Eżodu 17:1-16
17 U l-ġemgħa kollha taʼ wlied Israel telqet mix-xagħri tas-Sin,+ timxi u tieqaf, skond l-ordni taʼ Ġeħova,+ u kkampjat f’Refidim.+ Imma ma kienx hemm ilma għan-nies x’jixorbu.
2 U n-nies qabdu jitlewmu maʼ Mosè u jgħidulu:+ “Agħtina l-ilma x’nixorbu.” Imma Mosè qalilhom: “Għala qed titlewmu miegħi? Għala tibqgħu tgħaddu lil Ġeħova minn prova?”+
3 U n-nies qabadhom l-għatx hemmhekk, u n-nies komplew igergru kontra Mosè u jgħidu: “Għala tellajtna hawnhekk mill-Eġittu biex lilna u lil uliedna u lill-bhejjem tagħna toqtolna bl-għatx?”+
4 Fl-aħħar, Mosè għajjat lil Ġeħova, u qallu: “X’se nagħmel b’dawn in-nies? Ftit ieħor u jħaġġruni!”+
5 Imbagħad Ġeħova qal lil Mosè: “Għaddi quddiem in-nies+ u ħu miegħek lil xi wħud mix-xjuħ taʼ Israel u l-ħatar tiegħek li bih ilqatt ix-Xmara Nil.+ Ħudu f’idek u ibqaʼ miexi.
6 Ara! Jien wieqaf hemmhekk quddiemek fuq il-blata fil-Ħoreb.* U int trid tagħti daqqa fuq il-blata, u l-ilma joħroġ minnha, u n-nies jixorbu.”+ U Mosè hekk għamel taħt għajnejn ix-xjuħ taʼ Israel.
7 Għalhekk, il-post semmieh Massah*+ u Meriba,*+ minħabba t-tilwim taʼ wlied Israel u minħabba li għaddew lil Ġeħova minn prova,+ billi qalu: “Ġeħova qiegħed fostna jew le?”+
8 U l-Għamalekin+ ġew u ġġieldu kontra Israel f’Refidim.+
9 Minħabba f’hekk, Mosè qal lil Ġożwè:*+ “Agħżlilna rġiel u oħroġ+ iġġieled kontra l-Għamalekin. Għada jien se noqgħod fuq il-quċċata taʼ l-għolja, bil-ħatar taʼ l-Alla l-veru f’idi.”+
10 Imbagħad Ġożwè għamel bħalma kien qallu Mosè,+ sabiex jiġġieled kontra l-Għamalekin; u Mosè, Aron, u Ħur+ telgħu fuq il-quċċata taʼ l-għolja.
11 U ġara li, malli Mosè kien jgħolli idu, l-Israelin kienu jkunu minn fuq;+ imma malli kien iniżżel idu, l-Għamalekin kienu jkunu minn fuq.
12 Meta idejn Mosè tqalu, ħadu ġebla u poġġewha taħtu, u hu qagħad bil-qiegħda fuqha; u Aron u Ħur żammewlu idejh ’il fuq, wieħed din in-naħa u l-ieħor in-naħa l-oħra, u b’hekk idejh baqgħu sodi sakemm niżlet ix-xemx.
13 Għalhekk, Ġożwè għeleb għalkollox lil Għamalek u lill-poplu tiegħu b’xifer is-sejf.+
14 Ġeħova issa qal lil Mosè: “Ikteb dan bħala tifkira fil-ktieb+ u aqrah f’widnejn Ġożwè, ‘Se neqred għalkollox it-tifkira t’Għamalek minn taħt is-smewwiet.’”+
15 U Mosè bena artal u semmieh Ġeħova-nissi,*
16 għax qal: “Peress li hemm id kontra t-tron+ taʼ Jah,+ Ġeħova se jiggwerra kontra Għamalek minn ġenerazzjoni għal ġenerazzjoni.”+
Noti taʼ taħt
^ “Il-Ħoreb.” Hawnhekk m’huwiex il-muntanja li fuqha ngħataw l-Għaxar Kmandamenti, imma r-reġjun muntanjuż madwar il-Muntanja Sinaj, imsejjaħ ukoll ix-xagħri tas-Sinaj.
^ Ifisser “Tilwim; Ġlied; Tħaqqiq.”
^ Ifisser “Għadda minn Prova; Prova.”
^ Letteralment, “Ġeħosugħa,” li jfisser “Ġeħova Hu Salvazzjoni.”
^ X’aktarx ifisser “Ġeħova Hu s-Sinjal [l-Arblu] Tiegħi.”
