b tʋbã n pa rat n kelg a Zeova saglsã, la b mum b ninã  n pa rat n yã vẽenemã a sẽn da kõt-bã ye. (Ezai 6:10; Zer. 5:21; Eze. 12:2) B sã n yi yembdã n wa, tɩ tũudmã wɛɛngẽ ket n pa lebd be, b vɩɩmã na n yɩɩ noog bɩ? B kõn sãam a Zeova sũur t’a le bas-b sɩda? A Zeova pʋlem-b-la bũmb sẽn sõng-b tɩ b bas b yam. A yeelame: “Baraare, wʋms na n wʋma sebr goama. La zoens nin na n pukame tɩ b yi libsg la lik pʋgẽ n yã.” (Ezai 29:18) Hakɩka, a Zeova ra na n sõnga a nin-buiidã sẽn tek yamã tɩ b tũ-a sõma, n da le yɩ wa bãad rãmb tũudmã wɛɛngẽ ye. B sã n kell n yɩ sakdba, a na n wilg-b-la sor la a kõ-b vẽenem wakat fãa, b neer yĩnga.

7. Bõe la Wẽnnaam maan n pids a sẽn da pʋlem sẽn yi-b yembdã? La bõe yĩng t’a pʋlemsã sẽn pidsã kengd tõnd tẽebã?

⁷ A Zeova maana wa a sẽn pʋlmã bɩ? Nin-buiidã vɩɩm sẽn yɩ to-to wã wilgdame t’a pidsa a pʋlemsã. Zʋɩf rãmbã sẽn yi yembd n wa wã sɩd paama a Zeova barka. Bãan zĩndame, yɩɩ tɩgre, b tũu a Zeova sõma me. Wala makre, a Zeova kogl-b lame tɩ tẽn-yagsã sẽn tar pãng n yɩɩd-ba, tɩ b nebã sõor me yɩɩd-bã pa tõog-b ye. We-rũmsã me pa maan b rũmsã bũmb ye. Sɩd-sɩda, bãngr-goam nins a Zeova sẽn kɩt t’a Ezai ne a Zeremi la a Ezekɩɛll gʋlsã pidsame. La b pidsgã yɩɩ bilfu, bala tẽngã pa lebg arzãn wakat kãng ye. Baasgo Wẽnnaam nin-buiidã sũy yɩɩ noog wʋsgo. B paama b sẽn da ratã bal kɛpɩ. D sã n tags a Zeova sẽn maan wakat kãng n kõ a nin-buiidã, d tẽebã pãng paasdame. Bãngr-gom-kãensã sẽn pids bilfã sã n yɩɩ sũ-no-kãsenga, b sã n wa na n pids zãng-zãnga, sũ-noogã na n yɩɩ wãna? Bɩ d reng n ges a Zeova sẽn maand bũmb ning tõnd yĩng rũndã-rũndã.

8. Wẽnnaam sẽn kõ tõnd tẽng ningã yaa wãn-wãna?

⁸ A Zeova nin-buiidã pa buud a ye neba, b leb n pa naag taab n vɩ tẽng a ye pʋgẽ ye. La a nifẽ, sẽn paam-b zaeebã yaa wa buud a yembr neba, bala a boond-b lame tɩ “Israyɛll sẽn yaa Wẽnnaam dẽndã.” (Gal. 6:16) “Piis a taabã” sẽn yaa b tũud-n-taasã naag-b lame n yaa wa “tẽng” a ye neba. La pa tẽng sɩd-sɩd ye. Yaa siglg ning pʋgẽ b sẽn beẽ, n naag taab n tũud a Zeova ne yam a yembrã la b sẽn mak ne tẽngã. Sɩd me, b tũuda a Zeova noyã bũmb fãa pʋgẽ. (Zã 10:16; Ezai 66:8) Tẽng ning a Zeova sẽn kõ-dã yaa wãn-wãna? Be vɩɩm yaa noogo, tɩ yaa wa d zoe n bee arzãnã pʋgẽ. Dẽnd a Zeova sẽn pʋlem tɩ tẽn-kãng na n yɩɩ wa Edɛnnã sɩd pidsdame, hal tɩ be yamleoogo. D ges bũmb kẽer sẽn wilgd rẽ.

9, 10. a) Rũndã-rũndã, wãn to la bãngr-gomd ning sẽn be Ezai 11:6-9 wã pidsda? b) Bõe n wilgd tɩ laafɩ la zems-n-taar bee Wẽnnaam nin-buiidã sʋka?

⁹ Bãan na n zĩndame: Bãngr-gomd ning sẽn be Ezai 11:6-9 wã bilgda bũmb sẽn noogd sũur wʋsgo. B wilga be tɩ ninsaalbã ne yir-dũmsã pa na n le yɛɛsd we-rũmsã, la tɩ we-rũmsã me pa na n le zoet ninsaalbã ye. Gom-kãng pidsda rũndã-rũndã bɩ? N-ye! Vɛrse a 9 wã wilgda bũmb ning sẽn kɩt tɩ wẽng bɩ sãoong pa na n le zĩnd bõn-naandsã sʋkã. B  yeelame tɩ “dũniyã na n pida ne Zu-soabã bãngr wa koom sẽn pid mogre.” Rẽ yĩnga, rũmsã tõe n bãnga a Zeova n toeem sɩda? Ayo. Yaa ninsaalbã n tõe n bãng Wẽnnaam sẽn ka to wã, n dɩk a togs-n-taar n lebg neb sẽn baood laafɩ. Rẽ n so tɩ d sã n ges siglg ning pʋgẽ d sẽn be tɩ yaa wa arzãnã, d neeme tɩ bãngr-gom-kãngã sɩd pidsdame, hal tɩ noom-do. Wẽnnaam Rĩungã sẽn sɩng a naamã, kiris-nebã paamda zãmsg sẽn sõngd-b tɩ b basd b zʋg-wẽnsã sẽn da kɩt tɩ b wẽnd we-rũmsã, n vɩ ne b tẽed-n-taasã tɩ laafɩ la zems-n-taar be b sʋka.

¹⁰ Wala makre, seb-kãngã pʋgẽ d goma kiris-nebã sẽn pa kẽesd b toog dũni kãngã yɛlẽ wã. D tẽega Biiblã goam nins sẽn kɩt tɩ d pa kẽesd d toogã, la namsg ning Wẽnnaam nin-buiidã sẽn paamd yel-kãng poorẽ wã. Baa ne dũni kãngã sẽn pid ne nen-kɛglmã, neb kʋʋng n zãgs tɩ b kõn tʋm nen-kɛglem tʋʋm baa bilfu, hal n sak kũum rẽ yĩnga. Woto pa wõnd yel-solemd sɩda? Yaa kaset tɩ laafɩ la zems-n-taar hakɩk bee Mesi Rĩungã poorẽ dãmb sʋka, wa a Ezai sẽn bilgã. A Zezi ra yeelame tɩ yaa a karen-biisã sã n nong taab la b na n bãng-b n bake. (Zã 13:34, 35) Sɩd me, Kiristã tũnugda ne “tʋm-tʋmd sẽn tũud sɩd la sẽn tar yamã” n zãmsd a nin- buiidã tigimsã pʋsẽ, sẽn na yɩl tɩ b yɩ neb sẽn baood laafɩ, sẽn nong taab la sẽn tar sũ-bʋgsem.—Mat. 24:45-47.

11, 12. Kom bʋg buud n namsd nebã rũndã-rũndã, la wãn to la a Zeova maand tɩ yẽ nin-buiidã nengẽ yaa tɩgre?

¹¹ Na n yɩɩ tɩgre: Wẽnnaam tũubã wɛɛngẽ, dũniyã neb kiida kom. Biiblã ra yeelame: “Daar n wate, Soaala Wẽnd n yeele, tɩ m na n tool kom, tẽn-kãnga rãmba. La ka bur kom la b na n yãb ye, ka ko-yũud la b na n yãb ye. Yaa m goamã kom la ko-yũud n na n yõk-ba.” (Amos 8:11, Sebr Sõngo) Rẽ yĩnga Wẽnnaam Rĩungã poorẽ dãmb me kiida kom bɩ? A Zeova ra wilgame tɩ yẽ nin-buiidã nengẽ na n yɩɩ toor fasɩ ne a bɛɛbã. A yeela woto: “Mam tʋm-tʋmdbã na n dɩɩme, la yãmb na n gãanda kom. Mam tʋm-tʋmdbã na n yũume, la ko-yũud na n yõka yãmba. Mam tʋm-tʋmdbã na n paama sũ-noogo, la yãmb na n paama yãnde.” (Ezai 65:13) Yãmb pa ne tɩ gom-kãngã pidsdame sɩda?

¹² Bũmb nins tõnd sẽn paamd d tẽebã kengr yĩngã tara paasgo. Yaa wa kʋɩlg sẽn lebgd yaleng la zulunga. Sɛbã d sẽn yiisdã, kasɛt la CD rãmb d sẽn tõe n kelgã, video rãmbã, tigissã la tigis-kãsemsã, n paas bũmb nins sẽn be d sɩtã pʋgẽ wã fãa kɩtame tɩ tõnd nengẽ yaa tɩgre, tɩ dũniyã neb yaool n kiid kom. (Eze. 47:1-12; Zoɛll 4:18) A Zeova sẽn pʋlem tɩ na n yɩɩ tɩgre, tɩ yãmb ne rẽ sẽn pidsd daar fãa wã pa noom-y sɩda? Rẽ yĩnga, y modgdame n dɩt bõn-kãensã fãa yõod bɩ?

13. Bõe yĩng tɩ y tõe n yeel tɩ y zoe n yãa zoang nin sẽn puki, wall wʋng tʋb sẽn yoose?

¹³ B na n tũu Wẽnnaam sõma: Wẽnnaam tũubã wɛɛngẽ, neb wʋsg yaa wa zoens la wʋmse. (2 Kor. 4:4) Kiristã yaool n sãoogda komslem la bãas dũniyã gill zugu. Yãmb zoe n yãa zoang nin sẽn puki, wall wʋng tʋb sẽn yoos bɩ? A Zeova ra yeelame: “Baraare, wʋms na n wʋma sebr goama. La zoens nin na n pukame tɩ b yi libsg la lik pʋgẽ n yã.” (Ezai 29:18) Yãmb sã n mii ned sẽn zãms Wẽnnaam Gomdã n paam bãngr hakɩka, n bas ziri nins tũudmã a taabã sẽn da zãms-a tɩ kɩt t’a ra yaa wa zoang la wʋngã, dẽnd y yãa bãngr-gom-kãngã pidsgu. Yʋʋmd fãa, neb tusa tʋb yoosdame, tɩ b ninã me pukd tũudmã wɛɛngẽ. Ned sã n bas Babilon-kãsengã n wa naag tõnd a Zeova tũubã pʋgẽ, yaa kaset t’a Zeova bãngr-gomdã pidsdame.

14. Bõe n zoe n yaa vẽenega, tɩ y sã n bʋgsd rẽ zug bɩ kengd y tẽebã?

¹⁴ Y sã n karem seb-kãngã, y na n yãame tɩ sak fãa pʋgẽ, kaset n be n wilgd tɩ yaoolem wakat kãensã, Kiristã geta a poorẽ dãmbã yell sõma, tɩ yaa wa b zoe n bee arzãnã pʋgẽ. Bɩ d ket n bʋgsd bark nins fãa d sẽn paamd arzãn-kãng pʋgẽ wã. Rẽ, d na n maneg n kɩsa sɩd ne a Zeova pʋlems nins sẽn na n pids ka la bilfã.

15. Bõe yĩng tɩ d tõe n kɩs sɩd tɩ tẽngã na n wa yɩɩ arzãna?

¹⁵ A Zeova ra sɩng n datame tɩ tẽngã fãa lebg arzãna. A naana a Ãdem ne a Hawa n ning-b zĩ-neer pʋgẽ, n yeel-b tɩ b  rog kamb n pid dũniyã, la b ges b kambã ne b yagensã la bõn-naandsã fãa yelle. (Sɩng. 1:28) Bʋko, a Ãdem ne a Hawa saka a Sʋɩtãan noorã n kɩɩs Wẽnnaam, tɩ kɩt tɩ b kambã la b yagensã fãa lebg koangdba, yel-wẽn-maandb la kiidba. La Wẽnnaam ket n datame tɩ tẽngã lebg arzãna. A sã n yeel gomde, pa tõe n pa pids ye. (Karm-y Ezai 55:10, 11.) Dẽnd d tõe n kɩsa sɩd tɩ wakat n wat tɩ dũni-kãngã na n lebg arzãna, t’a Ãdem ne a Hawa kamb la b yagens vɩɩmd a zugu, n soog-a la b ges a Zeova bõn-naandsã fãa yelle. Wẽnnaam sẽn da kɩt tɩ b taas zʋɩf rãmbã sẽn da be yembdã bãngr-goam sẽn wilgd tɩ b ba-yirã na n yɩɩ noog wa arzãnã na n pidsa dũniyã gill zug wakat kãnga. Bɩ d gom vɩɩmã sẽn na n yɩ to-to wã yell bilfu.

16. Biiblã gom-bʋs n bilgd bãan ning sẽn na n zĩnd arzãnã pʋgẽ wã?

¹⁶ Bãan na n zĩndame: Gom-nood nins sẽn be Ezai 11:6-9 wã na n yaa n pidsa zãng-zãnga. Rapã, pagbã la kambã na n vɩɩmda ne bãane, baa b sẽn be zĩig ning fãa. Bõn-naandsã buud fãa, yaa ninsaalbã tɩ yaa rũmsã me, b pa na n le maan taab wẽng ye. Tags-y n ges-y tẽngã gill sẽn na n wa lebg wa yãmb zaka, tɩ y tõe n tɩ rug koom kʋɩlg ning y sẽn datẽ, kʋɩl-bõonesẽ la kʋɩl-kãsemsẽ, n tõe n gilg tãensẽ wã wa y sẽn date, la y tõe n saad moogẽ wã tɩ bũmb pa maand-y ye. Zĩig sã n sobge, rabeem pa tar-y ye. Ezekɩɛll 34:25 sẽn yet bũmb ningã na n pidsame, hal tɩ Wẽnnaam nin-buiidã tõe n “zĩnd wet pʋsẽ, n gãand tɩɩs tẽngr ne laafɩ.”

17. Bõe yĩng tɩ d tõe n kɩs sɩd tɩ Rĩungã sã n wa so tẽngã gilli, a Zeova na n kɩtame tɩ yɩ tɩgre?

¹⁷ Na n yɩɩ tɩgre: Tags-y n ges-y naong la far sẽn na n sa, tɩ kom kae, tɩ ned fãa paamd rɩ-sõma n dɩtẽ tɩ sekdẽ, tɩ nimbãan-ned le kae ye. Rũndã-rũndã, Wẽnnaam nin-buiidã sẽn vɩ tɩgr pʋgẽ tũudmã wɛɛngẽ wã zoe n yaa kaset tɩ Rĩmã sẽn yaa Mesi wã na n kõo a poorẽ dãmbã b sẽn dat fãa. A sẽn wa n be tẽngã zugã, a maana yel-soalem n wilg t’a sɩd tõee rẽ. A maaname tɩ bur la zĩm a wãn bal sek neb tusa kom sẽn da tare. (Mat. 14:17, 18; 15:34-36; Mark 8:19, 20) Wẽnnaam Rĩungã sã n wa so tẽngã gilli, bãngr-goam a taab wala a Ezai sẽn togs a soabã me na n pidsame. A ra yeelame: “Bãmb na n kõo yãmb saaga, bõn-buudã yãmb sẽn bʋdã yĩnga. La tẽngã na n woma rɩ-nood wʋsgo. Baraare, yãmb dũmsã na n wãba zĩ-yaleng pʋgẽ.”—Ezai 30:23.

18, 19. a) Ezai 65:20-22 goamã kɩtame tɩ y mi tɩ y na n wa paama bõe? b) B sẽn yeel tɩ tõnd “na n kaoosa wa tɩɩsã” rat n yeelame tɩ bõe?

¹⁸ Rũndã-rũndã, neb wʋsg getame tɩ b pa tol n tõe n paam b toorẽ zag-sõng la tʋʋm-sõng ye. Dũni-kãngã sẽn pid ne wẽgbã, neb wʋsg neeme tɩ b tʋmda wʋsg tɩ yaool n yaa zaalem, bala b pa paamd sẽn sek bãmb ne b zakã rãmb ye. B neeme tɩ yaa ra-kã-rãmb sẽn yaa yão-be-neb n kãagd fãa. Mams-y n ges-y vɩɩmã sẽn na n yɩ to-to, a Ezai sẽn togs bũmb ningã sã n wa pids dũniyã gill zugu. A ra yeela woto: “B na n mee zags n zĩnd b pʋsẽ. Bãmb na n sela tɩɩs n dɩ b  biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam nebã na n kaoosa wa tɩɩse. La neb nins mam sẽn yãkã na n paama b tʋʋmã nafre.”—Ezai 65:20-22.

¹⁹ B sẽn yeel tɩ tõnd “na n kaoosa wa tɩɩsã” rat n yeelame tɩ bõe? Yãmb sã n yas tɩ-kẽeng tẽngre, n zẽk y neng n ges tɩɩgã la y tags a yʋʋmã sõore, pa wõnd yel-solemd sɩda? Tõe t’a sɩng n beeme tɩ yãmb yaab tʋb-rakẽegã meng nan pa rog ye. Tõeeme tɩ y na n tagsa y sẽn yaa koangd la kiidã yelle, n miẽ tɩ yel-kãng sã n pa welge, yãmb na n wa maana kaalem tɩ tɩɩgã ket a zĩigẽ. Ad d sũy yaa noog wʋsg ne a Zeova, a sẽn yeel tɩ d bas d yam tɩ arzãnã pʋgẽ, d na n paama yõ-woko, la d vɩ ne laafɩ wã. (Yɩɩl 37:11, 29) Sɩd me, daar n wat tɩ tõnd na n wa getẽ tɩ yaa wa tɩ-kãensã buudã kiida tao-tao wa moodo. Rẽ tɩ tõnd vɩɩ wakat sẽn kõn sa!

20. Wilg-y sẽn na n yɩ to-to tɩ Rĩungã poorẽ dãmbã fãa paam yĩns laafɩ hakɩka.

²⁰ Yĩns laafɩ: Rũndã-rũndã, d fãa bẽedame, d fãa yaa kiidba. Yel-wẽndã me yaa wa bã-kʋʋdg sẽn tar d fãa. A Zezi sẽn ki tɩ yɩ maoongã bal la a tɩɩm. (Rom 3:23; 6:23) A Zezi naamã sẽn na n kaoos yʋʋm tusrã sasa, yẽ ne a na-rɩt-n-taasã na n kɩtame tɩ d rɩ maoong-kãng yõod tɩ pidi, tɩ bilf-bilfã bɩ d wa lebg neb sẽn pa le yaa yel-wẽn-maandba. Wakat kãnga, a Ezai sẽn da pĩnd n togs bũmb ningã na n pidsame. A ra yeelame tɩ tẽngã ned baa a ye ka na n le yeel t’a ka laafɩ, la tɩ nebã na n paama b yel-wẽnã sugri. (Ezai 33:24) Tags-y n ges-y-yã! Ned pa na n le yɩ zoanga, wʋng bɩ koams ye. (Karm-y Ezai 35:5, 6.) Bãag kae a Zezi sẽn pa na n tõog n sãoog ye. Yaa yĩng bãag tɩ yaa zug bãag wall yaa sũ-sãang bãag me, fãa na n saame. Rĩungã poorẽ dãmbã na n paama yĩns laafɩ hakɩka!

21. Ãnd soab n tar kũumã tɩɩm, la bõe la a na n maane? Bõe yĩng tɩ rẽ belsd yãmba?

²¹ La kũumã yẽ? Bala d miime tɩ bãag tõe n wa baasa ne kũum. Ninsaal buudã fãa ‘bɛ’ yaa kũum. D fãa yaa kiidba, tɩ ned kae n tar a tɩɩm ye. (1 Kor. 15:26) La rẽ yĩnga, kũumã yaa bũmb sẽn yɩɩd a Zeova pãng bɩ? Ad a Ezai sẽn yeele: “Bãmb na n sãama kũum wakat sẽn ka sɛta. Zu-soabã sẽn yaa Soaalã na n yẽesa nintãm nins fãa sẽn be nebã ninẽ wã.” (Ezai 25:8) Mams-y y yamẽ n ges vɩɩmã sẽn na n yɩ to-to. Kʋʋr le kae, yaad kae! Ned kõn le raag nintãm bɩ a wiis sũ-sãang yĩng ye. Nebã na n pʋd n daaga nintãm sũ-noogã yĩnga, bala a Zeova na n vʋʋga sẽn ki-bã wa a sẽn pʋlmã. (Karm-y Ezai 26:19.) D na n yaa n paama d mens ne toog ning fãa kũumã sẽn wat ne wã.

22. Mesi wã Rĩungã sã n wa kɩt tɩ Wẽnnaam daabã maand tẽngã gill zugu, bõe n na n maane?

²² Yʋʋm tusrã ne a sa tɩ Rĩungã kɩtame tɩ Wẽnnaam daabã maand tẽngã gill zugu. Rẽ, Kiristã na n dɩka naamã n lebs a Ba wã. (1 Kor. 15:25-28) Wakat kãng tɩ ninsaalbã paama b mens fasɩ ne yel-wẽnã. B na n basa a Sʋɩtãan t’a yi  bog-zulungã pʋgẽ, n mak nebã a yaoolem makre. Rẽ poore, Kiristã na n sãama wag-kʋdrã ne a poorẽ dãmbã zãnga. (Sɩng. 3:15; Wil. 20:3, 7-10) La neb nins fãa sẽn nong a Zeova wã na n paama barka. Biiblã gomd a ye n bilgd rẽ hal sõma. Wõnda gomd le kae n bilgd bark ning b sẽn na n paamã n ta gom-kãng ye. Yaa b sẽn yeel tɩ wẽn-sakdbã na n paama “pʋɩɩr ne Wẽnnaam kambã b lohormã ne b ziirã pʋgẽ” wã.—Rom 8:21.

23, 24. a) Bõe yĩng tɩ Wẽnnaam kãabsã pa tõe n pa pidsi? b) Bõe la y rat n maan ne y sũur fãa?

²³ Woto fãa pa zãmsdo, pa ned n tags n yeele, leb n pa saag-feed ye. A Zeova pʋlemsã pa tõe n pa pids ye. Bõe yĩnga? Tẽeg-y a Zezi goam nins yell d sẽn gom pipi sakã pʋgẽ wã. A wilga a karen-biisã tɩ b sã n na n pʋʋs bɩ b kos tɩ Wẽnnaam soolmã bɩ a Rĩungã wa, t’a raabã maan dũniyã zug wa sẽn maand saasẽ wã. (Mat. 6:9, 10) Wẽnnaam Rĩungã pa bũmb ned sẽn tags n naan ye. Yaa bũmb sẽn sɩd be. A Rĩmã zoe n dɩta naam saasẽ. Sẽn ta yʋʋm koabg masã, a kɩtame t’a Zeova kãabsã pidsdẽ, hal tɩ d ne rẽ vẽeneg kiris-neb hakɩkã sʋka. Dẽnd d tõe n kɩsa sɩd tɩ Rĩungã sã n wa so tẽngã gilli, Wẽnnaam sẽn pʋlmã fãa na n pidsame.

²⁴ D miime tɩ Wẽnnaam Rĩungã na n waame. D kɩsa sɩd me t’a Zeova sẽn kãabã fãa na n pidsame. Bõe yĩnga? Bala WẼNNAAM RĨUNGÃ RĨM RƖTA NAAM! La tõnd ned kam fãa segd n soka a meng woto: ‘Yaa Rĩungã n so maam bɩ?’ Bɩ ned fãa maan a sẽn tõe, t’a sẽn vɩ to-to masã mengã wilg t’a bee Rĩungã poorẽ. Rẽ, Rĩmã naam sẽn na n yɩ ne tɩrlmã sasa, d na n paam n dɩɩ a naamã yõod wakat sẽn kõn sa!