KAPITLU 30

Aħna Tassew Lesti għaż-Żwieġ?

Sibt il-​persuna li tixtieq tiżżewweġ, u ilek toħroġ magħha biżżejjed biex tkun taf li tħobbha. Iż-​żwieġ jinsab wara l-​bieb. Hekk kif tinsab lest biex tieħu waħda mill-​ikbar deċiżjonijiet taʼ ħajtek, tibda tgħid bejnek u bejn ruħek . . .

Aħna tassew lesti għaż-​ żwieġ?

HUWA normali li jkollok xi dubji dwar iż-​żwieġ—anki meta tkun tħobb lil xi ħadd. Minħabba li ż-​żwiġijiet imfarrkin qegħdin dejjem  jiżdiedu u r-​rati tad-​divorzju dejjem jogħlew, wieħed jifhem li trid toqgħod b’seba’ għajnejn meta tkun qed taħseb biex tieħu dan il-​pass li jbiddillek ħajtek mil-​lejl għan-​nhar. Kif tkun taf jekk intix lest għaż-​żwieġ? Issa, iktar minn qatt qabel, għandek bżonn tneħħi minn moħħok kwalunkwe tama mhix realistika li jistaʼ jkollok dwar iż-​żwieġ u, minflok, iddaħħal f’moħħok ir-​realtajiet. Pereżempju:

L-​1 TAMA MHIX REALISTIKA “Jekk ikollna l-​imħabba jkollna kollox.”

Ir-​realtà: Bla flus la tgħannaq u lanqas tbus. Jiġifieri bl-​imħabba la tistaʼ tħallas kontijiet u lanqas tkopri l-​ispejjeż finanzjarji. Fil-​fatt, xi riċerkaturi sabu li l-​flus huma l-​kaġun ewlieni tal-​ġlied fiż-​żwieġ li jistaʼ jwassal għad-​divorzju. Ħarsa mhix bilanċjata lejn il-​flus tistaʼ tikkaġunalek ħsara spiritwali u emozzjonali, u tistaʼ teqridlek ir-​relazzjoni mas-​sieħeb jew mas-​sieħba tiegħek fiż-​żwieġ. (1 Timotju 6:9, 10) X’inhi l-​lezzjoni? Toqgħodx tistenna sa wara ż-​żwieġ biex tiddiskuti kif se timmaniġġaw il-​flus!

Il-​Bibbja tgħid: “Min minnkom li jrid jibni torri ma joqgħodx l-​ewwel bil-​qiegħda u jikkalkula l-​ispejjeż?”—Luqa 14:28.

Suġġeriment: Tkellem issa, qabel ma tiżżewġu, dwar l-​arranġamenti finanzjarji tal-​futur mas-​sieħeb jew mas-​sieħba li se tiżżewweġ. (Proverbji 13:10) Ikkunsidra dawn il-​mistoqsijiet li ġejjin: Id-​dħul tagħna kif se jiġi mqassam? Se jkollna kont tal-​bank joint jew kontijiet tal-​bank individwali? Min minna huwa l-​iktar kapaċi jżomm rendikont finanzjarju u jara li qed jitħallsu l-​kontijiet? * Kemm flus jistaʼ kull wieħed minna jonfoq fuq xi ħaġa mingħajr ma jikkonsulta lill-​ieħor? Issa huwa ż-​żmien li tibdew taħdmu bħala tim!—Ekkleżjasti 4:9, 10.

IT-​2 TAMA MHIX REALISTIKA “Se nkunu koppja perfetta għax aħna tal-​istess fehma f’kollox—dejjem naqblu!”

 Ir-​realtà: Jekk qatt ma jkollkom xi tgħidu, x’aktarx huwa għaliex irnexxielkom tevitaw il-​kwistjonijiet li jistgħu jqajmu konflitt. Iżda meta tkun miżżewweġ se jkollok tiddiskutihom, trid u ma tridx. Il-​fatt hu li l-​ebda tnejn min-​nies imperfetti ma jaqblu perfettament, u għalhekk ma jistax jonqos li jkun hemm xi nuqqas taʼ qbil. (Rumani 3:23; Ġakbu 3:2) Jeħtieġ tikkunsidra mhux biss kemm taqblu iżda wkoll x’jiġri meta ma taqblux. Rabta soda hi magħmula minn tnejn min-​nies li jistgħu jagħrfu bl-​onestà d-​differenzi taʼ bejniethom u mbagħad jaħdmu fuqhom biex jirranġaw l-​affarijiet b’maturità u bil-​kelma t-​tajba.

Il-​Bibbja tgħid: “Tmorrux torqdu waqt li tkunu għadkom irrabjati.”—Efesin 4:26, Contemporary English Version.

Suġġeriment: Irrifletti bir-​reqqa dwar kif s’issa rreaġixxejt għal xi konflitt li kellek mal-​ġenituri tiegħek u maʼ ħutek. Agħmel ċart simili għal dik li tinsab f’paġna 93 taʼ dan il-​ktieb jew f’paġna 221 taʼ Volume 2. Innota l-​ġrajjiet speċifiċi li qanqlu nuqqas taʼ qbil, kif wiġibt, u liema tweġiba setgħet tkun aħjar. Pereżempju, jekk ir-​reazzjoni impulsiva tiegħek għal konflitt kienet li tlebbet tiġri lejn kamartek u b’rabja ssabbat il-​bieb, ikteb x’kienet tkun reazzjoni aħjar—waħda li se tgħinek issolvi l-​problema minflok ma tkompli tiggrava s-​sitwazzjoni. Jekk minn issa titgħallem tirreaġixxi aħjar għal xi konflitt, se tikseb abbiltà vitali għal żwieġ hieni.

IT-​3 TAMA MHIX REALISTIKA “Ladarba niżżewweġ, ix-​xewqat sesswali kollha tiegħi se jiġu sodisfati.”

 Ir-​realtà: Iż-​żwieġ mhuwiex xi garanzija li se tagħmel is-​sess kull meta tkun trid int. Ftakar li l-​parti l-​oħra fiż-​żwieġ hija persuna tad-​demm u l-​laħam li għandha sentimenti li jeħtieġ jiġu kunsidrati. Ngħiduha kif inhi, se jkun hemm drabi meta s-​sieħeb jew is-​sieħba tiegħek sempliċement ma jkollhiex aptit intimità. Iż-​żwieġ ma jagħtikx id-​dritt li tinsisti li jiġu sodisfati l-​bżonnijiet tiegħek. (1 Korintin 10:24) Il-​fatt hu li r-​rażan fuqek innifsek hu vitali fil-​ħajja tiegħek kemm bħala ġuvni jew xebba u kemm bħala persuna miżżewġa.—Galatin 5:22, 23.

Il-​Bibbja tgħid: “Kull wieħed minnkom ikun jaf kif jikkontrolla ġismu bil-​qdusija u bl-​unur, mhux b’aptit sesswali mimli xenqa.”—1 Tessalonikin 4:4, 5.

Suġġeriment: Irrivedi bir-​reqqa x-​xewqat u t-​tendenzi sesswali tiegħek u aħseb dwar kif dawn jistgħu jeffettwaw iż-​żwieġ tiegħek fil-​futur. Pereżempju, għandek int il-​vizzju egoistiku tal-​masturbazzjoni? Għandek int il-​vizzju tal-​pornografija? Tħares int b’xenqa lejn dawk tas-​sess oppost? Staqsi lilek innifsek: ‘Jekk insibha diffiċli nikkontrolla x-​xewqat sesswali tiegħi qabel iż-​żwieġ, kif se nkun nistaʼ nikkontrollahom wara?’ (Mattew 5:27, 28) Xi mistoqsijiet oħrajn jistgħu jkunu: Għandek int it-​tendenza li titkessaħ maʼ dawk tas-​sess oppost u li qatt ma tkun trid irbit? Ksibt int il-​fama taʼ playboy jew taʼ xi ħadd li jħobb jitkessaħ maʼ dawk tas-​sess oppost? Jekk iva, kif beħsiebek trażżan din it-​tendenza wara ż-​żwieġ, meta l-​affezzjonijiet tiegħek ikollhom bżonn jiġu diretti lejn persuna waħda—is-​sieħeb jew is-​sieħba tiegħek?—Proverbji 5:15-​17.

IR-​4 TAMA MHIX REALISTIKA “Iż-​żwieġ se jġibli l-​ferħ.”

Ir-​realtà: Persuna mhix miżżewġa li ma tkunx ferħana normalment issir persuna mhix ferħana anki fiż-​żwieġ. Għala? Għax il-​ferħ jiddependi iktar mill-​ħarsa  taʼ dak li jkun milli miċ-​ċirkustanzi tiegħu. (Proverbji 15:15) Dawk li għandhom it-​tendenza li jħarsu lejn ħajjithom b’mod negattiv normalment jiffokaw fuq dak li ma jkollhomx f’relazzjoni, u mhux fuq dak li jkollhom. Ikun ħafna aħjar li tikkultiva u tiżviluppa attitudni pożittiva waqt li tkun għadek ma żżewwiġtx. Imbagħad, meta tiżżewweġ se toħroġ l-​aħjar tiegħek fik u fis-​sieħeb jew fis-​sieħba tiegħek.

Il-​Bibbja tgħid: “Aħjar tkun sodisfatt b’dak li għandek milli dejjem tkun trid xi ħaġa oħra.”—Ekkleżjasti 6:9, Today’s English Version.

Suġġeriment: Xi kultant, attitudni negattiva tiġi meta jkollok stennijiet mhux realistiċi. Fuq biċċa karta, agħmel lista taʼ żewġ stennijiet jew tlieta li għandek miż-​żwieġ. Aqrahom, u mbagħad staqsi lilek innifsek: ‘Huma l-​istennijiet tiegħi bbażati iktar fuq il-​fantasija milli fuq ir-​realtà? Huma l-​istennijiet tiegħi  influwenzati minn films, serje tat-​televixin, jew kotba romantiċi? Huma l-​istennijiet tiegħi ffokati fuq dak li ż-​żwieġ se jagħmel għalija—forsi jtemm is-​solitudni tiegħi, jissodisfa x-​xewqa tiegħi għas-​sess, jew iġiegħel lil sħabi jkollhom iktar rispett lejja?’ Jekk iva, se jkollok bżonn tibda taħseb mhux dwarek innifsek biss, iżda dwar il-​persuna l-​oħra wkoll. Sabiex tiġi megħjun tagħmel dan, agħmel lista taʼ żewġ stennijiet jew tlieta li għandek miż-​żwieġ li jinvolvu kemm lilek u kemm lis-​sieħeb jew lis-​sieħba tiegħek tal-​futur.

Dawn it-​tamiet mhux realistiċi dwar iż-​żwieġ jistgħu jeffettwaw ħażin il-​ferħ tiegħek fiż-​żwieġ. Mela stinka biex telimina dawn il-​ħsibijiet u, minflok, adotta ħarsa realistika. Iċ-​ċart li tinsab f’paġni 216 u 217 tistaʼ tgħin lilek u lis-​sieħeb jew lis-​sieħba tiegħek tal-​futur hekk kif tħarsu ’l quddiem lejn dak li jistaʼ jkun wieħed mill-​akbar barkiet tal-​ħajja—żwieġ hieni!—Dewteronomju 24:5; Proverbji 5:18.

FIL-​KAPITLU LI JMISS

Firda f’relazzjoni romantika tistaʼ tinħass bħallikieku tmut parti minnek. Kif tistaʼ tkampa mal-​konsegwenzi?

[Nota ta’ taħt]

SKRITTURA PRINĊIPALI

“Raġel iħalli lil missieru u lil ommu u jrid jingħaqad maʼ martu u huma jsiru ġisem wieħed.”​—Ġenesi 2:24.

SUĠĠERIMENT

Tkellem maʼ koppja miżżewġa ikbar fl-​età, u staqsihom x’parir jagħtu lil raġel u mara miżżewġin friski dwar kif ikollhom żwieġ hieni.—Proverbji 27:17.

KONT TAF . . . ?

Fi żwieġ li jirnexxi, raġel u mara miżżewġin iqisu lil xulxin bħala ħbieb, jikkomunikaw tajjeb, ikunu jafu kif isolvu d-​differenzi taʼ bejniethom, u jqisu r-​relazzjoni tagħhom bħala rabta dejjiema.

L-​AZZJONI LI SE NIEĦU

Il-​kwalità li se nibda naħdem fuqha minn issa biex intejjeb ir-​relazzjoni li għandi mas-​sieħeb jew mas-​sieħba tiegħi tal-​futur hi ․․․․․

Dak li nixtieq nistaqsi lill-​ġenitur(i) tiegħi dwar dan is-​suġġett hu ․․․․․

INT X’TAĦSEB?

● F’xi pajjiżi, persentaġġ għoli taʼ żwiġijiet jispiċċaw f’divorzju. Għala taħseb li jiġri dan?

● Għala huwa taʼ periklu li tiżżewweġ sempliċement għax tħossok imdejjaq bis-​sitwazzjoni fid-​dar?

● Għala se jkun importanti li tgħix fi qbil maʼ prinċipji Bibliċi fiż-​żwieġ tiegħek fil-​futur?

[Kumment f’paġna 220]

“Iż-​żwieġ huwa pass serju ħafna. Huwa importanti li mhux biss tkun taf x’jinvolvi ż-​żwieġ imma wkoll li ssir taf sew lill-​persuna lil min se tiżżewweġ.”​—Audra

 [Kaxxa/​Stampa f’paġna 216, 217]

Eżerċizzju

Lest Int Biex Tiżżewweġ?

Ikkunsidra l-​mistoqsijiet fiż-​żewġ paġni li jmiss. Int tistaʼ saħansitra tuża dawn il-​paġni bħala bażi għal diskussjoni bejnek u bejn is-​sieħeb jew is-​sieħba fiż-​żwieġ tal-​futur. Kun ċert li taqra l-​iskritturi ċitati.

Il-​Finanzi

□ X’inhi l-​attitudni tiegħek lejn il-​flus?—Ebrej 13:5, 6.

□ B’liema modi qed turi li int diġà responsabbli finanzjarjament?—Mattew 6:19-​21.

□ Għandek xi dejn bħalissa? Jekk iva, liema passi qed tieħu biex tħallsu lura?—Proverbji 22:7.

□ Kemm se jiswa t-​tieġ tagħkom? Kemm dejn, jekk ikun hemm, tikkunsidra li hu raġunevoli?—Luqa 14:28.

□ Meta tkunu miżżewġin, it-​tnejn li intom se jkollkom bżonn toħorġu taħdmu? Jekk iva, kif se tkampaw mal-​iskedi differenti u mal-​bżonnijiet taʼ trasport?—Proverbji 15:22.

□ Fejn se tmorru tgħixu? Xi kemm se jkunu jiswew il-​kera, l-​ikel, l-​ilbies, u spejjeż oħrajn? U kif se tkopru dawn l-​ispejjeż?—Proverbji 24:27.

 Il-​Familja

□ Għandek relazzjoni tajba mal-​ġenituri tiegħek u maʼ ħutek?—Eżodu 20:12; Rumani 12:18.

□ Bħalissa kif issolvi nuqqas taʼ qbil fil-​familja? —Kolossin 3:13.

□ Jekk int mara żagħżugħa, b’liema modi turi li għandek “spirtu kwiet u ġwejjed”?—1 Pietru 3:4.

□ Qegħdin tippjanaw li jkollkom it-​tfal? (Salm 127:3) Jekk le, liema tip taʼ kontraċettivi se tużaw?

□ Jekk int raġel żagħżugħ, kif qed tippjana li tieħu t-​tmexxija f’li tipprovdi spiritwalment għall-​familja tiegħek?—Mattew 5:3.

Il-​Personalità

□ B’liema modi qed tagħti prova li int bieżel?—Proverbji 6:9-​11; 31:17, 19, 21, 22, 27.

□ Kif qed tagħti prova li għandek spirtu taʼ sagrifiċċju?—Filippin 2:4.

□ Jekk int raġel żagħżugħ, b’liema modi turi li int kapaċi tuża sew l-​awtorità li jistaʼ jkollok b’mod li timita lil Kristu?—Efesin 5:25, 28, 29.

□ Jekk int mara żagħżugħa, liema evidenza hemm li int kapaċi tissottometti ruħek għall-​awtorità?—Efesin 5:22-​24.

[Stampa f’paġna 219]

Taqbadx u tidħol għaż-​żwieġ bl-​amment, bħallikieku qed taqbeż fl-​ilma mingħajr ma taf tgħum