1, 2. Għala taħseb li t-​talb hu għotja daqstant speċjali, u għala għandna bżonn inkunu nafu x’tgħid il-​Bibbja dwar it-​talb?

IMQABBLA mal-​univers, id-​dinja hi żgħira ħafna. Meta Ġeħova jħares lejn id-​dinja, in-​nies tal-​pajjiżi kollha jidhru qishom qatra waħda minn barmil ilma. (Salm 115:15; Isaija 40:15) Avolja aħna żgħar ħafna meta mqabblin mal-​univers, Salm 145:18, 19 jgħid: “Ġeħova hu qrib dawk kollha li jsejħulu, dawk kollha li jsejħulu bil-​verità. Hu se jwettaq ix-​xewqa taʼ dawk li jibżgħu minnu, u se jismaʼ l-​għajta tagħhom għall-​għajnuna u jsalvahom.” Xi privileġġ meraviljuż għandna! Ġeħova, il-​Ħallieq li jistaʼ kollox, irid ikun qrib tagħna, u jrid jagħti widen għat-​talb tagħna. Iva, it-​talb hu privileġġ, għotja speċjali li Ġeħova ta lil kull wieħed u waħda minna.

² Imma Ġeħova se jismagħna biss jekk inkellmuh bil-​mod kif irid hu. Kif nistgħu nagħmlu dan? Ejja naraw x’tgħid il-​Bibbja dwar it-​talb.

3. Għala għandek titlob lil Ġeħova?

³ Ġeħova jridek titlob lilu, jew titkellem miegħu. Kif nafu dan? Jekk jogħġbok aqra Filippin 4:6, 7. Aħseb ftit dwar din l-​istedina mill-​qalb. Il-​Mexxej tal-​univers hu interessat ferm fik u jridek tiftaħ qalbek miegħu u tgħidlu dwar il-​problemi tiegħek.

4. Talb regolari lil Ġeħova kif isaħħaħ il-​ħbiberija tiegħek miegħu?

 ⁴ It-​talb jgħinna biex ikollna ħbiberija mill-​qrib maʼ Ġeħova. Meta l-​ħbieb jitkellmu regolarment maʼ xulxin dwar xi jkun għaddej minn moħħhom, dwar x’qed jinkwetahom, u dwar kif ikunu qed iħossuhom, il-​ħbiberija tagħhom tissaħħaħ. L-​istess meta nitolbu lil Ġeħova. Permezz tal-​Bibbja, hu wriek x’jaħseb u xi jħoss, u jgħidlek x’se jagħmel fil-​futur. Int tistaʼ taqsam saħansitra l-​iktar sentimenti profondi tiegħek miegħu billi tkellmu regolarment. Hekk kif tagħmel hekk, il-​ħbiberija tiegħek maʼ Ġeħova se tissaħħaħ ħafna iktar.—Ġakbu 4:8.

5. Kif nafu li Ġeħova ma jismax it-​talb kollu?

⁵ Jismaʼ Ġeħova kull tip taʼ talb? Le. Fi żmien il-​profeta Isaija, Ġeħova qal lill-​Iżraelin: “Avolja tgħidu ħafna talb, m’iniex nismaʼ; idejkom imtlew bit-​tixrid taʼ demm.” (Isaija 1:15) Allura jekk ma noqogħdux attenti,  nistgħu nagħmlu xi ħaġa li tbegħedna minn Ġeħova, u b’hekk ma jagħtix kas it-​talb tagħna.

6. (a) Il-​fidi għala hi daqstant importanti? (b) Kif tistaʼ turi li għandek il-​fidi?

⁶ Jekk irridu li Ġeħova jismaʼ t-​talb tagħna jrid ikollna fidi fih. (Marku 11:24) L-​appostlu Pawlu jispjega: “Mingħajr fidi impossibbli li togħġbu sew, għax min jersaq lejn Alla jrid jemmen li hu jeżisti u li jippremja lil dawk li jfittxuh bil-​ħeġġa.” (Ebrej 11:6) Imma mhuwiex biżżejjed li sempliċement ngħidu li għandna l-​fidi. Irridu nagħtu prova ċara tal-​fidi tagħna billi nobdu lil Ġeħova kuljum.—Aqra Ġakbu 2:26.

7. (a) Għala għandna nkunu umli u nuru rispett meta nitolbu lil Ġeħova? (b) Kif nistgħu nuru li aħna sinċieri meta nitolbu?

⁷ Meta nitolbu lil Ġeħova għandna nkunu umli u nuru rispett. Għala? Kieku konna se nkellmu lil xi re jew president, dan konna nagħmluh bir-​rispett. Ġeħova hu Alla li Jistaʼ Kollox, allura m’għandniex aħna nuru saħansitra iktar rispett u umiltà meta nkellmuh? (Ġenesi 17:1; Salm 138:6) Għandna wkoll inkunu sinċieri u nitolbu lil Ġeħova minn qalbna, m’għandniex sempliċement nirripetu l-​istess kliem darba wara l-​oħra.—Mattew 6:7, 8.

8. Meta nitolbu dwar xi ħaġa, x’hemm bżonn li nagħmlu?

⁸ Fl-​aħħar, meta nitolbu dwar xi ħaġa, għandna nagħmlu kulma nistgħu biex naħdmu fi qbil mat-​talb tagħna. Pereżempju, jekk nitolbu lil Ġeħova għall-​bżonnijiet tagħna taʼ kuljum, mela ma nistgħux inkunu għażżenin u nistennew li Ġeħova jagħtina kollox avolja aħna kapaċi naħdmu. Għandna naħdmu iebes u naċċettaw kwalunkwe xogħol li nistgħu nagħmlu. (Mattew 6:11; 2 Tessalonikin 3:10) Jew jekk nitolbu  lil Ġeħova biex jgħinna ħalli ma nibqgħux nagħmlu xi ħaġa ħażina, hemm bżonn li nevitaw kull sitwazzjoni li tistaʼ tħajjarna naqgħu fid-​dnub. (Kolossin 3:5) Issa ejja neżaminaw xi mistoqsijiet komuni dwar it-​talb.

9. (a) Lil min għandna nitolbu? (b) Ġwanni 14:6 x’jgħallimna dwar it-​talb?

⁹ Lil min għandna nitolbu? Ġesù għallem lis-​segwaċi tiegħu biex jitolbu lil “Missierna fis-​smewwiet.” (Mattew 6:9) Qal ukoll: “Jien it-​triq, il-​verità, u l-​ħajja. Ħadd ma jiġi għand il-​Missier ħlief permezz tiegħi.” (Ġwanni 14:6) Allura għandna nitolbu biss lil Ġeħova permezz taʼ Ġesù. Xi jfisser li nitolbu permezz taʼ Ġesù? Biex Ġeħova jaċċetta t-​talb tagħna, hemm bżonn li nuru rispett għall-​inkarigu speċjali li Ġeħova ta lil Ġesù. Bħalma tgħallimna, Ġesù ġie fuq l-​art biex isalvana mid-​dnub u l-​mewt. (Ġwanni 3:16; Rumani 5:12) Barra minn hekk, Ġeħova ħatar lil Ġesù bħala Qassis il-​Kbir u Mħallef.—Ġwanni 5:22; Ebrej 6:20.

10. Għandna bżonn noqogħdu f’xi pożizzjoni speċjali meta nitolbu? Spjega.

¹⁰ Għandna bżonn noqogħdu f’xi pożizzjoni speċjali meta nitolbu? Le, Ġeħova ma jgħidilniex biex noqogħdu għarkopptejna, biex inpoġġu bilqiegħda, jew biex inqumu bilwieqfa meta nitolbu. Il-​Bibbja tgħallimna li nistgħu nitolbu lil Ġeħova fi kwalunkwe pożizzjoni dinjituża. (1 Kronaki 17:16; Neħemija 8:6; Danjel 6:10; Marku 11:25) L-​iktar ħaġa importanti għal Ġeħova mhijiex f’liema pożizzjoni noqogħdu meta nitolbuh, imma li nkellmuh bl-​attitudni t-​tajba. Nistgħu nitolbu b’leħen għoli jew f’qalbna nkunu fejn inkunu  u fi kwalunkwe ħin matul il-​ġurnata jew billejl. Meta nitolbu lil Ġeħova, aħna nistgħu nkunu ċerti li se jismagħna anki meta ħadd iktar ma jismagħna.—Neħemija 2:1-​6.

11. X’inhuma xi affarijiet li nistgħu nitkellmu maʼ Ġeħova dwarhom?

¹¹ Għal xiex nistgħu nitolbu? Nistgħu nitolbu għal kull ħaġa li hi aċċettabbli għal Ġeħova. Il-​Bibbja tgħid: “Kulma nitolbuh skond ir-​rieda tiegħu, hu jismagħna.” (1 Ġwanni 5:14) Nistgħu nitolbu dwar affarijiet persunali? Iva. It-​talb lil Ġeħova għandu jkun bħal meta nitkellmu maʼ ħabib tal-​qalb. Maʼ Ġeħova nistgħu niftħu qalbna. (Salm 62:8) Nistgħu nitolbuh biex jagħtina l-​ispirtu qaddis setgħan tiegħu biex jgħinna nagħmlu t-​tajjeb. (Luqa 11:13) Nistgħu wkoll nitolbu lil Ġeħova għall-​għerf biex nieħdu deċiżjonijiet tajbin, u nistgħu nitolbu għas-​saħħa biex inkampaw mad-​diffikultajiet. (Ġakbu 1:5) Għandna nistaqsu lil Ġeħova biex jaħfrilna dnubietna. (Efesin 1:3, 7) Għandna nitolbu wkoll għal oħrajn, inkluż il-​familja tagħna u ħutna fil-​kongregazzjoni.—Atti 12:5; Kolossin 4:12.

12. X’għandu jkun l-​iktar importanti fit-​talb tagħna?

¹² X’għandu jkun l-​iktar importanti fit-​talb tagħna? Ġeħova u r-​rieda tiegħu. Għandna nirringrazzjawh minn qalbna għal dak kollu li għamel għalina. (1 Kronaki 29:10-​13) Dan nafuh għax meta Ġesù kien fuq l-​art, hu għallem lid-​dixxipli tiegħu kif għandhom jitolbu. (Aqra Mattew 6:9-​13.) Hu qal li l-​ewwel għandhom jitolbu biex l-​isem t’Alla jitqaddes, jiġifieri, li jiġi trattat bħala li hu sagru jew qaddis. Imbagħad Ġesù wera li għandna nitolbu biex tiġi s-​Saltna t’Alla u biex ir-​rieda t’Alla sseħħ mad-​dinja kollha. Ġesù qal li huwa biss  wara li nitolbu għal dawn l-​affarijiet importanti ħafna li għandna nitolbu għall-​bżonnijiet persunali tagħna. Meta npoġġu lil Ġeħova u r-​rieda tiegħu l-​ewwel fit-​talb tagħna, inkunu qed nuru x’inhu l-​iktar importanti għalina.

13. Kemm għandu jkun twil it-​talb tagħna?

¹³ Kemm għandu jkun twil it-​talb tagħna? Il-​Bibbja ma tgħidx. It-​talb tagħna jistaʼ jkun twil jew qasir, skont  is-​sitwazzjoni. Pereżempju, forsi ngħidu talba qasira qabel ma nieklu imma talba itwal meta nkunu qed nirringrazzjaw lil Ġeħova jew niftħu qalbna miegħu. (1 Samwel 1:12, 15) Ma rridux nitolbu fit-​tul sempliċement biex nimpressjonaw lil oħrajn, kif kienu jagħmlu xi wħud fi żmien Ġesù. (Luqa 20:46, 47) Talb bħal dan ma jimpressjonax lil Ġeħova. L-​iktar ħaġa importanti għal Ġeħova hi li nitolbu minn qalbna.

14. Kemm għandna nitolbu spiss, u dan x’jgħallimna dwar Ġeħova?

¹⁴ Kemm għandna nitolbu spiss? Ġeħova jistidinna biex inkellmuh regolarment. Il-​Bibbja tgħid li għandna ‘nitolbu kontinwament,’ ‘nipperseveraw fit-​talb,’ u ‘nitolbu bla waqfien.’ (Mattew 26:41; Rumani 12:12;  1 Tessalonikin 5:17) Ġeħova dejjem hu lest li jagħtina widen. Nistgħu nirringrazzjawh kuljum għall-​imħabba u l-​ġenerożità tiegħu. Nistgħu nistaqsuh ukoll għall-​gwida, is-​saħħa, u l-​faraġ tiegħu. Jekk verament ngħożżu l-​privileġġ li nistgħu nitolbu lil Ġeħova, se nużaw kull opportunità biex inkellmuh.

15. Għala għandna ngħidu “ammen” fl-​aħħar tat-​talba?

¹⁵ Għala għandna ngħidu “ammen” fl-​aħħar tat-​talba? Il-​kelma “ammen” tfisser “żgur” jew “hekk ikun.” Huwa mod kif nuru li verament nemmnu dak li għedna fit-​talba, jiġifieri, li aħna sinċieri. (Salm 41:13) Il-​Bibbja tgħallimna li hu tajjeb ukoll li ngħidu “ammen,” jew f’qalbna jew b’leħen għoli, fl-​aħħar taʼ talba pubblika biex nuru li naqblu maʼ dak li ntqal.—1 Kronaki 16:36; 1 Korintin 14:16.

16. Ġeħova verament iwieġeb it-​talb tagħna? Spjega.

¹⁶ Ġeħova verament iwieġeb it-​talb tagħna? Iva. Il-​Bibbja tgħid li hu “Semmiegħ it-​talb.” (Salm 65:2) Ġeħova jismaʼ u jwieġeb it-​talb sinċier taʼ miljuni taʼ bnedmin, u dan jagħmlu b’ħafna modi differenti.

17. Ġeħova kif juża l-​anġli u l-​qaddejja tiegħu fuq l-​art biex iwieġeb it-​talb tagħna?

¹⁷ Ġeħova juża l-​anġli u l-​qaddejja tiegħu fuq l-​art biex iwieġeb it-​talb tagħna. (Ebrej 1:13, 14) Hemm bosta eżempji taʼ nies li talbu għall-​għajnuna biex jifhmu l-​Bibbja u ftit wara dan ħabbtilhom il-​bieb wieħed mix-​Xhieda taʼ Ġeħova. Il-​Bibbja turi li l-​anġli huma involuti f’li jxandru “aħbar tajba” mad-​dinja kollha. (Aqra Rivelazzjoni 14:6.) Ukoll, ħafna minna tlabna lil Ġeħova dwar xi problema jew bżonn speċifiku u mbagħad  irċivejna l-​għajnuna li kellna bżonn minn xi ħu jew oħt Kristjana.—Proverbji 12:25; Ġakbu 2:16.

18. Ġeħova kif juża l-​ispirtu qaddis tiegħu u l-​Bibbja biex iwieġeb it-​talb?

¹⁸ Ġeħova juża l-​ispirtu qaddis tiegħu biex iwieġeb it-​talb tagħna. Meta nitolbu għall-​għajnuna biex inkampaw maʼ xi problema, hu għandu mnejn juża l-​ispirtu qaddis tiegħu biex jiggwidana u jsaħħaħna. (2 Korintin 4:7) Ġeħova juża wkoll il-​Bibbja biex iwieġeb it-​talb tagħna u biex jgħinna nieħdu deċiżjonijiet għaqlin. Meta naqraw il-​Bibbja, nistgħu nsibu skritturi li se jgħinuna. Ġeħova jistaʼ wkoll iqanqal lil xi ħadd li jikkummenta f’xi laqgħa biex jgħid dak li għandna bżonn nisimgħu jew xi anzjan fil-​kongregazzjoni biex jaqsam xi ħsieb mill-​Bibbja magħna.—Galatin 6:1.

19. Għala jistaʼ jidher li Ġeħova ma wiġibx it-​talb tagħna?

¹⁹ Iżda kultant forsi nistaqsu, ‘Ġeħova għax għadu ma wiġibx it-​talb tiegħi?’ Ftakar, hu jaf meta u kif għandu jwieġeb it-​talb tagħna. Hu jaf x’għandna bżonn. Forsi jkollna nibqgħu nitolbu għal xi żmien biex nuru li verament nixtiequ dak li qed nitolbuh u biex nuruh li tassew għandna fidi fih. (Luqa 11:5-​10) Kultant Ġeħova jwieġeb it-​talb tagħna b’mod li ma nkunux qed nistennew. Pereżempju, għandna mnejn nitolbu dwar sitwazzjoni diffiċli, imma minflok ma jneħħilna l-​problema, forsi jagħtina s-​saħħa biex nissaportuha.—Aqra Filippin 4:13.

20. Għala għandna nitolbu lil Ġeħova spiss?

²⁰ Xi privileġġ meraviljuż għandna li nistgħu nitolbu lil Ġeħova! Nistgħu nkunu ċerti li hu se jismagħna. (Salm 145:18) U iktar ma nitolbu lil Ġeħova minn qalbna, iktar se nsaħħu l-​ħbiberija tagħna miegħu.