KAPITLU 17

Għala Nibżaʼ Nitkellem Dwar ir-Reliġjon fl-Iskola?

“Kelli diversi opportunitajiet tajbin biex nitkellem dwar it-​twemmin reliġjuż tiegħi fl-​iskola, iżda ma ħtafthomx.”—Kaleb.

“L-​għalliema staqsietna bħala klassi x’naħsbu dwar l-​evoluzzjoni. Kont naf li din kienet opportunità tad-​deheb biex nitkellem dwar ir-​reliġjon tiegħi. Iżda f’daqqa waħda tant bżajt li mmutajt. Wara ħassejtni veru ħażin.”—Jasmine.

 JEKK int żagħżugħ jew żagħżugħa Kristjana, forsi tħossok bħal Kaleb u Jasmine. Bħalhom, int għandek mnejn tħobb il-​veritajiet li tgħallimt mill-​Bibbja. Għandek mnejn ukoll tkun trid taqsamhom m’oħrajn. Madankollu, il-​ħsieb li titkellem dwar ir-​reliġjon tiegħek forsi jkexkxek. Iżda int tistaʼ trabbi iktar kuraġġ. Kif? Ħu dawn il-​passi li ġejjin:

1. Agħraf x’inhuma l-​beżgħat tiegħek. Meta taħseb dwar li titkellem fuq ir-​reliġjon tiegħek m’oħrajn, huwa faċli timmaġina l-​agħar ħaġa li tistaʼ tiġri! Iżda, kultant għandek mnejn ittaffi l-​beżgħat tiegħek jekk tipprova titkellem jew tikteb dwarhom.

Kompli din is-​sentenza:

● Jekk nitkellem dwar it-​twemmin reliġjuż tiegħi fl-​iskola nibżaʼ li jistaʼ jiġri dan: ․․․․․

Jistaʼ jkun taʼ faraġ li tkun taf li l-​beżgħat tiegħek għandhom mnejn ikunu simili ħafna għal dawk taʼ żgħażagħ Kristjani oħrajn. Pereżempju, Christopher, li għandu 14-​il sena, jammetti u jgħid: “Nibżaʼ li sħabi tal-​iskola jidħqu bija u jgħidu lil kulħadd li jien stramb.” U Kaleb, li ġie kwotat fil-​bidu, jgħid: “Kont nibżaʼ li xi ħadd jagħmilli xi mistoqsija li ma nkunx naf inwiġibha.”

2. Aċċetta l-​isfida. Huma l-​beżgħat tiegħek kompletament bla bażi? Mhux bilfors. Ashley, li għandha 20 sena, tiftakar u tgħid: “Xi tfal kienu jagħmlu tabirruħhom li huma interessati fit-​twemmin reliġjuż tiegħi. Iżda mbagħad kienu jdawru l-​kliem kontrija u jgħajruni quddiem l-​oħrajn.” Nicole, li għandha 17-​il sena, għaddiet minn din l-​esperjenza: “Kien hemm tifel partikulari li beda jqabbel vers fil-​Bibbja tiegħu mal-​istess vers fil-​Bibbja tiegħi, u l-​kliem kien differenti. Hu qal li l-​Bibbja tiegħi  kienet ġiet mibdula. Ħassejt li ġabni dahri mal-​ħajt! Ħallieni bla kliem.” *

Sitwazzjonijiet bħal dawn jistgħu jidhru tassew tal-​biżaʼ! Iżda minflok ma taħrab minnhom, aċċetta dawn l-​isfidi bħala parti normali mill-​ħajja tiegħek bħala Kristjan. (2 Timotju 3:12) Matthew, li għandu 13-​il sena, jgħid: “Ġesù qal li s-​segwaċi tiegħu kellhom jiġu persegwitati. Mela ma nistgħux nistennew li nintgħoġbu minn kulħadd minħabba t-​twemmin tagħna.”—Ġwanni 15:20.

3. Aħseb dwar il-​benefiċċji. Tistaʼ toħroġ xi ħaġa taʼ ġid minn esperjenza li tkun tidher kerha? Amber, li għandha 21 sena, hekk taħseb. Hi tgħid: “Huwa diffiċli li tispjega t-​twemmin reliġjuż tiegħek lil nies li ma jirrispettawx il-​Bibbja. Iżda dan jgħinek tifhem it-​twemmin reliġjuż tiegħek stess aħjar.”—Rumani 12:2.

Erġaʼ agħti titwila lejn is-​sitwazzjoni li ddeskrivejt int fl-​1 Pass. Aħseb f’minn tal-​inqas żewġ affarijiet taʼ ġid li jistgħu joħorġu minn din is-​sitwazzjoni u iktibhom hawn taħt.

1 ․․․․․

2 ․․․․․

Ħjiel: Kif għandha mnejn tonqos il-​pressjoni li tiffaċċja minn dawk tamparek meta titkellem dwar ir-​reliġjon tiegħek? Kif tiġi effettwata l-​fiduċja fik innifsek meta titkellem dwar  ir-​reliġjon tiegħek? Kif jiġu effettwati s-​sentimenti tiegħek għal Alla Ġeħova u s-​sentimenti tiegħu għalik?—Proverbji 23:15.

4. Kun preparat. Proverbji 15:28 jgħid: “Qalb il-​ġust timmedita sabiex twieġeb.” Minbarra li timmedita fuq dak li se tgħid, ipprova antiċipa l-​mistoqsijiet li jistgħu jagħmlulek l-​oħrajn. Agħmel riċerka fuq dawn is-​suġġetti, u ppjana t-​tweġibiet li tħossok komdu tagħti.—Ara ċ-​ċart  “Ippjana X’Se Twieġeb,” f’paġna 127.

5. Ibda. Meta tħossok lest li titkellem dwar it-​twemmin reliġjuż tiegħek, kif għandek tibda? Għandek żewġ għażliet. F’ċertu sens, li titkellem dwar it-​twemmin reliġjuż tiegħek hu bħall-​għawm: Xi nies jinżlu fl-​ilma bil-​mod il-​mod; oħrajn jaqbdu u jaqbżu. Bl-​istess mod, tistaʼ tibda l-​konversazzjoni fuq suġġett li ma jkunx reliġjuż u bil-​mod il-​mod tara kif jirreaġixxi l-​individwu. B’hekk tkun bħallikieku qed tiċċekkja l-​ilma. Iżda jekk issib li qed tinkwieta żżejjed dwar x’jistaʼ jmur ħażin, l-​aħjar għażla li jkollok tistaʼ tkun li ‘taqbad u taqbeż.’ (Luqa 12:11, 12)  “Il-​ħsieb li nitkellem dwar it-​twemmin reliġjuż tiegħi m’oħrajn kien dejjem iktar diffiċli milli proprju nitkellem,” jgħid Andrew, li għandu 17-​il sena. “Ladarba kienet tinbeda konversazzjoni, kien ikun ħafna iktar faċli milli ħsibt!” *

6. Kun prudenti. Salamun kiteb: “In-​nies prudenti dejjem jaħsbu qabel ma jaġixxu.” (Proverbji 13:16, Today’s English Version) Sewwasew bħalma int ma taqbadx u togħdos f’ilma baxx, oqgħod attent li ma taqbadx argumenti bla siwi. Ftakar li hemm żmien li titkellem u żmien li toqgħod kwiet. (Ekkleżjasti 3:1, 7)  Kultant, anki Ġesù rrifjuta li jwieġeb ċerti mistoqsijiet.—Mattew 26:62, 63.

Jekk tiddeċiedi li twieġeb, forsi tistaʼ tagħti tweġiba fil-​qosor u b’mod għaqli. Pereżempju, jekk xi ħadd fil-​klassi tiegħek jipprova jgħaddik biż-​żmien billi jistaqsik, ‘Int għala ma tpejjipx?’ tistaʼ sempliċement tgħid, ‘Għax ma rridx inniġġes ġismi!’ Skont ir-​reazzjoni tal-​individwu, tistaʼ tiddeċiedi jekk tkomplix tispjega t-​twemmin reliġjuż tiegħek jew le.

Is-​sitt passi msemmijin f’dan il-​kapitlu jistgħu jgħinuk ‘tkun dejjem lest li tiddefendi’ r-​reliġjon tiegħek. (1 Pietru 3:15) M’għandniex xi ngħidu, li tkun lest ma jfissirx li qatt m’int se tħossok ansjuż. Iżda Alana, li għandha 18-​il sena, tgħid: “Meta tispjega t-​twemmin reliġjuż tiegħek, minkejja l-​biżaʼ li jkollok, tħossok bħallikieku wettaqt xi ħaġa kbira—kemm għax tkun għelibt il-​biżaʼ tiegħek u kemm għax tkun ħadt ir-​riskju li ma tirnexxix. U jekk tmur tajjeb se tħossok saħansitra aħjar! Se tħossok kuntent li kellek il-​kuraġġ titkellem.”

FIL-​KAPITLU LI JMISS

Qed tħossok stressat l-​iskola? Tgħallem kif tistaʼ tkampa.

[Noti ta’ taħt]

SKRITTURA PRINĊIPALI

“Kunu dejjem lesti li tiddefendu ruħkom quddiem kulmin ikun irid raġuni għat-​tama li għandkom, imma dan agħmluh bil-​ħlewwa u b’rispett profond.”​—1 Pietru 3:15.

SUĠĠERIMENT

Minflok ma tgħid lil sħabek tal-​klassi x’għandhom jew x’m’għandhomx jemmnu, b’wiċċek minn quddiem stqarr dak li temmen u għala tħoss li r-​raġunijiet għat-​twemmin tiegħek huma raġunevoli.

KONT TAF . . . ?

Xi wħud minn sħabek tal-​klassi għandhom mnejn jammirawk talli żżomm mal-​livelli morali tal-​Bibbja, imma forsi jistħu jistaqsuk dwar it-​twemmin reliġjuż tiegħek.

L-​AZZJONI LI SE NIEĦU

Fost sħabi tal-​klassi, nistaʼ nitkellem dwar it-​twemmin reliġjuż tiegħi maʼ [ikteb l-​isem taʼ minn tal-​inqas persuna waħda] ․․․․․

Is-​suġġett li naħseb li jinteressa l-​iktar lil din il-​persuna hu ․․․․․

Dak li nixtieq nistaqsi lill-​ġenitur(i) tiegħi dwar dan is-​suġġett hu ․․․․․

INT X’TAĦSEB?

● X’tistaʼ tkun raġuni waħda għala sħabek tal-​iskola jwaqqgħu għaċ-​ċajt it-​twemmin reliġjuż tiegħek?

● Jekk tiddeċiedi li titkellem dwar it-​twemmin reliġjuż tiegħek, għala hu importanti li titkellem b’wiċċek minn quddiem?

[Kumment f’paġna 126]

“Meta kont iżgħar, ma ridtx inkun differenti minn tfal oħrajn. Iżda mbagħad bdejt nifhem kif ir-​reliġjon tiegħi tgħinni biex ikolli kwalità taʼ ħajja aħjar. Dan saħħaħli l-​fiduċja tiegħi fija nnifsi u ġegħelni nħossni kburi b’dak li kont nemmen.”​—Jason

[Kaxxa f’paġna 124]

 Kif Tibda Konversazzjoni

● “X’għandek ippjanat għas-​sajf?” [Agħti ċans għal tweġiba u semmi x’inhuma l-​pjanijiet spiritwali tiegħek bħal, pereżempju, li tattendi xi konvenzjoni jew li żżid fil-​ministeru.]

● Semmi xi ġrajja kurrenti, u mbagħad staqsi: “Smajtha din? Int x’taħseb dwarha?”

● “Taħseb li hemm ċans li l-​qagħda finanzjarja tad-​dinja [jew xi problema oħra] titjieb? [Agħti ċans għal tweġiba.] Għala tħossok hekk?”

● “Taħseb li r-​reliġjonijiet kollha huma tajbin?”

● “Fejn tara lilek innifsek minn hawn u ħames snin oħra?” [Agħti ċans għal tweġiba u mbagħad għid x’inhuma l-​miri spiritwali tiegħek.]

 [Tabella f’paġna 127]

(Għall-​formazzjoni sħiħa tat-​test, ara pubblikazzjoni)

 Eżerċizzju

Ippjana X’Se Twieġeb

Ikkopja din!

Suġġeriment: Iddiskuti din iċ-​ċart mal-​ġenituri tiegħek u maʼ xi żgħażagħ Kristjani sħabek. Imla ċ-​ċart. Imbagħad ara jekk tistax taħseb f’xi mistoqsijiet oħrajn li għandhom mnejn jistaqsuk sħabek tal-​klassi, u ppjana tweġibiet li tħossok komdu tagħti.

Neutralità

Mistoqsija

Int għala ma ssellimx lill-​bandiera? Ma tħobbux

Tweġiba

Jien nirrispetta l-​pajjiż fejn ngħix, imma ma nqimux.

Mistoqsija li Jkun Imiss

Jiġifieri int ma tiġġilidx għal pajjiżek?

Tweġiba

Le, u lanqas miljuni taʼ Xhieda taʼ Ġeħova f’pajjiżi oħrajn ma jiġġieldu kontra dan il-​pajjiż.

Id-​Demm

Mistoqsija

Int għala ma taċċettax trasfuż-​jonijiet tad-​demm?

Tweġiba

Għalkemm ma naċċettax demm, naċċetta trasfuż-​jonijiet taʼ sustanzi mediċi alternattivi li ma jġorrux ir-​riskju tal-​AIDS jew tal-​epatite għax il-​Bibbja tgħidilna biex nitbiegħdu mid-​demm.

Mistoqsija li Jkun Imiss

Ejja ngħidu li tieħu d-​demm għax tkun se tmut. Allura Alla ma jaħfirlekx?

Tweġiba

․․․․․

L-​Għażliet

Mistoqsija

It-​tali hu membru tar-​reliġjon tiegħek, u hu għamel hekk u hekk. Int għala ma tistax tagħmel l-​istess?

Tweġiba

Aħna niġu mgħallmin x’jirrikjedi Alla, iżda ma jbellgħulniex ir-​ross bil-​labra! Ilkoll kemm aħna rridu nagħmlu l-​għażliet tagħna stess.

Mistoqsija li Jkun Imiss

Allura dan ifisser li jeżistu livelli differenti għal nies differenti fir-​reliġjon tiegħek?

Tweġiba

․․․․․

Il-​Ħolqien

Mistoqsija

Int għala ma temminx bl-​evoluzzjoni?

Tweġiba

Għala għandi nemmen bl-​evoluzzjoni? Ix-​xjenzati lanqas biss jaqblu bejniethom fuqha, u huma suppost l-​esperti!

Mistoqsija li Jkun Imiss

․․․․․

Tweġiba

․․․․․

[Stampa f’paġna 125]

Li titkellem dwar it-​twemmin reliġjuż tiegħek hu bħall-​għawm. Int tistaʼ tagħżel li tibda nieżel bil-​mod il-​mod —jew taqbad u taqbeż!