A Zeezi pẽga a Zãmbatiisi. La a zãmaanã neb tagsg yaa bõe ne a Zãmbatiisi? A Zeezi yeelame: “Bãmb wẽnda wa kamb sẽn zĩ raagẽ n boond taab n yetẽ: ‘Tõnd peeba wɩɩs la yãmb ka sao ye. Tõnd yɩɩla kʋʋr yɩɩl la yãmb ka wiis ye.’”—Matye 11:16, 17.

A Zeezi gomdã rat n yeelame tɩ bõe? Yẽ mengã wilga a võore, n yeel woto: “A Zã waame n ka rɩt la a ka yũud ye, tɩ b yet tɩ sɩ-wẽng n tar-a. Ninsaal Bi-riblã sẽn wa wã, b rɩtame la b yũuda, tɩ nebã yetẽ tɩ b yaa yão-be-neda, la rã-yũuda, la yaood-dɛɛgdb ne yel-wẽn maandbã zoa.” (Matye 11:18, 19) Sɩd me, a Zã monga a meng bũmb wʋsgo, n da vɩ wa Nazireyẽ, n pa yũud rãam ye. La a zãmaanã neb yeelame tɩ zĩn n tar-a. (Sõdbo 6:2, 3; Luk 1:15) A Zeezi yẽ ra vɩɩ wa neb a taabã. A ra rɩtame la a yũuda. Baa a sẽn da pa rɩt wall a yũud tɩ loogã, nebã yeelame t’a yaa yão-be-neda. Wõnda ned ka tar a sẽn na n maaneg tɩ ta nebã yam ye.

A Zeezi yeelame t’a zãmaanã neb yaa wa kamb sẽn zĩ raagẽ, tɩ kamb a taab peeb wɩɩs tɩ b ka sao, tɩ b yɩɩl kʋʋr yɩɩl me tɩ b ka wiis ye. A paasa woto: “La yam tʋʋm-sõama n wilgd yam sẽn yaa a soaba.” (Matye 11:16, 19) Hakɩɩka, a Zã ne a Zeezi “tʋʋm-sõama” wã wilgda vẽeneg tɩ nebã sẽn yetã yaa rõdga.

A Zeezi yeelame tɩ zãmaanã neb fãa yaa tõatba. Tẽns kẽer meng la a sõdge, n ning-b taale. Yaa Korazin, Betsayɩda la Kapɛrnawom. A ra maana yel-soalem sẽn sek rabeem tẽn-kãens pʋgẽ. A Zeezi yeelame tɩ yẽ sã n da maanẽ yel-soalem kãens Fenisi ne Tɩɩr la Sɩdõ, beenẽ nebã ra na n sak n teka yam. Kapɛrnawom n yaa zĩig ning a sẽn zĩnd n yɩɩdã. La baa beenẽ, neb wʋsg pa sak a koɛɛgã ye. Rẽ n so t’a gom Kapɛrnawom yelle, n yeel woto: “Bʋʋdã daare, Sodom sɩbgrã toolem ka na n ta foom ye.”—Matye 11:24.

Rẽ poore, a Zeezi pẽga a Ba wã, a sẽn maan tɩ ‘yam-dãmbã la yẽesem-dãmbã’ pa mi sɩdã sẽn be a Gomdã pʋgẽ wã, n yaool n vẽeneg rẽ sik-m-mens rãmbã sẽn wõnd kom-bõonegã. (Matye 11:25) A Zeezi yeta sik-m-mens rãmbã woto: “Bɩ y wa mam nengẽ yãmb-dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo. Rɩk-y mam yubl-balgr n pidi, la y sak mam zãmsgã. Bala mam yaa nin-bʋgsgo, la m yaa sũ-mar soaba, la yãmb na paam vʋʋsgo. Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.”—Matye 11:28-30.

Wãn to la a Zeezi kõt ned vʋʋsgo? Tũudmã taoor-dãmb ra zɩlga nin-buiidã ne minundu, wala makre, no-bõonesã b sẽn da gãneg vʋʋsg daarã yĩngã. La a Zeezi yẽ zãmsgã ra sõngda nebã tɩ b bãng Wẽnnaam sõma, n paamd b mense. A leb n sõnga neb nins pãn-soaadbã sẽn namsdã, la neb nins sũy sẽn sãam wʋsg b yel-wẽnã yĩngã, tɩ b bãng b sẽn tõe n tũ sor ning n paam yolsgo. Sɩd me, a Zeezi vẽnega nebã tɩ b bãng b sẽn tõe n paam b yel-wẽnã sugr to-to, la b sẽn tõe n maaneg n paam Wẽnnaam zoodo.

Neb nins fãa sẽn na n sak a Zeezi yubl-balgrã sẽn yaa faoogã tõe n dɩka b mens n kõ Wẽnnaam sẽn yaa sugr soab la nimbãan-zoɛtã, la b tũ-a. Woto pa bũmb sẽn zɩlgd ned ye. Bala Wẽnnaam sẽn yaa d saasẽ Ba wã sẽn dat tɩ d maan bũmb ninsã pa yɩɩd d pãng ye.—1 Zã 5:3.