L-Ewwel Ktieb taʼ Samwel 18:1-30
18 Meta Ġonatan sema’ lil David ikellem lil Sawl, hu u David saru ħbieb kbar,* u beda jħobbu bħalu nnifsu.
2 Minn dakinhar, Sawl żamm lil David miegħu u ma ħalliehx imur lura lejn dar missieru.
3 U Ġonatan u David għamlu patt, għaliex kien iħobbu bħalu nnifsu.
4 Ġonatan neħħa l-libsa bla kmiem li kellu fuqu u taha lil David. Tah ukoll l-armatura, ix-xabla, il-qaws, u ċ-ċinturin tiegħu.
5 David beda joħroġ għall-gwerra u jkollu suċċess* kull fejn kien jibagħtu Sawl. B’hekk, Sawl qiegħdu fuq il-gwerriera, u dan għoġob lin-nies u l-qaddejja taʼ Sawl kollha.
6 Meta David u suldati oħrajn kienu jaslu lura wara li joqtlu lill-Filistin, in-nisa kienu joħorġu mill-bliet kollha t’Iżrael jiżfnu u jkantaw biex jiltaqgħu mar-Re Sawl. B’ferħ, huma kienu jdoqqu t-tanburlini u l-istrumenti taʼ tliet kordi,
7 jiċċelebraw, u jkantaw:
“Sawl qatel eluf,U David għaxriet t’eluf.”
8 Sawl beda jirrabja ħafna, u dak li qalu m’għoġbux, għax qal: “Lil David tawh il-krettu li qatel għaxriet t’eluf, imma lili eluf. Is-saltna biss jonqoshom jagħtuh!”
9 Minn dakinhar, Sawl baqaʼ jissuspetta f’David.
10 L-għada, Alla ppermetta li Sawl ikollu ħsibijiet koroh,* u għalhekk beda jaġixxi b’mod stramb* ġod-dar. David kien qed idoqq l-arpa bħas-soltu u Sawl kellu lanza f’idu.
11 Hu waddabha u qal bejnu u bejn ruħu: ‘Se nsammar lil David mal-ħajt!’ Imma David ħarab minnu darbtejn.
12 Imbagħad Sawl beżaʼ minn David għaliex Ġeħova kien miegħu, imma lilu kien telqu.
13 Għalhekk, Sawl ma ridux jibqaʼ iktar miegħu u għamlu kap t’elf, u David kien imexxi l-armata għall-battalja.*
14 David baqaʼ jkollu suċċess* f’kulma jagħmel, u Ġeħova kien miegħu.
15 U meta Sawl ra li qed ikollu ħafna suċċess, beda jibżaʼ minnu.
16 Imma Iżrael u Ġuda kollha kienu jħobbu lil David, għaliex hu kien imexxihom fil-battalji.
17 Iktar tard, Sawl qal lil David: “Se nagħtik lil binti l-kbira Merab biex tiżżewwiġha. Imma int trid tkompli taqdini b’kuraġġ u tiġġieled il-gwerer taʼ Ġeħova.” Għax Sawl qal bejnu u bejn ruħu: “Ħa joqtluh il-Filistin, ħalli ma jkollix għalfejn noqtlu jien.”
18 U David qal lil Sawl: “Jien min jien u min huma l-familja taʼ missieri f’Iżrael, sabiex niżżewweġ lil bintek?”
19 Għalkemm Sawl qal dan, hu kien diġà żewweġ lil bintu Merab lil Għadrijel il-Meħolati, qabel ma wasal iż-żmien biex iżewwiġha lil David.
20 Issa Mikal, bint Sawl, kienet tħobbu lil David, u meta lil Sawl marru jgħidulu b’dan, hu ħa gost.
21 Għalhekk Sawl qal: “Nagħtihielu biex tkun nassa għalih, sabiex il-Filistin joqtluh.” Imbagħad reġaʼ qal lil David: “Int se tiżżewweġ lil binti* llum.”
22 Iktar minn hekk, Sawl ikkmanda lill-qaddejja tiegħu: “Kellmu lil David bil-moħbi u għidulu, ‘Ir-re kuntent bik, u l-qaddejja kollha tiegħu jħobbuk. Mela żżewweġ lil bint ir-re.’”
23 Meta l-qaddejja taʼ Sawl qalu dan lil David, hu qal: “Jaqaw hi xi ħaġa żgħira għalikom li niżżewweġ lil bint ir-re, meta ma jien xejn u fqir?”
24 Imbagħad il-qaddejja taʼ Sawl qalulu x’qal David.
25 Għal dan Sawl qal: “Hekk għidulu lil David, ‘Ir-re ma jrid ebda prezz tal-għarusa ħlief li toqtol 100 Filisti u ġġib prova* taʼ dan, biex jivvendika ruħu mill-għedewwa tiegħu.’” Għax Sawl kien qed jippjana biex David jinqatel mill-Filistin.
26 Għalhekk, il-qaddejja tiegħu wasslu dan il-kliem lil David, u David kien grat li setaʼ jiżżewweġ lil bint ir-re. U qabel m’għadda ż-żmien biex jagħmel dan,
27 David u l-irġiel tiegħu marru u qatlu 200 Filisti, u David ħa l-prova* taʼ dan lir-re biex jiżżewweġ lil bintu. Għalhekk, Sawl żewwiġlu lil bintu Mikal.
28 Sawl irrealizza li Ġeħova kien maʼ David u li bintu Mikal kienet tħobbu.
29 B’hekk, Sawl beda jibżaʼ iktar minn David, u sar għadu tiegħu għall-bqija taʼ ħajtu.
30 Kull darba li l-kapijiet tal-Filistin kienu joħorġu għall-gwerra, David kien ikollu iktar suċċess* mill-qaddejja kollha taʼ Sawl u sar stmat ħafna.
Noti taʼ taħt
^ Jew “ruħ Ġonatan intrabtet maʼ ruħ David.”
^ Jew “aġixxa b’għaqal.”
^ Letteralment “spirtu ħażin.”
^ Jew “aġixxa bħal profeta.” Din l-espressjoni tistaʼ tirreferi għall-mod stramb kif il-profeti kultant kienu jesprimu ruħhom jew jaġixxu.
^ Letteralment “u hu ħareġ u daħal quddiem il-poplu.”
^ Jew “jaġixxi b’għaqal.”
^ Jew “titħallat b’rabta taż-żwieġ miegħi.”
^ Letteralment “il-ġilda tal-organu sesswali tal-Filistin.”
^ Letteralment “il-ġilda tal-organu sesswali tal-Filistin.”
^ Jew “aġixxa b’iktar għaqal.”
