A Zeezi sõsa ne a tʋm-tʋmdb a naasã Oliiv tɩɩs tãngã zug n sa. B ra sok-a lame n na n bãng bãnd ning sẽn na n wilg yẽ waoongã la dũniyã saab wakatã.

Nizã rasem 11 wã sɩd yɩɩ yaamse. A Zeezi togsa a tʋm-tʋmdbã gomde, la wõnda yaa b sẽn wa n lebd Betani n na n tɩ gãandã. A yeel-b lame: “Yãmb miime tɩ Pakã yaa ra-yɩta, la tɩ b na n yõka Ninsaal Bi-riblã n kɩs tɩ b ka ra-pɩk [“ra-luk,” MN] zugu.”—Matye 26:2.

Vẽkembeoogã yɩɩ arba. Wõnda a Zeezi kell n paa ne a tʋm-tʋmdbã. Talaatã, a ra zaba tũudmã taoor dãmb n puk b bãong nebã sʋka. B baood-a lame n na n kʋ. Rẽ n so t’a pa kẽng neb sʋk Nizã rasem 12 ye. Bala vẽkembeoogã wĩndgã lʋɩɩs poor sẽn yaa Nizã rasem 14, a na n maanã Pakã ne a tʋm-tʋmdbã. Dẽnd a ra pa rat tɩ bũmb tiis-a ye.

Maan-kʋʋdbã kãsem-dãmb ne tẽngã nin-kẽembã yaool n da magd n na n yõka a Zeezi tɩ Pakã pa ta ye. B tigma taab maan-kʋʋdb kãsem a Kayif zakẽ wã. Bõe yĩnga? Bala a Zeezi sẽn puk b bãongã yika b sũyã. Rẽ n so tɩ b tigim n na n yẽs ne taab n bao sɩlem n “yõk a Zeezi n kʋ.” B na n maana wãn n yõk-a? Na n yɩɩ wakat bʋgo? Bãmb mensã ra yetame yaa: “Ka tog n yɩ tigrã pʋgẽ, tɩ rãmbg ra wa n yik nebã sʋk ye.” (Matye 26:4, 5) B ra yɛɛsdame, bala neb wʋsg ra nonga a Zeezi.

Tũudmã taoor dãmb sẽn da ket n be yẽsg zugu, ned n wa n na n yãnd-ba. Ling-b lame, bala yaa a Zeezi mengã tʋm-tʋmd a Zʋdaas Iskaryo. Sʋɩtãanã kẽe-a lame t’a baood n na n zãmb a Zu-soabã. A soka tũudmã taoor dãmb yaa: “Yãmb na n kõo maam bõe tɩ m yõk a Zeezi n kõ-yã?” (Matye 26:15) B sũyã yɩɩ noogo, tɩ b “sar tɩ bãmb na n kõo a Zʋdaas ligdi.” (Luk 22:5) Wãn la b kõ-a? Yaa wanzuri ligd pis-tã. Pĩndã, b ra raada yamb woto. (Yikri 21:32) Woto wilgdame tɩ b kisa a Zeezi, la t’a ka yõod ye. Wakat kãng tɛka, a Zʋdaas sɩngame n baood “weer ning yẽnda sẽn na n yõk a Zeezi n kõ-ba, tɩ kʋʋngã ka bãng ye.”—Luk 22:6.

Nizã rasem 13 sɩnga arbã wĩndgã lʋɩɩs poore. Rasem a yoob la woto a Zeezi sẽn wat n gãe Betani, la yaa a yaoolem. Vẽkembeoogã, nebã na n segla Pakã. B na n baoo pe-bila, tɩ Nizã rasem 14 sã n ta bɩ b kʋ-a n sẽ mumdi. A Zeezi pa togs b sẽn na n zĩndẽ n dɩ, la ned ning sẽn na n seglã ye. Dẽnd a Zʋdaas ra pa tõe n tɩ togs maan-kʋʋdbã kãsem-dãmb ye.

Lamusã daare, a Zeezi tʋma a Pɩyɛɛr ne a Zã. Wõnda yaa midi wã poore. A yeel-b lame yaa: “Kẽng-y n tɩ segl-y Zʋɩf-rãmbã Pakã rɩɩb tõnd yĩng tɩ d rɩ-a.” B soka a Zeezi tɩ yɛɛnẽ la a rat tɩ b tɩ segl Pakã. A Zeezi leokame: “Ade, yãmb sã n kẽ tẽngã pʋgẽ, yãmb na n sega rao sẽn tʋk koom ne yʋʋre. Tũ-y-yã-a n kẽ yir ning a sẽn na n kẽ wã. Yeel-y yirã soab yaa: ‘Karen-saamb sokdame tɩ roog ning bãmb sẽn na n dɩ Pakã tigr ne b karen-biisã bee yɛ?’ La yẽnda na n wilga yãmb do-pʋg sẽn yaa yalenga, n be roog zugu, tɩ teedã fãa be be, yaa be la y na n segl Pakã.”—Luk 22:8-12.

Sãmbg kae tɩ yirã soab yaa a Zeezi karen-biiga. Tõeeme t’a ra zoe n miime t’a Zeezi na n wa rata yẽ roogã n maan Pakã. Tʋm-tʋmdb a yiibã sẽn ta Zeruzalɛmmã, b mikame tɩ bũmb fãa yaa wa a Zeezi sẽn togsã. Dẽnd bãmb n na n kʋ pe-bilã n maneg la b sẽ, la b ges tɩ bũmb fãa yɩ wa sẽn segdã, tɩ bãmb ne a Zeezi la tʋm-tʋmdb a taabã wa paam n maan Pakã kibsã. B fãa sẽn naag taab yaa neb 13.