A Zeova Kaset rãmbã sẽn tagsd bũmb ning karengã wɛɛngẽ wã tika Biiblã saglsã zugu. Karengã wɛɛngẽ, yaa d ned kam fãa n tikd a sũur-kasetã sẽn paam kiblg ne Biiblã maasmã, n bãng a sẽn na n tũ Biiblã sagls to-to wa d sẽn na n yã wã. a

•  Karengã tara yõod wʋsgo

•  D tall tagsg sẽn zems karengã wɛɛngẽ

•  Karen-bɛdã tõe n kɩtame tɩ ned tall minim-yood la koms a tẽebã

•  A Zeova Kaset rãmbã tigissã zĩisẽ, b welgda kambã toor n zãmsd-b bɩ?

 Karengã sõngda ned t’a paam ‘yam la a tagsd sõma.’ Rẽ yaaa zʋg-sõma Biiblã sẽn wilg tɩ tara yõod wʋsgo. (Yel-bũnã 2:10, 11; 3:21, 22) Sẽn paase, a Zeezi yeela a karen-biisã tɩ b zãms nebã tɩ b sak bũmb nins fãa a sẽn yeel-bã. (Matiye 28:19, 20) Rẽ n so tɩ d sagenda d tẽed-n-taasã tɩ b modg n wa tõe n karme, n gʋlse, la b tõe n sõsd sõma. b Sẽn paase, d sagend-b lame tɩ b bao n bãng bũmb kẽer tũudum a taabã la nebã minimdã wɛɛngẽ.—1 Korẽnt rãmbã 9:20-22; 1 Tɩmote 4:13.

 Goosneema-rãmbã me getame tɩ karengã tara yõod wʋsgo. Tẽns kẽer pʋsẽ, b yiisa noor n wilg tɩ yaa tɩlɛ tɩ kambã karem n tãag kolɛɛse. D tũuda no-kãens buudã, bala Biiblã yetame yaa: “Bɩ ned kam fãa sak nanambsã,” bɩ goosneema-rãmbã. (Rom dãmbã 13:1) Sẽn paase, d sagenda d kambã tɩ b karemd sõma, n maan b sẽn tõe tɛka, la b ra maand sẽn zems bal ye. c Bala Wẽnnaam Gomdã yetame yaa: “Yãmb sẽn maand bũmb ning fãa, bɩ y maan ne y sɩɩg fãa wa y sẽn maand a Zeova yĩnga, la pa ninsaalb yĩng ye.”—Kolos rãmbã 3:23.

 Karengã tõe n wa songame tɩ d tõogd n get d zagsã rãmb yelle. Biiblã yeelame tɩ “ned sã n pa ges a neb yelle, sẽn yɩɩd fãa, a meng zak rãmb yelle, a kɩɩsa tẽebã, la a yaa wẽng n yɩɩd ned sẽn pa tar tẽebo.” (1 Tɩmote 5:8) Karengã tõe n wa sõnga tõnd tɩ d ges d zakã rãmb yell wa Wẽnnaam sẽn datã. Sebr a yembr (The World Book Encyclopedia) yeelame tɩ “karengã sõngda nebã tɩ b tõogd n tʋmd sõma tẽngã nafr yĩnga, . . . tʋm-tʋmdb sẽn tʋmd tɩ arzɛk kẽedẽ.” Ned sẽn karem sõma n tar minim tõe n paama ligd nana-nana n ges a zakã neb yell sõma n yɩɩd ned sẽn pa tar minim la sẽn pa karme.—Yel-bũnã 22:29.

 Roagdbã sõngda b kambã me, b sã n wilgd-b bũmb toor-toor sẽn na n naf-b b bɩʋʋng zugẽ. Zĩ-kãng wɛɛngẽ, zãmsg ning kambã sẽn paamd lekollẽ wã tara yood wʋsgo. (2 Korẽnt rãmbã 12:14) D sagenda roagdbã tɩ b kẽes b kambã lekolle, baa b sẽn be tẽng ningã lekollã yaood sã n yaa wʋsgo, bɩ lekollã zãrame, pa rẽ bɩ kẽes biig lekoll sã n pa neb wʋsg minungu. d D leb n wilgda roagdbã b sẽn tõe n sõng b kambã to-to karengã wɛɛngẽ. e

 D vaeesdame n bãngd kareng buk ning sẽn yaa sõma. Biiblã yetame: “Ned sẽn pa tar minim tẽeda gomd buud fãa, la gũus-m-meng soab tagsda a sẽn na n maan bũmb ningã zug neere.” (Yel-bũnã 14:15) D maagda d yĩng n vaees n bãng kareng buk ning d sẽn dat n karem kolɛɛsã poorã, a ligdã, la a yõodã, tɩ wilgdẽ tɩ d tũuda sagl-kãngã. Wala makre, ned sã n yãk yam na n zãms nug-tʋʋmde, tõe n talla yõod wʋsgo, la pa rɩk zẽk wʋsg me ye.

 Bao n bãng Wẽnnaam tara yõod n yɩɩd lekollẽ wã karengã. Ned sã n zãmsd Biiblã, pa wa ned sẽn karemd lekollẽ ye. Tõe n sõng-a lame t’a bãng Wẽnnaam n wa paam vɩɩm sẽn kõn sa wã. (Zã 17:3) Sõngd-a lame me t’a bãng a yel-manesem sẽn segd n yɩ to-to, rat n yeel t’a bãngda “sẽn yaa tɩrg la sẽn zemse,” la a “bãng so-sõngã.” (Yel-bũnã 2:9) Tẽn-tʋmd a Poll sẽn paam zãmsg ningã tõe n dɩk n maka rũndã-rũndã inivɛrsite karengo. Baa ne rẽ, a yeelame tɩ yẽ ‘sẽn bãng a Zu-soab a Kirist Zeezi wã yõod n ka to.’ (Filip rãmbã 3:8; Tʋʋma 22:3) Rũndã-rũndã me, a Zeova Kaset rãmb wʋsg n karem n zãage, la baa ne rẽ b tẽedame tɩ b sẽn zãms Biiblã n bãng Wẽnnaam sõma wã yõod n yɩɩda. f

 Biiblã pʋgẽ, yel-bũnd a ye n yet yaa: “Gũus-m-meng soab yãta yell n solge.” (Yel-bũnã 22:3) A Zeova Kaset rãmbã tagsdame tɩ inivɛrsite-rãmb kẽer ne lekoll-dãmb nins pʋsẽ b sẽn karemd karem-bɛd sãnda pʋsẽ, yɛlã sẽn yaa to-to wã tõe n kɩtame tɩ ned tall minim-yoodo, la koms a tẽebo. Woto yĩnga, a Zeova Kaset rãmb wʋsg yãka yam tɩ bãmb mensã wall b kambã pa na n kẽ inivɛrsite bɩ lekoll kãens buudã ye. B miime tɩ zĩis a woto, bũmb kẽer la b wae n zãmsd nebã tɩ pa sɩd ye. Wala makre:

•   Tags-kɛgre: Yaa ligdã n wat ne sũ-noog la bãane

   Nebã wae n yetame tɩ yaa karen-bɛdã n tõe n sõng ned n yɩɩd t’a paam tʋʋm-sõngo. Woto kɩtame tɩ wʋsg sẽn kẽngd inivɛrsite-rãmbẽ wã yaa sẽn na yɩl n wa paam ligd wʋsgo. Neb kẽer tẽedame tɩ ligdã n wat ne su-noog la bãane. La Biiblã wilgdame tɩ tagsg a woto yaa faoore. (Koɛɛg soaba 5:10) Sẽn yɩɩd fãa, Biiblã meng yetame tɩ “ligdã nonglem yaa bõn-wẽns buud fãa yẽgre,” la tɩ wae n kɩtdame tɩ ned bas tẽebo. (1 Tɩmote 6:10) A Zeova Kaset rãmbã maooda b sẽn tõe tɛk sẽn na yɩl n da wa lʋɩ “arzɛkã pãng sẽn tõe n belg nedã” bẽdg pʋgẽ ye.—Matiye 13:22.

•   Tags-kɛgre: Karen-bɛdã kɩtdame tɩ ned paam ziir la naam

   Wala makre, a Nika Gilauri sẽn yɩ Zeorzi peremiye minisrã gʋlsame n wilg a tẽngã neb wʋsg tagsgo, n yeele: “Ned sã n dat n yɩ nin-tɩrg Zeorzi soolmẽ wã, yaa tɩlɛ t’a karem inivɛrsite n paam dipolom. . . . [Pĩndã,] bi-bɩɩg sã n pa paam dipolomme, a ninga a zakã rãmb yãnde.” g La Biiblã sagend-d lame tɩ d ra bao yʋʋr dũni-kãngã pʋgẽ ye. A Zeezi ra soka a wakatẽ tũudmã taoor-dãmb sẽn da baood ziirã yaa: “Yãmb na n yɩɩ wãn n tẽ, yãmb ned kam fãa sẽn baood ziir a to nengẽ” wã? (Zã 5:44) Yɛlã sẽn yaa to-to inivɛrsite-rãmbẽ wã tõe n kɩtame tɩ ned lebg wuk-m-meng soaba, tɩ Wẽnnaam yaool n kis wuk-m-menga.—Yel-bũnã 6:16, 17; 1 Pɩyɛɛr 5:5.

•   Tags-kɛgre: Yaa ned kam fãa n yãkd sẽn yaa sõma wall wẽng a toore

   A Zeova Kaset rãmbã tũuda Wẽnnaam sẽn gãneg noy nins sõma la wẽngã wɛɛngẽ wã. (Ezayi 5:20) La sõsg b sẽn yiis zʋrnall a ye (Journal of Alcohol and Drug Education) pʋgẽ b yeelame tɩ inivɛrsite-rãmbã pʋsẽ, kom-bɩɩsã sẽn pẽdgd b taabã kɩtame tɩ b wʋsg “yãkd yam n maand bũmb sẽn pa sõma, baa ne b sẽn kɩs sɩd tɩ rẽ yaa wẽngã.” h Gom-kãensã zemsa ne Biiblã sẽn yeel tɩ “tũud-n-ta-wẽns sãamda minim-sõamyã” wã. (1 Korẽnt rãmbã 15:33) Inivɛrsite-rãmbã pʋsẽ, tʋʋm-wẽns nins Wẽnnaam sẽn kisã n wae. Wala rã-tɩgrã, dorgã yũub la yoobã. B pʋd n pẽgda sẽn maand-b woto wã menga.—1 Korẽnt rãmbã 6:9, 10; 2 Korẽnt rãmbã 7:1.

•   Tags-kɛgre: Yaa karen-bɛdã n tõe n sõng tɩ b maneg dũniyã n tɩ yɩɩda

   D miime tɩ neb wʋsg sẽn karemd karen-bɛda, pa sẽn na yɩl n paam arzɛk la yʋʋre, pa rẽ bɩ b sẽn dat n tʋm tʋʋm-dẽgd n noog b yõor yĩng ye. Yaa sẽn na n bao bãngre, la b tõog n maneg dũniyã. Yam-yãkr a woto pa wẽng ye. La a Zeova Kaset rãmbã yaka yam sẽn yaa toore. D teega Wẽnnaam Rĩungã wa a Zeezi, n kɩs sɩd tɩ yaa Rĩungã bal n sɩd n tõe maneg dũniyã. (Matiye 6:9, 10) La d pa kalemd d nus n zĩ n gũudẽ tɩ Wẽnnaam Rĩungã wa welg dũniyã zu-loeesã ye. D maanda wa a Zeezi, n moond “Rĩungã koe-no-kãngã” dũniyã gill zugu, n sõngd neb tusa yʋʋmd fãa tɩ b toeemdẽ, tɩ b vɩɩmã lebgd sõma. i—Matiye 24:14.