A Zeezi ne a karen-biisã taa Betsayɩda. Nebã talla zoang n wa a nengẽ, n kos-a t’a puk a ninã.

A Zeezi gãda zoangã nug n tall-a n yi tẽngã, n tʋbs kolkood n ning a ninã, n bas n sok-a yaa: “Fo nee bũmbu?” Raoã yeelame: “Mam nee nebã, la b wẽnda wa tɩɩse, la b kẽndame.” (Mark 8:23, 24) A Zeezi sɩɩsa zoangã ninã, tɩ puk t’a neẽ. A yeel-a lame t’a kuil la a ra kẽ tẽngã pʋgẽ ye.

Rẽ poore, a Zeezi ne a karen-biisã kẽnga soolem ning b sẽn boond tɩ Filip Sezaare wã. Taa kilo 40. Rẽ me yaa rʋʋbo, bala tẽng ning b sẽn debdẽ wã bee tãng zugu. Ned sã n be be, a tool n nee Hɛrmo tãngã sẽn gãneg ne sa-lamdã. B kẽndã tog n taa rasem a yiibu.

B wa n tek n yalsa sorẽ, t’a Zeezi bao zĩig n tɩ pʋʋs a yembre. A kũumã ra keta kiis a wɛ bɩ piig bala, t’a ra tagsd a karen-biisã yelle. Sẽn nan pa kaoose, wʋsg n bas a tũubu, tɩ wõnd kẽer me yam yuusdame. Tõe tɩ b ra sokda b mens bõe yĩng tɩ nebã rat t’a Zeezi lebg rĩm t’a zãgse, la bõe yĩng t’a pa maan yel-solemd n wilg a sẽn yaa ned ningã vẽenega?

Karen-biisã wa n bʋʋga a Zeezi a sẽn da beẽ n pʋʋsdẽ wã, la a sok-b lame yaa: “Nebã yetame tɩ maam a Ninsaal Bi-riblã yaa ãnda?” B leokame: “Neb kẽer yetame tɩ yãmb yaa a Zãmbatiisi, tɩ kẽer t’a Eli, tɩ kẽer t’a Zeremi wall Wẽnnaam no-rɛɛsdbã ned a yembre.” Sɩd me, nebã ra tagsdame t’a Zeezi yaa Wẽnnaam pĩnd no-rɛɛs a ye sẽn vʋʋge. La a Zeezi rat n bãnga a karen-biisã me sẽn tagsde. Rẽ n so t’a sok-b yaa: “La yãmba, yãmb yetame tɩ mam yaa ãnda?” Tao-tao bala, a Sɩmo Pɩyɛɛr leoka woto: “Yãmb yaa Kirisã, Wẽnnaam sẽn vɩ wã Bi-ribla.”—Matye 16:13-16.

A Zeezi yeela a Pɩyɛɛr t’a maan sũ-noogo, bala yaa Wẽnnaam n vẽneg-a t’a bãng rẽ. A paasa woto: “La maam, mam yeta foom tɩ fo yaa Pɩyɛɛre, la kug-kãngã zugu, mam na n mee m wẽnd-doogã, la kɩɩm-kulg ka na n tõog-a ye.” A ra rat n yeelame tɩ yẽ mengã na n lugla tiginga, la t’a karen-biisã sã n kell n sak Wẽnnaam b yõor tɛka, baa b sã n ki, b na n vʋʋgame. A yeela a Pɩyɛɛr yaa: “Mam na n kõo foom arzãn [“saasẽ,” MN] soolem kʋɩlen-biisi.”—Matye 16:18, 19.

A Zeezi ra pa rat n yeel t’a Pɩyɛɛr yɩɩda tʋm-tʋmdb a taabã, bɩ tɩ yaa a Pɩyɛɛr zug la a na n yẽbg tigingã ye. A Zeezi mengã n na n yɩ tigingã a sẽn na n luglã pãng kugri. (1 Korẽnt-rãmbã 3:11; Efɛɛs-rãmbã 2:20) La b ra na n wa kõo a Pɩyɛɛr kʋɩlen-biis a tãabo. Yẽ n da na n wa pak sor tɩ neb paam n kẽ saasẽ soolmã.

Yʋʋmd 33 Pãntekotã sasa la a Pɩyɛɛr tall pipi kʋɩlen-bilã n pak sore, zʋɩf-rãmb n paas neb sẽn da tuub n sak zʋɩf-rãmbã tũudmã yĩnga. A sõnga nin-kãensã sẽn tek yam n kos sugrã tɩ b bãng b sẽn segd n maan n paam fãagre. Ne kʋɩlen-bil a yiib-n-soabã, a paka sor tɩ Samaari neb sẽn tẽ a Zeezi paam n kẽ Wẽnnaam soolmẽ wã. Yʋʋmd 36 soabã la a Pɩyɛɛr tall kʋɩlen-bil a tãab-n-soabã n pak sor t’a Kornɛy, n paas bu-zẽms neb sẽn pa kẽ bãongã paam n kẽ saasẽ soolmã.—Tʋʋmã 2:37, 38; 8:14-17; 10:44-48.

A Zeezi togsa a karen-biisã tɩ b na n namsa yẽ Zeruzalɛm, la b kʋ-a. Woto sãama a karen-biisã sũy hal wʋsgo. A Pɩyɛɛr ra pa mi t’a Zeezi sã n ki, Wẽnnaam na n vʋʋg-a lame t’a loog saasẽ ye. Rẽ n so t’a peega a Zeezi n leb kɛɛng n yeel-a woto: “Zu-soaba, Wẽnd na zãage! Yel-kãngã kõn paam yãmb abada.” La a Zeezi wẽnemdame n yeel a Pɩyɛɛr yaa: “Leb mam poorẽ, Sʋtãana! Fo yaa gɩdgr mam sor zugu. Bala, fo tagsdã ka Wẽnnaam dẽnd ye, yaa ninsaal dẽnda.”—Matye 16:22, 23.

A Zeezi wa n boola neb a taab tɩ b wa naag tʋm-tʋmdba, t’a wilg-b tɩ yɩl n yɩ yẽ karen-biig pa na n yɩ nana ye. A yeelame: “Ned sã n dat n tũ maam, bɩ a kɩɩs a mengã raabo, n dɩk a da-pɩk [“ra-luk,”MN] n tũ maam. Bala, ned ning fãa sẽn dat n gũ a vɩɩm, a vɩɩm na sãame, la ned ning fãa sẽn na n bas a vɩɩm mam yĩnga la koe-noogã yĩnga, a na paam fãagre.”—Mark 8:34, 35.

Sɩd me, ned ning sẽn dat n tũ a Zeezi n paam bark tog n talla raoodo, la a sak n mong a meng bũmb kẽere. A Zeezi meng yeelame: “Ned ning fãa sẽn na n zoe-a mam yãnde la mam goamã yãnde, zamaan-kãngã nebã sẽn yaa yoaadbã la yel-wẽn maandbã sʋka, Ninsaal Bi-riblã sã n wa n wa ne b ziirã, la b ba wã ziiri, ne malegs-sõamyã, b na n zoee yẽnda me yãnde.” (Mark 8:38) Hakɩɩka, a Zeezi sã n wa, a “na n dola ned kam fãa wa sẽn zems a tʋʋmde.”—Matye 16:27.