A Zozɛf ne a Maari kell n paa Betlehɛm. B pa leb Nazarɛt ye. A Zeezi rog tɩ rasem a nii, b kẽes-a-la bãong wa Wẽnnaam sẽn da kõ Israyɛll nebã noor tɩ b maanã. (Maan-kʋʋre 12:2, 3) Yaa daar-n-kãng me la nebã ra minim n pʋt b kom-dibli wã yʋy. A Zozɛf ne a Maari pʋda b biigã yʋʋr t’a Zeezi, wa malɛk a Gabriyɛll sẽn da yeelã.

A Zeezi rog tɩ rasem 40, a roagdbã tall-a lame n kẽng wẽnd-doogẽ wã Zeruzalɛm sẽn pa zãr wʋsg ne Betlehɛmmã. Tõogã wilgame tɩ pag sã n dog bi-ribla, rasem 40 daare, a tog n kẽnga wẽnd-doogẽ wã n tɩ maan maoong a mengã yɩlgr yĩnga.—Maan-kʋʋre 12:4-7.

A Maari sɩd maana woto. A talla liuuli a yiib n tɩ maan maoongo. Rẽ sõngda tõnd tɩ d bãng t’a Zozɛf ne a Maari ra yaa naong rãmba. Tõogã ra yetame tɩ yaa pe-raoog sẽn yaa polle, n paas liuul la pagã tog n tall n wa maan maoongã. La b paasame tɩ pagã sã n pa tõe n paam pe-raoogo, a tõe n talla manwall a yiibu, bɩ wal a yiib n wa. Dẽnd a Maari sẽn kõ bũmb ningã wilgdame t’a yaa naong soaba.

A Zozɛf ne a Maari sẽn wa n be wẽnd-doogẽ wã, b sega nin-kẽem a ye yʋʋr sẽn boond t’a Sɩmyõ. A Zeova ra vẽneg n togsa a Sɩmyõ tɩ nand t’a maan kaalem, a na n yãa Kirisã bɩ Mesi wã, rat n yeel tɩ Wẽnnaam sẽn tʋm a soabã. Vʋʋsem sõngã kɩtame t’a wa wẽnd-doogẽ wã, n kell n yã a Zozɛf ne a Maari la b biigã. A reega biigã.

A Sɩmyõ zãa a Zeezi, n pʋʋs Wẽnnaam bark n yeel woto: “Zu-soaba! Moasã, yãmb basa y tʋmtʋmdã t’a loogd ne laafɩ. Wa yãmb sẽn dag n yeelã, mam nin yãnda fãagr ning yãmb sẽn kõ tõndã, fãagr y sẽn segl nebã fãa nifẽ wã. A yaa vẽenem sẽn vẽnegd bu-zẽmse, la a yaa Israyɛll sẽn yaa yãmb nebã ziiri.”—Luk 2:29-32.

A Zozɛf ne a Maari sẽn wʋm gom-kãensã, yɛɛs-b lame. A Sɩmyõ ning-b-la barka, la a yeel a Maari t’a biigã “waa Israyɛll neb wʋsg lʋɩɩse la b yikr yĩnga.” La a paasame t’a Maari na n paama sũ-sãang sẽn zabd wa sʋʋg sẽn kõs neda.—Luk 2:34.

Baraarã, ned a to me n zĩnd wẽnd-doogẽ wã. A yʋʋr la a Anne. Yaa no-rɛɛs-poak sẽn tar yʋʋm 84. A ra wata wẽnd-doogẽ wã wakat fãa. Yẽ me kolga a Zozɛf ne a Maari la b biigã, n sɩng Wẽnnaam bark pʋʋsgo, la a gomd a Zeezi yell ne neb nins fãa sẽn da be beenẽ wã.

Tags-y n ges-y a Zozɛf ne a Maari sũur sẽn yɩ noog to-to ne bũmb nins sẽn maan wẽnd-doogẽ wã! Vẽenega, bõn-kãensã fãa kɩtame tɩ b maneg n kɩs sɩd tɩ b biigã sɩd yaa biig ning Wẽnnaam sẽn da togs t’a watame wã.