Yʋʋmd 30 wã a Zeezi sẽn kẽng Zeruzalɛm n tɩ maan Pakã, a maana yel-soalma. Kɩtame tɩ neb wʋsg tẽ-a. A Zeezi sẽn maan bũmb ninsã yɩɩ a Nikodɛm noogo. Yaa Fariizẽ, n leb n naag zʋɩf-rãmbã bʋ-kaoodb sull b sẽn boond tɩ Sãnedrẽ wã. A kẽnga a Zeezi nengẽ, n na n bãng n paase. La yɩɩ ne yʋngo. Tõe tɩ yaa a sẽn zoet b na n wa yã-a, t’a yʋʋrã sãam tũudmã taoor dãmb sʋkã.

A Nikodɛm yeela a Zeezi yaa: “Karen-saamba, tõnd miime tɩ yãmb yaa karen-saamb Wẽnnaam sẽn tʋme. Bala, ned ka tõe n maan bõn-bãn nins yãmb sẽn maandã, tɩ sã n ka Wẽnnaam n be ne-a ye.” La a Zeezi yeela a Nikodɛm tɩ ned sã n dat n kẽ Wẽnnaam Rĩungã pʋgẽ, yaa tɩlɛ t’a soab “lebg n dog yɛsa.”—Zã 3:2, 3.

La ned yɩta a wãn n leb n doge? A Nikodɛm soka a Zeezi yaa: “A tõe n leb n kẽe a ma pʋgẽ yɛs n dog sɩda?”—Zã 3:4.

Ayo. Pa woto la a Zeezi rat n yeel ye. A togsa a gomdã võore. A yeela a Nikodɛm yaa: “Mam yeta foom sɩd-sɩd tɩ ned sã n ka rog ne koom la ne Sɩɩg-sõngo, a ka tõe n kẽ Wẽnnaam soolmẽ wã ye.” (Zã 3:5) A Zeezi sẽn paam koom lisgu, tɩ vʋʋsem sõngã me sig a zug wakat kãngã, a roga ne “koom la ne Sɩɩg-sõngo.” Sasa kãng me, Wẽnnaam koɛɛg yii saasẽ n yeele: “Ada yaa mam Bi-ribl-nongr sẽn ta mam yam zãnga.” (Matye 3:16, 17) Wẽnnaam sẽn yeel woto wã, wilgdame t’a Zeezi lebga yẽ biiga, la t’a na n wa paam n zĩnda a Rĩungã pʋgẽ saasẽ. Yʋʋmd 33 Pãntekotã sasa, Wẽnnaam vʋʋsem sõngã siga neb a taab sẽn da paam koom lisgu, tɩ bãmb me lebg Wẽnnaam kamba, tɩ d tõe n yeel tɩ b lebg n dogame.—Tʋʋmã 2:1-4.

Yaa toog ne a Nikodɛm t’a wʋm a Zeezi sẽn yeel bũmb ning Rĩungã wɛɛngẽ wã võore. Rẽ n kɩt t’a Zeezi togs-a bũmb a ye yẽ sẽn na n maane, a sẽn yaa Wẽnnaam Biigã yĩnga. A Zeezi yeel-a lame tɩ wala “a Moyiis sẽn zẽk zũud waafã” rasempʋɩɩgẽ wã, yaa tɩlɛ tɩ b “zẽk Ninsaal Bi-riblã” me, sẽn na yɩl tɩ ned ning fãa sẽn tẽed yẽ paam vɩɩm sẽn kõn sa.—Zã 3:14, 15.

Sɩd me, wakat n zĩnd tɩ wiis ra kɛɛd Israyɛll nebã, la a Moyiis maana zũud waafo, tɩ ned ning fãa sẽn dat n põs segd n nak n ges zũudã waafã. (Sõdbo 21:9) Woto me, ned ning fãa sẽn dat n wa paam a meng ne kũumã, n tõog n vɩɩm wakat sẽn kõn sa, a tog n wilgame t’a tẽeda Wẽnnaam Biigã. Sẽn na yɩl n wilg tɩ yaa nonglem yĩng la Wẽnnaam sẽn maan woto wã, a Zeezi yeela a Nikodɛm yaa: “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) A Zeezi sẽn sɩng a tʋʋmdã zemsa kiis a yoob masã, la a gom-kãensã wilgda vẽeneg tɩ yaa ne yẽ maasem la ninsaalbã na n paam fãagre.

A Zeezi yeela a Nikodɛm yaa: “Wẽnnaam ka tʋm b Bi-riblã dũniyã zug tɩ b kao ninsaalbã bʋʋd ye.” Woto rat n yeelame tɩ Wẽnnaam pa tʋm a Zeezi t’a wa ning nebã fãa taale, n wilg tɩ b segda ne sãoong ye. A mengã pʋd n yeelame t’a sẽn wa wã yaa sẽn na yɩl tɩ nebã “paam fãagr” yẽ maasem yĩnga.—Zã 3:17.

Rabeemã yĩnga, a Nikodɛm waa a Zeezi nengẽ ne yʋngo. Rẽnd a Zeezi sẽn baas a sõsgã to-to wã zemsame. A yeelame: “Bũmb ning sẽn wat ne bʋʋdã la a woto: vẽenem waa dũniyã zugu, la ninsaalbã nonga likã n yɩɩd vẽenemã, b tʋʋmã sẽn yaa wẽnsã yĩnga. Bala, ned ning fãa sẽn maand wẽng kisa vẽenem, n ka wat vẽenemẽ ye, t’a tʋʋm-wẽnsã na n wa puki. La ned ning sẽn maand sɩd wata vẽenemẽ, tɩ nebã tõe n bãng t’a tʋʋmã tʋmda Wẽnnaam sakr pʋgẽ.”—Zã 3:19-21.

A Nikodɛm sẽn yaa Fariizẽ la Israyɛll nebã karen-saambã bãnga a Zeezi sẽn segd n maan bũmb ning Wẽnnaam daabã pidsg yĩngã. Dẽnd bee ne yẽ masã t’a bʋgs rẽ fãa zugu.