Mhux kulħadd jaħsibha l-​istess dwar l-​alkoħol. Hemm min kultant jieħu pjaċir jieħu drink mal-​ħbieb. Oħrajn jiddeċiedu li ma jixorbux u oħrajn tant jixorbu li jiskru. Il-​Bibbja x’tgħid dwar l-​alkoħol?

1. Ħażin li tixrob?

Il-​Bibbja ma tgħidx li ħażin li tixrob l-​alkoħol. Anzi, il-​Bibbja ssemmi ħafna affarijiet tajbin li tana Alla, wieħed minnhom hu “l-​inbid li jferraħ qalb il-​bniedem.” (Salm 104:​14, 15) Anki rġiel u nisa leali li jissemmew fil-​Bibbja xorbu l-​alkoħol.​—1 Timotju 5:​23.

2. Il-​Bibbja x’tgħid dwar min jixrob?

Ġeħova ma jiħux pjaċir meta nixorbu ħafna, anki jekk ma nidhrux fis-​sakra. (Galatin 5:​21) Il-​Bibbja tgħid: “Tkunx fost dawk li jixorbu ħafna nbid.” (Proverbji 23:20) Mela kemm jekk inkunu mal-​ħbieb jew waħedna, ma rridux nixorbu ħafna. Inkella jaf ma nibdewx naħsbu sew, ma nkunux nafu x’qed ngħidu u nagħmlu, u ma jkunx tajjeb għal saħħitna. Jekk ma nistgħux nikkontrollaw kemm nixorbu, ikun aħjar li ma nixorbu xejn.

3. Kif nistgħu nirrispettaw x’jagħmel ħaddieħor?

Kulħadd għandu jiddeċiedi għalih jekk iridx jixrob. M’għandniex niġġudikaw lil xi ħadd li jixrob l-​alkoħol b’mod bilanċjat. U lanqas m’għandna nisforzaw lil xi ħadd biex jixrob. (Rumani 14:10) Aħna ma nixorbux jekk xi ħadd li jkun magħna ma jħossux komdu. (Aqra Rumani 14:21.) Aħna ‘ma nibqgħux infittxu dak li jaqbel lilna, imma dak li jaqbel lil ħaddieħor.’​—Aqra l-​1 Korintin 10:​23, 24.

 TGĦALLEM IŻJED

4. Iddeċiedi jekk hux se tixrob

Ġesù x’kien jaħseb dwar li tixrob l-​alkoħol? Biex tkun taf, ara l-​ewwel miraklu li għamel. Aqra Ġwanni 2:​1-​11, u mbagħad iddiskuti:

• Minn dan il-​miraklu, Ġesù kif kien iħares lejn l-​alkoħol u min jixorbu?

• Ġesù ma qalx li ma nistgħux nixorbu alkoħol. Mela Kristjan kif għandu jħares lejn xi ħadd li jagħżel li jixrob?

Għalkemm Kristjan jistaʼ jixrob l-​alkoħol, ma jfissirx li dejjem se tkun l-​aħjar għażla. Aqra Proverbji 22:​3, u mbagħad iddiskuti jekk għandekx tixrob fis-​sitwazzjonijiet li ġejjin:

• Tkun se ssuq jew taħdem b’xi magni.

• Tkun tqila.

• Tabib issuġġerielek li ma tixrobx alkoħol.

• Issibha diffiċli biex tieqaf tixrob.

• Tkun kontra l-​liġi li tixrob.

• Tkun ma’ xi ħadd li jiddeċiedi li ma jixrobx għax kellu problema bix-​xorb.

Għandu jkollok alkoħol f’tiġijiet u affarijiet oħra? Ara l-​VIDJOW biex jgħinek tiddeċiedi.

Aqra Rumani 13:13 u l-​1 Korintin 10:​31, 32. Wara li taqra kull skrittura, iddiskuti:

• Kif tistaʼ tuża dan il-​prinċipju biex tieħu deċiżjoni li togħġob lil Ġeħova?

 5. Iddeċiedi kemm se tixrob

Jekk tagħżel li se tixrob, tinsiex: Ġeħova ma jgħidilniex li ma nistgħux nixorbu alkoħol, imma jgħidilna li hu ħażin li nixorbu żżejjed. Għala? Aqra Ħosea 4:​11, 18, u mbagħad iddiskuti:

• X’jistaʼ jiġri meta persuna tixrob iżżejjed?

X’se jgħinek ma tixrobx iżżejjed? Trid tkun modest, jiġifieri li tkun taf il-​limitu tiegħek. Aqra Proverbji 11:​2, u mbagħad iddiskuti:

• Għala tkun idea tajba li tiddeċiedi minn qabel meta se tieqaf tixrob?

6. X’jistaʼ jgħin lil xi ħadd jieqaf jixrob iżżejjed?

 XI DDISKUTEJNA?

Ġeħova tana l-​alkoħol biex nieħdu pjaċir, imma ma jridniex nixorbu żżejjed u niskru.

X’Tgħallimt

• Il-​Bibbja x’tgħid dwar l-​alkoħol?

• X’inhu l-​periklu li tixrob iżżejjed?

• Kif nistgħu nirrispettaw id-​deċiżjonijiet t’oħrajn dwar ix-​xorb?