It-Tieni Ktieb taʼ Samwel 10:1-19
-
Ir-rebħiet fuq Għammon u s-Sirja (1-19)
10 Iktar tard, ir-re tal-Għammonin miet, u ibnu Ħanun sar re minfloku.
2 U David qal: “Jien se nuri mħabba u lealtà* maʼ Ħanun bin Naħas, bħalma wera missieru miegħi.” Għalhekk, David bagħat il-qaddejja tiegħu fl-art tal-Għammonin biex ifarrġuh minħabba li miet missieru. Imma meta l-qaddejja taʼ David daħlu fl-art,
3 il-kapijiet tal-Għammonin qalu lil sidhom Ħanun: “Taħseb li David bagħathom biex jonora lil missierek? Hu bagħathom biex jara x’fiha l-belt u jitkixxef dwarha ħalli jirbaħha.”
4 Għalhekk, Ħanun qabad il-qaddejja taʼ David, qaxxrilhom nofs id-daqna, qattgħalhom ilbieshom minn qaddhom ’l isfel, u bagħathom.
5 Meta David semaʼ b’dan, minnufih bagħat xi rġiel biex jiltaqgħu magħhom, għaliex ġew umiljati ħafna. Ir-re qalilhom: “Oqogħdu f’Ġeriko sakemm tikbrilkom id-daqna, imbagħad erġgħu lura.”
6 Maż-żmien, l-Għammonin raw li David kien sar jobgħodhom, għalhekk krew 20,000 suldat Sirjan taʼ Bet-reħob u Soba, lir-re taʼ Magħka b’1,000 raġel miegħu, u lil 12,000 raġel minn Istob.*
7 Meta David semaʼ b’dan, bagħat lil Ġowab u l-armata kollha, inkluż l-aqwa gwerriera tiegħu.
8 U l-Għammonin ħarġu u tqassmu għall-battalja fid-daħla taʼ bieb il-belt, waqt li s-Sirjani taʼ Soba u taʼ Reħob, u Istob* u Magħka kienu għalihom waħedhom fil-kampanja.
9 Meta Ġowab ra li l-għedewwa kienu sejrin kontrih minn quddiem u minn wara, hu għażel xi wħud mill-aqwa suldati t’Iżrael u qassamhom għall-battalja biex jiltaqgħu mas-Sirjani.
10 Il-bqija tas-suldati ħalliehom f’idejn ħuh Abisaj, sabiex iqassamhom għall-battalja u jiltaqgħu mal-Għammonin.
11 Imbagħad qallu: “Jekk is-Sirjani jkunu b’saħħithom wisq għalija, int trid tiġi tgħinni; imma jekk l-Għammonin ikunu b’saħħithom wisq għalik, niġi jien ngħinek.
12 Ejja nkunu sodi u kuraġġużi għall-poplu tagħna u għall-bliet tal-Alla tagħna, imbagħad Ġeħova jagħmel dak li hu tajjeb f’għajnejh.”
13 Imbagħad Ġowab u l-irġiel tiegħu resqu lejn is-Sirjani għall-battalja, u dawn ħarbu minn quddiemhom.
14 Meta l-Għammonin raw li s-Sirjani kienu ħarbu, huma ħarbu minn Abisaj u daħlu fil-belt. Imbagħad Ġowab telaq minn ħdejn l-Għammonin u wasal Ġerusalemm.
15 Meta s-Sirjani raw li Iżrael kien rebħilhom, reġgħu nġabru flimkien.
16 Għalhekk, Ħadadgħeżer bagħat għas-Sirjani fir-reġjun tax-Xmara,* u mbagħad waslu Ħelam. Sobak il-kap tal-armata taʼ Ħadadgħeżer kien qed imexxihom.
17 Meta lil David waslitlu l-aħbar, hu minnufih ġabar lil Iżrael kollu, qasam il-Ġordan, u wasal Ħelam. Imbagħad is-Sirjani tqassmu għall-battalja biex jiltaqgħu maʼ David u ġġieldu kontrih.
18 Imma s-Sirjani ħarbu mill-Iżraelin. Mis-Sirjani, David qatel 700 sewwieq tal-karrijiet u 40,000 rikkieb taż-żwiemel, u qatel lil Sobak il-kap tal-armata tagħhom.
19 Meta r-rejiet kollha li kienu taħt it-tmexxija taʼ Ħadadgħeżer raw li Iżrael rebħilhom, huma mill-ewwel għamlu paċi mal-Iżraelin u bdew jagħmlu dak li jgħidulhom. Is-Sirjani beżgħu jerġgħu jgħinu l-Għammonin.
Noti taʼ taħt
^ Jew “imħabba leali.” Ara Termini tal-Bibbja Spjegati.
^ Jew “raġel taʼ Tob.”
^ Jew “l-irġiel taʼ Tob.”
^ Jiġifieri l-Ewfrat.
