Sẽn na yɩl n yɩ Wẽnnaam zoa, y segd n bao n bãng-a lame. Yãmb zo-rãmbã mii yãmb yʋʋrã la b boond-a bɩ? N-yẽe. Wẽnnaam datame tɩ y bãng a yʋʋrã n boole. Wẽnnaam yʋʋrã ya a Zeova. (Yɩɩl Sõamyã 83:18, NW; Matɩe 6:9) Y segdame me n bao n bãng a sẽn nong la a sẽn pa nonge. Y segd n bãnga a zo-rãmbã sẽn yaa b rãmba, la a bɛɛbã sẽn yaa b rãmba. Kaoosdame tɩ f wa tõog n bãng neda. Biiblã yetame tɩ yaa yam bũmb tɩ d bao sẽk n zãms n bãng a Zeova.—Efɛɛz rãmba 5:15, 16, NW.

Wẽnnaam zo-rãmbã maanda sẽn noom-a. Tags-y y zo-rãmbã yelle. Yãmb sã n maand-b wẽng la y maand bũmb nins b sẽn kisã, rẽ yĩnga b na n ket n yaa y zo-rãmb bɩ? Yaa vẽeneg tɩ ayo! Woto me, y sã n dat n yɩ Wẽnnaam zoa, rɩlla y maan sẽn noom-a.—Zã 4:24.

Pa tũudmã fãa n kɩtd tɩ ned yɩ Wẽnnaam zoa ye. A Zezi sẽn yaa Wẽnnaamã zoa n yɩɩd neb a taaba fãa wã goma soay a yiib yelle. A yembrã yaa yaleng n pid ne neba. So-kãng rebda sãoong zĩigẽ. Sor a to wã yaa sẽk tɩ neb bilf tũud-a. So-kãng tar n debda vɩɩm sẽn-kõn-sa zĩigẽ. Rẽ rat n yeelame tɩ y sã n dat n yɩ Wẽnnaam zoa, y segd n bao n bãnga y sẽn na n balm-a to-to tɩ zemse.—Matɩe 7:13, 14.