Isaija 41:1-29
41 “Agħtuni l-attenzjoni fis-skiet, intom il-gżejjer;+ u ħalli l-popli+ jerġgħu jsibu l-qawwa. Ħa jersqu+ u mbagħad jitkellmu. Ħa nersqu qrib xulxin għall-ġudizzju.+
2 “Min qajjem lil xi ħadd minn tlugħ ix-xemx?+ Min sejjaħlu bis-sewwa biex jersaq Lejh,* biex jagħtih quddiemu l-ġnus, biex imur irażżan saħansitra lis-slaten?+ Min tahomlu bħala trab għal sejfu, sabiex jixterdu bħat-tiben* bil-qaws tiegħu?+
3 Min baqaʼ jiġri warajhom, baqaʼ għaddej fil-paċi bil-mixi mill-mogħdija li ma ġiex minnha?
4 Min ħa azzjoni+ u għamel dan, u sejjaħ lill-ġenerazzjonijiet waħda wara l-oħra sa mill-bidu taż-żminijiet?+
“Jien, Ġeħova, l-Ewwel Wieħed;+ u nibqaʼ l-istess anki meta jiġu dawk taʼ l-aħħar.”+
5 Il-gżejjer+ raw u bdew jibżgħu. It-truf taʼ l-art bdew jitriegħdu.+ Resqu u baqgħu ġejjin.
6 Kull wieħed mar jgħin lil sieħbu, u wieħed qal lil ħuh: “Agħmel il-ħila.”+
7 Għalhekk, il-bniedem tas-sengħa saħħaħ lill-ħaddiem fil-metall;+ dak li jillixxa bil-martell tal-forġa saħħaħ lil dak li qed jagħti bil-mazza fuq l-inkwina, u jgħidlu: “Tajba s-saldatura.” Fl-aħħar, wieħed rabtu bl-imsiemer sabiex ma jaqax.+
8 “Imma int, O Israel, int il-qaddej tiegħi,+ u int, O Ġakobb, il-wieħed li għażilt,+ in-nisel t’Abraham+ il-ħabib tiegħi;+
9 int, li qbadtek minn truf l-art,+ u int, li sejjaħtlek mill-partijiet imbegħdin tagħha.+ U għalhekk għedtlek, ‘Int il-qaddej tiegħi;+ jien għażiltek,+ u ma ċħadtekx.+
10 Tibżax, għax jien miegħek.+ Tiċċassax ’l hemm u ’l hawn, għax jien Alla tiegħek.+ Jien inqawwik.+ Jien ngħinek verament.+ Jien inżommok sod tassew b’idi l-leminija+ tas-sewwa.’+
11 “Ara! Kulmin qed jitbaqbaq għalik se jistħi u jkun umiljat.+ L-irġiel li qed jitlewmu miegħek se jisfaw fix-xejn u jgħibu.+
12 Lil dawk l-irġiel li qed jiġġildulek int għad tfittixhom, imma ma ssibhomx.+ Dawk l-irġiel li huma fi gwerra miegħek se jsiru bħal xi ħaġa li ma teżistix u li m’hi xejn.+
13 Għax jien, Ġeħova Alla tiegħek, qed naqbdek minn idek il-leminija+ u ngħidlek, ‘Tibżax.+ Jien stess ngħinek.’+
14 “Tibżax Ġakobb, daqsxejn taʼ dudu,+ intom nies taʼ Israel.+ Jien stess ngħinek,” hija l-kelma taʼ Ġeħova, iva, Dak li jixtrik lura,*+ il-Qaddis taʼ Israel.
15 “Ara! Għamiltek slitta tad-dris,+ għodda tad-dris ġdida bi snien taʼ żewġt ixfar. Int tisħaq il-muntanji u tfarrakhom; u l-għoljiet iġġibhom bħall-karfa.+
16 Int idderrihom,+ u riħ iġorrhom miegħu,+ u riefnu jxerridhom f’postijiet differenti.+ U int tifraħ b’Ġeħova.+ Se tiftaħar bik innifsek minħabba l-Qaddis taʼ Israel.”+
17 “Il-magħkusin u l-foqra qed ifittxu l-ilma,+ imma m’hemmx. Bl-għatx li għandhom,+ ilsienhom nixef.+ Jien, Ġeħova, se nwiġibhom.+ Jien, l-Alla taʼ Israel, mhux se nitlaqhom.+
18 Fuq l-għoljiet għerjin se niftaħ ix-xmajjar, u n-nixxigħat f’nofs il-pjanuri fil-widien.+ Ix-xagħri nagħmlu għadira bl-ilma mimlija qasab, u l-art bla ilma nagħmilha għejun taʼ l-ilma.+
19 Fix-xagħri se nqiegħed iċ-ċedru, is-siġra taʼ l-akaċja u tar-riħan u taż-żejt.+ Fil-pjanura tad-deżert se nqiegħed is-siġra tal-ġnibru, u s-siġra tal-fraxxnu u taċ-ċipress flimkien;+
20 sabiex in-nies kollha f’daqqa jaraw u jkunu jafu u jagħtu kas u jkollhom id-dehen, li id Ġeħova għamlet dan, u l-Qaddis taʼ Israel ħalaq dan.”+
21 “Ressqu l-kawża kontroversjali tagħkom,”+ jgħid Ġeħova. “Ġibu l-argumenti tagħkom,”+ jgħid is-Sultan taʼ Ġakobb.+
22 “Ersqu u għidulna l-affarijiet li se jiġru. L-ewwel affarijiet—għidulna x’kienu, sabiex niħduhom bis-serjetà u nkunu nafu l-futur tagħhom. Jew semmgħulna l-affarijiet li ġejjin.+
23 Għidu l-affarijiet li ġejjin wara, sabiex inkunu nafu li intom allat.+ Iva, imisskom tagħmlu l-ġid jew id-deni, sabiex nistagħġbu u naraw dan flimkien.+
24 Ara! Intom xi ħaġa li ma teżistix, u ma wettaqtu xejn.+ Kulmin jagħżel lilkom hu ħaġa mistkerrha.+
25 “Qajjimt lil xi ħadd mit-tramuntana u dan ġej.+ Minn tlugħ ix-xemx+ se jsejjaħ ismi. U ġej fuq il-ħakkiema deputati bħallikieku kienu tafal+ u bħalma fuħħari jgħaffeġ il-materjal imxarrab.
26 “Min qal xi ħaġa mill-bidu, sabiex inkunu nafu, jew mill-passat, sabiex ngħidu, ‘Għandu raġun’?+ Fil-fatt m’hemm ħadd li qed jitkellem. Fil-fatt m’hemm ħadd li qed isemmaʼ leħnu. Fil-fatt m’hemm ħadd li qed jismagħkom tgħidu xi kelma.”+
27 Jien l-ewwel wieħed; jien qed ngħid lil Sijon: “Ara! Hawn huma!”+ U lil Ġerusalemm se nagħtiha wieħed li jġib aħbar tajba.+
28 U bqajt nara, u ma kien hemm ħadd; u ma kien hemm ħadd minnhom li jagħti parir.+ U komplejt nistaqsihom, sabiex iwiġbuni.
29 Ara! Ilkoll huma xi ħaġa li ma teżistix. Xogħol idejhom m’hu xejn. Ix-xbihat tagħhom magħmulin minn metall imdewweb huma riħ u m’humiex reali.+
