Eżodu 38:1-31
38 U għamel ukoll l-artal taʼ l-offerta tal-ħruq mill-injam taʼ l-akaċja. It-tul tiegħu kien ħames kubiti, u l-wisaʼ tiegħu ħames kubiti, għax kien kwadru, u l-għoli tiegħu kien tliet kubiti.+
2 Imbagħad għamel il-qrun tiegħu+ fuq l-erbaʼ kantunieri tiegħu. Il-qrun tiegħu kienu ħerġin minnu. Imbagħad ksieh bir-ram aħmar.+
3 Wara dan, għamel l-għodod kollha taʼ l-artal, ir-reċipjenti għall-irmied u l-pali u l-iskutelli, il-frieket u r-reċipjenti għall-ġamar. L-għodod kollha tiegħu għamilhom tar-ram aħmar.+
4 Għamel ukoll għall-artal gradilja, xibka tar-ram aħmar, taħt ix-xifer tiegħu, ’l isfel sa nofs l-għoli tiegħu.+
5 Imbagħad għamel erbaʼ ħolqiet fuq l-erbaʼ kantunieri ħdejn il-gradilja tar-ram aħmar, bħala appoġġ għal-lasti.
6 Wara dan, għamel il-lasti mill-injam taʼ l-akaċja u ksiehom bir-ram aħmar.+
7 Imbagħad għadda l-lasti minn ġol-ħoloq fuq il-ġnub taʼ l-artal biex iġorruh bihom.+ Għamlu forma taʼ kaxxa tat-twavel, vojt minn ġewwa.+
8 Imbagħad għamel il-vaska tar-ram aħmar+ u l-bażi tagħha tar-ram aħmar billi uża l-mirja* tal-qaddejja nisa li kienu organizzati għas-servizz fid-daħla tat-tinda tal-laqgħa.+
9 U għamel il-bitħa.+ Għan-naħa tan-Negeb, lejn in-nofsinhar, il-purtieri tal-bitħa kienu taʼ l-għażel fin mibrum, għal tul taʼ mitt kubitu.+
10 L-għoxrin pilastru tagħhom u l-għoxrin pedestall bl-ingast tagħhom kienu tar-ram aħmar. Il-kavilji tal-pilastri u l-irbit tagħhom kienu tal-fidda.+
11 Ukoll, għan-naħa tat-tramuntana kien hemm mitt kubitu. L-għoxrin pilastru tagħhom u l-għoxrin pedestall bl-ingast tagħhom kienu tar-ram aħmar. Il-kavilji tal-pilastri u l-irbit tagħhom kienu tal-fidda.+
12 Imma għan-naħa tal-punent il-purtieri kienu għal tul taʼ ħamsin kubitu. Il-pilastri tagħhom kienu għaxra u l-pedestalli bl-ingast tagħhom għaxra.+ Il-kavilji tal-pilastri u l-irbit tagħhom kienu tal-fidda.
13 U għan-naħa tal-lvant lejn tlugħ ix-xemx kien hemm ħamsin kubitu.+
14 Il-purtieri kienu għal tul taʼ ħmistax-il kubitu fuq ġenb wieħed. Il-pilastri tagħhom kienu tlieta u l-pedestalli bl-ingast tagħhom tlieta.+
15 U għall-ġenb l-ieħor, fuq din in-naħa kif ukoll fuq l-oħra, tal-bieb tal-bitħa, il-purtieri kienu għal tul taʼ ħmistax-il kubitu. Il-pilastri tagħhom kienu tlieta u l-pedestalli bl-ingast tagħhom tlieta.+
16 Il-purtieri kollha tal-bitħa dawramejt kienu taʼ l-għażel fin mibrum.
17 U l-pedestalli bl-ingast għall-pilastri kienu tar-ram aħmar. Il-kavilji tal-pilastri u l-irbit tagħhom kienu tal-fidda u l-parti taʼ fuq tagħhom kienet miksija bil-fidda, u kien hemm irbit tal-fidda għall-pilastri kollha tal-bitħa.+
18 U l-purtiera tad-daħla tal-bieb tal-bitħa kienet ix-xogħol taʼ nissieġ, tal-ħajt blu, suf miżbugħ vjola ħamrani, materjal lewn l-iskarlat,* u għażel fin mibrum,+ u t-tul kien għoxrin kubitu, u l-għoli minn tarf sa l-ieħor tagħha kien ħames kubiti daqs il-purtieri tal-bitħa.+
19 U l-erbaʼ pilastri tagħhom u l-erbaʼ pedestalli bl-ingast tagħhom kienu tar-ram aħmar. Il-kavilji tagħhom kienu tal-fidda u l-kisi tal-parti taʼ fuq tagħhom u l-irbit tagħhom kienu tal-fidda.
20 U l-imsiemer tat-tined kollha għat-tabernaklu u għall-bitħa dawramejt kienu tar-ram aħmar.+
21 Dawn li ġejjin huma l-affarijiet li hemm fl-inventarju tat-tabernaklu, it-tabernaklu tat-Testimonjanza,+ li sar inventarju tiegħu bl-ordni taʼ Mosè, bħala s-servizz tal-Leviti+ taħt il-gwida taʼ Itamar,+ bin Aron il-qassis.
22 U Besalel,+ bin Uri, bin Ħur, mit-tribù taʼ Ġuda, għamel kulma Ġeħova kien ikkmanda lil Mosè.
23 U miegħu kien hemm Oħolijab+ bin Aħisamak, mit-tribù taʼ Dan, bniedem tas-sengħa u wieħed li jirrakkma u jinseġ il-ħajt blu, is-suf miżbugħ vjola ħamrani, il-materjal lewn l-iskarlat, u l-għażel fin.
24 Id-deheb kollu li ntuża għax-xogħol li sar fix-xogħol kollu tal-post qaddis kien daqs id-deheb preżentat għall-offerta tat-tixjir,+ disgħa u għoxrin talent u sebaʼ mija u tletin xekel skond ix-xekel+ tal-post qaddis.+
25 U l-fidda taʼ dawk mill-ġemgħa li kienu reġistrati kienet mitt talent u elf, sebaʼ mija u ħamsa u sebgħin xekel skond ix-xekel tal-post qaddis.
26 In-nofs xekel għal kull individwu kien in-nofs xekel skond ix-xekel tal-post qaddis, għal kull raġel li kien qed jgħaddi għal maʼ dawk li kienu reġistrati, minn għoxrin sena ’l fuq,+ b’kollox sitt mija u tlett elef, ħames mija u ħamsin.+
27 U mitt talent fidda ġiet imdewba biex isiru l-pedestalli bl-ingast tal-post qaddis u l-pedestalli bl-ingast tal-purtiera. Mitt talent servew għal mitt pedestall bl-ingast, talent għal kull pedestall bl-ingast.+
28 U mill-elf, sebaʼ mija u ħamsa u sebgħin xekel għamel kavilji għall-pilastri u ksielhom il-parti taʼ fuq u għaqqadhom flimkien.
29 U r-ram aħmar taʼ l-offerta tat-tixjir kien sebgħin talent u elfejn u erbaʼ mitt xekel.
30 U b’dan għamel il-pedestalli bl-ingast għad-daħla tat-tinda tal-laqgħa u l-artal tar-ram aħmar u l-gradilja tiegħu tar-ram aħmar, u l-għodod kollha taʼ l-artal,
31 u l-pedestalli bl-ingast tal-bitħa dawramejt, u l-pedestalli bl-ingast tal-bieb tal-bitħa, u l-imsiemer tat-tined kollha tat-tabernaklu u l-imsiemer tat-tined kollha+ tal-bitħa dawramejt.
Noti taʼ taħt
^ Mirja magħmulin minn metall illostrat sew.
^ F’dan il-kapitlu “l-iskarlat” jirreferi għaż-żebgħa mill-insett tal-kukku.
