A Zeezi ra zoe n boola neb a naas tɩ b lebg a karen-biisi, n yaa yẽ nebã baoodba. Yaa a Pɩyɛɛr ne a Ãndere la a Zak ne a Zã. Vʋʋsg raarã sẽn wa n ta wã, b tũu taab n kẽng Kapɛrnawom karen-doogẽ wã. A Zeezi zãmsa nebã Wẽnnaam goamã beenẽ, hal t’a sẽn da zãmsd-b to-to wã le ling-b wʋsgo. A ra tara zãmsgã tõogo, pa wa gʋlsdbã ye.

Baraarã, rao a ye zĩn sẽn da tar n da be karen-doogẽ wã. Raoã kelmame n yeel yaa: “Zeezi sẽn yit Nazarɛte, yaa bõe la y rat ne tõndo? Yãmb waame n na n menes tõnd laa? Maam mii yãmb sẽn yaa ned ninga. Yãmb yaa Wẽnnaam pʋ-peelem soaba.” La a Zeezi lenga zĩnã, n yeele: “Sĩnd la f yi n bas raoã.”—Mark 1:24, 25.

Zĩig pʋgẽ, zĩnã luba raoã n kɩt t’a virsd wʋsg la a kelemd ne a pãng fãa. Zĩnã yiime n bas raoã n ka “maan-a wẽng baa bilfu.” (Luk 4:35) Neb nins fãa sẽn da be karen-doogẽ wã yɛɛsame, n sok taab yaa: “Bõn-kãngã yaa bõe? . . . B tãsda zĩn-dãmb mens hal tɩ b sakd-ba.” (Mark 1:27) Sãmbg kae tɩ b ra gomda yel-solemdã yell zĩig fãa Galɩle soolmẽ wã.

A Zeezi ne a karen-biisã yii karen-doogẽ wã n kẽng a Pɩyɛɛr b sẽn boond me t’a Sɩmo wã zakẽ. B tɩ mikame t’a Pɩyɛɛr pagã ma ka keeme, t’a yĩngã wɩng wʋsgo. B kosa a Zeezi sõngre. La a Zeezi kolgame n gãd a nugã, n sõng-a t’a yiki. La zĩig pʋgẽ a yĩnsã sigame, t’a sɩng tʋʋma, n na n ges a Zeezi ne a karen-biisã yelle. Tõe t’a segla rɩɩb n kõ-ba.

Wĩndgã sẽn wa n kẽ, neb wʋsg waa a Pɩyɛɛr zakẽ wã ne b bãad-rãmba. Tao-tao bal tɩ ne wa yaa tẽngã nebã fãa n wa n gũm zakã noore. Bõe la b rata? B ratame t’a Zeezi sãoog b bãasã. Sɩd me, “neb nins fãa sẽn dag n tar bãad-dãmba, bãas buud toay-toay sẽn tare, tall-b lame n wa a Zeezi nengẽ. A Zeezi tika bãmb ned kam fãa ne b nusi, n maag-ba.” (Luk 4:40) Wa a Ezayi sẽn da reng n togsã, a sãooga ned fãa, baa bãagã sẽn da yaa to-to. (Ezayi 53:4) Baa zĩn-dãmb sẽn da tar-b rãmbã me paama b mense. A Zeezi sã n dig zĩn t’a na n yi, zĩnã kelemdame n yetẽ: “Yãmb yaa Wẽnnaam Bi-ribla.” (Luk 4:41) La a Zeezi tãsd-b lame, n pa basd-b tɩ b le gom ye. Zĩn-dãmbã ra miime t’a Zeezi yaa Kirisã, la a Zeezi ra pa rat tɩ b maan tɩ nebã tẽ tɩ zĩn-dãmbã sakda Wẽnnaam ye.